Talateú

Taumuʻa ʻo e Kalasí ni

ʻOku fakataumuʻa e kalasi ko e Nofo-malí mo e Ngaahi Feohi Fakafāmilí ke tokoni ki he kāingalotu ʻo e Siasí ʻi hono fakamālohia e nofo-malí mo e ngaahi fāmilí pea nau maʻu ai ha fiefia ʻi he ngaahi feohi fakafāmilí. ʻOku vahevahe ia ki ha konga ʻe ua. Konga A, “Ko Hono Fakamālohia ʻo e Nofo-malí,” ʻa ia ʻoku fakatefito ʻene ʻaongá ki he ngaahi mātuʻa malí pea mo e kāingalotu ʻoku teuteu ke malí. Ko e konga E, “Ko e Ngaahi Fatongia ʻo e Mātuʻá ke Fakamālohia ʻa e Ngaahi Fāmilí,” ʻoku tokoni ia ki he ngaahi mātuʻá mo e ngaahi kuí ʻi heʻenau ngaahi feinga ke “[lehilehiʻi hake ʻa e fānaú] ʻi he ngaahi akonaki mo e [naʻinaʻi] ʻa e ʻEikí”(ʻEfesō 6:4).

ʻOku makatuʻunga e kalasí ni ʻi he ngaahi tokāteline mo e ngaahi tefitoʻi moʻoni ʻoku akoʻi ʻi he folofolá pea mo e kau palōfita mo e kau ʻaposetolo ʻi he ngaahi ʻaho kimui ní. ʻOkú ne fai ha fakamamafa makehe ki he “Ko e Fāmilí: Ko ha Fanongonongo ki Māmani,” ʻa ia ʻoku ʻi he peesi ix.

Ko ho Fatongia ʻi hoʻo hoko ko e Faiakó

ʻI hoʻo fakalaulauloto ki he mahuʻinga taʻengata ʻo e nofo-malí mo e fāmilí pea mo e fiemaʻu vivili ko ia ke fakamālohia e nofo-malí mo e ngaahi fāmilí, ʻe kamata leva ai ke mahino kiate koe ʻa e mahuʻinga lahi ko ia ʻo ho uiuiʻi ke akoʻi e kalasí ni. ʻE hanga ʻe hoʻo līʻoá mo hoʻo teuteu ʻi he faʻa lotú ʻo ʻomi ha ngaahi tāpuaki kiate koe mo ho fāmilí kae pehē foki kia kinautolu ʻoku kau he kalasí ni. ʻI hoʻo fai feinga ʻi he lakanga ʻa ia kuo uiuiʻi ko e ki aí, manatuʻi ʻa e ngaahi tefitoʻi moʻoni ko ia ʻoku hā ʻi he peesi ko ʻení pea mo e peesi x–xii).

Teuteu ke ke Faiako

ʻI hoʻo hoko ko ia ko e faiako ʻo e kalasí ni, ko ho fatongiá ia ke akoʻi ʻa e ngaahi tokāteline ʻo e ongoongoleleí ʻi he mālohi ʻo e Laumālie Māʻoniʻoní. ʻOku ʻikai fie maʻu ia ke ʻi ai haʻo taukei fakapalofesinale ʻi he faleʻi fakafāmilí, pe fie maʻu ke ke lava ʻo ʻiloʻi e tali ki he ngaahi faingataʻa kotoa pē ʻe ala hoko ʻi he ngaahi fāmilí. ʻOku totonu ke hanga ʻe he ngaahi fealēleaʻaki fakakalasí ʻo takiekina ʻa kinautolu ʻoku kaú ke nau fakalaulauloto mo lotua ʻenau moʻuí pea ke nau toe fakalakalaka ange ʻi honau ngaahi fāmilí.

Ke maʻu ha tokoni ʻi he ngaahi tefitoʻi moʻoni mahuʻinga ʻo hono akoʻi ʻo e ongoongoleleí, hangē ko e teuteu fakafoʻituituí, ʻofa ʻia kinautolu ʻokú ke akoʻí, pea mo faiako ʻaki e Laumālié, vakai ki he ngaahi maʻuʻanga tokoni ko ʻení:

Vahe 16 ʻo e Tohi Tuʻutuʻuni ʻo e Siasí, Tohi Fika 2: Kau Taki ʻo e Lakanga Fakataulaʻeikí mo e Ngaahi Houalotú (35209 900 pe 35903 900).
ʻOku ʻIkai ha Ui ʻe Mahuʻinga ange ʻi he Faiakó(36123 900).
Tohi Fakahinohino ʻa e Faiakó (34595).

Manatuʻi ange ʻa e Vakaiʻi Fakalūkufua ʻo e Lēsoní

Ki muʻa peá ke akoʻi ʻa e ʻuluaki lēsoní, fakaʻaongaʻi ha kiʻi taimi ke ke vakaiʻi kotoa ai e ngaahi lēsoní. ʻE tokoni ʻeni ke ke ʻiloʻi e founga ʻoku fengāueʻaki fakataha ai ʻa e ngaahi lēsoní ke fakamālohia e nofo-malí mo e ngaahi fāmilí.

ʻI hoʻo teuteu ko ia ki he lēsoni takitaha, ʻe ʻaonga ke ke vakaiʻi ʻa e tēpile fakahokohoko ʻo e tohí ʻi he peesi v–viii), ʻa ia ʻoku ʻoatu ai ha vakai fakalūkufua ki he kalasí ni. Vakaiʻi ʻa ia kuo ʻosi akoʻi mo ʻiló, peá ke fakalaulauloto ki he anga hono poupouʻi ʻe he ngaahi tokāteline mo e ngaahi tefitoʻi moʻoni ʻi he lēsoni takitaha ʻa e kalasi akó ni fakakātoa.

Kamata Ki muʻa ange Hoʻo Teuteu Lēsoní

ʻE toe lelei ange hoʻo teuteú ʻo kapau te ke kamata ia ki muʻa ʻi he foʻi lēsoni kotoa pē. Hili pē hoʻo akoʻi ha lēsoni, kamata vakaiʻi leva ʻa e lēsoni hokó. Kapau te ke ʻiloʻi ʻa e taumuʻa ʻoku ʻamanaki ke ke akoʻí, ʻe lava leva ai ke ke fakalaulauloto ki he lēsoní he lolotonga ʻo e uiké. ʻE tokoni ʻeni ke ke toe ʻiloʻi lelei ange ai ʻa e ngaahi tefitoʻi moʻoni ʻoku totonu ke tō ki ai hoʻo fakamamafá, ngaahi founga te ke lava ʻo fakaʻaongaʻí pea mo e ngaahi meʻa kuó ke aʻusia ʻe lava ke ke vahevahé.

Fili ʻa e Nāunau ʻi he Lēsoní Te ne Feau Lelei Taha e Ngaahi Fiemaʻu ʻa e Kau Akó

Ako fakalelei ʻa e ngaahi tokāteline mo e ngaahi tefitoʻi moʻoni ʻi he lēsoni takitaha, ʻo kolea ke maʻu e takiekina ʻa e Laumālié ke ne tokoniʻi koe ʻi hoʻo fili ʻa e nāunau he lēsoní te ne feau lelei taha e ngaahi fiemaʻu ʻa kinautolu ʻoku kaú. Manatuʻi ʻoku “fua tautau ha ola lelei ʻo ha lēsoní mei heʻene takiekina ko ia ʻa kinautolu ʻokú ke akoʻí” (ʻOku ʻikai ha Ui ʻe Mahuʻinga Ange ʻi he Faiakó, 121).

Fakapapauʻi e Founga ke Akoʻi ʻaki e Ngaahi Lēsoní

ʻOku ʻikai ngata pē ʻi hono fakapapauʻi e meʻa ke ke akoʻi ʻi ha foʻi lēsoni, ka ʻoku mahuʻinga foki ke ke fakapapauʻi e founga te ke akoʻi ai iá. ʻOku totonu ke ke faifeinga maʻu pē ke faiako ʻi ha founga ʻe fakalotolahia ai e kau akó ke nau fakaʻaongaʻi e ngaahi tokāteline mo e ngaahi tefitoʻi moʻoni ʻoku nau akó.

ʻOku totonu ke fai e ngaahi lēsoni ʻi he kalasí ʻi ha founga fealēleaʻaki kae ʻikai ko ha fakamatala pe akonaki ʻataʻatā pē. Tokoni ki he kau mēmipá ke mahuʻinga mālie ʻenau kau mai ki hono aleaʻi e ngaahi tokāteline mo e ngaahi tefitoʻi moʻoni ʻokú ke akoʻí. ʻOku maʻu e naʻinaʻi ʻa e ʻEikí ʻo fekauʻaki mo e fealēleʻaki fakakalasí ʻi he Tokāteline mo e Ngaahi Fuakava 88:122: “Mou fakanofo ʻiate kimoutolu ha faiako, pea ʻoua ʻe tuku ke lea kotoa fakataha; kae tuku ke lea toko taha pē ha taha, pea tuku ke fanongo kotoa pē ki heʻene ngaahi leá, koeʻuhi ka ʻosi lea kotoa pē, ke felangaʻaki hake kotoa, pea ke maʻu ʻa e faingamālie tatau ʻe he tangata kotoa pē.” Ki ha toe fakamatala fekauʻaki mo hono fakahoko ʻo ha ngaahi fealēleaʻakí, vakai ki he peesi 70–74 ʻo e ʻOku ʻIkai ha Ui ʻe Mahuʻinga ange ʻi he Faiakó.

ʻO ka feʻunga ke fakahoko, peá ke fakaʻaongaʻi ha ngaahi founga kehekehe ke tokoni ki hono ako mo fakamahino ki he kau akó ʻa e ngaahi tefitoʻi moʻoni ʻi he ngaahi lēsoní. Hangē ko ʻení, kumi ha ngaahi faingamālie ke ke tohi ai he palakipoé, fakaʻaongaʻi ha ngaahi meʻa ke ne fakamahinoʻi hoʻo taumuʻá pea mo fakaʻaliʻali ai ha ngaahi fakatātā. Ke maʻu ha tokoni ki he anga hono fakaʻaongaʻi ʻení pea mo ha ngaahi founga kehé, vakai ki he peesi 195–226 ʻo e ʻOku ʻIkai ha Ui ʻe Mahuʻinga ange ʻi he Faiakó.

Fakaafe’i e Kau Akó ke nau Fakaʻaongaʻi e Meʻa ʻOku Nau Akó

ʻI hoʻo hoko ko ia ko ha faiako ʻo e ongoongoleleí, kuo pau ke ʻoua naʻá ke fiemālie pē ʻi hono vahevahe ʻo ha ngaahi fakamatalá, neongo kapau ʻokú ke fai ia ʻi he founga totonu mo fakalotolahi. Ko hoʻo taumuʻá ke tokoniʻi e niʻihi kehé ke nau moʻui ʻo fakatatau mo e ngaahi tokāteline pea mo e ngaahi tefitoʻi moʻoni ʻoku nau akó. Naʻe naʻinaʻi mai ʻa Palesiteni Hāloti B. Lī ko e Palesiteni hono 11 ʻo e Siasí ʻo pehē:

“Ko e ngaahi tefitoʻi moʻoni mo e ngaahi ouau ʻo e ongoongoleleí ko ha ngaahi fakaafe pē kinautolu ki hono ako ʻo e ongoongoleleí ʻaki hano fakahoko ʻo hono ngaahi akonakí. ʻOku ʻikai ʻilo ha taha ia ki he tefitoʻi moʻoni ʻo e vahehongofulú kae ʻoua kuó ne totongi vahehongofulu. ʻOku ʻikai ʻilo ha taha ia ki he tefitoʻi moʻoni ʻo e Lea ʻo e Potó kae ʻoua kuó ne tauhi e Lea ʻo e Potó. ʻOku ʻikai fakaului ʻa e fānaú ia pe ko e kakai lalahí ki he vahehongofulú, Lea ʻo e Potó, tauhi e ʻaho Sāpaté ke māʻoniʻoní pe ko e lotú, ʻi heʻenau fanongo pē ki ha talanoa ʻa ha taha ʻo fekauʻaki mo e ngaahi tefitoʻi moʻoni ko ʻení. ʻOku tau ako ʻa e ongoongoleleí ʻi heʻetau moʻui ʻaki iá….

“… ʻOku ʻikai ke tau teitei ʻiloʻi moʻoni ha faʻahinga meʻa ki hono akoʻi ʻo e ongoongoleleí kae ʻoua kuo tau aʻusia e ngaahi tāpuaki ʻoku maʻu mei hono moʻuiʻaki e foʻi tefitoʻi moʻoni takitaha” (Stand Ye in Holy Places [1974], 215).

ʻOku faʻa hā he ngaahi makasini ʻo e Siasí ha ngaahi talanoa fakalaumālie ʻoku fakatātaaʻi mai ai e anga hono tāpuekina ha kāingalotu ʻi heʻenau moʻuiʻaki ʻa e ongoongoleleí. Te ke lava ʻo maʻu e ngaahi talanoa ʻoku akoʻi mai ai ha ngaahi tokāteline mo ha ngaahi tefitoʻi moʻoni pau ʻi haʻo fekumi he ngaahi fakahokohoko fakamotuʻalea ʻo e ngaahi makasiní. Fakakaukau ke ke vahevahe ha niʻihi ʻo e ngaahi talanoa ko ʻení ʻi he kalasí.

ʻI he fakaʻosinga ʻo e lēsoni takitaha, hanga ʻo fakaafeʻi ʻa e kau akó ke nau fakaʻaongaʻi e ngaahi meʻa kuo nau akó. Fakapapauʻi ʻokú ke tuku ha taimi feʻunga ke ke fakahoko ha fakaafe ʻa ia ʻe ueʻi fakalaumālie ai e kau akó ke nau fakahoko ia. Palani ha ngaahi founga ʻe lava ke fakahoko ai e faʻahinga fakaafe peheé. Hangē ko ʻení, hili hoʻo fai e lēsoni 9 “Ko e Fānaú ko e Tofiʻa mei [he ʻEikí],” te ke lava ke mou toe fakamanatu ai e ngaahi tefitoʻi moʻoni ʻo e lēsoní peá ke fakaafeʻi leva e kau akó ke nau tukupā ke fakamoleki ha kiʻi taimi fakafoʻituitui mo e tokotaha kotoa pē ʻo ʻenau fānaú.

Poupouʻi e Kau Akó ke Nau Fakaʻaongaʻi e Tohi Fakahinohino Ako ki he Kalasí ni.

ʻOku totonu ke ke toe vakaiʻi e ngaahi nāunau ʻoku fekauʻaki mo e lēsoní ʻoku ʻi he Tohi Fakahinohino Ako ʻa e Kau Akó ki he Ngaahi Fetuʻutaki ʻi he Nofo-malí mo e Fāmilí (36357 900) pea ke hoko ia ko ha konga ʻo hoʻo teuteu ki he lēsoni takitaha. Palani ha ngaahi founga ke fakaʻaiʻai ʻaki e kau akó ke nau (1) muimui ki ha taha ʻo e ngaahi fokotuʻu ʻi he “Fakahoko ʻo e Ngaahi Tokāteline mo e Ngaahi Tefitoʻi Moʻoni Naʻá ke Akó” pea nau (2) lau e ngaahi fakamatala ʻoku ʻoatu mo e lēsoni takitaha. Fakamamafaʻi ange ʻe lava ke maʻu ʻe he ongo mātuʻa malí ha lelei lahi mei haʻanau lau mo aleaʻi fakataha ʻa e ngaahi fakamatala ʻi he tohi fakahinohino akó.

ʻOku totonu ke omi e kau akó ki he kalasi takitaha mo ʻenau tohi fakahinohino akó.

Tokanga ki he Ngaahi Fiema’u ‘a Kinautolu ‘Oku ‘Ikai Ke Nau ‘i he Tuʻunga fakafāmili ʻa ia ʻOku Tau Anga Maheni Ki Aí.

Tokanga ʻaupito ki he ngaahi tu’unga fakataautaha ʻo kinautolu ʻo e kalasi, ko e niʻihi ‘oku ‘ikai ke mali, uitou, vete mali, pe ‘i ha ngaahi tu’unga faingata’a fakafāmili kehe pē. Manatuʻi ‘a e fakamatala ko ʻeni ‘a Palesiteni Sipenisā W. Kimipolo ko e Palesiteni hono Hongofulu Mā Ua ‘o e Siasí:

“ ʻOku tau … hokohoko atu ʻi hono fakaʻaliʻali ʻo e fāmili Siasí. Ko e moʻoni ʻoku ʻi ai ha niʻihi ʻoku ʻikai ke nau maʻu e faingamālie ke moʻui ʻi ha ngaahi fāmili pehē ka ʻoku ʻikai foki ko ha ʻuhinga ia ʻoku feʻunga ke taʻofi ai e talanoa fekauʻaki mo iá. Neongo ia, ʻoku tau talanoaʻi e moʻui fakafāmilí mo e tokanga ʻaupito, koeʻuhi ko ʻetau ʻiloʻi ʻoku ʻi ai siʻa niʻihi … he lolotongá ni ʻoku ʻikai ke nau siʻi maʻu e faingamālie ke kau pe tokoni ki ha fāmili pehē. Ka heʻikai ke tau lava ke tukunoaʻi e tuʻunga koʻení, koeʻuhí he ʻoku fakafalala ai ha ngaahi meʻa lahi” (The Teachings of Spencer W. Kimball, ed. Edward L. Kimball [1982], 294–95).

Ko e fehangahangai mo ha ngaahi palopalema lalahi fakafāmilí

Lolotonga hono fakaʻaiʻai ʻo e fealēleaʻakí, fakapapauʻi ʻoku mahino ki he kau akó ʻoku ʻikai totonu ke talaki fakahāhā ha fakaikiiki ʻo ha ngaahi palopalema lalahi fakafāmili. Kapau ʻoku fiemaʻu ʻe he kau akó ha faleʻi fekauʻaki mo ha ngaahi palopalema lalahi, peá ke poupouʻi lelei kinautolu ke nau talanoa fakatāutaha mo e pīsopé. Te ne lava ke faleʻi kinautolu. Te ne toe lava foki ke fokotuʻu atu ha kau faleʻi ʻi he vaʻa ngāue faleʻi fakafāmili ʻa e Siasí pe ko ha maʻu- ʻanga tokoni fakakolo ‘oku fenāpasi ʻene founga tokoní mo e ngaahi tuʻunga makehe ʻo e Siasí.

Ngaahi Nāunau ʻOku Totonu Ke ke Ngāueʻakí

Kuo ʻomi ʻe he Siasí ha ngaahi nāunau feʻunga ke tokoniʻi ʻaki koe ke ke akoʻi ʻaki e ngaahi tokāteline mo e ngaahi tefitoʻi moʻoni fekauʻaki mo e malí mo e fāmilí. Kātaki ʻo fakamamaʻo mei hono ngāueʻaki ʻo e ngaahi nāunau ʻoku ngāueʻaki fakakomēsialé ʻi hoʻo teuteu ko ia ki hoʻo faiakó. Ko hoʻo ngaahi nāunau tefito ki hoʻo akoʻi ʻo e kalasí ko e ngaahi folofolá, tohi lēsoni koʻení, pea mo e Tohi Fakahinohino ʻa e Kau Akó ki he Ngaahi Fetuʻutaki ʻi he Nofo-malí mo e Fāmilí. Kuo lahi ha ngaahi lotu mo e fakakaukau fakamātoato kuo fai ki hono teuteuʻi ʻo e ngaahi naunau ki he foʻi lēsoni koʻení.

Ngaahi Maʻuʻanga Tokoni Kehé

ʻOku ʻoatu ʻi he ngaahi nāunau maʻuʻanga tokoni koʻeni naʻe faʻu ʻe he Siasí ha ngaahi fakamatala toe lahi ange ʻi he ngaahi taumuʻa ʻoku aleaʻi ʻi he lēsoni koʻení. Ko e ngaahi maʻuʻanga tokoni koʻení ʻoku tufaki atu ia ʻi he ngaahi Senitā Tufakiʻanga Nāunau ʻo e Siasí. Mahalo ʻoku fiemaʻu ke ke fakaʻaiʻai e kau akó ke nau ngūaeʻaki e ngaahi tohi ko ʻení ʻi honau ngaahi fāmilí (ʻoku hiki kinautolu ʻi he peesi vi ʻo e Tohi Fakahinohino Ako ʻa e Kau Akó ki he Ngaahi Fetuʻutaki ʻi he Nofo-malí mo e Fāmilí).

Tohi Fakahinohino Maʻá e Fāmilí (31180 900). ʻOku fakamatalaʻi ʻe he tohi fakahinohino ko ʻení ʻa e fokotuʻutuʻu ʻo e fāmilí, ʻomi ʻa e ngaahi fakamatala fekauʻaki mo hono akoʻi ʻo e ongoongoleleí ʻi ʻapí, pea mo e ngaahi founga ki hono fakahoko ʻo e ngaahi tāpuaki mo e ngaahi ouau ʻo e lakanga fakataulaʻeikí.
Ngaahi Fakamatala fekauʻaki mo e malí pea mo e fāmilí ʻi he ngaahi makasini ʻa e Siasí.
Tohi Maʻuʻanga Tokoni ki he Efiafi Fakafāmili ʻi ʻApí (31106 900). ʻOku tokoni ʻa e tohi ko ʻení ki he mātuʻá mo e fānaú ki hono teuteu ʻo e ngaahi lesoni ki he efiafi fakafāmilí (peesi 3–197). ʻOku fonu ia ʻi he ngaahi fakakaukau ke ne fakatupulaki ʻa e efiafi fakafāmilí (peesi 200–210) pea ʻoku ʻi ai mo ha ngaahi fokotuʻu ki hono akoʻi ki he fānaú ha ngaahi tefitoʻi moʻoni pau (peesi 234–314). ʻOku toe maʻu ai foki mo e ngaahi fakakaukau ki he ngaahi ʻekitivitī fakafāmilí (peesi 364–409).
ʻOku ʻIkai ha Ui ʻe Mahuʻinga Ange ʻi he Faiakó (36123 900). ʻOku ʻi he maʻuʻanga tokoni koʻení e ngaahi tefitoʻi moʻoni mo e ngaahi fokotuʻu fakakaukau kuo ʻosi fakamoʻoniʻi ke tokoni ki he kāingalotu ʻo e Siasí ke nau fakalakalaka ʻi heʻenau hoko ko e faiako ʻo e ongoongoleleí. Konga H “Akoʻí ʻi he ʻApí” (peesi 153–181), ʻoku mahuʻinga ʻaupito ia ki he mātuʻá.
Tohi Fakahinohino Maʻá e Faiakó (34595 900). ʻOku ʻomi ʻe he tohi fakahinohino koʻení e ngaahi fokotuʻutuʻu ki he fakalakalaka ʻo hono akoʻi mo e ako ʻo e ongoongoleleí.
Ki Hono Fakamālohia ʻo e Toʻu Tupú. (34285 900). ʻOku fokotuʻutuʻu mai ʻe he kiʻi tohi tufa ko ʻení ʻa e ngaahi akonaki ʻa e Siasí ki he fakakaumeʻá, valá mo e fōtungá, fakakaungāmeʻá, faitotonú, lea, heleʻuhilá, televīsoné, letioó, kāsetevitioó, nusipepá, ngaahi tohí mo e ngaahi makasiní, moʻui lelei fakaʻatamai mo fakasinó, mūsiká mo e hulohulá, haohaoa fakasekisualé, ʻulungāanga ʻi he ʻaho Sāpaté, tokoni fakalaumālié, fakatomalá, mo e feʻunga mo taau mo e ngāué.
Ko ha Fakahinohino Maʻá e Mātuʻá (31125 900). ʻOku ʻomi ʻi he kiʻi tohi ko ʻení ha ngaahi fokotuʻu ke tokoniʻi e mātuʻá ke akoʻi ʻenau fānaú fekauʻaki mo e fetuʻutaki fakaesino ʻa e tangatá mo e fefiné.
Guidebood for Parents and Guardians of Handicapped Children (31123). ʻOku ʻomi ʻe he tohi fakahinohino ko ʻení ha faleʻi maʻá e ngaahi fāmili ʻoku ʻi ai ʻenau fānau ʻoku faingataʻaʻiá. ʻOku toe ʻi ai foki ha fakahinohino fekauʻaki mo e ngaahi nāunau ʻa e Siasí ki hono tokoniʻi ʻo e ngaahi mātuʻá mo ha niʻihi kehe ki hono akoʻi ʻo kinautolu ʻoku faingataʻaʻiá.
Ngaahi Makatuliki ʻo ha ʻApi Fiefia (33108 900). ʻOku maʻu ʻi he kiʻi tohi tufa ko ʻení ha lea naʻe fai Palesiteni Kōtoni B. Hingikeli lolotonga ʻene hoko ko ha Tokoni Ua ʻi he kau Palesitenisī ʻUluakí.
Being a Righteous Husband and Father (35402). ʻOku hā ʻi he kiʻi tohi tufa ko ʻení ha lea naʻe fai ʻe Palesiteni Hauati W. Hanitā, ko e Palesiteni hono hongofulu mā fā ʻo e Siasí.
One for the Money: Guide to Family Finance (33293). ʻOku ʻomi ʻi he kiʻi tohi tufa ko ʻení ha ngaahi fokotuʻu fakakaukau fakapotopoto meia ʻEletā Māvini J. ʻEsitoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo fekauʻaki mo hono puleʻi ʻo e meʻa fakapaʻanga ʻa e fāmilí.