Wase 38
Na Farisi kei Koya na Daukumuni iVakacavacava
E dua na siga a vosa tiko o Jisu vei ira eso era nanuma ni ra sa tamata ivalavala dodonu cake mai vei ira na tamata tale eso. A qai talanoa o Jisu vei ira.
E rua na tamata rau a laki masu ena valetabu. E dua na Farisi. Na kena ikarua e dua na vakailesilesi, e dau kumuna na ivakacavacava. Era sega ni dau taleitaki ira na dau kumuni ivakacavacava ko ira na tamata. Era kaya ni ra daulawaki na daukumuna na ivakacavacava.
Sa laki tu na Farisi e liu vei ira na tamata me masu. A vakavinavinakataka na Kalou ni sa tamata vinaka cake mai vei ira na tamata tale eso. E kaya ni dau lolo vakarua ena veimacawa ka sauma na nona ikatini. Ia o koya na vakailesilesi sa tucake taudua ga, vakacuvara sobu na uluna, ka masu, “Kemuni na Kalou lomani au mai, koi au na tamata ivalavala ca.”
Sa nanuma na Farisi ni sa ivalavala dodonu sara ka sega ni gadreva na veivuke ni Kalou. Ia ko koya na vakailesilesi e kila ni tamata ivalavala ca ka gadreva na veivuke ni Kalou. E tamata yalomalumalumu ka kerea vua na Kalou me vosoti koya.
E kaya o Jisu ni dodonu vei ira na tamata me ra vakataka na vakailesilesi o ya. Me ra kakua ni nanuma ni ra sa vinaka cake mai vei ira na tamata tale eso. E dodonu me ra veivutunitaka na nodra ivalavala ca ka kerea na Kalou me vosoti ira.