Wase 10
Na Papitaiso nei Jisu
E vuqa na yabaki a bula voli o Joni ena vanua dravuisiga. E vakaisulu ena isulu e caka mai na vuti ni kameli, ka kena kakana na oni kei na vodre Era gole mai na tamata mai na veikoro lelevu me ra rogoca na nona veivakavulici. E kilai o koya me, ko Joni na Dauveipapitaiso.
E tukuna o Joni na Dauveipapitaiso vei ira na tamata na veika e baleti Jisu Karisito. E tukuna vei ira me ra veivutunitaka na nodra ivalavala ca ka me ra papitaiso. Sa papitaisotaki ira era sa veivutunitaka na nodra ivalavala ca o Joni.
Era sa tarogi Joni na Dauveipapitaiso na tamata ena sala me ra bula uasivi kina. A tukuna me ra dau lomani ira na dravudravua, tukuna na ka dina, ka caka vinaka vei ira na tani. A tukuna ni sa voleka ni lako mai o Jisu Karisito. Ena mai solia o Jisu vei ira na isolisoli ni Yalo Tabu.
Ena dua na siga ni a papitaisotaki ira tiko na tamata o Joni na Dauveipapitaiso ena Uciwai na Joritani, sa lako mai vua o Jisu Karisito. A kerei Joni me papitaisotaki Koya. Sa kila tu o Joni ni sa talairawarawa o Jisu ki na ivakaro ni Kalou ka sega ni gadrevi me veivutuni. E nanuma o Joni ni sega ni gadrevi vei Jisu me papitaiso.
Ia sa vakarota na Kalou me ra papitaiso na tamata kecega, sa kaya kina o Jisu vei Joni me papitaisotaki Koya. Sa ivakaraitaki kina o Jisu kivei keda me da talairawarawa ki na ivakaro ni Kalou ka papitaiso.
Ni sa lamata cake mai wai o Jisu, sa sobuti Koya na Yalo Tabu. Sa vosa mai lomalagi na Kalou, ka kaya, “O koya oqo na noqu Gone ni toko, au sa dau vinakata vakalevu.” A vakadinadinataka talega o Joni na Dauveipapitaiso ni ko Jisu na Luve ni Kalou.
Maciu 3:16–17; Joni 1:33–36; Jisu na Karisito 150