Wase 63
Vakaotia o Paula na nona Kaulotu
Sa lako o Paula ki na valetabu e Jerusalemi. Eso vei ira na Jiu era nanuma ni sa kauta o Paula eso na tamata sega ni Jiu ki na valetabu. Era sa cudru kina vakalevu na Jiu. Era sa qai kauti Paula tani mai na valetabu ka mokuti koya.
Era sa qai vesuki Paula na sotia ni Roma. Era sa vakatara me vosa vei ira na kai Jiu. Sa tukuna o Paula vei ira na tamata ni a raica o koya e dua na rarama sa cila mai lomalagi ka rogoca ni sa vosa mai na iVakabula. A kaya ni a tukuna vua o Jisu me laki vunautaka na kosipeli.
Era sa sega ni vakabauti Paula o ira na tamata. Era sa qai via vakamatei koya. Sa qai balati Paula ki valeniveivesu o ira na sotia.
A sikovi Paula e valeniveivesu na iVakabula ka kaya vua me kakua ni rere. A kaya me na lako o Paula ki Roma ka vakavulica e kea na kosipeli.
Ni gadrevi me taqomaki o Paula, era sa kauti Paula na kai Roma ki na dua tale na koro. A tiko mai kea o Akaripa na Tui. Sa tukuna o Paula vei Akaripa na Tui ni sa Farisi e liu o koya ka dau vakacacani ira na tamata era vakabauti Jisu. Ka dau biuti ira talega ki valeniveivesu. A qai raica o Paula e dua na rarama ni sa cila mai lomalagi ka rogoca na domona na iVakabula. Ia sa mai vakabauti Jisu oqo.
Sa vakadinadinataka o Paula vei Akaripa na Tui ni sa dina na kosipeli. A kaya ni sa tucake tale o Jisu. Ena raivotu, sa kaya o Jisu Karisito vei Paula me laki vakavulica na Nona kosipeli. Ena vuku ga ni talairawarawa nei Paula, era sa cati koya kina na tamata.
Sa kaya o Akaripa na Tui vei Paula ni sa voleka sara me veisautaki koya me vakabauti Jisu. E nanuma kina na tui me kakua ni vakamatei o Paula. Ia a qai vakauti Paula ki Roma, me laki lewai mai kina o Paula.
Sa qai curu o Paula e valeniveivesu e Roma me rua na yabaki. Era lewelevu era sa mai raici koya. Sa vakavulica vei ira na kosipeli. A volavola o Paula vei ira na Yalododonu ena veivanua tale eso. Eso na ivola oqo, vakaiapositolo, era tiko ena Veiyalayalati Vou.
Sa kila tu o Paula ni na vakamatei. A sega ni rere o koya. Ni sa muria tiko na vunau ni Kalou. Ka sa dau vakavulica na kosipeli. Sa vakaotia vakavinaka na nona kaulotu. Sa kila o Paula ni sa lomani koya na Tamada Vakalomalagi. Sa kila talega o koya ni gauna ena mate kina, ena laki bula vata tale kei na Tamada Vakalomalagi kei Jisu Karisito.