Wase 39
Vakabula E Dua na Mataboko o Jisu
E dua na siga a taubale tiko o Jisu vata kei iratou na Nona tisaipeli. Eratou sa raica sara e dua na tamata sa mataboko ni se qai sucu ga mai. Eratou sa taroga na tisaipeli ke sa mataboko beka ena vuku ni nona ivalavala ca se nodrau ivalavala ca na nona itubutubu.
A kaya na iVakabula ni sega ni rau ivalavala ca na itubutubu se tamata mataboko o ya. A mataboko na tamata o ya me vakabulai koya kina o Jisu me vakaraitaki kina na kaukauwa ni Kalou vei ira na tamata.
Sa qai uliya na soso o Jisu. A qai boroya ena matai koya sa mataboko. A kaya o Jisu kivua na tamata me laki savata na matana.
Ena gauna ga sa savata kina na tamata oqo na matana, sa rai rawa sara!
Ni ra sa raici koya na wekana, era sa sega ni kilai koya. Sa qai kaya vei ira ni a vakabulai koya o Jisu. Era sa qai kauti koya na wekana vei ira na Farisi. Sa tukuna o koya vei ira na Farisi ni a vakabulai koya o Jisu.
Eso vei ira na Farisi era nanuma ni sa tamata ivalavala dodonu o Jisu. Eso era nanuma ni sa tamata ivalavala ca. Ena gauna sa tukuna kina na tamata oqo ni o Jisu sa tamata ivalavala dodonu, era sa cudru kina eso na Farisi ka ra kolotaki koya i tautuba.
Sa qai raici koya o Jisu. A taroga vua na tamata oqo ke vakabauta na Luve ni Kalou. Sa taroga na tamata oqo se o cei na Luve ni Kalou. A kaya o Jisu ni sai Koya ga na Luve ni Kalou, ka sa vakacaucautaki Koya na tamata oqo.