Wase 14
Nikotimo
O Nikotimo e dua vei ira na ilawalawa Jiu e yacadra na Farisi. O koya talega e dua na iliuliu vei ira na Jiu. E vuqa na Farisi era sega ni vakabauta ni sa talai mai vua na Kalou o Jisu Karisito. Ia a vakabauta ga o Nikotimo baleta na caka mana a vakayacora o Jisu.
Ena dua na bogi a lako mai o Nikotimo me mai veivosaki kei na iVakabula. A kaya vua o Jisu ni sega ni rawa vua e dua me curuma na matanitu ni Kalou ke sega ni sucu tale.
E sega ni kila o Nikotimo na ka o ya. Ena sucu tale vakacava e dua na tamata? Sa vakamacalataka na iVakabula ni tukuna tiko na veika vakayalo. Ni dua me sucu vou, sa na gadrevi vua me papitaiso ena wai ka ciqoma na isolisoli ni Yalo Tabu.
Sa vakamacalataka o Jisu ni a talai mai ki vuravura me mai vukei keda me da lesu kece vua na Tamada Vakalomalagi. E kaya o Koya ni sa na vakararawataki baleta na noda ivalavala ca ka mate ena kauveilatai me rawa kina ni da bula tawamudu.
E kaya o Koya ni sa gadrevi me da vakabauti Koya ka digitaka na dodonu. Kevaka eda cakava na ka dodonu, eda na bula tawamudu ena matanitu ni Kalou.