Chʼol 52
Li Komonil re Tenq’ank
Marzo re 1842
Eb’ laj Santil Paab’anel yookeb’ chixyiib’ankil li santil ochoch sa’ Nauvoo. Yoo chi q’aak li raq’eb’ li winq, ut li ixq ke’raj xtenq’ankileb’. Jun ixq kixye naq a’an tixyiib’ aq’ej choq’ reheb’ li winq, a’b’an maak’a’ xtumin re xloqb’al t’ikr.
Li xSarah Kimball kixye naq a’an tixk’e t’ikr re li ixq. Li Hermana Kimball kixpatz’ ajwi’ reheb’ xkomon chik li ixq naq te’tenq’anq. Eb’ li ixq ke’xb’aanu jun ch’utam sa’ rochoch li Hermana Kimball ut ke’xk’ulub’a xch’ooleb’ naq te’xtikib’ jun komonil choq’ reheb’ li ixq sa’ li Iglees.
Eb’ li ixq ke’xpatz’ re li xEliza R. Snow naq tixtz’iib’a junjunqeb’ li chaq’rab’ choq’ re li komonil. A’an kixk’ameb’ li chaq’rab’ chiru laj Jose Smith. A’an kixye naq chaab’ileb’ li chaq’rab’, a’ut wan ajwi’ xk’uub’anb’il na’leb’ li Dios chaab’il wi’chik choq’ reheb’ li ixq.
Laj Jose Smith kixpatz’ reheb’ li ixq naq te’chalq sa’ jun ch’utam. Kixye naq eb’ laj jolominel re li tijonelil te’xtenq’aheb’ li ixq rik’in xkomonil. Li xEmma Smith kisik’e’ ru choq’ aj jolominel reheb’ li ixq. Li Komonil re Tenq’ank ke’xye rib’.
Laj Jose Smith kixye reheb’ li ixq naq te’xtenq’aheb’ li ani yaj malaj neb’a’. Tento te’xk’e yalaq paay chi tenq’ li na’ajman. Li obiisp tixtenq’aheb’ li ixq re te’xnaw li k’a’ru te’xb’aanu.
Eb’ li ixq ke’xch’utub’ rib’ sa’ ch’utam re xtzolb’al li k’a’ru tento te’xnaw. Ke’saho’ sa’ xch’ool naq te’ruuq te’xtenq’aheb’ li komon sa’ li Iglees.
Eb’ li ixq ke’xyiib’ raq’eb’ li winq li yookeb’ chixyiib’ankil li santil ochoch. Ke’xyiib’ ajwi’ li k’a’aq re ru taa’oksimanq sa’ li santil ochoch.
Eb’ li ixq ke’xk’am tzakemq reheb’ li maak’a’ wan reheb’. Ke’rileb’ li yaj ut ke’xb’aanu naab’al chik li k’anjel re xtenq’ankileb’ laj Santil Paab’anel.
Chixjunileb’ li ixq sa’ li Iglees neke’oken sa’ li Komonil re Tenq’ank. Neke’xtenq’aheb’ kristiaan. Neke’tzolok chirix li evangelio. Neke’tzolok chirix li chaab’il hu, b’ich, ut li jar paay chi chaq’al ru k’anjel, jo’ li b’onok malaj li pak’ok. Neke’tzolok chirix chanru te’xkawresi xjunkab’al. (B’ar chalenaqeb’ wi’ li na’leb’ sa’ li ch’ol a’in: Resilal li Komonil re Tenq’ank, 1842–1966 [1967].)