Haapa‘o i te ture no te viivii-ore

I roto i teie tau tuuraa, ua parau faahou mai te Fatu i te faaueraa tei horo‘ahia i Sinai ra i To’na parauraa e, « Eiaha… e faaturi… eiaha atoa e rave i te hoê mea mai te reira te huru » (PH&PF 59:6, reta tei faahuru-ê-hia). Mai te haamataraa mai â o te mau tau, ua haamau te Fatu i te hoê faatureraa papû e te hape ore no ni‘a i te vai-mâ-raa i te viivii-ore. Mai te tau e te tau mai â te reira, mai te reira i teie nei e mai te reira noa’tu. Taua faatureraa ra, o te ture ïa no te viivii-ore. Hoê â faanahoraa no te taatoaraa—no te tane e te vahine, te mea paari e te mea apî, te mea moni e te mea veve.⁵

Aita e piti faito faatureraa a te Ekalesia i te pae morare. Teie te arata‘iraa morare o te raʻi, no te tane e te vahine, oia hoʻi, te viivii-ore i to’na faito hope na mua aʻe i te faaipoiporaa, e te hereraa ia raua, i to’na faito hope, i muri mai i te faaipoiporaa.⁶

I roto i te Buka a Moromona, te parau nei te peropheta Iakoba ia tatou e, e mea oaoa na te Fatu te viivii-ore o Ta’na mau tamarii (hi‘o Iakoba 2:28). Te faaroo nei anei outou i te reira, to’u mau taea‘e e to’u mau tuahine ? Eita te Fatu e au noa ia vai viivii-ore tatou ; e oaoa roa Oia i te viivii-ore. Ua haapii Moromona i taua mea nei i ta’na tamaiti o Moroni, ma te papa‘i e, o te viivii-ore e te peu mâ « tei hau ê e tei hinaarohia hoʻi i te mau mea atoa » (Moroni 9:9).⁷

Te hiaai natura a te tane e a te vahine ia hoê raua, no ô mai ïa i te Atua. Tera râ, ua taʻotiʻahia te reira apitiraa e ta’na mau ture. Ia riro te reira mau mea i te faaherehere-maitai-hia no te faaipoiporaa ; e ia rave-ana‘e-hia te reira i roto i te taatiraa no te faaipoiporaa, e mea ti‘a ïa e e mea au i mua i te Atua ; e te faaoti nei hoʻi te reira i te faaueraa ia faarahi e ia faaî i te fenua. Areʻa râ, ia ravehia taua mau mea nei i rapae au i te mau taamuraa o te faaipoiporaa, e anatemaraa ïa te reira.⁸

A haere i te fata no te faaipoiporaa, ma te poraʻo ore e te mâ. A faaherehere no te faaipoiporaa i te reira amuiraa au e te tapiri, o ta te Atua i te raʻi i opua ia riro ei tuhaa no te faaipoiporaa eiaha râ no rapae au i te fafauraa o te faaipoiporaa. Aita vau e tauʻa nei i te mea ta teie nei ao e parau nei, teie râ te mau faatureraa a te basileia o te Atua.⁹

Te hara e aere nei i roto i teie uʻi, o te taiʻata ïa. Ua parau te peropheta Iosepha e, e riro mai te reira ei puna no te mau faahemaraa rahi atu â, te mau taʻiriraa rahi atu â e te mau fifi rahi atu â, e e rahi atu â te reira fifi no te mau peresibutero no Iseraela i te tahi atu taata.¹⁰

Mai te huru te taiʻata i te hoê ôphi « viper » te taʻiri nei eiaha na roto noa i te ao, na roto atoa râ i te Ekalesia. Ia ore tatou e ara i te reira, te farii ohie nei ïa tatou i te hoê mea haamataʻu e aore râ mai te huru ra te patia ra tatou i te upoo i roto i te one. Ia au i te anaʻiraa o te mau hara rahi, te taparahiraa taata noa e te tuhiraa i te Varua Maitai tei na mua noa mai i te herehereraa ti‘a ore, o ta tatou e parau nei te poreneia aita anaʻe te taata i faaipoipo, e aore râ, te hara rahi atu â no te faaturi, e taata faaipoipo ana‘e. Ua ite au e, aita te mau ture o te fenua e faariro nei i te peu faufau ei ohipa teimaha mai te Atua, aita atoa e faautuʻaraa teimaha mai ta te Atua, atira noa’tu, eita te reira e taui i te viivii o te reira. I mua i te mata o te Atua, hoê anaʻe faatureraa morare no te tane e te vahine. I mua i te mata o te Atua, eita roa’tu te viivii-ore e marau… 

Aita e hara e haamoʻe rahi nei e e haamoʻe rahi a‘e i te Varua o te Fatu, tei rotopu i to tatou mau taata i teie nei, maori râ te taiʻataraa. Te faaturorirori nei te reira i to tatou mau taata, ma te faataupupu i to ratou tupuraa, ma te haapoiri i to ratou mau mana pae varua e ma te faatopa ia ratou i raro a‘e i te tahi atu mau hara.¹¹

E fifi rahi e vai ra no te paturaa i te mau apitiraa i ni‘a i te ohipa o te tino na mua a‘e i te faaipoiporaa … e riro te mau hopea mauiui no taua huru apitiraa ti‘a ore i te vai noa i roto i te faaipoiporaa, e e tae mai te inoino, te aau mauiui e te paruparu i ni‘a i te tino o te utuafare.¹²

Te mâraa i te pae morare, e parau tumu mure ore ïa. Eita te Varua o te Atua e « vai i roto i te hiero viivii ra » [hi‘o Helamana 4:24]. Te mâraa, o te ora ïa ; te mâ-ore-raa, o te pohe ïa. Eita e nehenehe e ofati i te mau ture mo‘a a te Atua ma te ore e farii i te utuʻa. Ua maʻiri te mau nunaa rahi i to ratou riroraa ei nunaa viivii i te pae morare, no te mea i muri iho i te mau hara no te taiʻata, ua vai noa mai te mau tino pêpê e te au ore, e eita faahou ta ratou e nehenehe e faaruru i te mau tamataraa o to ratou anotau.¹³

Te peu faufau, o te ino rahi aʻe ïa i te mau ino atoa, areʻa te mâraa i te pae morare, e pare teitei roa a‘e ïa te reira no te hoê fare manuïa. Eita te fare oaoa e te fare manuïa e nehenehe e patuhia i ni‘a i te taiʻata.¹⁴

Te vai ra te taata e faati‘a i to ratou taiʻata ma te parau e, te mau opaniraa no te reira e mau opaniraa pae faaroo noa, e aita to te reira faufaa no te mea aita e Atua e vai mau nei. Te reira, ia ite outou, o te hoê noa ïa faatumuraa hape i ni‘a i te mana‘o, tei opuahia no te paruru i to te tino hiaai, te hinaaro faufau e te orohea. E vai tamau noa ta te Atua ture. No te taatoaraa, o te ti‘aturi i te Atua e aore râ aita. Pauroa tei raro a‘e i to te reira mau faautuʻaraa, noa’tu â te faatumuraa a te tahi i ni‘a i te tahi atu mana‘o e aore râ te haapa‘o-ore-raa i te reira.

I muri iho i te taiʻata… e faahaparaa aau ihoa te tae mai. Eita ta te hoê taata e nehenehe e farii i te mau peu faufau ma te ore e mauiui i to te reira mau faahopearaa ino. Eita ta’na e nehenehe e rave i te ino ma te mana‘o hau i te aau—eita roa’tu. I te taime ihoa a ofati ai te hoê taata i te ture a te Atua, e aufau oia i te utuʻa, te mauiui i te aau, te oto, te faahaparaa aau, te faatura-ore-raa ia’na iho e e iriti mai oia ia’na iho mai te tuʻatiraa i te Varua o te Atua.¹⁵

Te rahiraa o te mau taata e topa nei i roto i te hara faufau, no te tamataraa hape ïa ia haamaha i te mau hiaai tumu o te tino. Pauroa tatou te hinaaro nei ia herehia mai tatou e ia haafaufaahia mai. Pauroa tatou te imi nei i te popou e te oaoa i roto i te oraraa. E no to’na iteraa i te reira, pinepine roa Satane i te paru i te taata i te taiʻata ma te haʻuti i ni‘a i to ratou mau hinaaro tumu. E tuu mai oia i te parau fafau no te mana‘o au, te oaoa e te maha.

Areʻa râ, e haavareraa noa te reira. Mai ta te taata papaʻi Maseli i parau : « O tei moiheuo ra, e maamaa rahi ïa ; O tei na reira ra, ua taparahi ïa ia’na iho » (Maseli 6:32). Ua haapii atoa Samuela te ati Lamana i taua mea nei a parau ai oia, « I titau na outou i te maitai na roto i te raveraa i te ohipa ino, o te mea au ore ïa i te huru no taua parau-ti‘a nei » (Helamana 13:38). Ua parau ohie mai Alama : « E ere roa te parau ino i te oaoa » (Alama 41:10).¹⁶

Te vai ra te hoê parau tahito tei na ô mai e : E mea maitai a‘e te faaineineraa e te arairaa i te tâtâîraa e te tatarahaparaa. Ua tano roa hoʻi te reira no te ture o te viivii-ore. Te reni paruru matamua no te tape‘a ia vai mâ noa tatou i te pae morare, o te faaineineraa ïa ia tatou ia patoʻi i te faahemaraa e ia arai i te toparaa tatou i roto i te hara.¹⁷

Hōho’a

Young adults in San Diego, California.

Te vai ra paha te tahi taata, ua taere roa te aʻoraa ia faaineine e ia arai i teie ohipa. Ua oti roa paha outou i te tafifiraa i teie hara teimaha. Mai te peu teie to outou vairaa, aita e rave‘a ê atu â i teie nei maori râ te tâtâ‘îraa i to outou oraraa e te tatarahaparaa i ta outou mau hara. No outou, e parau atu vau i teie na mana‘o faufaa rahi e pae ta outou e nehenehe e rave no te hoʻi mai i te mâraa i te pae morare. E maʻue ê atu i teie nei â taime mai roto mai i te mau vahi atoa tei roto outou e o te ume nei ia outou ia hara e aore râ o te riro i te ume ia outou ia hara. E tiaoro i te Fatu i te mana no te upooti‘a. E vaiiho i to outou feia faatere no te autahu‘araa ia tauturu ia outou no te faaafaroraa i te hape e no te hoʻi mai i roto i te auhoaraa papû o te Fatu. A inu i te pape pihaa a te Atua e a faaî faarahi i to outou oraraa i teie mau puna au no te mana. E haamana‘o e, na roto i te tatarahaparaa ti‘a, e riro faahou mai outou ei taata mâ.

Ratou tei aufau i te hoo titauhia no te tatarahaparaa mau, e mea papû te parau fafau. E nehenehe outou ia mâ faahou mai. E nehenehe te taata hepohepo ia faateiteihia. E manii mai te hau marû no te faaoreraa hara i roto i to outou oraraa. I roto i teie tau tuuraa, ua papû te parau a te Fatu a na ô ai oia e, « Inaha, o oia o tei tatarahapa i ta’na ra mau hara, ua faaorehia ïa te reira, e e ore hoʻi au, o te Fatu e haamanaʻo faahou â i te reira » (PH&PF 58:42).³⁰

E ti‘a i te mau metua ia horo‘a i ta ratou mau tamarii i te tahi mau arata‘iraa taa ê no ni‘a i te viivii-ore i to ratou apîraa ihoa, no to ratou parururaa pae tino e pae morare.³¹

Mai te mea, e mea here na metua ia raua, e mea faatura raua ia raua, e mai te mea i roto i to raua apitiraa moʻa, e mea turu hope raua ia raua e aita e feaaraa no ni‘a i to te tahi here, e riro teie mau mea faufaa tumu i te taʻitaʻihia i roto i te mau utuafare no ananahi. Areʻa mai te mea e, te vai ra te manianiaraa, te mârôraa e te au ore i roto i te utuafare, na reira atoa te tamatamataraa i te rave i te tahi ohipa faahinaaroraa i te tahi atu taata na rapae, ei reira te mau utuafare no ananahi e haaparuparuhia ai… 

E ti‘a i to tatou mau utuafare ia riro ei pare puai na roto i te haaparahiraa i te parau-ti‘a e na roto i te hopoiraa i reira te hau, te tahoêraa e te pipiri ore te mahuti mai na roto i te mâraa o te taata, te feaa-ore-raa i to te tahi here e te rave‘a ohie no te fafau-hope-raa ia’na i te utuafare. E ti‘a roa i te mau metua ia farii i te faaipoiporaa ei faanahoraa hanahana, e ia faatura ratou i te ti‘araa metua. E ti‘a i te mau tamarii ia faaûruhia na roto i te parau e te hi‘oraa, no te faaineineraa no te faaipoiporaa, no te arairaa i te peu faufau mai te arairaa i te hoê maʻi faufau, e no te raveraa i te tahi atoa mau hiroʻa tumu no te oraraa keresetiano.³²

Aita to to tatou Metua i te Ao ra hinaaro ê atu maori râ ia oaoa tatou. Te parau nei Oia ia tatou i taua mau mea nei e oaoa ai tatou. E te hoê o te mau parau tumu papû roa a‘e tei horo‘ahia mai e te Atua no te tauturu ia tatou ia noaa taua oaoa ra, o te ture no te viivii-ore ïa. Te pure nei au ma to’u aau atoa ia feruri maite outou i te mau faahopearaa oaoa no te haapa‘oraa i teie ture, na reira atoa te mau faahopearaa ati rahi no te ofatiraa i te reira.³³

Te hoê tumu no te peu mâ—e tei roto atoa to tatou iho viivii-ore, te mau mana‘o e te mau raveraa mâ, e te haavare ore—oia hoʻi ïa, ia roaa ia tatou te Varua e te mana o te Atua i roto i to tatou oraraa e ti‘a’i, no te raveraa i te ohipa a te Atua. Aita ana‘e tera mana e tera faaûruraa, aita ïa tatou i maitai a‘e i te tahi atu taata no te tahi atu faanahoraa. Te anaana nei te reira peu mâ e e riro te reira i te faaûru ia vetahi ê ia haere i ni‘a i te hoê oraraa maitai a‘e e ia faatupu i roto i te mau melo ore te hiaai ia tuatapapa i to tatou faaroo.³⁴

A haapa‘o i te mau ture mo‘a a te Atua. A haamana‘o, aita e ofatiraa aita e faautuʻaraa. Mai te mea ua hinaaro outou ia oaoa e ia manuïa i roto i ta outou apitiraa, ta outou arapaeraa e te paturaa o to outou utuafare i ni‘a i te fenua nei, a faatuʻati i to outou oraraa i ni‘a i te mau ture mure ore o te raʻi. Aita e raveʻa ê atu.³⁵

Aita e oaoaraa maoro i roto i te taiʻata. Aita e popou e itehia i roto i te ofatiraa i te ture no te viivii-ore. Areʻa i te tahi pae, te vai ra ïa. E taime au iti paha e vai ra. E mai te huru ra e, e mea faahiahia te mau mea atoa i tera taime. Teie râ, e oioi roa teie auraa i te avaava mai. E parahi mai te mana‘o faahapa e te haamâ. E riʻariʻa tatou ia itehia mai ta tatou mau hara. E nee tatou no te tapuni, e no te haavare. E haamata te here i te pohepohe. E haamata te mana‘o maramara, te pohehae, te riri e tae noa’tu te tairoiro i te rahi mai. Pauroa te reira, e mau faahopearaa natura no te hara e no te ofatiraa ture.

I te tahi râ pae, ia haapa‘o tatou i te ture no te viivii-ore e ia vai mâ noa tatou i te pae morare, e ite tatou i te mau haamaitairaa no te here rahi e te hau rahi, te ti‘aturiraa rahi a‘e e te faatura i to tatou hoa faaipoipo, te fafauraa hohonu a‘e i te tahi e te tahi, e na roto i te reira, te hoê oaoa e te popou huru rahi e te faahiahia.³⁶

• Ua parau te peresideni Benson e, ua riro te faatureraa a te Fatu no ni‘a i te vai-mâ-raa i te viivii-ore ei mea « papû e te hape ore » (tuhaa 1). Eaha te taa-ê-raa i rotopu i teie faatureraa e te mau poroʻi o teie nei ao ?

• Eaha te tahi o te mau faahopearaa no te ofatiraa i te ture no te viivii-ore ? (No te tahi mau hi‘oraa, a hi‘o i te tuhaa 2).

• Eaha te mau mea taa ê ta tatou e nehenehe e rave no te paruru ia tatou e to tatou utuafare i mua i te faahemaraa o te peu faufau ? (No te tahi mau hi‘oraa, a hi‘o i te tuhaa 3).

• A hi‘o faahou â i te parau aʻo a te peresideni Benson no te feia i roto i « teie hara teimaha » (tuhaa 4). Eaha to outou mana‘o e eaha te mea i to outou aau ia feruri ana‘e outou i te parau fafau a te Fatu, ia farii i te taata tatarahapa tei « hoʻi mai i roto i auhoaraa papû » ?

• I to outou mana‘o, no te aha e mea faufaa no te mau metua ia « horo‘a i ta ratou mau tamarii i te tahi mau arata‘iraa taa ê no ni‘a i te viivii-ore i to ratou apîraa ihoa » ? Nahea te haapa‘o-maitai-noa-raa o na metua, te tahi i te tahi, e faaûru ai i te mana‘o o ta ratou mau tamarii no ni‘a i te faaipoiporaa e te ture no te viivii-ore ? (A hi‘o i te tuhaa 5).

• Eaha te tahi o « te mau faahopearaa oaoa » no te haapaʻoraa i te ture no te viivii-ore ? (No te tahi mau hi‘oraa, a hi‘o i te tuhaa 6).

Genese 39:7–21; 1 Korinetia 6:18–20; Galatia 5:16; Alama 38:12; 39:3–5; 3 Nephi 12:27–30; PH&PF 42:22–25

« A faaitoito i te feia o ta outou e haapii ra ia haere ineine mai i te piha haapiiraa e ia amui mai. Ia faaitoito ratou iho i te haapiiraa i te evanelia, te tauturu ra ïa ratou i te hoê varua haapiiraa i roto i te haapiiraa » (Te haapiiraa : Aita e piiraa teitei a‘e [1999], 82).