O Le Vavega o Aso e Gata Ai o le Galuega Faafaifeautalai

Ua i ai sa tatou tiutetauave paia e momoli atu le talalelei i malo uma, ituaiga, gagana, ma nuu. Ua i ai sa tatou tiutetauave e aoao atu ma papatiso i le suafa o le Alii o Iesu Keriso. Sa fetalai mai le Faaola toetu, “O atu ia outou i le lalolagi uma, ina talai atu ai le talalelei i tagata uma lava” [Mareko 16:15]. O loo tatou aafia i se taumafaiga malosi mo le upumoni ma le lelei.⁸

Sa i ai le galuega faafaifeautalai a o le’i faatulagaina le Ekalesia. O loo faaauauina ai lava talu mai lena taimi, e ui lava i le tele o faigata o vaitau na asa mai ai o tatou tagata. Ia taitasi i tatou, ma faia se faaiuga ia i tatou lava, o le a tulai mai i se avanoa fou, se lagona fou mo tiutetauave, se taliaina fou o le matafaioi e fesoasoani i lo tatou Tama oi le Lagi i Lana galuega mamalu o le faataunuuina o le faaofuina o Ona atalii ma afafine i le lalolagi atoa.⁹

Ia tatou aapa atu o i tatou o ni Au Paia o Aso e Gata Ai i isi e le o ni tagata o la tatou faatuatuaga. Ia aua lava ne’i o tatou tali atu i le agaga o le faasausili po o se uiga o le [ou te] mama atu nai lo oe. Nai lo o lena, ia tatou faaali atu le alofa ma le faaaloalo ma le loto fesoasoani ia i latou. E matuai ese lava le talitonuga o tagata e uiga ia i tatou, ma ou te popole ona o le tele o lena mea e mafua mai ia i tatou lava. E mafai ona faateleina lo tatou faapalepale, faateleina lo tatou avea ma ni tuaoi lelei, faateleina ona tatou faauo atu, faateleina le avea ma se faataitaiga nai lo le mea sa tatou i ai i aso ua mavae. Ia tatou aoao a tatou fanau ia fai isi ma se agaga faauo, faaaloalo, alofa, ma le faamemelo. O lena mea o le a maua ai se taunuuga e sili atu ona lelei nai lo o se uiga faaalia o a’u lava ua lelei. …

Ia tatou aapa atu i le lalolagi i la tatou auaunaga faafaifeautalai, ia aoao atu i latou uma o e o le a faalogo e uiga i le toefuataiga o le talalelei, ia tautala atu e aunoa ma le fefe ae ia leai foi se faafia-amiotonu, e uiga i le Uluai Faaaliga, molimau atu i le Tusi a Mamona ma e uiga i le toefuataiga o le perisitua. Ou uso e ma tuafafine, ia tatou o ifo i o tatou tulivae ma tatalo mo le avanoa e aumai ai isi i le olioli o le talalelei.¹⁰

O se mea ofoofogia ma matagofie le faitau afe o i latou o loo faagaeetia i le vavega o le Agaga Paia, ua latou talitonu ma talia, ma avea ma tagata [o le Ekalesia]. Ua papatisoina i latou. Ua aafia ai e faavavau o latou olaga mo le lelei. E tutupu vavega. E oo atu i totonu o o latou loto se fatu o le faatuatua. E faateleina a o latou aoao. Ma latou te talia ia lea mataupu ma lea mataupu, ua latou maua foi faamanuiaga ofoofogia uma ia e oo mai ia i latou o e savavali ma le faatuatua i le nei, Le Ekalesia a Iesu Keriso o le Au Paia o Aso e Gata Ai.¹¹

Sa ou feiloai i se tamaitai i Amerika i Saute o le na faatoa auai lava i le Ekalesia. O le faaosofia i se alofa maoae mo le mea sa ia mauaina, sa alu ai o ia ma le naunautai ma ta’u atu i isi. I se vaitaimi e na o le fitu masina talu ona papatiso o ia, sa ia tuuina atu ai ni igoa e tolu selau o tagata e masani ai i faifeautalai ina ia mafai ona latou faamalamalama atu i ai le talalelei. I se tasi o taimi, e toa onosefulu na o mai i le Ekalesia. Atonu na o mai i totonu. I São Paulo, Pasila, sa ou feiloai ai i se faifeautalai talavou o le na aoaoina muamua o ia i le talalelei. O ia foi o se tagata liliu mai, sa alu i se misiona e fai ma sui o le Ekalesia i se osigataulaga tele i tautupe. O le tamaitai lea sa ou talanoa atu e uiga i ai, o se tasi lea o le toa fasefulu ma le tolu sa fesoasoani i ai o ia e aumai i totonu o le Ekalesia i lena taimi. O lenei alii talavou Pasila e silia ma le faaselau ona ia faalautele atu o ia lava—e toa fasefulutolu ana lava tagata liliu mai, ae e onosefulu na ala mai i se tasi o i latou sa ia faaliliuina mai, ma le tele o isi o le a o mai mai ana tagata liliu mai.¹²

E toatele lava i tatou e vaai atu i le galuega faafaifeautalai ua na o le tala’i tu’itu’i. Ae ua iloa e tagata uma ua masani i lenei galuega, o loo i ai se auala e sili atu ona lelei. O lena auala e ala atu lea i tagata o le Ekalesia. Soo se taimi lava e i ai se tagata o le Ekalesia na te faailoaina atu se tagata sailiili, e i ai i le taimi lava lena se faiga e lagolagoina ai. E tuuina atu e le tagata o le Ekalesia le molimau i le moni o le galuega. E naunau o ia mo le fiafia o lana uo sailiili. E oo ina fiafia tele o ia a o faasolosolo i luma lena uo i le aoaoina o le talalelei.

Atonu e fai e faifeautalai faamisiona le aoaoina, ae o le tagata o le Ekalesia, i soo se mea lava e mafai ai, o le a lagolago atu i lena aoaoga i le ofoina atu o lona maota e faataunuu ai lenei auaunaga faafaifeautalai. O le a tuuina atu se molimau faamaoni e uiga i le paia o le galuega. O le a i ai o ia iina e tali atu i fesili pe a le i ai faifeautalai. O le a avea o ia ma se uo i le tagata liliu mai o loo faia se suiga tele ma e masani lava ona faigata.

O le talalelei e le o se mea e ma ai. O se mea e tatau ona mitamita ai. Sa tusi atu Paulo ia Timoteo, “O lenei, aua e te ma i le molimau i lo tatou Alii.” (2 Timoteo 1:8). O loo i soo se mea lava ia avanoa e faasoa atu ai le talalelei. …

Ata

fafine o loo talatalanoa

O le faagasologa o le aumaia o tagata fou i totonu o le Ekalesia, e le o se tiutetauave e na o faifeautalai. E sili atu ona manuia pe a avea tagata o le ekalesia ma puna e mafai ona maua mai ai tagata sailiili fou. …

Ia faapea ona atiina a’e se nofouta i totonu o loto o tagata uma o le ekalesia e uiga i lona lava gafatia mo le aumaia o isi i se malamalama o le upumoni. Ia faapea ona galue i ai o ia. Ia faapea ona tatalo ma le naunautai tele e uiga i ai. …

… O’u uso e ma tuafafine, e mafai ona tatou tuu atu i faifeautalai latou te taumafai e fai na o i latou, pe mafai foi ona tatou fesoasoani atu ia i latou. Afai latou te faia na’o i latou, o le a latou tu’itu’i i faitotoa i lea aso ma lea aso, ma o le a itiiti lava le seleselega. Po o lena, i le avea ai ma tagata o le ekalesia, e mafai ona tatou lagolago atu ia i latou i le sailia ma le aoaoina o tagata sailiili. …

Ia faapea ona atiina a’e i siteki uma se nofouta i le avanoa e su’e ai i latou o e o le a faalogo i le savali o le talalelei. I lenei faagasologa e le manaomia ona tatou faatiga atu. E le manaomia ona tatou faasausili. O le talaiga tu’itu’i e sili ona aoga o le a tatou tauaveina, o le amiolelei lea ia i o tatou lava olaga ma faataitaiga. Ma a o tatou i ai i lenei auaunaga, o le a faaleleia atili o tatou olaga, aua o le a faapea ona tatou mataala e iloa ai, tatou te le faia pe tautala atu i soo se mea e ono taofia ai le alualu i luma o i latou o loo tatou taumafai e taitai atu i le upumoni. …

E tatau ona i ai se faateleina o le naunautai i soo se vaega i le Ekalesia. Ia avea lenei mataupu [e uiga i le galuega faafaifeautalai] ma se mataupu e tautalagia i lea taimi ma lea taimi i le sauniga faamanatuga. Ia faapea ona talanoaina e le au perisitua ma le Aualofa i a latou fonotaga faalevaiaso. Ia talanoa foi i ai Alii ma Tamaitai Talavou ma fuafua ni auala e fesoasoani ai i lenei taumafaiga sili ona taua. Ia tuu atu foi i tamaiti o le Peraimeri e mafaufau i ni auala e mafai ona fesoasoani ai. E toatele ni matua ua o mai i totonu o le Ekalesia ona sa valaaulia e se tamaitiiti i le Peraimeri. …

Uso e ma tuafafine, o outou uma o loo i uarota ma siteki ma i itu ma paranesi, ou te valaaulia outou ia avea ma se autau tele ma naunautai mo lenei galuega, ma se manao tele e lagolago i faifeautalai i le latou tiutetauave tele o loo i ai e tauave atu le talalelei i atunuu, ituaiga, gagana ma nuu uma. “Ua sinasina le fanua [ma ua saunia] e selesele” (MF&F 4:4). Ua fetalai faafia mai le Alii i lenei mea. Pe o le a tatou le talitonu ea i Lana fetalaiga?¹³

I le avea ai ma sui o faifeautalai … Ou te fia talosaga atu ai i le Au Paia ina ia fai mea uma tou te mafaia e tuuina atu ai ni igoa [o tagata] o e e ono mafai ona latou aoaoina. O le a outou fiafia pe a outou faia o lena mea. O tagata uma lava tou te vaai e o mai i totonu o le Ekalesia ona a outou taumafaiga, o le a aumaia ai le fiafia i totonu o o outou olaga. Ou te ta’u atu lena mea o se folafolaga ia te outou uma taitoatasi.¹⁴

E tatau ona tatou siitia le tulaga faatonuina o le agavaa ma tulaga manaomia o i latou e o atu i le lalolagi o ni avefu’a a le Alii o Iesu Keriso.¹⁵

Ua manaomia e le lalolagi i nei aso le mana o molimau moni a’ia’i. Ua manaomia le talalelei a Iesu Keriso, ma afai e tatau ona faalogo le lalolagi i lena talalelei, e tatau lava ona i ai ni avefeau e aoaoina atu.

Matou te talosaga atu ina ia vave amata e matua ona aoao a latou fanau [mo le auaunaga faafaifeautalai]. O aiga e fai ai tatalo faaleaiga, o aiga e fai ai afiafi faaleaiga, o aiga e faitauina tusitusiga paia, o le aiga e toaaga le tama ma le tina i le Ekalesia ma talanoa ma le naunautai e uiga i le Ekalesia ma le talalelei, o fanau i totonu o aiga faapena, e faatumulia i se aga masani ma se manao e aoao atu le talalelei i isi. E masani lava ona i ai se aga masani o le galuega faafaifeautalai i totonu o aiga faapena. E amatalia ni teugatupe a o laiti lava le fanau. E tutupu a’e tama ma se faamoemoe masani o le a valaauina i latou e auauna atu o ni faifeautalai mo le Ekalesia. E avea le misiona ma se vaega tele o le polokalama o le olaga a se tama e faapei foi o se aoga.¹⁶

O le galuega faafaifeautalai o se tiutetauave taua o le perisitua. O le mea lena, e tatau ai lava ona tauave e o tatou alii talavou le avega autu. O le latou tiutetauave ma le tiute lenei.¹⁷

[Alii] talavou, ou te faamoemoe o loo outou aga uma atu i le ala o le auaunaga faafaifeautalai. E le mafai ona ou folafola atu ia te outou ni mea malie. E le mafai ona ou folafola atu ia te outou le faigofie ma le lagolelei. E le mafai ona ou folafola atu ia te outou le saoloto mai le lotovaivai, mai le fefe, mai le matuai faanoanoa i nisi o taimi. Ae e mafai ona ou folafola atu ia te outou, o le a outou tuputupu a’e i se ala tou te le’i tuputupu a’e ai lava i se vaitaimi faapena o o outou olaga atoa. E mafai ona ou folafola atu ia te outou se fiafia lea o le a tulaga ese ma matagofie ma tumau. E mafai ona ou folafola atu ia te outou, o le a outou toe faia se iloiloga i o outou olaga, o le a outou faatulagaina ni mea fou e ave i ai le faamuamua, o le a outou ola latalata atili atu i le alii, o le a avea le tatalo ma se aafiaga moni ma matagofie, o le a outou savavali ma le faatuatua i le taunuuga o mea lelei tou te faia.¹⁸

Tatou te manaomia ni tamaitai talavou [e auauna atu i ni misiona]. Latou te faia ni galuega ofoofogia. E mafai ona latou oo atu i aiga e le mafai ona ulufale atu i ai alii faifeautalai. …

[Ae peitai], … E le tatau i tamaitai talavou ona lagona faapea ua ia te i latou se tiute e tutusa ma alii talavou. O nisi o i latou o le a matua mananao lava e o. Afai o lea, e tatau ona latou maua mai se taitaiga mai o latou epikopo faapea ma o latou matua. … I tuafafine ou te faapea atu, o le a faapea ona maualuga le faaaloalogia o outou, o le a tutusa lava le manatulia o outou i le faatinoga o le galuega, o a outou taumafaiga o le a taliaina lava e le Alii ma i le Ekalesia, e tusa lava pe tou te o i se misiona pe le o foi i se misiona.¹⁹

Faatasi ai ma le manaomia o alii ma tamaitai faifeautalai talavou, o loo i ai foi e manaomia faateleina mo ulugalii i totonu o le misiona. O loo faia e ulugalii matutua atu ua faaipoipoina se galuega matagofie i totonu o misiona. O loo manaomia pea nisi e toatele. O loo faapitoa lava ona tatou manaomia i latou e i ai gafatia i isi gagana. E mafai ona latou auauna atu i le tele o tiutetauave i lalo o le taitaiga a peresitene misiona mataala ma magafagafa.

Faatasi ai ma se numera faateleina o tagata ua litaea ae o loo soifua maloloina ma aumalolosi lava, e toatele i latou o e e mafai ona faatumuina se manaomia tele i le galuega a le Alii.²⁰

O loo [i ai] ni o tatou alii ma tamaitai ua litaea o loo auauna atu i se avanoa faafaifeautalai anoa mo lenei Ekalesia i le lalolagi atoa. O loo faateleina le fuaitau [o le Ekalesia]. E o atu i latou i nofoaga e valaauina i ai i latou. Latou te auauna atu i nofoaga o loo manaomia ai i latou. E faavaeina ni faigauo; e fetufaai atu ia tomai; e tatalaina avanoa mo i latou o e o le a le faagaloina lava ia alii ma tamaitai o e na o atu ia i latou i le agaga atoa o le le manatu faapito e aoao atu ma fai se lelei mo i latou. Latou te le maua ai ni tupe. E totogi e i latou lava a latou [misiona]. E le gata mai le fua o lo latou tuuto. O fua o a latou taumafaiga e le mafaitaulia.²¹

Ata

o le anoano o tamaitai faifeautalai

Ona ua tatou o mai uma lava i matua e tasi [o ni fanau a le Atua], tatou te tali atu ai i le upumoni e tasi. O le mea moni e faapea, o le pa’u o se tagata e fai si ese o le lanu, o mata o se tagata e ono i ai se eseesega teisi, e ono ese ni lavalava e ofu e se tasi tagata, e leai lava ma se mea e faapea e ese ai lena tagata. O alii ma tamaitai o le lalolagi atoa e tutusa lava le ala latou te tali atu ai i le uunaiga lava e tasi. Latou te sailia le mafanafana pe a latou maalilili; latou te iloa ituaiga tiga lava e tasi; latou te oo i le faanoanoa, ma latou te iloa le olioli. …

Pe a foliga mai eseesega—a le ma o tatou tuaoi po o i isi aganuu—e tutu o ni maagao a o tatou saili e faasoa atu le talalelei, o le faaalia o le faaaloalo e masani lava ona aveesea ai nei maagao. A o tatou tausia le poloaiga a le Alii ina ia faasoa atu le talalelei i isi, ou te molimau atu, e fesoasoani le Agaga o le Alii e faafoia ni eseesega i le va o lē o loo aoao atu ma lē o loo aoaoina. Ua faamanino mai e le Alii le faiga ina ua ia fetalai mai, “O le mea lea, o ia o lē e talai atu [e ala i le Agagaatoa ma ia o lē e mauaina [e ala i le Agaga], e malamalama i le tasi, ma e faagaeetiaina ma olioli faatasi i laua uma.” (MF&F 50:22.)

Ua faamalieina a’u ona o le auala e sili ona aoga o loo ia i tatou taitoatasi i o tatou valaauga e faasoa atu le talalelei o le Agaga lea o le Alii. Ua tatou vaai uma [i le Agaga] i isi. A o tatou faia le galuega a le Alii, tatou te lagonaina foi i totonu o i tatou lava. I taimi faapena, o eseesega e foliga mai o loo i ai i lo tatou va ma i latou tatou te aoaoina, e foliga mai e pauu e pei o ni una mai o tatou mata. (Tagai i le 2 Nifae 30:6.) E alia’e se mafanafana o le sootaga ma le malamalama o se mea matagofie lea i le vaai. Tatou te malamalama lelei lava i le tasi ma le isi, ma e aoaoina lelei lava i tatou ma fiafia faatasi.²²

E moni lava o loo tatou auai i se galuega taua ma le ofoofogia. … Ua aumai e le Atua o le lagi lenei vavega i aso e gata ai, ma o le mea ua tatou vaaia ua na o se muaitofo i mea silisili atu o le a oo mai. O le galuega o le a faataunuuina e alii ma tamaitai lotomaualalalo, o e talavou ma matutua.²³

O le a manuia le galuega ona o loo i ai i le Alii le folafolaga:

“Ma ai se tasi na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma sio faataamilo outou e au agelu, e sapasapai outou i luga.” (MF&F 84:88.)

Faatasi ai ma lo tatou tiute na faalelagi ona tuuina mai, ma faamanuiaga na faalelagi ona folafolaina mai, ia tatou agai loa i luma i le faatuatua. A tatou faia lena mea, o le a faamanuia e le Alii a tatou taumafaiga. Ia tatou faia la tatou vaega i le faasoaina atu o le talalelei ia i latou o siomia i tatou, e muamua i faataitaiga ona sosoo ai lea ma mataupu musuia.

O le maa na tofia i le mauga ae e le’i tofia i se lima, o le a faaauau ona taavale atu i luma seia faatumulia ai le lalolagi atoa. (Tagai Tanielu 2.) Ou te tuuina atu ia te outou lau molimau i lenei upumoni ma i le upumoni e faapea, e mafai e i tatou taitoatasi ona fesoasoani i auala e talafeagai ma o tatou tulaga, pe afai o le a tatou sailia le taitaiga ma uunaiga a lo tatou Tama oi le Lagi. O le galuega lenei a le Atua o loo tatou faia, ma faatasi ai ma ana faamanuiaga o le a tatou le toilalo lava.²⁴

• Aisea tatou te fefefe ai i nisi o taimi e faasoa atu le talalelei? O a nisi o auala e mafai ona tatou faatoilalo ai le fefe ae aapa atu i isi? (Tagai vaega 1.) O a nisi o vavega o le galuega faafaifeautalai ua e molimauina?

• Aisea e “sili atu ona manuia [ai faifeautalai] pe a avea tagata o le ekalesia ma puna e mafai ona maua mai ai tagata sailiili fou.”? (Tagai vaega 2.) O a nisi o auala e mafai e tagata o le ekalesia ona fesoasoani ai i faifeautalai faamisiona?

• Aisea e matuai malosi ai aafiaga o misiona talai i olaga o i latou o e auauna atu? E mafai faapefea ona fesoasoani matua i a latou fanau ia saunia e auauna atu i ni misiona talai? (Tagai vaega 3). E mafai faapefea ona fesoasoani aiga i ulugalii matutua atu ia saunia e auauna atu?

• (Tagai vaega e 4.) O a nisi o uiga/vaaiga masani o tagata uma lava? E mafai faapefea ona tatou faatoilaloina eseesega ia e foliga mai o ni maagao i le faasoaina atu o le talalelei? O a ni auala na e vaai ai o fesoasoani le Agaga o le Alii i tagata e faatoilalo ni eseesega?

• Sa faamamafa mai e Peresitene Hinckley e faapea, o le a faamanuia e le Alii a tatou taumafaiga e faasoa atu le talalelei pe afai tatou te “agai i i luma i le faatuatua” (vaega e 5). E mafai faapefefa ona e faateleina lou manao ma [lou] faatuatua e faasoa atu ai le talalelei?

Isaia 52:7; Mataio 28:19–20; Alema 26:1–5; MF&F 1:20–23; 4; 18:15–16; 38:40–41

“Aua e te fefe i le leai o se pisa. E masani ona mananao tagata i nisi taimi e mafaufau e uiga i fesili ma tali atu i ai pe faailoa atu ai po o a o latou lagona. Atonu e te faatali pe a mavae ona tuuina atu se fesili, pe a maea ona fetufaai mai se tulaga faaleagaga na oo i ai, pe i ai foi ni faafaigata i se tagata e faamatala mai ai ona lagona” (O Le Aoao Atu, E Leai Se Isi Valaauga E Sili Ai [1999], 70).