Pene 9

Te Buka a Moromona—Ofa‘i fana no ta tatou haapa‘oraa

« Aita anei e mea hohonu e vai nei i roto i to tatou aau, o te hiaaʻi nei ia haafatata’tu i te Atua ? Mai te mea e, te vai ra, e tauturu ïa te Buka a Moromona ia tatou ia na reira, hau atu i te tahi buka ê atu ».

No roto mai i te oraraa o Ezra Taft Benson

I te 5 no tenuare 1986, ua peresideni te peresideni Ezra Taft Benson i te hoê amuiraa tĭtĭ i Annandale, Virginia—ta’na teie amuiraa tĭtĭ matamua ei peresideni no te Ekalesia. Ua « putapû roa » te Feia Mo‘a i te Mau Mahana Hopea Nei o tei tae e faaroo ia’na i te paraparauraa. I roto i ta’na a‘oraa, « ua faaʻite oia i to’na iteraa papû no ni‘a i te mana o te Buka a Moromona no te taui i te oraraa e no te arata‘i i te taata i te Mesia ra ». Ua vauvau oia i te hoê « titauraa puai [ia] tuatapapa i teie buka papa‘iraa mo‘a ».¹

E ere teie poro‘i i te mea apî i roto i te tau faatereraa a te peresideni Benson. Ei melo no te Pŭpŭ no te Tino Ahuru Ma Piti Aposetolo, ua faaitoito pinepine oia i te Feia Mo‘a i te Mau Mahana Hopea Nei ia tuatapapa i te Buka a Moromona e ia haapa‘o i to te reira mau haapiiraa.² Tera râ, ei peresideni no te Ekalesia, ua faaûruhia oia ia haapapû maitai atu â i te reira poro‘i. Ua parau oia e : « Ua faaûru te Fatu i To’na tavini ia Lorenzo Snow ia haapapû faahou i te parau tumu no te tuhaa ahuru no te faaora i te Ekalesia i te fifi moni … I teie nei, i to tatou nei anotau, ua heheu mai te Fatu i te titauraa ia turaʻi-faahou-hia te parau no te Buka a Moromona ».³ Ua faaʻite papû mai te peresideni Benson no ni‘a i te Buka a Moromona i te mau vahi atoa ta’na e haere : i roto i te mau apooraa misionare, te mau amuiraa tĭtĭ e retioni, te mau amuiraa rahi, e te apooraa e te mau Hui Mana Faatere Rahi.⁴

I roto i ta’na a‘oraa matamua no te amuiraa rahi i roto i to’na ti‘araa ei peresideni no te Ekalesia, ua faaʻite mai te peresideni Benson i te hoê tumu e mea rû teie poro‘i. Ua faaara mai oia e, « Mai te mea e, aita tatou e tai‘o i te Buka a Moromona e e haapa‘o i to te reira mau haapiiraa, ua parau mai te Fatu i roto i te tuhaa 84 o Te Parau Haapiiraa e te Mau Parau Fafau e, tei raro a‘e te Ekalesia taatoa i te faahaparaa : ‘E te vai nei teie nei faahaparaa i ni‘a i te mau tamarii no Ziona ra, oia te paatoaraa’ [PH&PF 84:56]. Te parau faahou ra te Fatu e : ‘E e vai noa ratou i raro a‘e i teie nei faahaparaa e tae noa’tu i te taime ratou e tatarahapa ai e e hamana‘o ai te fafau apî ra, oia te Buka a Moromona e te mau faaueraa matamua o ta’u i horo‘a’tu ia ratou ra, eiaha hoʻi ia parau noa, ia rave râ mai te au i ta’u i papa‘i ra’ [PH&PF 84:57] ».⁵

No roto mai teie mau faahitiraa parau i muri nei i i te mau a‘oraa ta te peresideni Benson i horo‘a i roto i to’na ti‘araa ei peresideni no te Ekalesia, ei faahi‘oraa i ta’na mau faaararaa e mau parau fafau no ni‘a i te Buka a Moromona :

« I teie nei aita tatou i titau-noa-hia ia parau hau atu no ni‘a i te Buka a Moromona, titauhia râ ia rave hau atu â i te reira. No te aha ? Ua pahono te Fatu e : ‘Ia ti‘a ia ratou ia faatupu mai i te hotu e au no te basileia no to ratou ra Metua ; ia ore râ e vai noa ïa te faaanoraa e te faautu‘araa ia haamaniihia’tu i ni‘a i te mau tamarii no Ziona’ [PH&PF 84:58]. Ua ite tatou i te reira faaanoraa e te reira faautu‘araa !

« … Aita te Buka a Moromona i riro, e aita â i riro, ei ohipa tumu i roto i ta tatou iho tuatapaparaa, te haapiiraa a te utuafare, te pororaa e te ohipa misionare. Ia tatarahapa tatou i te reira e ti‘a’i ».⁶

« Aita â tatou e faaohipa nei i te Buka a Moromona mai tei titauhia ia tatou. Eita to tatou mau utuafare e puai mai te mea e, eita tatou e faaohipa i te reira no te arata‘i i ta tatou mau tamarii i te Mesia ra. Eita to tatou mau utuafare e viivii i te mau feruriraa e te mau haapiiraa o te ao nei mai te mea e, ua ite tatou e nahea ia faaohipa i teie buka no te faaʻite e no te aro i te mau haavare … Eita to tatou mau misionare e aravihi roa maori râ e [haapii] atu ratou na roto i te reira. Eita te taata faafariu, noa’tu te faito sotiare, te faito morare, te hiro‘a tumu e aore râ, te haapiiraa, eita oia e ora mai i i te ahu o te mahana mai te mea e, eita to’na aa e toro hohonu i roto i te îraa o te evanelia e vai ra i roto i te Buka a Moromona. Eita ta tatou mau piha haapiiraa e î roa i te varua maori râ e faariro tatou i te reira ei faatureraa ».⁷

« Te haamaitai nei au ia outou ia rahi to outou haroʻaroʻa i te Buka a Moromona. Te parau fafau nei au ia outou mai teie taime atu e, mai te mea e, e amu tatou i te mau mahana atoa i to’na mau api e ia haapa‘o i ta’na mau ture, e ninii mai te Atua i ni‘a i te tamarii tata‘itahi o ziona e i ni‘a i te Ekalesia i te hoê haamaitairaa aita â i itehia a‘enei—ei reira hoʻi tatou e ti‘aoro ai i te Fatu ia haamata Oia i te iriti i te faahaparaa—te faaanoraa e te faautu‘araa. Te faaʻite nei au i to’u iteraa papû hanahana no teie ».⁸

« Aita vau i ite hope roa e, no te aha te Atua i faaherehere ai i to’u ora e tae roa mai i teie faito matahiti, tera râ, teie ta’u i ite : No teie hora ua heheu mai Oia ia’u i te titauraa u‘ana ia faahaere tatou i te Buka a Moromona i mua i teie nei ma te maere rahi. E ti‘a roa ia outou ia tauturu i teie hopoi‘a e i teie haamaitairaa Ta’na i tuu i ni‘a i te Ekalesia taatoa, oia hoʻi te mau tamarii atoa no Ziona.

« Aore roa o Mose i tomo i roto i te fenua i parauhia ra. Aore roa o Iosepha Semita i ite i te faaoraraahia o Ziona. Eita paha te tahi pae o tatou e ora maoro no te ite i te mahana e diluvi ai te Buka a Moromona i te fenua nei e i te taime e iriti ai te Fatu i Ta’na faahaparaa. (A hi‘o PH&PF 84:54–58). Tera râ, mai te mea e, e ti‘a i te Atua, te hinaaro nei au e rave i teie ohipa hanahana e hope noa’tu to’u oraraa ».⁹

Ua parau te peropheta Iosepha Semita e, ua riro te Buka a Moromona ei « ofa‘i tape‘a fana no ta tatou haapa‘oraa ».

Te mau haapiiraa a Ezra Taft Benson,

O te Buka a Moromona te ofa‘i tape‘a fana o ta tatou haapa‘oraa.

Eaha te faufaa o te Buka a Moromona ? Ua parau Iosepha Semita i te reira « te ofa‘i tape‘a fana o ta tatou haapa‘oraa ». (History of the Church, 4:461.) « A iriti ê atu i te Buka a Moromona e te mau heheuraa », te parau ra oia, « e teihea ïa ta tatou haapa‘oraa ? Aita hoê aʻe ». (History of the Church, 2:52.)¹⁰

Te hoê ofa‘i tape‘a fana o te ofa‘i tumu ïa i roto i te hoê âpou. E tape‘a te reira i te mau ofa‘i atoa, e ia itirihia, e marua mai te âpou

… Mai te âpou o te marua mai mai te mea e tatarahia te ofa‘i tape‘a fana, e ti‘a e aore râ e marua te taatoaraa o te Ekalesia na roto i te parau mau o te Buka a Moromona. Ua maramarama maitai te mau enemi o te Ekalesia i te reira. No reira hoʻi ratou e faaitoito ai i te tamata i te faahapa i te Buka a Moromona, e mai te mea e manuïa te reira i te faahapahia, e na reira atoa ïa te peropheta Iosepha Semita. E na reira atoa ïa to tatou reo faa‘ite i te mau taviri no te autahu‘araa, e te heheuraa e te Ekalesia tei faaho‘ihia mai. Mai te mea râ e, e parau mau te Buka a Moromona—e ua faaʻite e milioni i teie nei e e iteraa to ratou no ô mai i te Varua ra, e e parau mau ihoa—e ti‘a atura ïa i te taata ia farii i te mau parau no te Faaho‘i-faahou-raa mai e no te mau mea atoa e apee nei i te reira.¹¹

Peneia‘e aita’tu e mea o te faaʻite maramarama atu â i te faufaa rahi o teie buka papa‘iraa mo‘a maori râ te mea ta te Fatu Iho i parau no te reira buka.

Na roto i To’na iho vaha ua faaʻite papû Oia e (1) e parau mau te reira (PH&PF 17:6), tei roto te parau mau e Ta’na mau parau (PH&PF 19:26), (3) ua iritihia te reira na roto i te mana no ni‘a mai (PH&PF 20:8), (4) tei roto te îraa o te evanelia a Iesu Mesia (PH&PF 20:9) ; 42:12), (5) ua horo‘ahia mai te reira na roto i te faaûruraa e ua haapapûhia na roto i te utuuturaa a te mau melahi (PH&PF 20:10), (6) e te haapapû nei te reira e e parau mau te mau papa‘iraa mo’a (PH&PF 20:11), e (7) te feia atoa o te farii i te reira ma te faaroo, e farii ïa ratou i te ora mure ore (PH&PF 20:14).¹²

Te faaʻite papû nei te Buka a Moromona no Iesu Mesia, e te arata‘i nei te reira ia tatou ia haafatata atu â i te Atua.

Te ohipa tumu a te Buka a Moromona, mai tei papa‘ihia i ni‘a i te api upoo parau, maori râ, « ia faaʻite papû atu hoʻi i te ati Iuda e te Etene atoa hoʻi e, o Iesu o te Mesia ïa, te Atua mure ore, o te faaʻite Ia’na iho i te mau fenua atoa ra ».

E ti‘a i te taata imi e te te aau tae mau ia farii i te iteraa papû e, o Iesu te Mesia, ma te feruri maite noa oia na roto i te pure i te mau parau faaûruhia i roto i te Buka a Moromona.¹³

Te haamana‘o ra anei tatou i te fafau apî, oia hoʻi te Buka a Moromona ? Te vai nei i roto i te Bibilia te Faufaa Tahito e te Faufaa Apî. Te parau faufaa o te iritiraa ïa na roto i te reo Peretane no te hoê parau Heleni e nehenehe atoa e iritihia ei fafauraa.Teie anei ta te Fatu e mana‘o ra a pii ai Oia i te Buka a Moromona ei « fafau apî » ? Oia mau, e faufaa apî aore râ e ite faahou â te reira no Iesu. Teie te hoê o te mau tumu i tuu ai matou i te mau parau « Te Tahi Faahou Ite no Iesu Mesia » i ni‘a i te upoo parau no te Buka a Moromona…

Te Buka a Moromona, o te ofa‘i tape‘a fana ïa no to tatou iteraa ia Iesu Mesia, tei riro ho‘i ei ofa‘i tihi no te mau mea atoa ta tatou e rave. Te faaʻite nei te reira ma te puai e te papû maitai e, te vai mau nei Oia. E ere mai te Bibilia tei haere na roto i te mau u‘i taata papa‘ipaʻi, taata iriti, e taata faaroo viivii tei faahuru ê i te papa‘iraa, ua tae mai râ te Buka a Moromona mai te taata papa‘i i te taata tai‘o na roto noa i te hoê taahiraa faaûruhia no te iritiraa. No reira, e mea maramarama, e mea tarapape ore e mea puai hope to te reira iteraa no te Fatu. Ua hau atu â râ ta’na ohipa. Te pato‘i nei te rahiraa o te ao keresetiano i teie mahana i te hanahana o te Faaora. Te uiui nei ratou i te semeio no To’na fanauraa, To’na oraraa maitai roa, e te tupuraa mau o To’na Ti‘a-faahou-raa hanahana. Te haapii nei te Buka a Moromona na roto i te mau parau papû e te hape ore i te parau mau no te taatoaraa o taua mau mea ra. Te horo‘a atoa mai nei te reira i te hoê tatararaa hope roa no ni‘a i te haapiira no te Taraehara. Oia mau, ua riro mau teie buka faaûruhia e to te ra‘i ei hoê ofa‘i tape‘a fana no te faaʻite-papû-raa i to te ao e, o Iesu te Mesia.¹⁴

I roto i te Buka a Moromona, e mea « maramarama, e mea tarapape ore e mea puai hope » te faaʻiteraa papû no ni‘a ia Iesu Mesia.

Ua parau te peropheta Iosepha Semita e, « Ua parau vau i te mau taea‘e e, te Buka a Moromona, o te buka ti‘a roa a‘e ïa i ni‘a i te fenua nei, e o te ofa‘i tihi no ta tatou haapa‘oraa, e e piri roa’tu te hoê taata i te Atua na roto i te tamau-maite-raa i ta’na mau ture ; i te tahi noa’tu buka » [History of the Church, 4:461] … Aita anei e mea hohonu e vai nei i roto i to tatou aau o te hiaai nei ia haafatata’tu i te Atua, ia riro hau atu â mai Ia’na ra te huru i roto i to tatou haerea i te mau mahana atoa, ia ite tamau noa i To’na mana i piha‘i iho ia tatou ? Mai te mea e, te vai ra, e tauturu ïa te Buka a Moromona ia tatou ia na reira, hau atu i te tahi buka ê atu ».

Te faaʻite nei to tatou taea‘e here, te peresideni Marion G. Romney… tei ite no’na iho i te mana e vai ra i roto i teie buka, i te mau haamaitairaa e tae mai i roto i te oraraa o te feia e tai‘o e e tuatapapa i te Buka a Moromona. Ua parau oia e :

« Ua papû ia’u e, mai te mea, i roto i to tatou mau utuafare, e tai‘o te mau metua i te Buka a Moromona ma te pure e te tamau, o ratou iho e ta ratou mau tamarii, e tomo mai ïa te varua o taua buka faahiahia nei i roto i to tatou mau utuafare e i roto i te feia atoa e faaea ra i roto. E rahi atu te varua tura ; e tupu te faaturaraa te tahi i te tahi e te haapa‘oraa i te tahi e te tahi i te rahi. E haere ê atu te varua mârô. E a‘o te mau metua i ta ratou mau tamarii na roto i te here e te paari rahi a‘e. E faaroo e e auraro rahi atu te mau tamarii i te a‘o a to ratou mau metua. E tupu te parau-ti‘a i te rahi. E rahi te faaroo, te ti‘aturi, e te aroha—te hinaaro mau o te Mesia—i roto i to tatou mau utuafare e mau oraraa, ma te hopoi mai i te hau, te oaoa e te popou » (Ensign, Me 1980, api 67).

Teie mau parau fafau—te here e te au-maitai-raa rahi a‘e i roto i te utuafare, te faatura rahi a‘e i rotopu i te metua e te tamarii, te varua e te parau-ti‘a rahi a‘e—e ere ïa i te parau faahiti noa, o te mea mau râ ta te peropheta Iosepha Semita e mana‘o ra a parau ai oia e, e tauturu te Buka a Moromona ia tatou ia haafatata roa’tu i te Atua.¹⁵

Te haapii nei te Buka a Moromona i te haapiiraa tumu mau, te faa‘ite papû nei i te parau hape, e te hohora nei i te mau enemi o te Mesia.

Na te Fatu Iho i parau e, tei roto i te Buka a Moromona te « îraa o te evanelia a Iesu Mesia » (PH&PF 20:9). Aita te reira e parau nei e, tei roto te mau haapiiraa atoa, te mau parau haapiiraa tumu atoa tei heheuhia mai. Te parau maira râ te reira e, e itehia i roto i te Buka a Moromona i te îraa o taua mau haapiiraa tumu nei titauhia no to tatou faaoraraa. E te haapiihia ra te reira ma te papû e te ohie, ia nehenehe atoa i te mau tamarii rii ia haapii mai i te mau e‘a no te faaoraraa e te faateiteiraa. E mea rahi atu â ta te Buka a Moromona e horo‘a nei no te faaaano i to tatou maramaramaraa i te mau haapiiraa tumu no te faaoraraa. Ia ore te reira, e ere ïa te rahiraa o te mea e haapiihia ra i roto i te tahi atu mau papa‘iraa mo‘a i te mea papû roa e te mea faufaa roa.¹⁶

No ni‘a i te pororaa i te evanelia, tei roto i te Buka a Moromona te tatararaa maramarama a‘e e te papû a‘e e te hope roa. Aita e papaa parau no te faaau i te reira. I roto i tei hea papaa parau e roaa ai ia outou te hoê haroʻaroʻaraa hope roa no ni‘a i te parau o te hi‘araa, te parau o te pohe tino e te pohe varua, te haapiiraa tumu o te Taraehara, te haapiiraa tumu o te parau-ti‘a e te aroha e au i te Taraehara, e te mau parau tumu e te mau oro‘a o te evanelia ? Tei roto i te Buka a Moromona te papa‘iraa maramarama a‘e o teie mau haapiiraa tumu faufaa.¹⁷

Te haamau e te haapapû nei… te Buka a Moromona i te Bibilia. Te iriti nei oia i te mau ofa‘i turori, te faaho‘i mai nei oia e rave rahi mau mea maramarama e te faufaa. Te faaʻite papû nei tatou e, mai te mea e faaohipa-apiti-hia te Bibilia e te Buka a Moromona, e faaore te reira i te mau haapiiraa hape, e faaore te reira i te mârôraa e e faatupu hoʻi i te hau. (A hi‘o 2 Nephi 3:12).¹⁸

E mea ti‘a ia tatou… ia ite roa i te Buka a Moromona hau atu i te tahi buka. Eiaha tatou e titau noa ia ite i te mau aamu haapuai faaroo e vai ra i roto, ia haroʻaroʻa atoa râ tatou i te mau haapiiraa o te reira. Mai te mea e, e rave mau tatou i ta tatou tuhaa ohipa e e haafatata hoʻi ia tatou i te Buka a Moromona na roto i te haapiiraa, e nehenehe ïa ta tatou e faaʻite i te mau hape e e ite i te mau parau mau no te patoʻi e rave rahi mau haapiiraa hape e te feruri-hohonu-raa a te taata nei, i teie mahana.

Ua itehia ia’u i roto i te Ekalesia nei i te hoê taa-ê-raa o te iteraa, te hi‘oraa, te ti‘aturiraa e te varua i rotopu i te feia tei ite e tei here i te Buka a Moromona e te feia aita. E au teie buka mai te hoê titi‘a rahi.¹⁹

Te faaʻite nei te Buka a Moromona i te mau enemi o te Mesia. Te faa‘ite papû nei i te mau haapiiraa hape e te faaore nei i te mârôraa. (A hi‘o 2 Nephi 3:12). E faaetaeta te reira i te mau pĭpĭ haehaa a te Mesia i mua i te mau opuaraa ino, te mau faanahoraa e te mau haapiiraa a te diabolo, i to tatou nei anotau. Te huru taata taiva i roto i te Buka a Moromona, hoê â ïa huru i to tatou nei anotau. I roto i To’na ite hohonu, ua hamani te Atua i te Buka a Moromona ia ti‘a ia tatou ia hi‘o i te hape e ia ite nahea ia aro i te mau tumu parau hape o te haapiiraa, te poritita, te haapa‘oraa e te mau feruriraa hohonu o te taata no to tatou nei anotau.²⁰

Ua riro Te Parau Haapiiraa e te Mau Parau Fafau ei hono taamu i te Buka a Moromona e te ohipa tamau no te Faaho‘i-faahou-raa.

Te hinaaro nei au e paraparau taa ê atu no ni‘a i te Buka a Moromona e Te Parau Haapiiraa e te Mau Parau Fafau. Ua nati-hoê-hia teie na buka papa‘iraa mo‘a faahiahia o te mau mahana hopea nei, ei mau heheuraa no ô mai i te Atua o Iseraela ra no teie opuaraa, te haaputuputuraa e te faaineineraa i To’na mau taata no te tae-piti-raa mai o te Fatu.…

Na ô atura te Fatu i te peropheta Iosepha Semita, « E ite râ teie nei u‘i i ta’u nei parau na roto ia oe » (PH&PF 5:10). Ua riro te Buka a Moromona e Te Parau Haapiiraa e te Mau Parau Fafau ei tuhaa no te tupuraa o taua parau fafau ra. Te hopoi mai nei teie na ohipa rahi o te papa‘iraa mo‘a i te mau haamaitairaa rarahi i teie nei u‘i…

Te faaʻite nei teie na papa‘iraa mo‘a rahi o te mau mahana hopea nei i te iteraa mana e te nehenehe no ni‘a i te Fatu ia Iesu Mesia. Te haapii mai nei te api tata‘itahi o Te Parau Haapiiraa e te Mau Parau Fafau e o te Buka a Moromona i te parau no ni‘a i te Fatu—To’na here rahi i Ta’na mau tamarii e To’na tusia taraehara—e te haapii mai nei ia tatou e nahea ia ora ia ti‘a hoʻi ia tatou ia ho‘i faahou Ia’na ra e i to tatou Metua i te Ao ra ra.

Te vai nei i roto i teie na buka papa‘iraa mo‘a faahiahia no te mau mahana hopea nei te ite e te mana no te tauturu ia tatou ia ora i te oraraa maitai a‘e i roto i te hoê anotau ati e te ino rahi. Te feia e imi maite i roto i te mau api o teie mau buka na roto i te pure, e noaa ia ratou te hau, te a‘o, te arata‘iraa, e te mana hau no te haamaitai i to ratou oraraa.²¹

Ua riro Te Parau Haapiiraa e te Mau Parau Fafau ei hono taamu i te Buka a Moromona e te ohipa tamau no te Faaho‘i-faahou-raa, na roto i te peropheta Iosepha Semita e te feia tei mono mai ia’na.

I roto i Te Parau Haapiiraa e te Mau Parau Fafau, te haapii mai nei tatou i te parau no te ohipa o te hiero, no te mau utuafare mure ore, no te mau hanahana, no te faanahonahoraa o te Ekalesia, e e rave rahi atu â parau mau no ni‘a i te Faaho‘i-faahou-raa mai.…

Te Buka a Moromona o te « ofa‘i tape‘a fana » ïa no ta tatou haapa‘oraa, e Te Parau Haapiiraa e te Mau Parau Fafau o te ofa‘i faahope ïa, apitihia mai e te heheuraa tamau o te mau mahana hopea nei. Ua tuu te Fatu i Ta’na titiro mana i ni‘a i te ofa‘i tape‘a fana e te ofa‘i faahope.²²

Te Parau Haapiiraa e te Mau Parau Fafau, o te hoê ïa buka hanahana no te papa‘iraa mo‘a tei horo‘a-ti‘a-hia mai i to tatou nei u‘i. Tei roto i te reira te hinaaro o te Fatu no tatou i teie mau mahana hopea nei hou te tae-piti-raa mai o te Mesia. Tei roto i te reira e rave rahi parau mau e mau haapiiraa tumu tei ore i heheu-hope-hia i roto i te tahi atu papa‘iraa mo‘a. Mai te Buka a Moromona, e haapuai atoa oia i te feia e tuatapapa maite i to’na mau api na roto i te pure.

Tatou te Feia Mo‘a o te Atua Teitei Roa, te poihere ra anei tatou i te parau Ta’na i faaherehere na tatou ma te hoo rahi ? Te faaohipa anei ra tatou i teie mau buka o te heheuraa no te mau mahana hopea nei no te haamaitai i to tatou oraraa e no te aro i te mau mana o te diabolo ? O te tumu ïa i horo‘ahia mai ai te reira. Nahea tatou e ore ai e faahapahia mai te mea e, e rave tapetepete noa tatou i te reira mau mea na roto i te vaiiho-noa-raa ia ratou ia î i te repo i ni‘a i ta tatou mau paepae ?

E au mau taea‘e e au mau tuahine here, te faaʻite papû nei au ma te hanahana e, tei roto i teie mau buka te mana‘o e te hinaaro o te Fatu no tatou i teie mau mahana tamataraa e te ati hoʻi. Te ti‘a nei ratou i piha‘i iho i te Bibilia no te faaʻite no ni‘a i te Fatu e i Ta’na ohipa. Tei roto i teie mau buka te reo o te Fatu no tatou i teie mau mahana hopea nei. E ti‘a ia tatou ia fariu atu i ni‘a i te reira ma te aau tae mau e ia faaohipa i te reira mai te au i ta te Fatu e hinaaro nei ia faaohipahia.²³

Te mau mana‘o tauturu no te tuatapaparaa e te haapiiraa

Uiraa

A tai‘o ai outou i te mau haapiiraa a te peresideni Benson no ni‘a i te riroraa te Buka a Moromona ei ofa‘i tape‘a fana no ta tatou haapa‘oraa (a hi‘o tuhaa 1), a feruri i to’na ti‘araa i roto i to outou oraraa. Eaha te ti‘a ia tatou ia rave no te faariro i te Buka a Moromona ei ohipa rahi a‘e na tatou i roto i ta tatou mau tautooraa ia ora i te evanelia ?
Ua parau te peresideni Benson e, te faaʻite papû nei te Buka a Moromona no Iesu Mesia, e te arata‘i nei te reira ia tatou ia haafatata’tu â i te Atua (a hi‘o i te tuhaa 2). Eaha te tahi mau mea ta outou i apo mai no ni‘a i te Faaora a tuatapapa ai outou i te Buka a Moromona ? E mea nahea to te Buka a Moromona arata‘iraa ia outou e to outou hoʻi utuafare, i piha‘i iho roa’tu â i te Atua ?
No te aha i titauhia ai ia tatou ia « ite roa i te Buka a Moromona hau atu i te tahi buka » ? E mea nahea to te mau haapiiraa tumu i roto i te Buka a Moromona faaitoitoraa ia outou i mua i te « mau haapiiraa a te diabolo, i to tatou nei anotau » ? (A hi‘o i te tuhaa 3).
E mea nahea te Buka a Moromona e te Te Parau Haapiiraa e te Mau Parau Fafau e rave amui nei i te ohipa no te haapuai ia tatou ? (A hi‘o i te tuhaa 4).

Te mau papa‘iraa mo‘a

Isaïa 29:9–18 ; 1 Nephi 13:35–41 ; 2 Nephi 25:23, 26 ; 29:6–9 ; PH&PF 1:17–29

Tauturu haapiiraa

« I roto i te rahiraa o te mau buka haapiiraa, te vaira te mau uiraa no te haamata e no te faatere i te mau aparauraa. E nehenehe outou e faaohipa i teie mau uiraa e e faaineine ia outou iho. A ui i te mau uiraa no te tura‘i i te mau piahi ia feruri maite e no te tauturu ia feruri maite i te evanelia » (Te haapiiraa: Aita e piiraa teitei a‘e [1999], 63).