Iesu Mesia, to tatou Faaora e to tatou Taraehara.

Aita e faaûruraa ê atu tei faatupu i te ohipa rahi a‘e i ni‘a i te fenua nei, maori râ te ora o Iesu Mesia. Eita ta tatou e nehenehe e feruri i to tatou oraraa e aita ta’na mau haapiiraa. Aita ana‘e oia, ua moʻe ïa tatou i roto i te tahi mau ti‘aturiraa e te tahi mau haamoriraa haavarevare, ua fanauhia tatou i roto i te taiâ e te poiri, i reira te arearea tino e te materia te puairaa. E mea atea roa tatou i te fâ ta’na i tuu mai no tatou, atira noa’tu, eiaha roa’tu tatou e haamoʻe i te reira, eiaha atoa tatou e haamoʻe e, eita ta tatou paʻumaraa rahi i te maramarama, i te maitai-roa-raa, e manuïa maori râ, na roto ana‘e i ta’na mau haapiiraa, to’na ora, to’na pohe e to’na ti‘a-faahou-raa⁸

No te faatupu i te au e i te mauruuru no te mau mea ta [Iesu Mesia] i rave no tatou, e ti‘a ia tatou ia haamana‘o i teie mau parau mau faufaa :

Ua haere mai Iesu i ni‘a i te fenua nei no te rave i te hinaaro o to tatou Metua.

Ua haere mai Oia ma te ite e, e amo Oia i ni‘a Ia’na i te hopoi‘a o ta tatou paatoa mau hara.

Ua ite Oia e faateiteihia Oia i ni‘a i te satauro.

Ua fanauhia Oia ei Faaora e ei Taraehara no te mau taata atoa.

Ua ti‘a Ia’na ia faaoti i Ta’na ohipa no te mea o Oia te Tamaiti a te Atua e tei Ia’na te mana o te Atua.

Ua hinaaro mau Oia e rave i Ta’na misioni no te mea ua here Oia ia tatou.

Aore to te hoê noa’tu taata tahuti e mana e aore râ, e ti‘araa no te faaora i te taatoaraa o te tahi atu mau taata tahuti mai roto mai i to ratou huru pau e te hi‘a, aita atoa e taata e nehenehe e horo‘a ti‘amâ i to’na ora no te faatupu i te ti‘a-faahou-raa rahi no te taatoaraa o te tahi atu mau taata tahuti.

O Iesu Mesia ana‘e tei ti‘a e tei hinaaro ia rave i taua huru ohipa faaora ra o te here.⁹

Ua haere mai Iesu Mesia… i ni‘a i teie fenua i te hoê tau tei faataa-a‘ena-hia na roto i te hoê fanauraa huiarii tei faaherehere i To’na ti‘araa atua. Tei roto Ia’na te hiro‘a o te taata nei na roto i To’na metua vahine tahuti e te hiro‘a Atua e te mau mana o To’na Metua i te Ao ra.

Na roto i teie huru ti‘araa fatu ai‘a taa ê To’na, ua riro Ia’na te ti‘araa hanahana ra—Te Tamaiti Fanau Tahi a te Atua i te tino nei. Ei Tamaiti na te Atua, ua fatu Oia i te mau mana e te ite aore roa e taata i farii na mua a‘enei e i muri atu. O Emanuera mau Oia, te auraa, « Te Atua i ô tatou nei ». (A hi‘o Isaïa 7:14 ; Mataio 1:23).

Noa’tu e, e Tamaiti Oia na te Atua tei tonohia mai i te fenua nei, ua titau te faanahoraa hanahana a te Metua ia farii Iesu i te mau fifi e te mau ati o te tahuti nei. E no reira, ua roohia Oia i « te mau faahemaraa,… e te poia, e te poihâ, e te rohirohi ». (Mosia 3:7.)

No te riroraa ei Taraehara no te mau tamarii paatoa a to tatou Metua, ua titauhia ia Iesu ia haapa‘o maitai hope roa i te mau ture atoa a te Atua. No te mea ua tuu Oia Ia’na iho i raro a‘e i te hinaaro o te Metua, ua tupu a‘era Oia « mai te aroha i te aroha, e tae noa’tu i te taime oia i farii ai i te îraa » o te mana o te Metua. No reira « ua farii oia i te mana atoa, no roto i te ao ra e i ni‘a i te fenua nei ». (PH&PF 93:13, 17).¹⁰

E Atua Iesu—e Tamaiti hoʻi na te Atua—no reira, ua ti‘a Ia’na ia amo i te teimaha e te hopoi‘a o te mau hara a te tahi atu mau taata i ni‘a Ia’na iho. Ua tohu Isaïa no ni‘a i te hinaaro o to tatou Faaora ia rave i te reira i te na ôraa e : « Ua rave mau râ oia i to tatou paruparu, e ua hopoi ê oia i to tatou oto : … i paruparu râ oia i ta tatou nei hara, i tairihia oia i to tatou nei ino : e te a‘o i hauhia ai to tatou, tei ni‘a ïa ia’na, e no to’na paruparu e ora ai tatou ». (Isaïa 53:4–5.)

Taua ohipa mo‘a ra e te pipiri ore, te raveraa i ni‘a Ia’na iho, na roto i To’na iho hinaaro, i te mau hara a te taatoaraa o te tahi atu mau taata, o te Taraehara ïa. Nahea pai hoê taata e nehenehe ai e amo i te mau hara a te mau taata atoa, eita e roaa i te haroʻaroʻaraa taata tahuti ia taa maitai. Teie râ ta’u i ite : ua rave mau Oia i ni‘a Ia’na i te mau hara a te mau taata atoa, e ua na reira Oia no To’na here mure ore ia tatou tata‘itahi. Na ô maira Oia : « No te mea inaha, ua faaoroma‘i au, o te Atua, i teie nei mau mea no te taata’toa, ia ore ratou ia roohia i te mamae mai te mea e e tatarahapa ratou… na te reira mamae rahi i faatupu i roto ia’u, oia o te Atua, o tei hau a‘e i te mau mea atoa ra, i te rurutaina no te mauiui, e ua tahe maira te toto na te mau poa’toa, e ua mauiui i te tino e te varua atoa hoi—e ua hinaaro hoʻi ia ore au ia inu i te au‘a maramara e oriorio atu ». (PH&PF 19:16, 18).

Noa’tu te mauiui o taua ohipa ra, ua rave Oia i te au‘a e ua inu. Ua amo Oia i te mamae o te mau taata atoa ia ore hoʻi tatou ia mauiui. Ua faaoroma‘i Oia i te faahaehaaraa e te faainoraa o To’na mau taata hamani ino ma te amuamu ore e aore râ, ma te faaho‘i ore i te ino. Ua faaruru Oia i te taʻiri e te haamâ o te taparahi-ino-raa rahi—te satauro.¹¹

I Getesemane e i Kalavaria, ua faaoti [Iesu] i te taraehara hope ore e te mure ore. O te ohipa rahi a‘e ïa no te here i roto i te tuaai i papa‘ihia. I muri iho, To’na ïa poheraa e te tia-faahou-raa.

Riro mai nei Oia ei Taraehara no tatou no te faaora ia tatou paatoa i te pohe tino, e no te faaora ia tatou i te pohe varua, tatou o te haapa‘o i te mau ture e te mau oro‘a o te evanelia.¹²

Eita roa’tu paha tatou e ite e e maramarama i te tahuti nei e, e mea nahea Oia i te rave-faaoti-raa i te ohipa Ta’na i rave, tera râ, eiaha roa tatou e ore e maramarama no te aha Oia i rave ai i te mea Ta’na i rave.

Te mau mea atoa Ta’na i rave, ua faaûruhia ïa e To’na here pipiri ore e te hopea ore no tatou.¹³

Te mau ohipa rarahi roa a‘e o te tuaai, o te mau ohipa ïa e haaputapû i te faito rahi a‘e o te taata i roto i te hoê pu‘e tau roa a‘e. Ia au i teie arata‘iraa mana‘o, aore e ohipa hau atu i te faufaa no te taata e aore râ, no te nunaa maori râ te tiʻa-faahou-raa o te Fatu.

E parau papû te tiʻa-faahou-raa o te mau taata atoa tei ora e tei pohe i ni‘a i te fenua nei, e mea papû maitai e, e ti‘a i te hoê taata ia faaineine maitai no taua ohipa ra. Ia riro te hoê tiʻa-faahou-raa hanahana ei titauraa na te mau tane e te mau vahine atoa, no te mea e parau papû te parau no te tiʻa-faahou-raa.

Aita e ohipa hau atu i te rahi maori râ te tiʻa-faahou-raa. E tiʻa faahou te mau taata atoa. « Mai te taata i hope i te pohe ia Adamu, e hope atoa i te tiʻa faahou i te Mesia ». (1 Korinetia 15:22).

Te faaʻite mai nei te parau i papa‘ihia ra e, i te toru o te mahana i muri a‘e i te faasatauroraahia o Iesu, ua tupu te hoê aueueraa fenua rahi. Ua faataa-ê-hia te ofaʻi i te uputa o te menema ra. Mai rotopu mai i Ta’na mau pĭpĭ faaroo roa a‘e, haere maira e toofanu pu‘e vahine i taua vahi ra e ta ratou raau no‘ano‘a « aita râ te tino o te Fatu ra o Iesu ».

Ua fâ maira te mau melahi e na ô maira, « Eaha outou i imi ai i te ora i te vairaa o te pohe ? Aore Oia i ô nei, ua ti‘a ïa i ni‘a ». (Luka 24:3–6). Aore hoê mea i roto i te tuaai e aifaito i te reira parau faaara faahitimahuta ra : « Aore Oia i ô nei, ua ti‘a ïa i ni‘a ».

Ua niuhia teie parau no te tiʻa-faahou-raa o to tatou Fatu i ni‘a i te mau faaʻiteraa a te mau ite papû e rave rahi. Ua fâ mai te Fatu tiʻa faahou i te mau vahine e rave rahi, i na pĭpĭ e piti i ni‘a i te e‘a no Emausa, ia Petero, i te mau aposetolo ; e « muri a‘era hoi », mai ta Paulo i parau, « i itea oia e te mau taea‘e e pae atoa hanere e tiahara … E te hopea ihora, itea atoa ihora ia [Paulo] ». (1 Korinetia 15:6, 8)… 

Ei hoê o te mau ite No’na i te mau mahana hopea nei, te faaʻite papû nei au e, te ora nei Oia i teie mahana. E taata tiʻafaahou Oia. O Oia to tatou Faaora, to tatou Fatu, te Tamaiti mau a te Atua. Te faaʻite papû nei au e, e ho‘i faahou mai â Oia ei Fatu faahanahanahia, e tei tiʻafaahou. E ere taua mahana ra i te mea atea roa. No te mau taata atoa o te farii Ia’na ei Faaora e ei Fatu, te auraa no To’na tiʻa-faahou-raa, maori râ, aita te ora e hope i te pohe ra, i te mea e, ua fafau mai Oia e : « No te mea e ora vau, e ora atoa hoʻi outou ». (Ioane 14:19).¹⁴

Tei Ia’na ana‘e ra te mana no te tiʻa-faahou-raa. E no reira i te ru‘i toru ra i muri mai i To’na ra hunaraa, ua haere maira Oia i rapae i te menema, ua ora e ua faaʻite Ia’na iho i te mau taata e rave rahi … Ei hoê o te mau ite taa ê [No’na] ra tei piihia i teie mahana, te faaʻite papû nei au ia outou e, te ora nei Oia. Te ora nei Oia i roto i te tino tiʻafaahou. Aita e parau mau e aita e ohipa ta’u i papû aʻe e ta’u e ti‘aturi a‘e, maori râ te parau mau no te tiʻa-faahou-raa papû o to tatou Fatu.¹⁵

Te haamaitairaa faufaa rahi roa a‘e e ti‘a i te mau melo atoa o te Ekalesia ia farii maori râ, o te hoê ïa iteraa papû no ni‘a i te hanahana o Iesu Mesia e ta’na Ekalesia. Te hoê iteraa papû, o te hoê ïa o te mau mea rii e ti‘a ia tatou ia hopoi na muri iho ia tatou i te taime a faaru‘e ai tatou i teie oraraa.

Te fariiraa i te hoê iteraa papû no ni‘a ia Iesu, o te fariiraa ïa i te hoê iteraa na roto i te Varua Maitai no ni‘a i te misioni hanahana a Iesu Mesia.

Te hoê iteraa papû no ni‘a ia Iesu, o te iteraa ïa i te natura hanahana no te fanauraa o to tatou Fatu—oia hoʻi, o Oia mau te Tamaiti Fanau Tahi i roto i te tino nei.

Te hoê iteraa papû no ni‘a ia Iesu, o te iteraa ïa e, o Oia taua Mesia ra i fafauhia mai, e a ora ai Oia i rotopu i te taata nei, ua faatupu Oia e rave rahi mau semeio rarahi.

Te hoê iteraa papû no ni‘a ia Iesu, o te iteraa ïa e, te mau ture Ta’na i horo‘a mai ei haapiiraa tumu Na’na ra, e parau mau ïa, ei reira, ia haapa‘o i te reira mau ture e mau oro‘a.

Te fariiraa i te hoê iteraa papû no ni‘a ia Iesu, o te iteraa ïa e, ua rave Oia i ni‘a iho Ia’na i te mau hara a te mau taata atoa, na roto i To’na iho hinaaro, i roto i te Ô i Getesemane, e ua haamamae te reira Ia’na i te tino e te varua, e ua faatahe mai i te toto na roto i te mau poa atoa. Ua rave Oia i teie mau mea atoa ia ore tatou ia mauiui mai te mea e tatarahapa tatou. (A hi‘o PH&PF 19:16, 18).

Te fariiraa i te hoê iteraa papû no ni‘a ia Iesu, o te iteraa ïa e, ua haere mai Oia i rapae i te menema ma te tino iʻo e te tiʻafaahou. E no te mea hoʻi e, te ora nei Oia, e ora atoa ïa te mau taata atoa.

Te fariiraa i te hoê iteraa papû no ni‘a ia Iesu, o te fariiraa ïa i te iteraa e, ua fâ mai te Atua te Metua e o Iesu Mesia i te peropheta ra ia Iosepha Semita no te haamau i te hoê tau tuuraa apî no Ta’na evanelia, ia ti‘a hoʻi i te faaoraraa ia porohia i te mau nunaa atoa hou a ho‘i mai ai Oia.

Te fariiraa i te hoê iteraa papû no ni‘a ia Iesu, o te iteraa ïa e, ua riro te Ekalesia, Ta’na i faati‘a i roto i te afaraa o te tau e Ta’na i faaho‘i faahou mai i te anotau hopea nei, mai ta te Fatu iho i parau ra, i « te ekalesia parau-ti‘a ana‘e e te mea ora i ni‘a i te ao paatoa nei ». (PH&PF 1:30).

E mea faufaa rahi te fariiraa i te hoê iteraa papû mai teie te huru. Te mea faufaa rahi roa’tu râ, o te vai-itoito-raa i roto i to tatou iteraa papû.

Te hoê iteraa papû no ni‘a ia Iesu, o te fariiraa ïa i te misioni hanahana a Iesu Mesia, te fariiraa ïa i Ta’na evanelia, e te raveraa i Ta’na mau ohipa. O te farii-atoa-raa ïa i te misioni tohuhia a Iosepha Semita e tae noa’tu i te feia tei mono mai ia’na e tei haapa‘o i ta ratou a‘o. Mai ta Iesu i parau ra, « Na roto i to’u iho reo e aore râ, na roto i te reo o ta’u mau tavini, hoê â ïa ». (PH&PF 1:38).

No ni‘a i te feia o te farii i te mau haamaitairaa o te basileia tiretiera, na ô atura te Fatu ia Iosepha Semita :

« O ratou ïa o tei farii i te parau faaʻite a Iesu, e ua faaroo i to’na ra i‘oa e ua bapetizohia hoʻi na roto i te huru o to’na tanuraahia, ua tanuhia hoʻi i raro a‘e i te pape i roto i to’na ra i‘oa, e o teie mai te au i te faaueraa ta’na i horo‘a mai ra ». (PH&PF 76:51).

Teie te feia tei itoito i roto i to ratou iteraa papû no ni‘a ia Iesu, mai ta te Fatu i parau ra, o ratou ïa « o tei upooti‘a hoʻi na roto i te faaroo, e ua taatihia’tu hoʻi e te Varua Mo‘a no te fafauraa, o ta te Metua i ninii mai i ni‘a ia ratou atoa o tei parau-ti‘a e tei haapa‘o maitai hoi ». (PH&PF 76:53).¹⁶

Te parau tumu matamua o ta tatou haapa‘oraa faaroo, o te faaroo ïa i te Fatu ia Iesu Mesia. No te aha e mea ti‘a ia tatou ia faatumu i to tatou ti‘aturiraa, ta tatou tiaʻiraa i ni‘a i te hoê noa iho tino ? No te aha e mea faufaa te faaroo Ia’na no te farii i te hau i roto i te feruriraa i roto i teie oraraa e te ti‘aturiraa i roto i te ao a muri a‘e ?

Na ta tatou mau pahonoraa i teie mau uiraa e haapapû mai e, te hi‘o ra anei tatou i te ananahi ma te itoito, te ti‘aturi e te mana‘o maitai, e aore râ, ma te măta‘u, te hepohepo e te mana‘o ti‘aturi ore.

Teie ta’u parau poro‘i e to’u iteraa papû : O Iesu Mesia ana‘e te ti‘a ia horo‘a mai i taua tiaʻiraa ra, taua ti‘aturiraa ra, e taua puai ra ta tatou e titau nei no te upooti‘a i ni‘a i te ao nei e no te ti‘a i ni‘a a‘e i to tatou mau hi‘araa i te tino nei. No te rave i te reira, e titauhia ia tatou ia tuu i to tatou faaroo i ni‘a Ia’na e ia ora ho‘i i Ta’na ra mau ture e Ta’na mau haapiiraa ».… 

Te faaroo i roto Ia’na e ere ïa i te ite-noa-raa e, te ora nei Oia. Ua hau atu ïa i te poro-noa-raa i te ti‘aturiraa.

Te faaroo ia Iesu Mesia o te ti‘aturi-hope-roa-raa ïa Ia’na. Ei Atua, e mana, e ite e e here hopea ore To’na. Aita e fifi to te taata nei e ore e tae‘ahia i To’na ti‘araa ia faatîtîʻaifaro i te reira. Ua pou Oia i raro a‘e i te mau mea atoa ra (a hi‘o PH&PF 122:8), no reira, ua ite Oia e nahea ia tauturu ia tatou ia ti‘a i ni‘a a‘e i to tatou mau tafifi o te mau mahana atoa.

Te faaroo i roto Ia’na, o te ti‘aturiraa ïa e, noa’tu e, aita tatou e maramarama nei i te mau mea atoa, O’na râ, oia ïa. No reira, titauhia ia tatou ia hi‘o Ia’na « i roto i te mau mana‘o atoa ; eiaha e feaa, eiaha e măta‘u ». (PH&PF 6:36).

Te faaroo i roto Ia’na, o te ti‘aturiraa ïa e, tei roto Ia’na te mau mana atoa i ni‘a i te mau taata atoa e te mau nunaa atoa. Aita e ino eita e mau Ia’na ia tape‘a. Tei roto te mau mea atoa i To’na rima. Ua riro teie fenua ei hau tiʻa No’na. Teie râ, te vaiiho nei Oia i te ino ia ti‘a ia tatou ia ma‘iti i rotopu i te maitai e te ino.

Ua riro Ta’na evanelia ei arata‘i papû maitai no te mau fifi atoa o te taata nei e no te mau ma‘i sotiare.

Tera râ, e faufaahia Ta’na evanelia mai te mea e, e faaohipahia te reira i roto i to tatou oraraa. No reira, « A popou na outou i te parau a te Mesia ; inaha hoʻi, e faaʻite te parau a te Mesia ia outou i te mau mea ta outou e haapa‘o». (2 Nephi 32:3).

Ia ore tatou e haapa‘o i Ta’na mau haapiiraa, aita ïa tatou e faaʻite nei i te faaroo Ia’na.

A feruri na i te taa-ê-raa o teie nei ao ahiri e, e rave te mau taata atoa mai Ta’na i parau ra : « Hinaaro oe i to Atua ia Iehova ma to aau atoa, e ma to varua atoa, e ma to mana‘o atoa … E aroha’tu oe i to taata tupu, mai to aroha ia oe iho na ». (Mataio 22:37, 39).

No reira, eaha ïa te pahonoraa i te uiraa e « Eaha te ti‘a ia ravehia no ni‘a i te mau fifi e i te mau pe‘ape‘a ta te taata, te mau fenua e te mau nunaa e farerei nei i teie mahana ? » Teie Ta’na haapiiraa ohie roa :

« A faaroo i te Atua ; a faaroo e, te vai ra oia, e na’na iho i hamani i te mau mea atoa ra, tei te ra‘i e te ao atoa hoʻi ; a faaroo e, tei ia’na te paari hope, e te mana atoa i te ao nei, e i te ra‘i atoa hoʻi, a faaroo e, aita e ti‘a i te taata ia haroʻaroʻa i te mau mea mai ta te Atua e haroʻaroʻa ra… 

« A faaroo outou e, ia tatarahapa outou i ta outou mau hara e ti‘a ai, e ia haapae i te reira, e ia faahaehaa ia outou iho i mua i te Atua ra ; a ani ai ma te aau tae ia faaorehia ta outou e ana ra ; e tena na, te faaroo na outou i taua mau mea ra, e haapa‘o ïa outou ». (Mosia 4:9–10 ; ua apitihia’tu te papa‘i faaopa).¹⁷

Te hoê o te mau tumu o teie oraraa, ia tamatahia ïa tatou ia itehia e, « e haapa‘o anei [tatou] i te mau mea atoa ta te Fatu » to tatou Atua e faaue mai ia tatou. (Aberahama 3:25). Parau poto noa tatou e, ua titauhia ia tatou ia haapii i te hinaaro o te Fatu e ia rave i te reira. Titauhia ia tatou ia pee i te hi‘oraa o Iesu Mesia e ia riro mai Ia’na te huru.

Te uiraa faufaa rahi o te oraraa nei, o te uiraa ïa i uihia e Paulo : « E te Fatu, eaha vau, eaha to oe hinaaro ? (Te Ohipa 9:6)… 

Te hinaaro nei tatou i te tahi atu â mau tane e mau vahine no te Mesia, o te haamana‘o noa Ia’na, o te haapa‘o i Ta’na mau faaueraa Ta’na i horo‘a mai ia ratou ra. Te faito rahi a‘e o te manuïaraa, o te iteraa ïa i te fatataraa ta tatou e nehenehe e haere i te mau taime atoa i roto i to’na mau taahiraa.¹⁸

Te vai te tahi… tei hinaaro ia pohe no to ratou faaroo, aita râ ratou e hinaaro nei ia ora hope roa no te reira. Ua ora e ua pohe te Mesia no tatou. Na roto i Ta’na Taraehara e na roto i te haereraa na ni‘a i to’na mau taahiraa, e roaa ia tatou te horo‘a rahi a‘e i te mau horo‘a atoa—te ora mure ore, oia te huru oraraa o tei Mure Ore rahi—to tatou Metua i te Ao ra.

Ua ui te Mesia i te uiraa e, « Eaha to [tatou] huru e au ai ? » Ua pahono a‘era Oia i te na oraa e, mai Ia’na ra te huru. (3 Nephi 27:27).

Te [taata] tei haafatata roa i to’na oraraa i to te Mesia, e taata rahi a‘e ïa e te haamaitaihia e te oaoa. E ere teie parau no te mau tao‘a, te mana e te roo no teie nei ao. Hoê noa iho faito mau o te rahi, o te popou, o te oaoa, maori râ, o te huru ïa te fatataraa o te hoê oraraa i to te Fatu, o Iesu Mesia. O Oia te haerea mau, te parau mau hope e te ora auhune.

E riro e, o teie te uiraa e ti‘a ia vai tamau noa e ia ohu noa i roto i to tatou feruriraa, no ni‘a i te mau mana‘o e te mau ohipa atoa o to tatou oraraa, « E te Fatu, eaha vau, eaha to oe hinaaro ? » (Te Ohipa 9:6). E mea na roto ana‘e i te Maramarama o te Mesia e te Varua Maitai te pahonoraa i taua uiraa ra e tae mai. Ua fana‘o ïa te feia e ora i te hoê oraraa e faaîhia ai to ratou tino i na mea e piti ra… 

Ia hi‘ohia te mau mea atoa ta [Iesu Mesia] i rave e Ta’na e rave nei no tatou, te vai ra hoê mea o te ti‘a ia tatou ia faaho‘i Ia’na ra.

Te horo‘a rahi a te Mesia no tatou nei o To’na ïa ora e te tusia. No reira, e ere anei ïa te reira atoa ta tatou horo‘a haʻihaʻi Ia’na—to tatou oraraa e ta tatou mau tusia, eiaha i teie noa nei taime, i roto atoa râ i te tau i muri nei ?¹⁹

[O ratou o te] arata‘ihia e te Mesia, e pau ïa ratou i roto i te Mesia ra … E horomiihia to ratou hinaaro i roto i To’na hinaaro. (A hi‘o Ioane 5:30). I te mau taime atoa, e rave ratou i te mau mea e auhia e te Fatu. (A hi‘o Ioane 8:29). Eita ratou e pohe noa no te Fatu, te mea faufaa roa’tu, ua hinaaro ratou e ora No’na.

A tomo i roto i to ratou fare, e faaʻite mai te mau hoho‘a i ni‘a i to ratou mau papa‘i, te mau buka i ni‘a i te mau pa‘epa‘e, te pehe e faaroohia, ta ratou mau parau e te mau ohipa, e Keresetiano ratou. Te ti‘a nei ratou ei mau ite no te Atua i te mau taime atoa, i roto i te mau mea atoa e i te mau vahi atoa. (A hi‘o Mosia 18:9). Tei roto te Mesia i to ratou mana‘o, ia hi‘o ana‘e ratou Ia’na i roto i te mau mana‘o atoa. (A hi‘o PH&PF 6:36). Tei roto te Mesia i to ratou aau e te tuu nei ratou i to ratou aroha i ni‘a Ia’na e a muri noa’tu. (A hi‘o Alama 37:36).

Fatata pauroa te hepetoma te rave nei ratou i te oro‘a mo‘a e te faaʻite faahou nei ratou i to ratou Metua Mure ore e, te hinaaro nei ratou e rave i ni‘a ia ratou i te i‘oa o Ta’na Tamaiti, e i te haamana‘o tamau noa Ia’na, e ia haapa‘o i Ta’na mau faaueraa. (A hi‘o Moroni. 4:3).

I roto i te reo o te Buka a Moromona, « te popou nei ratou i te parau a te Mesia » (2 Nephi 32:3), « parau i te Mesia » (2 Nephi 25:26), « oaoa nei tatou i te Mesia » (2 Nephi 25:26), « ua faaorahia tatou i te Mesia » (2 Nephi 25:25), e « te oaoa nei hoʻi i [to ratou ra] Iesu » (a hi‘o 2 Nephi 33:6). Ei haapotoraa, te haamoʻe nei ratou ia ratou i roto i te Fatu e te ite nei ratou i te ora mure ore. (A hi‘o Luka 17:33).²⁰

• Ua haapii mai te peresideni Benson e, noa’tu e, aita tatou e haroʻaroʻa hope roa e e mea nahea to te Faaora faatupuraa i te Taraehara, e nehenehe râ ta tatou e haroʻaroʻa e no te aha Oia i rave ai i te reira (a hi‘o i te tuhaa 1). Eaha ta teie haroʻaroʻaraa e faatupu mai i roto i to outou oraraa ?

• A haapii ai outou i te tuhaa 2, a feruri i te mea ta te Tiʻa-faahou-raa o te Faaora e faatupu mai. Eaha ta To’na Tiʻa-faahou-raa e faatupu mai i roto i to outou oraraa ?

• I to outou mana‘o, no te aha te hoê iteraa papû no ni‘a ia Iesu Mesia i riro ai ei « haamaitairaa faufaa rahi roa a‘e » ? (A hi‘o i te tuhaa 3). Eaha te auraa no outou te parau no vai-itoito-raa i roto i to tatou iteraa papû no te Faaora ?

• A feruri i te mau parau a te peresideni Benson no ni‘a i te faaroo ia Iesu Mesia (a hi‘o i te tuhaa 4). E mea nahea teie tatararaa o te faaroo i te Mesia i hau atu ai « i te ite-noa-raa e, te ora nei Oia » ?

• Ua parau te peresideni Benson e, te mau taata tei « arata‘ihia e te Mesia » e hinaaro ratou « e pohe… no te Fatu, te mea faufaa roa’tu, ua hinaaro ratou e ora No’na. » (tuhaa 5). I to outou mana‘o, eaha te auraa no te parau ra, e ora no te Faaora ?

Ioane 10:17–18 ; 2 Nephi 9:20–24 ; 31:20–21 ; Mosia 16:6–11 ; 3 Nephi 27:20–22 ; Moroni 7:33 ; PH&PF 19:1–3, 16–19 ; 76:22–24 ; Hiroʻa Faaroo 1:3

« A ite ai oe i te oaoa o te tae mai na roto i to oe maramaramaraa i te evanelia, e mea papû e e hinaaro oe i te faaohipa i te mea o ta oe i haapii. A faaitoito i te oraraa ma te au i to oe ite. Ia na reira oe, e puai to oe faaroo, to oe ite, e to oe iteraa papû » (Ia Poro Haere i Ta‘u nei Evanelia [2004], 21).