Akoʻi ʻo e Ngaahi Tefitoʻi Moʻoni ʻo e Ongoongoleleí ki he Fānaú

Vahevahe ange ʻa e meʻa ko ʻeni naʻe hoko ʻi hono fakamatalaʻi ʻe ʻEletā Lōleni C. Tani ʻo e Kau Fitungofulú:

“ ʻI heʻeku tupu hake mo hoku tokouá ʻi ha kiʻi kolo siʻi, naʻe ʻilo ʻe heʻeku tamaí ʻa e fiemaʻu ke ma ako ki he tefitoʻi moʻoni ʻo e faʻa ngāué. Ko ia ai naʻá ne fekau ke ma ngāue ʻi ha kiʻi faama siʻisiʻi pē ʻi he ngataʻanga ʻo e koló, ʻa ia naʻá ne tupu hake ai. Naʻá ne fakalele ʻa e nusipepa ʻa e koló, naʻe ʻikai ha fuʻu taimi lahi ne nofo ai mo kimaua, tukukehe pē ʻa e taimi pongipongí mo e efiafí. Ko e fatongia faingataʻa moʻoni ia ki ha ongo kiʻi talavou ʻokú na kei taʻu hongofulu tupu siʻi pē pea naʻe ʻi ai ʻa e taimi ʻe niʻihi naʻe lahi ai ha ngaahi fehālaaki naʻá ma faʻa fai.

“Ne ofi mai pē ki homau kiʻi fāmá ha ngaahi faama kehe pea naʻe ʻalu ai ha taha ʻo e kau tangata faama ko iá ki heʻeku tamaí ʻi ha ʻaho ʻe taha ke ne fakahā ange kiate ia ʻa e ngaahi meʻa naʻá ma fai naʻe halá. Naʻe fakafanongo lelei pē ʻa ʻeku tamaí kiate ia pea hili pē iá naʻá ne toki pehē ange, “ ʻE Simi, ʻoku ʻikai ke mahino kiate koe ʻa e meʻa ʻoku ou faí. ʻOku ʻikai ko e fanga pulú ʻoku ou lehilehiʻi haké ka ko ʻeku fānaú.” Hili ha mālōlō ʻa ʻeku tamaí naʻe toki fakahā mai ʻe Simi kiate au ʻa e meʻa ko ʻení. Naʻe fuʻu hounga ʻaupito kiate au ʻa ʻeku maʻu ha tamai naʻá ne fakakaukau ke ne hanga ʻo lehilehiʻi hake ha ongo foha kae ʻikai ko ha fanga pulu. Neongo pē ʻa e ngaahi hala naʻá ma faí ka naʻá ma ʻilo ai ʻa e founga ke ma ngāueʻi ʻa e kiʻi faama siʻisiʻi ko iá, pea ʻoku ou tui neongo pē naʻe ʻikai ke lahi ʻa ʻene fakahā mai kia kimaua ʻaki ʻene ngaahi leá, ka naʻá ma ʻilo maʻu pē ʻokú ma mahuʻinga ange ki heʻema tamaí mo ʻema faʻeé ʻi he fanga pulú, pe ʻi ha faʻahinga meʻa pē” (Tūhulu ʻEpeleli 1975, 28).

• Ko e hā ʻa e meʻa ʻoku ongo kia koe mei he talanoá ni?

Fakamamafaʻi ange naʻe ʻilo pē ʻe ʻEletā Tani ia mo hono tokouá ʻa e ʻofaʻi kinaua ʻe heʻena ongo mātuʻá. Ko e founga ʻe taha ʻoku fakahā ai ʻe he ongo mātuʻá ʻena ʻofá ko hono tuku ha taimi ke akoʻi ai ʻena fānaú ke fakaʻaongaʻi ʻa e ngaahi tefitoʻi moʻoni ʻo e ongoongoleleí. ʻOku lave ʻa e lēsoní ni ki he founga hono akoʻi ki he fānaú ʻa e ngaahi tefitoʻi moʻoni ʻe 5 ʻo e moʻuiʻaki ʻa e ongoongoleleí: ʻA e manavaʻofá mo e ngāue-tokoní, faitotonú, fakaʻapaʻapaʻi ʻo e koloa ʻa e niʻihi kehé, fiefia ʻi he ngāue faitotonú pea moʻui anga-maʻá.

Fakamatalaʻi ange naʻe akoʻi mai ʻe he Fakamoʻui ʻa e mahuʻinga ʻe ʻofá mo e tokoni ki he niʻihi kehé, ʻi he kotoa ʻo e taimi naʻá ne ngāue ai ʻi he māmaní. Naʻá ne akoʻi ʻa e tefitoʻi moʻoni ko ʻení ʻi Heʻene leá mo ʻEne faʻifaʻitakiʻangá.

• Ko e hā ha ngaahi lelei ʻe maʻu ʻe he fānau kuo ako mei heʻenau mātuʻá ke ʻofa mo tokoni ki he niʻihi kehé? (Tānaki atu ki he ngaahi tali ʻa e kau akó haʻo fai ange ʻa e ngaahi sīpinga ko ʻení).

  Naʻe pehē ʻe Palesiteni Poiti K. Peeka ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá:

  “Ne u nofo ʻo vakai ki ha fefine ʻe taha ʻi he ngaahi taʻu lahi kuo hilí ʻi heʻene ngāue ʻo laka ia ʻi ha ui ke faiako pe taki ʻi he Siasí. ʻOkú ne mamata pē ki ha fiemaʻu peá ne ngāue leva ki ai; ʻo ʻikai ko ha “Telefoni mai kapau te ke fie maʻu ha tokoni,” ka ko e “Ko au ʻeni; ko e hā ha meʻa te u lava ʻo tokoni atu aí?” ʻOkú ne fai ʻa e fanga kiʻi meʻa iiki lahi, hangē ko ʻene toʻotama ki ha kiʻi tama ʻa ha taha lolotonga ha fakataha pe ʻave ha tamasiʻi ʻa hono kaungāʻapí ki he akó ʻi haʻane tōmui ʻi heʻene pasí. ʻOkú ne fakasio maʻu pē ha ngaahi fofonga foʻou ʻi he lotu peá ne ʻalu atu ʻo talitali fiefia kinautolu… .

  “Naʻá ne ako ʻa e laumālie ʻo e ngāue ko iá mei heʻene faʻeé. Ko e lelei tahá ke akoʻi ʻa e laumālie ʻo e ngāué ʻi ʻapi. Kuo pau ke tau akoʻi ʻetau fānaú ʻi he faʻifaʻitakiʻanga pea fakahā kiate kinautolu ʻoku ʻaonga ʻa e laumālie taʻesiokitá ki he fiefiá” (ʻi he Conference Report, ʻOkatopa 1997, 5; Tūhulu Sānuali 1998, 6)

  Ne faingataʻaʻia ha kiʻi tamasiʻi ʻi he fāmili ʻe taha. Naʻe tokoni ʻa ʻene ongo mātuʻá ki ai ʻaki ʻena fakalotolahiʻi ia ke ne fakahoko ha kiʻi ngāue-ʻofa fakapulipuli ki ha taha pē ʻi he fāmilí ʻi he ʻaho taki taha. ʻI he ʻosi ko ia ʻa e uiké ne ʻikai ke fuʻu tokanga ia ki heʻene ngaahi palopalemá ka naʻá ne kamata ke fiefia ʻi he ngaahi tāpuaki mo e nonga ʻoku maʻu mei he ʻofa ki he niʻihi kehé.

• Ko e hā meʻa ʻe lava ke tau ako ʻi ʻapi ʻo fekauʻaki mo e ngāue tokoní ʻa ia heʻikai toe ako ia ʻi ha feituʻu kehé?

• Ko e hā ha ngaahi fokotuʻu ʻe lava ke ke ʻomai ke tokoni ki he mātuʻá ʻi heʻenau akoʻi ʻa e fānaú ke nau ngāue tokoni ki ha niʻihi kehé?

  Fakakaukau ke ke hiki ʻa e ngaahi tali ʻa e kau akó ʻi he palakipoé. Fakalotolahiʻi kinautolu ke nau vahevahe ha ngaahi meʻa mei heʻenau moʻuí. Kole ange ke nau fevahevaheʻaki ha ngaahi fakakaukau fekauʻaki mo ha ngaahi ngāue tokoni ke fai fakafāmilí. ʻI hoʻo tataki ko ia ʻa e fealēleaʻaki ʻoku faí, hanga ʻo fakaʻaliʻali ange ʻa e ngaahi meʻa ko ʻení:

  1. ʻE lava ʻe he ngaahi mātuʻá ʻo tā ha sīpinga ʻi heʻenau tokoni ki he ʻi niʻihi honau fāmilí, fua honau ngaahi fatongia ʻi he Siasí, pea ala atu ʻo tokoniʻi ʻa e niʻihi kehé.

  2. ʻE lava ke nau fekumi ki ha ngaahi faingamālie ke tokoni ai ʻenau fānaú ki ha mēmipa ʻo e fāmilí pea mo e niʻihi kehé. ʻE lava ke ongoʻi ʻe he fānau īkí ʻa e fiefia ʻi he ngāué.

Vahevahe ange ʻa e akonaki ko ʻeni naʻe fai ʻe Palesiteni N. ʻEletoni Tena ʻa ia naʻe hoko ko ha Tokoni ʻUluaki ʻi he Kau Palesitenisī ʻUluakí:

“Ko e ako ki he faitotonú ʻoku kamata pe ia ʻi ʻapi. Ko kitautolu fakatāutaha ko ʻení ʻoku ʻi ai ʻetau ngaahi koloa ʻa ia ʻoku ʻatautolu ia taʻe kau ai ha taha. ʻOku totonu ke tau vahevahe atu ʻetau ngaahi meʻa-vaʻingá mo ʻetau ngaahi tokoní ki ha niʻihi kehe; ka ʻoku ʻi ai haʻatau paʻanga pe siueli pe vala ʻa ia ko ʻetau koloa ia ʻa kitautolu pea ʻoku ʻikai totonu ke ʻave ia taʻeloto ki ai ʻa e tokotaha ʻoku ʻaʻaná. Ko e kiʻi tamasiʻi ʻokú ne faitotonu ʻi ʻapí ʻe ʻikai lava ke ne maumauʻi ʻe ia ʻa e laó ʻi ha toe feituʻu kehe. Ka ʻi he tafaʻaki ʻe tahá, ko e siʻi hono akoʻi ʻo e fānaú ke peheé, ʻe hoko ai pē ʻenau taʻefakaʻapaʻapa ki he ngaahi totonu pea mo e koloa ʻa e niʻihi kehé” (ʻi he Conference Report, ʻEpeleli 1978, 64; pe Tūhulu ʻOkatopa 1978, 75–76).

• Ko e hā ʻe ala hoko ʻi he taimi ʻoku ʻikai akoʻi ai ʻa e fānaú ke nau fakaʻapaʻapaʻi ʻa e koloa ʻa e niʻihi kehé?

• ʻE anga fēfē ha ako ʻa e fānaú ʻi ʻapi ke nau faitotonu mo fakaʻapaʻapaʻi ʻa e koloa ʻa e niʻihi kehé? Ko e fē taimi ʻoku totonu ke kamata akoʻi ai ʻe he mātuʻá ʻa e ngaahi tefitoʻi moʻoni ko ʻení ki heʻenau fānaú?

Fakamatalaʻi ange kuo toutou naʻinaʻi mai ʻa e kau taki ʻo e Siasí ki he mātuʻá fekauʻaki mo hono mahuʻinga ke akoʻi ʻo e fānaú ke ngāué. Neongo hono faingataʻa he taimi ʻe niʻihi ke akoʻi ʻa e fānaú ka ʻoku totonu ke vilitaki ʻa e mātuʻá ʻi he meʻá ni. Naʻe pehē ʻe ʻEletā L. Tomu Peuli ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko hono akoʻi ko ia ʻo e fānaú ke fiefia ʻi he ngāue faitotonú, ko e meʻaʻofa mahuʻinga taha ia ʻe lava ke ke ʻoange kia kinautolú” (Tūhulu Sānuali 1987, 70).

• Ko e hā ha ngaahi tuʻunga mahuʻinga ʻo hono akoʻi ʻo e fānaú ki he ngaahi tefitoʻi moʻoni ʻo e ngāué mo e faʻa ngāué ʻi heʻenau kei siʻí? ʻE tokoniʻi fēfē ʻe he mātuʻá ʻenau fānaú ke nau ako ke ngāué? (Lolotonga ʻenau feinga ke tali ʻení fakalotolahiʻi kinautolu ke nau fevahevaheʻaki ha ngaahi meʻa kuo nau aʻusia. Kamataʻaki hoʻomou fevahevaheʻakí haʻamou talanoa ki he ngaahi meʻa ko ʻení.)

  1. Tā ha sīpinga lelei maʻá e fānaú ʻaki haʻo tokoni fiefia ki hono fai ʻo e ngaahi ngāue ʻi ʻapí.

  2. ʻOange ki he fānaú ha ngāue ʻe hoa mo e meʻa ʻoku nau lavá.

  3. ʻAi ha taimi ke akoʻi ai ʻa e fānaú ke nau lavaʻi honau ngaahi fatongiá.

  4. Fakahā hoʻo houngaʻia ʻi he tokoni ʻa e fānaú.

Lau ha taha pe fakatouʻosi e ongo lea ko ʻení :

Naʻe akonaki ʻa Palesiteni Kōtoni B. Hingikelí ko e Palesiteni hono hongofulu mā nima ʻo e Siasí ʻo pehē, “ ʻOku totonu ke ngāue fakataha ʻa e fānaú mo e mātuʻá … .ʻi hono fufulu ʻo e ʻū peletí, olo ʻo e falikí, kosi ʻo e musié, ʻauhani ʻo e ʻulu ʻakaú, valí mo monomonó, fakamāʻopoʻopó pea mo ha ngaahi meʻa ʻe laui ngeau kehe ʻa ia te nau lava ai ke ako ko e ngāué ko e totongi ia ʻo e maʻá, fakalakalaká pea mo e koloaʻia” (Tūhulu Sune 1996, 8).

Naʻe akoʻi ʻe ʻEletā Sēmisi E. Fausi ʻi heʻene kei ʻi he Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “Ko e konga mahuʻinga ʻo e fatongia ki hono akoʻi ʻo e fānaú ke nau talangofua mo mapuleʻi kinautolú, ko hono akoʻi kinautolu ke nau poto ʻi he ngāué…. Ko e mātuʻá pē ʻa e kau faiako lelei taha te nau akoʻi ʻa e tefitoʻi moʻoni ʻo e ngāué. Naʻe fakafiefia kiate au ʻa e ngāué ʻi heʻeku ʻuluaki ngāue fakataha mo ʻeku tamaí mo ʻeku kui tangatá, fanga faʻē tangatá mo hoku fanga tokouá. ʻOku ou tui naʻe lahi ange ʻeku hoko ʻaʻaku ko e fakahelá ʻi he tokoni naʻá ku faí, ka ko e meʻa fakafiefia moʻoni ʻa ʻeku manatu ki aí. Pea ko e ngaahi lēsoni mahuʻinga ʻaupito naʻá ku ako mei aí. ʻOku fie maʻu ke ako ʻe he fānaú ʻa e fatongiá mo e moʻui fakafalala pē kia kinautolú. ʻOku fakamoleki nai ʻe he mātuʻá ha taimi ke nau fakahā ai mo fakaʻaliʻali mo fakamatalaʻi ange ia koeʻuhí ke lava ai ʻe he fānaú ʻo fai ʻa e ngaahi meʻa naʻe akoʻi ʻe Līhaí, “ke ngāue maʻanautolu [pē] kae ʻikai ke fai kiate kinautolu ha meʻa?’ [2 Nīfai 2:26]” (ʻi he Conference Report, Oct. 1990, 42; pe Ensign Nov. 1990, 34; vakai foki ki he peesi 60 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí).

• Ko e hā ʻoku mahuʻinga ai ke ngāue ʻa e fānaú ʻi he tafaʻaki ʻo ʻenau mātuʻá mo e ngaahi mēmipa kehe ʻo e fāmilí? ʻOku tokoniʻi fēfē ʻa e fetuʻutaki fakafāmilí ʻi he taimi ʻoku nau ngāue fakataha aí?

• Ko e hā ha ngaahi fakapale ʻo e ngāue faitotonú? ( ʻE lava ke kau ai ʻa e ngaahi tali ko ʻení.)

  1. Fiemālie pea fiefia ʻi he ngāue kuo fai leleiʻí.

  2. Ongoʻi kuo lavameʻa.

  3. Ko e poto ʻi he ngaahi taukei fakangāue ʻoku ʻaongá.

  4. Ongoʻi mahuʻingaʻia ʻiate kita.

  5. Ko e ngaahi pale ʻo e koloa fakamāmaní, hangē ko e ngaahi fakalāngilangi ʻi he poto fakaʻatamaí mo e ngaahi lelei fakapaʻangá.

• ʻE lava ke hoko fēfē ʻa e ngāué ko ha tāpuaki fakalaumālie mo fakatuʻasino?

• Ko e hā ʻe lava ke fai ʻe he mātuʻá ke tokoniʻi ʻenau fānaú ke tānaki pea ngāue fakapotopoto ʻaki e paʻangá? ʻE lava fēfē ke tokoniʻi ʻe he mātuʻa ʻa ʻenau fānaú ke potupotu tatau ʻenau ngāue paʻangá mo e ngaahi meʻa kehé ʻo hangē ko e ngāue faka-Siasí, faka-akó pea mo e ngāue ʻi ʻapí?

• Ko e hā ha fakatuʻutāmaki ʻo e tukunoaʻi ʻe he mātuʻá ʻa e fānaú ʻi he taimi ʻoku nau kalo holo ai mei he ngāué?

  Naʻe akonaki ʻa ʻEletā Niila A. Mekisuele ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

  “Ko e ongoongolelei ko ia ʻo e ngāué ko e konga pē ia ʻo e ‘kakato ʻo e ongoongoleleí.’ Neongo ʻoku fakafiefia ka ko e ngāue fakafaifekaú, ko ha ngāue ia. Neongo ʻoku fakafiefia ʻa e ngāue fakatemipalé, ka ko ha ngāue ia. Ko ia ʻoku ʻi ai ha niʻihi tokosiʻi ʻo ʻetau fānau tupú ʻoku nau ngāue ka ʻoku ʻikai ko honau lotó ia, pea ko e lahi tahá ʻenau feinga pē ke nau faʻifaʻitelihá… .

  “Mou tokangaʻi hoʻomou holi vavale ke lelei ange ʻa e meʻa kotoa ki hoʻomou fānaú ʻiate kimoutolú. ʻOua naʻá ke ʻai ke toe kovi ange ia ʻaki haʻo toʻo ʻa e ngaahi tuʻutuʻuni ke nau ngāué mei haʻane hoko ko ha konga ʻo ʻenau akó, ʻo ke iku taʻofi ai mei hoʻo fānaú ʻa e ngaahi meʻa naʻe tokoni ke ke aʻusia ai e tuʻunga ʻokú ke ʻi aí!” (Tūhulu Siulai 1998, 44).

Fakamamafaʻi ange ʻoku moʻua ʻa e mātuʻá ke akoʻi ki he fānaú ʻa e ngaahi tuʻunga ʻo e anga- maʻá ʻa ia kuo tuʻutuʻuni ʻe he ʻEikí. ʻE tokoni ʻeni ki he fānaú ke nau matuʻuaki ʻa e ʻahiʻahí.

• Ko e hā ʻoku totonu ai ke kamata ʻe he mātuʻa ha fepōtalanoaʻaki kau ki he anga-maʻá mo ʻenau fānaú? Ko e hā hono ngaahi fakatuʻutāmaki ʻo e ʻikai ke fai ʻení?

  Fakamahino ange kuo ʻikai taʻe fanongo ʻa e fānaú ia ki ha meʻa kau ki he moʻui fakasekisualé ʻi he ngaahi ʻahó ni. Ke neongo ia, ko e lahi ʻo e meʻa ʻoku nau fanongo ki aí ʻoku kau ia ki hono fakaʻaiʻai kinautolu ke ngāue hala ʻaki ʻa e mālohi toputapu ko ia ke fakatupú. ʻOku totonu ke maʻu ʻe he fānaú, tautautefito ki he toʻutupú, ʻa e fakamatala mo e tokāteline totonu fekauʻaki mo e ngaahi meʻá ni. Kuo pau ke tokoniʻi ʻe he mātuʻá ʻa e fānaú ke nau maʻu ha mālohi feʻunga ke matuʻuaki ʻa e ngaahi meʻa hala kuo akoʻi ʻi māmaní. Kuo pau ke nau akoʻi ki he fānaú ʻa e palani ko ia ʻa e ʻEikí ki hono ngāueʻaki ʻo e mālohi ko ia ke fakatupú.

Fakaafeʻi ha niʻihi he kalasí ʻoku ʻosi ʻi ai haʻanau fānaú ke nau vahevahe ha taimi naʻa nau akoʻi ai ʻenau fānaú ʻo kau ki he ngaahi taumuʻá ni. Toe kole ange ke nau vahevahe ʻenau ngaahi ʻilo fekauʻaki mo e ngaahi tefitoʻi moʻoni ko ʻení :

ʻOku totonu ke ʻoange ha fakamatala mahino mo faingofua ki he fānau īkí ʻo kau ki he toputapu ʻo honau sinó. ʻE maluʻi kinautolu ʻe he ʻilo ko ʻení mei he niʻihi ʻoku feinga ke fakahoko ha faʻahinga tōʻonga kehe kiate kinautolú. ʻI he taimi te nau toe kiʻi lalahi ange aí ʻoku totonu ke fakamatalaʻi ange ʻe he mātuʻá ʻa e ngaahi liliu ʻoku hoko ki honau sinó. Fakamatalaʻi ange ko e hoko ko ia ʻo fuʻu fefiné pe fuʻu tangatá ko e konga pē ia ʻo e palani ʻa e ʻOtuá.

ʻOku totonu ke tokoni e ngaahi mātuʻá ʻi hono fakamahinoʻi ki he fānaú ʻoku toki lelei pē ʻa e feohi fakasekisualé ʻi hono fakaʻaongaʻi ʻi loto he ngaahi haʻi pē fakangatangata kuo fokotuʻu ʻe he ʻEikí, pea ko ha angahala mamafa ʻeni ʻo ka maumauʻi e ngaahi meʻa kuo tuʻutuʻuni mai ʻe he ʻEikí. ʻOku fie maʻu foki ʻe he toʻutupú ia ha ngaahi fakahinohino mahino mei heʻenau ngaahi mātuʻá ʻo fekauʻaki mo e ngaahi tuʻunga ko ʻeni kuo fokotuʻu ʻe he ʻEikí.

Fakaʻaliʻali ange ʻa e kiʻi tohi ko ia ko e Ki Hono Fakamālohia ʻo e Toʻutupú. Fakamatalaʻi ange ʻoku hanga ʻe he kiʻi tohí ni ʻo tokoniʻi ʻa e toʻutupú mo e mātuʻá. ʻOku kau heni ʻa e fakamatala kau ki he faikaumeʻá, valá mo e fōtungá, leá, mītiá, mūsiká mo e hulohulá. Fakalotolahiʻi ʻa e mātuʻá ke nau lau mo aleaʻi fakatāutaha mo ʻenau fānau kuo lalahí ʻa e kiʻi tohi ko ʻení. ʻE faingofua heni ki he ngaahi mātuʻá haʻanau talanoa ki he taumuʻa ʻoku faʻa faingataʻa ʻa e talanoa ki aí. ʻE maʻu foki heni ʻe he toʻutupú ha faingamālie ke ʻeke ha ngaahi fehuʻi kau ki he ngaahi tuʻunga fakaeangamaʻá. Mou vahevahe ʻa e ngaahi fakakaukau ʻi he peesi 18–19 ʻo e tohí ni:

“Kuo ʻosi folofola mai ʻa ʻetau Tamai ʻi Hēvaní, ʻoku totonu ke toki fai pē ʻe Heʻene fānaú ʻa e fetuʻutaki fakasekisualé ʻi he hili ʻenau malí. ʻOku hoko ko ha meʻa fakaʻofoʻofa mo toputapu ʻa e fetuʻutaki fakasino ʻa e husepānití mo e uaifí. Kuo tuʻutuʻuni ia ʻe he ʻOtuá ki hono fakatupu ʻo e fānaú, mo hono fakahā ʻo e feʻofaʻakí ʻi he malí: “Ko ia ʻe tukuange ai ʻe he tangatá ʻene tamaí mo ʻene faʻeé kae pīkitai ki hono ʻunohó; pea te na kakano taha pē” (Sēnesi 2:24).

“Ko e meʻa ʻi he toputapu ʻa e fetuʻutaki fakasekisualé, ʻoku finangalo ai ʻa e ʻEikí ke tau faʻa fakamaʻumaʻu mo haohaoa ki muʻa pea tau toki malí, pea ke tau fetauhiʻaki kakato foki ʻi he hili ʻetau malí. Mou anga fakaʻapaʻapa ki homou kaumeʻá ʻi he taimi ʻoku mou feohi fakakaumeʻa aí, pea mou ʻamanaki foki ke fakahā atu ʻe homou kaumeʻá ʻa e fakaʻapaʻapa tatau kiate kimoutolu. ʻOua naʻa mou ngaohi homou kaumeʻá ke hoko ko ha meʻa ke fakafiemālieʻi ʻaki hoʻomou ngaahi holi koví pe siokitá. ʻE hanga ʻe haʻamou fetuʻutaki fakasino taʻe totonu ʻo fakatupu ha mole meiate kimoutolu hoʻomou mapuleʻi kimoutolú. Mou feinga ke mou lava ʻo mapuleʻi kimoutolu mo hoʻomou ngaahi ongo fakasinó ʻi he taimi kotoa pē.

“Naʻe hanga ʻe he ʻEikí ʻo tapui mai ha ngaahi ʻulungāanga ʻe niʻihi, ʻa ia ʻoku kau ai ʻa e ngaahi fetuʻutaki fakasekisuale kotoa pē ki muʻa ʻi he malí, ngaahi tōʻonga fakakaumeʻa mousaʻá (petting) mo e ngaahi tōʻonga fakasekisuale fakalieliá (hangē ko e nonofo ʻa e tangata mo e tangatá, pe ko e fefine mo e fefiné [homosexuality], tohotohó mo e angahala fakamalaʻiá [incest], ngāue faka-Tongá [masturbation], pe ko e fakakaukauʻi ʻataʻatā pē ʻo e fetuʻutaki fakasekisualé ʻi he ʻatamaí, leá pe ngāue kotoa pē …. .

“Ko e angahala pea ʻoku fakalielia ʻi he ʻao ʻo e ʻEikí ʻa e ngaahi meʻa kotoa pē ʻoku fekauʻaki mo e nonofo ʻa e tangata mo e tangatá pe ko e fefine mo e fefiné (vakai, Loma 1:26–27, 31). ʻOku fepaki mo e palani taʻe ngata ʻa e ʻOtuá ki Heʻene fānaú ha faʻahinga ʻofa ʻoku faʻa fakanatulá, hangē ko e ʻofa ʻa ha tangata ki ha tangatá pe ʻofa ʻa ha fefine ki he fefiné. Ko homou fatongiá ke mou fai ʻa e ngaahi fili ʻoku totonú. ʻE hanga ʻe ha ngaahi ongo pe holi kovi ʻo fakatupu hano fakahoko ha ngaahi angahala ʻoku mamafa angé, ʻo tatau ai pē pe ʻoku fakataumuʻa ia ʻe ha tangata ki ha tangata pe fefine ki he fefine, pe ko ha tangata ki ha fefiné. Kuo pau ke ako ʻa e kāingalotu kotoa pē ke nau fakamaʻumaʻu mo mapuleʻi kinautolu.

Fakaʻaliʻali ange ʻa e tohi Ko Ha Fakahinohino Maʻá e Mātuʻá pea mo e Ngaahi Maʻuʻanga Tokoni ki he Efiafi Fakafāmili ʻi ʻApí. Fakamatalaʻi ange ʻe tokoni ʻa e ongo tohí ni ki he mātuʻá ʻi hono akoʻi ʻenau fānaú ʻo fekauʻaki mo e anga-maʻá. ʻOku fekauʻaki kotoa e tohi Ko ha Fakahinohino Maʻá e Mātuʻá, pea mo e ngaahi meʻá ni. ʻOku lave ʻa e Ngaahi Maʻuʻanga Tokoni ki he Efiafi Fakafāmili ʻi ʻApí ki he tefito ko ʻení ʻi he peesi 281–309.

Fakamamafaʻi ange ko e taimi ko ē ʻoku talanoa ai ʻa e mātuʻá mo e fānaú fekauʻaki mo e tuʻunga fakasekisualé, ʻe lava ke nau fakamoʻoniʻi ʻoku ʻomi ʻe he moʻui anga-maʻá ha fiefia mo ha nonga.

• Ko e hā ʻoku mahuʻinga ai ke tā ʻe he mātuʻá ha sīpinga ʻo e anga-maʻá ʻo tānaki atu ia ki he ngaahi akonaki kuo nau ʻoangé? Ko e hā ha founga ʻe lava ai ʻe he ongo mātuʻá ʻo tā ha sīpinga ʻo e moʻui anga-maʻá?

  Fakamahinoʻi ange ʻe lava ke ako ʻe he fānaú ʻa e ngaahi tefitoʻi moʻoni ʻo e moʻui anga-maʻá ʻi heʻenau mamata ki he anga e feohi ʻa e ongo mātuʻá, ʻi he ngaahi tohi ʻokú na laú, pe ko e ngaahi filimi vitiō, nusipepa mo e alā meʻa pehē, ʻokú na fakaʻatā ke hū mai ki hona ʻapí, mo e anga ʻena fepōtalanoaʻaki ʻo kau ki he mālohi toputapu ko ia ʻo e fakatupú.

Fakamamafaʻi ange ko e fatongia ia ʻo e mātuʻá ke akoʻi ki heʻenau fānaú ʻa e ngaahi tefitoʻi moʻoni ʻo e anga māʻoniʻoní. Fakalotolahiʻi e kau akó ke nau feinga ke moʻui ʻaki ʻa e ngaahi tefitoʻi moʻoni ʻoku akoʻi ʻi he lēsoni ko ʻení pea fakapapauʻi ʻe lava leva ke nau akoʻi lelei ange ai ki he fānaú ʻa e ngaahi tefitoʻi moʻoni ko iá.

Vahevahe ange hoʻo fakamoʻoni ki hono moʻoni ʻo e ngaahi meʻa ne mou aleaʻi ʻi he lēsoní, ʻo fakatatau mo e ueʻi ʻa e Laumālié.

Vakai ki he peesi 70–76 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí. Fakalotolahiʻi kinautolu ke nau toutou fakamanatu ʻa e ngaahi tokāteline mo e ngaahi tefitoʻi moʻoni kuo nau ako ki aí ʻaki haʻanau (1) fai ha taha ʻo e ngaahi fokotuʻu ʻoku haʻi he “Ngaahi Fakakaukau ki Hono Fakahokó” pea mo nau (2) lau ʻa e lea ko ia naʻe fai ʻe Palesiteni Poiti K. Peeka ko e “Akoʻi ʻa e Fānaú.” Fakamahino ange ʻe lahi ha ngaahi lelei ʻe maʻu ʻe he ongo meʻa malí mei haʻana lau mo aleaʻi fakataha ʻa e ngaahi fakamatala ʻi he tohi fakahinohino akó.