Fakahinohinoʻi ʻo e Fānaú ʻi Heʻenau Fakahoko ʻEnau Ngaahi Filí

Mou lau fakataha mo e kau akó ʻa e ʻAlamā 12:32:

“Ko ia ai naʻe fakahā ʻe he ʻOtuá ha ngaahi fekau kiate kinautolu hili ʻa ʻene fakahā kiate kinautolu ʻa e hala ʻo e huhuʻí.”

• Ko e hā ʻoku mahuʻinga ai ʻa e pehē naʻe toki foaki ʻa e ngaahi fekaú kia nautolu hili ʻa ʻene fakahā kia kinautolu ʻa e palani ʻo e huhuʻí? ʻE tokoni fēfē ʻa e ngaahi tefitoʻi moʻoni ko ʻení ki he feinga ko ia ʻa e mātuʻá ke fakalotolahiʻi ʻenau fānaú ke tauhi ʻa e ngaahi fekaú?

  Naʻe akonaki ʻa ʻEletā Poiti K. Peeka ʻo pehē:

  “ ʻOku faʻa fehuʻia ʻe he kau talavoú pe” ko e hā hono ʻuhingá ? ‘—Ko e hā hono ʻuhinga kuo fekauʻi ai kitautolu ke tau fai e meʻa ko eé, pea fekauʻi ke ʻoua naʻa tau fai ʻa e meʻa ko eé? ʻI heʻenau ʻiloʻi ʻa e palani ʻo e fiefiá te nau maʻu leva ʻa e ʻuhingá….

  “Heʻikai ke ke ofi maʻu pē ki hoʻo fānaú ʻi he ngaahi ʻaho honau ʻahiʻahiʻí. ʻI he ngaahi taimi faingataʻa pehení kuo pau pē ke nau fekumi ki ha ngaahi maʻuʻanga tokoni. Kapau te nau ʻilo ʻa e ngaahi palani ʻo e ongoongolelei, ʻe lava ke fakamālohia ai kinautolu.

  “Ko e palani ʻeni ʻoku totonu ke toutou fakamanatua maʻu pē. Pea te nau manatuʻi leva ʻa e ʻuhinga ʻo e moʻuí ni, mo e moʻoni ʻoku ʻi ai ʻa e Huhuʻí, pea mo e ʻuhinga ʻo e ʻi ai ʻa e ngaahi fekaú.

  “ ʻE hoko ʻa ʻenau ako ki he ongoongoleleí mo e ngaahi meʻa ʻoku nau aʻusia ʻi he moʻuí ni ko ha meʻa ia te ne tānaki ki heʻenau fakamoʻoni ki he Kalaisí, ʻa e Fakaleleí pea mo hono toe fakafoki mai ʻo e ongoongoleleí” (The Great Plan of Happiness [ʻi ha lea naʻe fai ki he kau ako fakalotú, he ʻaho 10 ʻo Aokosi 1993], 3).

Fakamatala ange ʻoku totonu ke ʻoange ʻe he mātuʻá ha fakahinohino mahino ke muimui ki ai ʻa e fānaú ʻi he taimi ʻoku nau fai ai ha ngaahi filí. ʻE kau ai hono akoʻi ʻo e ongoongoleleí pea fokotuʻu mo ha ngaahi tuʻunga ʻulungaānga ʻi ʻapi. Naʻe akonaki ʻa ʻEletā Siō J. Kulisitianesoni ʻo e Kōlomu ʻo e Kau Fitungofulú ʻo pehē:

“ ʻOua ʻe manavahē ke fokotuʻu ha ngaahi tuʻutuʻuni mo ha ngaahi fakahinohino mahino fekauʻaki mo e anga-maʻá. Manatuʻi ke mou ʻikai ʻi he taimi ʻoku fiemaʻu ai ke mou ʻikaí. ʻOku totonu pē ke ke fakahā ki [hoʻo fānaú] ʻoku ʻi ai ha ngaahi meʻa ʻe niʻihi ʻe ʻikai te nau lava ʻo fai ʻi heʻenau hoko ko e mēmipa homou fāmilí. ʻOku ʻi ai ha mātuʻa ʻe niʻihi ʻoku nau fuʻu hohaʻa ʻaupito ki hono manakoa ʻa ʻenau fānaú ʻe he toʻutupú mo tali lelei kinautolu ʻi heʻenau feohi fakasōsialé ko ia ʻoku nau hanga ai ʻo poupouʻi ha ngaahi meʻa lahi naʻe totonu pē ke ʻoua te nau poupouʻi, hangē ko e vala mo e ngaahi sīpinga fakamole paʻanga lahi ʻo e kuongá, kaeʻumaʻā ʻa e ngaahi vala taʻefeʻungá, ko e ʻeva poʻuli ʻo fuʻu fuoloá, ʻeva fakakaumeʻa ʻoku teʻeki taʻu hongofulu mā onó mo e ngaahi heleʻuhila taʻefeʻungá mo e ngaahi alā meʻa pehē. ʻOku ʻi ai ʻa e taimi ʻe niʻihi ʻe hoko ai ha tuʻu ʻa e fānaú mo e mātuʻá ʻo taukapoʻi ʻa e meʻa ʻoku totonú, ko ha meʻa ia ke fehiʻanekina ai kinautolú. Kuo pau pē ke ʻi ai ha pō ʻe niʻihi te nau nofo tokotaha pē pea ʻikai ke nau ʻalu ki ha ngaahi paati, pe sio ʻi ha ngaahi heleʻuhila, ʻe ʻikai fakafiefia ia ʻi he taimi kotoa. Ka ko e fatongia fakamātuʻá ʻoku ʻikai ko ha feʻauhi ia pe ko hai ʻe manakoa tahá” (ʻi he Conference Report, ʻOkatopa 1993, 13; pe Tūhulu Sānuali 1994, 14).

• Ko e hā ʻe lava ke fai ʻe he mātuʻá ke fokotuʻu ai ha fakahinohino pau fekauʻaki mo e moʻui anga-maʻá maʻa honau fāmilí?

Mou lau fakataha mo e kau akó ʻa e Molonai 7:15–19.

• Ko e hā ha faleʻi ʻoku ʻomai ʻe he veesi ko ʻení fekauʻaki mo e lava ko ia ke tau ʻilo ʻa e leleí mei he koví? ʻE lava fēfē ke fakaʻaongaʻi ʻe he mātuʻá ʻa e faleʻi ko ʻení ke fokotuʻu ha ngaahi fakahinohino ki heʻenau fānaú?

• Ko e hā ha ngaahi tafaʻaki ʻo e moʻui ʻa e toʻutupú te nau fie maʻu ai ha tokoni ʻi hono fakafaikehekeheʻi ʻo e leleí mei he koví? ʻE fakaʻaongaʻi fēfē ʻe he mātuʻá ʻa e akonaki ʻoku hā ʻi he Molonai 7:15–19 ke tokoniʻi ʻa e fānaú ke fai ha fili ʻoku māʻoniʻoní?

Fakamatalaʻi ange ʻoku fakamatala ʻa e Molonai 7:15–19 ki he Maama ʻa Kalaisí, ʻa ia ʻokú ne tokoniʻi kitautolu ke tau ʻilo ʻa e leleí meí he koví. ʻE lava ke toe tānaki atu ki he muimui ki he Maama ʻa Kalaisí, ʻa e lava ko ia ke tau maʻu ha fakahinohino mei he Laumālie Māʻoniʻoní ʻa ia te ne “fakahā mai ʻa e meʻa kotoa pē ʻoku totonu ke [tau] faí” (2 Nīfai 32:5) pea te ne tokoni mai ke tau “ ʻiloʻi ʻa e meʻa kotoa pē” (Molonai 10:5). ʻI he taimi ʻoku ako ai ʻa e fānaú ke nau fakatokangaʻi pea muimui ki he ngaahi ueʻi ʻa e Laumālie Māʻoniʻoní te nau maʻu leva ha tokoni makehe ʻi he taimi ʻoku nau fai ai ha ngaahi filí. Hili hano hilifakinima kinautolu ke maʻu ʻa e Laumālie Māʻoniʻoní, ʻe lava ʻe he mātuʻá ʻo tokoniʻi e fānaú ke nau feinga maʻu pē ke moʻui taau pea nofoʻia kinautolu ʻe he Laumālie Māʻoniʻoní.

Naʻe fakamatala ʻa ʻEletā Lōpeti D. Heili fekauʻaki mo hono tokoniʻi ia ʻe heʻene faʻeé ke ne ʻiloʻi ʻa e ngaahi ueʻi ʻa e Laumālie Māʻoniʻoní:

“Hili hono papitaiso aú, ne puke atu au ʻe heʻeku fineʻeikí ki he tafaʻakí peá ne pehē mai “Ko e hā hoʻo ongoʻí? Ne u fakamatalaʻi ki ai ʻi he lelei taha naʻá ku lavá ʻa e faʻahinga ongo māfana ʻo e nonga, fiemālie pea mo e fiefia ne u maʻú. Ne toki fakamatalaʻi mai leva ʻe heʻeku fineʻeikí ko e meʻa ʻoku ou ongoʻi ko e meʻa foaki ia ʻo e Laumālie Māʻoniʻoní. Naʻá ne talamai leva kapau te u moʻui taau mo ia, ʻe hoko atu ai pē ke u kei maʻu ʻa e meʻa foaki ko iá. Ko ha momeniti ako ia kuó u moʻuiʻaki ʻi he kotoa ʻo ʻeku moʻuí” (ʻi he Conference Report, ʻEpeleli 1999, 42; pe Liahona Siulai 1999, 39).

• Ko e hā e meʻa ʻe lava ke fai ʻe he mātuʻá ke tokoniʻi ʻenau fānaú ke ongoʻi mo ʻiloʻi ʻa e ngaahi ueʻi ʻa e Laumālie Māʻoniʻoní? ( ʻE lava ke kau ʻa e ngaahi tali ko ʻení, ʻa hono fakalotolahiʻi kinautolu ke ako ʻa e folofolá, fanongo ki he ngaahi hiva toputapú, tauhi ʻa e ngaahi fekaú, pea lotu ʻi he loto fakamātoato moʻoni. ʻE lava ke nau vahevahe mo ʻenau fānaú ha ngaahi meʻa fakalaumālie kuo nau aʻusiá pea fakahaaʻi ange ʻa ʻenau ʻofá).

  Fakamamafaʻi ange ʻa hono mahuʻinga ko ia ke hanga ʻe he mātuʻá ʻo fakalotolahiʻi ʻenau fānaú ke ʻi ai haʻanau taimi lotu makehe ʻo hangē ko e lau folofola fakafoʻituituí, lotú mo e ʻaukaí. ʻOku lelei pē ʻa e kau ki he ngaahi polokalama fakalotu ʻa e fāmilí ka ʻoku ʻikai ke feʻunga ia.

Fakamahinoʻi ange ʻe lava ke ʻoange ʻe he mātuʻá ha faingamālie ki he fānau īkí ke nau fai ha ngaahi fili. ʻE lava ke nau fakafaingofuaʻi ʻeni ʻaki haʻanau ʻoange pē ha meʻa ʻe ua ke fili mei ai ka e ʻai ʻa e ongo filí ke na fakapotopoto lōua. Hangē ko ʻení, ʻe pehē ange ʻe he mātuʻá “ ʻOkú ke fie tui ho sote lanu puluú pē kulokulá he ʻahó ni?” pe ko e “ ʻOkú ke fie fanongo nai ki ha foʻi talanoa pe ʻokú ke fie vaʻinga pē koe ia kae ʻoua kuo hoko ho taimi mohé?” Ko e taimi ko ē ʻoku ʻoange ai ʻe he mātuʻá ha ngaahi fili peheni pea ʻoku totonu ke nau tali leva ʻa e fili ko ia ʻa e fānaú.

• ʻE hanga fēfē ʻe he fanga kiʻi fili iiki pehení ʻo tokoniʻi ʻa e fānaú ʻi he taimi te nau fai ai ha ngaahi fili ʻoku toe mahuʻinga ange pe mamafa ange ʻi heʻenau moʻuí?

Fakamatala ange ko e taimi ʻoku fehangahangai ai ʻa e fānaú mo ha ngaahi fili ʻoku faingataʻa ʻo hangē ko e ngaahi ʻekitivitī ke fai ʻi he ʻaho Sāpaté, fili honau ngaahi kaungā-meʻa ofí, pe ko e palani ʻenau akó pe fokotuʻu ha ngaahi taumuʻa ki heʻenau ngāué, ke nau ʻilo ʻoku mahuʻinga ʻa e founga ke nau fai ʻaki ʻa e ngaahi filí, ʻo fakatatau mo e ngaahi tefitoʻi moʻoni ʻo e ongoongoleleí. ʻOku mahuʻinga foki ke nau ʻilo ʻe uesia ʻa e toenga ʻenau moʻuí ʻi he fili ʻoku nau faí. Kuo pau ke tuku taimi ʻa e mātuʻá ke akoʻi ʻa e fānaú ʻi heʻenau kei īkí ke nau talanoa ai ki he ngaahi tefitoʻi moʻoni ko ʻení.

• Ko e hā ha ngaahi founga ʻe lava ai ke fakahinohinoʻi ʻe he mātuʻá ʻa ʻenau fānaú ʻi he taimi ʻoku nau talatalaifale ai mo kinautolú? (ʻE lava ke kau ʻi he ngaahi talí ʻa e ngaahi meʻa ko ʻení, ʻe lava ke vahevahe ʻe he mātuʻá ʻa e ngaahi meʻa kuo nau aʻusiá, fakamanatu ki heʻenau fānaú ʻa e ngaahi fekau ʻa e ʻEikí, pea tokoniʻi e fānaú ke nau fakakaukau maʻu pē ki he ngaahi ola taʻengata ʻo ʻenau ngaahi filí.)

• Ko hā ha ngaahi meʻa ʻe hoko ʻe fie maʻu ai ke ala mai ʻa e mātuʻá ʻo tokoniʻi ʻa e fānaú ʻi ha ngaahi fili taʻemāʻoniʻoni te nau faí?

  Kole ange ki ha taha ʻo e kau akó ke ne lau ʻa e lea ko ʻeni naʻe fakahoko ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá: (peesi 77 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí):

  “Ko e fatongia ia ʻo e mātuʻá ke hū mai ʻo kau ʻi he taimi ʻokú na mamata ai ʻoku fai ha ngaahi fili halá. ʻOku ʻikai ʻuhinga ia ke toʻo ai ʻe he mātuʻa mei he fānaú ʻa e meʻaʻofa ʻo e tauʻatāina ke filí. Koeʻuhi ko e tauʻatāina ke fili ko ha meʻaʻofa faka-ʻOtua ia ʻoku foaki mai, ko hono moʻoni toputapu tahá ko e fili ko ia ki he meʻa te nau faí, anga ʻo ʻenau tōʻongá pea mo e meʻa ko ia te nau tui ki aí, ʻe tuku maʻu pē ia kia kinautolu. Ka ʻi heʻetau hoko ko e ngaahi mātuʻá, ʻoku fiemaʻu ke tau fakapapauʻi ʻoku mahino kia kinautolu ʻa e tōʻonga tāú mo e ngaahi nunuʻa ʻe hoko kapau te nau tūlifua ai pē ʻi he ngaahi meʻa ʻoku halá. Manatuʻi ʻoku ʻikai ke ʻi ai ha meʻa ia ko e kau fai sivi taʻe fakalao ʻi ʻapi. Ko e ngaahi heleʻuhilá, makasiní, ngaahi polokalama ʻi he televīsone, ngaahi vitiō, ʻInitāneti mo e ngaahi mītia kehé ko ha kau fakaafe pē kinautolu ki ho ʻapí pea ʻoku totonu ke toki talitali pe kinautolu ʻi he taimi ʻoku nau taau ai ki he fakafiefia ʻa e fāmilí. ʻAi ke hoko ʻa ʻapi ko ha taulanga ū ʻo e melinó mo e anga māʻoniʻoní. ʻOua naʻa tuku ʻa e tākiekina koví ke ne fakaʻuliʻi ho ʻātakai fakalaumālie makehé. Anga-ʻofa, fakaʻatuʻi, anga-lelei mo faʻa fakakaukau ʻi he meʻa ʻokú ke lea ʻakí mo e founga ʻoku ke fai ki he niʻihi kehé. Pea ʻe hanga leva ʻe he ngaahi taumuʻa fakafāmili ʻoku fakavaʻeʻaki e ngaahi tuʻunga ʻulungāanga ʻo e ongoongoleleí ʻo fakafaingofuaʻi ai hono fai ʻo e fili ʻoku leleí” (ʻi he Conference Report, ʻEpeleli 1999, pe Liahona Siulai 1999, 103).