Wase 61
O Paula kei Sailasa e Valeniveivesu
E dua na goneyalewa e tiko vua e dua na yalo velavela. Era sa via rogoca na tamata na veika sa tukuna mai vua na tevoro. Era sauma na tamata e cakacaka tiko kina o goneyalewa me ra rogoca ni vosa mai vua na tevoro.
Ena gauna e dau lako takoso mai kea o Paula kei Sailasa, e dau muri rau na goneyalewa oqo ka dau vosa sara mai na tevoro oqo. E dua na siga sa qai vakarota o Paula na tevoro oqo me biuta na goneyalewa. Sa yaco vakakina. Era a cudru kina o ira na tagane e cakacaka tiko vei ira o goneyalewa. Ni sa sega tale ni ra rawa ilavo kina.
Era sa qai kauti Paula kei Sailasa o ira na tagane kivei ira na iliuliu ni nodra koro levu. Era kaya ni rau vakatubura tiko na ca o Paula kei Sailasa.
Rau sa qai vakanakuitataki o Paula kei Sailasa ka bala e valeniveivesu ena nodra lewa na iliuliu.
Ena bogi o ya rau sa masu ka lagasere ni lotu o Paula kei Sailasa vua na Tamada Vakalomalagi. Era sa rogoci rau o ira kece era tiko ena valeniveivesu Sa qai yavavala mai vakasauri na qele. Ka tadola na katuba ni valeniveivesu.
Sa yadra cake mai na ivakatawa ni valeniveivesu ka raica ni sa tadola na katuba. Sa nanuma ni ra sa dro na vesu tiko. Sa kaya o Paula vua me vakacegu ga. Era se tiko kecega na kaivesu. Sa tekiduru na ivakatawa ni valeniveivesu vei Pita kei Sailasa ka taroga me na vakabulai vakacava.
Sa qai laki vakatavulica o Paula kei Sailasa na kosipeli vei koya na ivakatawa ni valeniveivesu kei na nona matavuvale. Ena bogi o ya eratou sa papitaiso kina na ivakatawa ni valeniveivesu kei na nona matavuvale.
Ena siga tarava era sa sereki Paula kei Sailasa na iliuliu. Rau sa lako o Paula kei Sailasa ki na dua tale na koro levu me rau laki kaulotu kina.