Filemu ma le Faamalieina e ala i le Ola-Tutoatasi Faaletino

Ou te talitonu i le talalelei o le galue. E leai se mea e i lalo o le lagi e suitulaga i le toaga e galue. O le auala lea e mafai ona ausia ai miti. O le auala lea e avea ai vaaiga mamao e leai ni faamoemoe ma ni ausiga alualu pea i luma.⁴

E lelei sina taalo laitiiti ma sina faamiimiie laitiiti. Ae o le galue e iloa ai le eseesega i le olaga o se alii po o se tamaitai. O le galue e maua mai ai meaai tatou te aai ai, lavalava tatou te oofu ai, ma fale tatou te nonofo ai. E le mafai ona tatou teena le manaomia o le galulue i lima atamamai ma mafaufau aoaoina pe afai o le a tatou tuputupu a’e ma manuia taitoatasi ma faatasi.⁵

Ua ou iloaina o le olaga e le o se faasologa o ni faatinoga maoae tetele. O le olaga i lona tulaga aupito sili ona lelei o se tulaga o le lelei ma le tauagafau faifaipea, o le faia e aunoa ma ni viiga o mea e tatau ona fai, i le taimi e tatau ai ona fai. Ua ou matauina, e le o le maoae o le poto na te faia se eseesega i lenei lalolagi. Ua ou matauina, o galuega a le lalolagi ua matele lava ina faia e alii ma tamaitai o loo i ai ni taleni masani o e na galulue i se auala e sili atu ona tulaga ese.⁶

E tatau i tamaiti ona galulue faatasi ma o latou matua—e fufulu ipu faatasi ma i latou, e solo fola faatasi ma i latou, e moa vao, e teu laau ma pupulaau, e vali ma toefaaleleia ma faamama ma fai le fia selau o isi mea, o le a latou iloa ai, o le galue o le tau lea o le tumama ma le alualu i luma ma le manuia.⁷

Ata

o le tamaloa ma tamaiti faatasi ma se faaputuga fafie

O le faiai maoae o le Ekalesia lenei o le galue. E galulue tagata uma. E le mafai ona e tuputupu ae seiiloga e te galue. O le faatuatua, molimau o le upumoni, e pei uma lava o le maso o lo’u lima. Afai e te faaaogaina, o le oo ina malosi. Afai e te tuuina i se faataupe, e faasolo ina vaivai ma gapelu. Tatou te tuu tagata ia galulue. Tatou te faamoemoe mo ni mea maoae mai ia i latou, ma o le mea e taua ma manaia ai, e mafai ona ausia ia mea. Latou te fua mai.⁸

E leai se mea e tupu i lenei Ekalesia sei vagana ua e galue. E pei lava o se uilipaelo. E le minoi seiiloga e te uuina ona au e lua ma tulei. O le galue malosi e minoi ai agai i luma le galuega a le Alii, ma afai na e aoao e galue ma le amiosa’o moni o le a manuia ai o outou olaga e faavavau. E moni lava la’u tala lena ma lo’u loto atoa. O le a manuia ai o outou olaga e faavavau.⁹

E i ai se faaupuga ua leva e faapea, afai e te avatu i se tagata se i’a, o le a maua lana meaai mo se aso. Ae afai e te aoao o ia e fagota, o le a maua lana meaai i aso uma o totoe o lona olaga. …

Tau ina foai mai e le Alii ia i tatou le vaaiga mamao ma le malamalama e fai ai na mea o le a fesoasoani i o tatou tagata e le gata i le faaleagaga ae faapea foi i le faaletino. Ua i o tatou luga se tiute sili ona taua. Na saunoa mai Peresitene Iosefa F. Samita … o se ekalesia e le fesoasoani i se tagata i le olaga lenei, atonu foi o le a le tele se mea na te faia mo ia i le olaga a sau (tagai “The Truth about Mormonism,” Out West magazine, Sept. 1905, 242).

O le mea o loo tele ai le mativa i o tatou tagata, e tatau ona tatou faia ai mea uma tatou te mafaia e fesoasoani ai ia i latou e siitia i latou lava, ia faavae o latou olaga i luga o se faavae o le ola-tutoatasi lea e mafai ona maua mai i aoaoga. O le a’otauina o le ki lea i avanoa. …

O lo tatou tiute paia … le “fesoasoani i e vaivai, sii i luga lima ua tautau i lalo; ma faamalosi tulivae ua vaivai” (MF&F 81:5). E tatau ona tatou fesoasoani ia i latou ia faalagolago le tagata ia te ia lava ma ia faamanuiaina.

Ou te talitonu e le finagalo le Alii e silasila mai o faasalaina Lona nuu e ola i le mativa. Ou te talitonu e finagalo o Ia ia olioli e faamaoni i mea lelei o le lalolagi. O le a finagalo o Ia ia tatou faia nei mea e fesoasoani ai ia i latou.¹⁰

E pei ona tatou aoao atu, e tatau i le tagata lava ia ona faia mo ia lava mea uma na te mafaia. Afai ua uma ona ia faaaogaina ana punaoa, ona tatau lea ona liliu atu i lona aiga e fesoasoani atu ia te ia. Afai e le mafai ona faia e le aiga, o le Ekalesia loa na te taulimaina. Ma a taulimaina loa e le Ekalesia, o lo tatou faanaunauga sili lava, ia taulima muamua mea o loo ia manaomia vave, ona fesoasoani ai lea ia te ia pe afai e manaomia ona fesoasoani i ai, ae i lena faagasologa ia fesoasoani e fai ni aoaoga faamasani, ia faamautu se galuega, ma le sueina o nisi o auala e toe tu ai o ia i ona vae. O le faamoemoega atoa lava lena o le polokalama maoae o le uelefea [a le Ekalesia].¹¹

O i latou o e na auai o ni tagata na mauaina le fesoasoani a lenei polokalama, ua faasaoina mai “le fetuu o le paie ma le leaga o le ola i le penefiti.” Ua faasaoina lo latou mamalu ma le taua o le tagata lava ia. Ma o le anoano o na alii ma tamaitai o e e le’i i ai se aafiaga tuusa’o [ma le mauaina o le penefiti, ae o e na auai i le totoina ma le gaosiga o meaai ma le tele o taumafaiga e faatatau i ai, e molimau mai i le olioli e maua i auaunaga e le manatu faapito i isi.

E leai se tasi ua molimauina lenei polokalama i lona faaaogaaga aoao ma i ona taunuuga maoae e i ai ni mafuaaga lelei e masalosalo ai i le agaga o le faaaliga na ala mai ai, ma ua faalauteleina ai lona mana moni mo le lelei.¹²

O le a tatou faia pea lenei galuega. O le a i ai pea le manaomia. O le matelaina ma le manao, ma mala o le natura o le a i ai pea ma i tatou. Ma o le a i ai pea i latou ua tuia o latou loto i le malamalama o le talalelei, o e o le a naunau e auauna atu ma galulue ma faamalosiau i e le tagolima o le lalolagi.

O se taumafaiga foi faapea ua tatou faavaeina ai le Tupe Faaagaga mo Aoga. Na mafai ona faatinoina e ala i a outou foai agalelei. … Ua tuuina atu nonogatupe i alii ma tamaitai talavou agavaa mo aoaoga. A leai, o le a maileia i latou i le le mafai lea ona o ese mai ma le mativa, lea na oo i ai o latou matua ma augatuaa mo le tele o tupulaga. …

O loo taitaia e le Agaga o le Alii lenei galuega. O lenei gaoioiga o le uelefea o se gaoioiga e faaletino, o loo atagia mai lona uiga moni i tulaga o araisa ma pi, o loo faailoa mai i palanikeke ma faleie, o lavalava ma vailaau faafomai, o galuega ma aoaoga mo ni galuega sili atu ona lelei. Ae o le mea ua tatou taua o se galuega faaletino o se faatinoga lea i fafo o se agaga o loo i totonu—le Agaga lea o le Alii o loo faapea mai, o Ia “sa femaliuai ma agalelei” (Galuega 10:38).¹³

Tatou te aoao atu le ola tutoatasi o se mataupu faavae o le ola, e faapea, e tatau ona tatou saunia mea e manaomia mo i tatou lava ma taulima o tatou lava manaoga. Ma o lea matou te uunaia ai o tatou tagata ia i ai se mea, ia fuafua mamao, ia i ai … ni meaai e teu, e amata se teugatupe, pe afai, aua aso leaga. E oo mai ai mala i tagata i nisi o taimi ae latou te le’i mafaufauina—o le leai o ni galuega, ma’i, ma mea faapena.¹⁴

E le o se mea fou i lenei lalolagi tuai ia faalavelave ma mala. O i tatou o e faitau ma talitonu i tusitusiga paia ua nofouta i lapataiga a perofeta e uiga i mala ua faapea ona oo mai ma o le a oo mai. …

E ese le taua o upu o le faaaliga o loo maua i le vaega e 88 o le Mataupu Faavae ma Feagaiga e uiga i faalavelave e tatau ona oo mai pe a mavae molimau a toeaiina. Na fetalai mai le Alii:

“Aua a mavae la outou molimau o le a oo mai le molimau a mafuiʼe, lea o le a tupu mai ai le oi i totonu o ia, ma o le a pauu tagata i luga o le eleele ma o le a lē mafai ona tutu.

“Ma o le a oo mai foi le molimau a le leo o faititili, ma le leo o uila, ma le leo o ta’uta’ʼu, ma le leo o galu o le sami e fafati mai i latou lava e tia’ina o latou tuaoi.

“Ma o le a vāvāō mea uma; ma e moni lava, o le a pepē fatu o tagata; ona o le a oo mai le mata’u i luga o tagata uma” (MF&F 88:89–91). …

… E pei lava ona sa i ai faalavelave i taimi ua sola, tatou te faatalitali mo ni [faalavelave] se tele atu i le lumanai. O le a se mea e tatau ona tatou faia?

Sa fai mai se tasi tagata sa le’i timu le taimi na fau ai e Noa le vaa. Ae sa ia fauina lava, ona oo mai ai lea o timuga.

Ua fetalai mai le Alii, “Afai ua saunia outou o le a outou le matatau ai lava” (MF&F 38:30).

Ua faatulagaina mai foi tapenaga autu i le Mataupu Faavae ma Feagaiga, lea o loo faapea mai, “ O le mea lea, ia outou tutu ai i nofoaga paia, ma aua le masiʼi ese, seia oo mai le aso o le Alii” (MF&F 87:8). …

E mafai ona tatou ola ina ia mafai ona tatou valaau atu i le Alii mo Lana puipuiga ma le taitaiga. O se mea lenei e muamua ave i ai le faamuamua. E le mafai ona tatou faamoemoe i Lana fesoasoani pe afai tatou te le mananao e tausi Ana poloaiga. O i tatou i totonu o lenei Ekalesia ua molimauina le tele o faasalaga o le le usiusitai i faataitaiga a sa Iareto ma malo o Sa Nifae. Sa o mai ia malo taitasi mai le mamalu e oo i le faatafunaga atoa ona o le amioleaga.

Ioe, ua tatou iloa, e to le ua i luga o e amiotonu faapea foi ma e le amiotonu (tagai Mataio 5:45). Ae e ui ina maliliu e amiotonu, e le o leiloloa i latou, ae ua faasaoina e ala i le Togiola a le Faaola. Sa tusi atu Paulo i Roma, “Aua afai tatou te ola, tatou te ola mo le Alii; pe afai e oti, e oti mo le Alii” (Roma 14:8). …

Ua fautuaina … o tatou tagata ma uunaia e faia na sauniuniga aua e mautinoa ai lava e mafai ona ola, pe a oo mai se mala.

E mafai ona tatou teu ni vai, meaai autu, vailaau faafomai, ma lavalava tatou te faamafanafana ai. E tatau ona i ai sina tatou tupe e faataatia ese ina ne’i timuga aso.¹⁵

Ua i ai se tatou polokalama maoae o le uelefea faatasi ma fale ma fanua mo mea e pei o le teuina o fatu [meaai] i eria eseese. E taua lo tatou faia o lenei mea. Ae o le nofoaga sili lava e teu ese ai ni nai meaai, o totonu lea o o tatou aiga, faatasi ma sina seleni o teu. O le polokalama uelefea e sili ona lelei, o a tatou lava polokalama uelefea. O ni apa se lima pe ono o le saito i totonu o le fale e sili atu nai lo o se faaputuga i totonu o le faleteuoloa o le uelefea. …

E mafai ona tatou amatamata i nai mea iti. E mafai ona tatou amata teu ni meaai mo le vaiaso, ma faasolosolo malie atu ai lava ona teu mo se masina, ona sosoo ai lea ma le tolu masina. O loo o’u tautala atu nei e faatatau i meaai e faaaoga soo. Ua outou silafia uma lava, e le fou lenei fautuaga. Ae ou te popole ona e toatele naua ua manatu, o le teuina o ni meaai mo se taimi umi, e le mafai ona oo i ai se malosi ona latou le faia ai lava lea o se taumafaiga e fai ai.

Amata i sina mea itiiti, … ona faasolosolo malie ai lava lea ona faaputu seia pa’ia le faamoemoega talafeagai. Ia teu foi e le aunoa sina tupe itiiti, ma o le a e maofa i lona faateleina.¹⁶

Ua faafia ona faituaina i tatou e uiga i le ola tutoatasi, e uiga i aitalafu, ma e uiga i le faautauta. O le toatele o o tatou tagata ua oo i aitalafu mamafa ona o mea e matuai le manaomia lava. … Ou te uunaia outou o tagata o lenei Ekalesia ia outou saoloto mai i aitalafu pe a mafai ai, ma ia tuuese sina vaega itiiti aua aso leaga.¹⁷

“Ua oo mai le taimi e faatulaga lelei ai o tatou aiga. …

Na [saunoa] Peresitene J. Reuben Clark Jr., i le sauniga perisitua o le konafesi i le 1938: “E te oo loa i le aitalafu, avea loa tupe tului ma au soa i minute taitasi o le ao ma le po; e te le mafai ona aloese mai ai; e le mafai ona faatea ese; e le gauai i le aioi, faamalosi, pe faatonu; ma a e faalavelave i lona ala pe tetee i ai pe le mafai ona faamalie lena faatonuga, o le a na faaatamaia oe” (i le Conference Report, Ape. 1938, 103).

Ioe, ou te iloa atonu e talafeagai ona nono se tupe ina ia maua ai se fale. Ae ia tatou faataua se fale e mafai ona tatou gafatia ma faapea ona tuumamaina ai mea e totogi lea o le a tautau mai i taimi uma lava i luga ae o o tatou ulu e aunoa ma se alofa pe malolo. …

Talu mai lava le amataga o le Ekalesia, na fetalai mai ai le Alii e uiga i lenei mataupu o le aitalafu. Ia Matini Harisi e ala i faaaliga sa ia fetalai mai ai: Totogi le ʼaitalafu na e konakalate ai ma le lomitusi. Tatala oe lava mai le nofo aitalafu” (MF&F 19:35).

Sa saunoa soo mai Peresitene Heber J. Grant e uiga i lenei mataupu. Fai mai a ia: “Afai e i ai lava se mea e tasi o le a aumaia le filemu ma le faamalieina i le loto o le tagata, ma i totonu o le aiga, o le ola lea i mea ua tatou maua. Ma afai e i ai lava se mea e tasi e oloia ma faalotovaivaia ma faaatuatuvaleina, o le i ai o ni aitalafu ma ni tiute ua le mafai e se tagata ona taulima” (Gospel Standards, comp. G. Homer Durham [1941], 111).

O loo tatou tauaveina i le Ekalesia atoa se savali o le ola tutoatasi. E le mafai ona maua le ola tutoatasi pe afai o loo i ai se aitalafu tele o loo tautau a’e i luga o le aiga. E le maua e se tagata le tutoatasi po o le saolotoga mai saisaitiaga pe a nofoaitalafu o ia i isi.

Ua matou taumafai e faia se faataitaiga i le taulimaina o mea a le Ekalesia. E tusa ai ma aiaiga faaletulafono, ua matou mulimuli ai ma le toto’a i le faiga o le faataatiaese i tausaga taitasi o se pasene o le tupe maua a le Ekalesia e sauniuni ai mo se taimi e ono tulai mai ai se manaomia.

Ou te fiafia lava e faapea atu, o le Ekalesia i ona taualumaga uma lava, ma i ana taumafaiga uma lava, ma i ona matagaluega uma lava, o loo mafai ona faagaoioia e aunoa ma ni nonogatupe. Afai e le mafai ona tatou faia le galuega, o le a tuuitiitia a tatou polokalama [ina ia sefe ai tupe]. O le a tatou tuuitiitia tupe faaalu ina ia fetaui ma le tupe maua. O le a tatou le nono mai [ni tupe]. …

E maeu le lagona lelei e maua ina ua saoloto mai aitalafu, i le i ai o sina tupe itiiti e faaagaaga mo se aso e tupu ai se faalavelave faafuasei, ma mafai ona tapa i ai pe a manaomia. …

Ou te apoapoai atu ia te outou ia vaavaai i tulaga o a outou mea tautupe. Matou te uunaia outou ina ia faautauta i a outou tupe faaalu; ia pulea lelei outou lava i a outou faatauga ina ia aloese ai mai le aitalafu. Ia totogi faauma aitalafu i se vave e te mafaia ai, ma ia faasaoloto outou mai saisaitiaga.

O se vaega lenei o le faaletino o le talalelei ua tatou talitonu i ai. Tau ina faamanuia outou e le Alii … ia faatulaga lelei o outou aiga. Afai ua uma ona totogi a outou aitalafu, afai o i ai sau tupe o teu, e tusa lava pe itiiiti, afai e pesi mai matagi i luga a’e o lou ulu, o le a i ai le malutaga mo lou [aiga] ma le toafilemu i o outou loto.¹⁸

• Na aoao mai Peresitene Hinckley e faapea, “e leai se mea e i lalo o le lagi e suitulaga i le toaga e galue” (vaega 1). Ua avea faapefea le galue ma se faamanuiaga i lou olaga? O le a se mea ua e aoaoina e ala i le galue malosi? E mafai faapefea ona fesoasoani matua ia latou fanau ia aoao e galulue?

• O a ni ou tiutetauave e i ai ia i latou o loo i ai ni manaoga faaletino? (Tagai vaega 2.) E mafai faapefea ona tatou fesoasoani i isi ia ola faalagolago le tagata ia te ia lava? O a ni auala na aafia ai lou olaga i auaunaga na e tuuina atu ma mauaina mai?

• Toe faamanatu sauniuniga na fautuaina mai e Peresitene Hinckley tatou te faia mo taimi e manaomia ai le fesoasoani (tagai vaega 3). O le a se taimi na e vaaia ai le taua o le saunia mo taimi e le tagolima ai? O a nisi o mea laiti ma faifaimalie e mafai ona tatou faia e saunia ai i tatou lava?

• Toe faamanatu le fautuaga a Peresitene Hinckley e uiga i aitalafu ma le faautauta. Aisea e taua ai le [loto] pulea i le ala tatou te faaalu ai tupe? O a auala e mafai ona tatou aafia ai faaletino ma faaleagaga ona o aitalafu? E mafai faapefea e matua ona aoao a latou fanau e faaaoga tatau tupe?

1 Tesalonia 4:11–12; MF&F 1:11–13; 78:13–14; 104:13–18; Mose 5:1

“Ia faaeteete ia aua le vave momotuina ia talanoaga i se taumafaiga e folasia uma atu ai ia mea na e sauniaina. E ui lava e taua le aofia o mea uma na saunia, ae sili atu ona taua le fesoasoani i tagata o loo aoaoina ina ia lagonaina le uunaiga a le Agaga, foiaina ni a latou fesili, faateleina lo latou malamalama i le talalelei, ma faamausaliina la latou tautinoga i le tausia o poloaiga” (O Le Aoao Atu, E Leai Se Isi Valaauga E Sili Ai [1999], 67).