O Le Mana o le Tusi a Mamona

E i ai se saunoaga mai anamua na fofogaina e le Faaola e faapea, e mautu upu uma i le mau a le toalua po o le toatolu.⁴

E faapei ona avea le Tusi Paia ma molimau o le Lalolagi Tuai, e faapena foi le Tusi a Mamona o le molimau o le [Lalolagi] Fou. E o faatasi lava i le tautinoina atu o Iesu o le Alo o le Tama.⁵

O le Tusi a Mamona … o loo molimau mai e uiga ia te Ia o le sa soifua i Peteleema i Iutaia ma o le na maliu i le mauga o Kalevaria. I se lalolagi ua vaivai i lona faatuatua, o le Tusi a Mamona o [le] molimau mamana lea i le paia o le Alii. O lona lava faatomuaga, sa tusia e se perofeta o le sa savalia Amerika i se meleniuma ma le afa ua mavae, o loo tau manino mai ai e faapea, sa tusia “mo le faatalitonuina foi o Iutaia ma Nuuese, o Iesu o le Keriso, o le Atua Faavavau, ua faaali mai o ia lava i atunuu uma.”⁶

E leai se mea e mafai ona tatou faia e sili atu le taua nai lo o le faamalosia i o tatou olaga taitoatasi se tautinoga e le maluelue o Iesu o le Keriso. … Ma, o’u uso e ma tuafafine, o le faamoemoega lena o le oo mai o lenei tusi maoae ma le matagofie.⁷

Ua ou faitau i le Tusi a Mamona, lea sa faaliliuina e [Iosefa Samita] e ala i le meaalofa ma le mana o le Atua. E ala mai i le mana o le Agaga Paia, na ou maua ai se molimau ma se faamaoniga o le afuaga paia o lenei faamaumauga paia.⁸

O lona afuaga o se vavega; pe a faatoa faamatala atu lena afuaga i se tasi na te le’i iloaina, e toetoe lava a le mafai ona talitonuina. Ae o lea ua iinei le tusi e tagotago i ai ma uuina ma faitau i ai. E leai se tasi e mafai ona finauina lona i ai. O taumafaiga uma lava e faamatala lona afuaga, e ese mai i le tala na tuuina mai e Iosefa Samita, sa faaalia ai e leai ni mea e iloa ai e moni.⁹

“O le faamaoniga mo lona moni, mo lona lelei i se lalolagi ua matele i le manaomia o se faamaoniga, e le maua lea i le suesueina o toega o mea po o le suesueina o le tagata soifua, e ui lava o nei mea atonu e aoga i isi. E le maua foi i le suesuega o upu po o suesuega anamua, e ui o nei mea e ono faamaonia ai le moni. O le faamaoniga o lona moni ma le lelei o loo taoto lea i totonu o faavaa o le tusi lava ia. O le suega o lona moni o loo taatia lea i le faitauina o le tusi. O se tusi a le Atua. E ono fesiligia e tagata mafaufau lelei lona afuaga; ae o i latou o e ua faitauina ma le agaga tatalo, ua latou iloa e ala i le mana e sili atu i o latou lagona faalenatura, ua moni lea, ma ua i ai le afioga a le Atua, ma ua faataatitia mai ai upumoni faaola o le talalelei e faavavau, ma na “aumaia e ala i le meaalofa ma le mana o le Atua … i le faatalitonuina o tagata Iutaia ma nuu Ese o Iesu o le Keriso.”¹⁰

Sa tusia e [Moronae] lana molimau faaiu i le tusi lea o loo tauave ai lona igoa ma o loo faaiu ai le faamaumauga a sa Nifae. Sa ia tusia o se tasi sa i ai se malamalama mautinoa, o lana faamaumauga o le a iu lava ina faaalia mai. …

I le mataupu mulimuli o lana lava tuufaatasiga, sa ia molimau mai ai e uiga i le faamaumauga a lona nuu ma le folafolaga manino e faapea, o i latou o e o le a faitau i ai, e mafai ona iloa lona moni e ala i le mana o le Agaga Paia [tagai Moronae 10:3–5].

E leai lava se isi tusi o i ai se folafolaga faapena. Ana faapea e leai se isi mea na tusia e Moronae, semanu o lenei folafolaga o loo i le faaiuga o lana molimau, o le a faailoga ai o ia e faavavau o se molimau manino o upumoni e faavavau. Aua, na fai mai o ia, “o le mana foi o le Agaga Paia tou te iloa ai le tonu i mea uma lava” (Moronae 10:5).¹¹

O taimi uma lava tatou te uunaia ai isi e faitau le Tusi a Mamona, o loo tatou faia se galuega lelei mo i latou. Afai latou te faitau i ai ma le agaga tatalo faapea ma se manao faamaoni ia iloa le mea moni, o le a latou iloa e ala i le mana o le Agaga Paia, e moni le tusi.

Mai lena malamalama o le a faapea ona tafe mai ai se tautinoga o le moni o isi mea e tele. Aua afai e moni le Tusi a Mamona, o lona uiga o loo soifua le Atua. O loo i ai i ona itulau lea molimau ma lea molimau e uiga i le mea moni a’ia’i e faapea, e mo’i lo tatou Tama, e patino o ia, e alofa o ia i lana fanau ma saili mo lo latou fiafia.

Afai e moni le Tusi a Mamona, o lona uiga la, o Iesu o le Alo o le Atua, le Toatasi na Fanaua o le Tama i la le tino, na fanau mai ia Maria, o “se taupou, ma sa matua silisili ona lalelei … i isi taupou uma” (tagai 1 Ni. 11:13–21), aua o loo molimau mai le tusi i se faamatalaga e le mafaatusalia i tusi faitau uma.

Afai e moni le Tusi a Mamona, o lona uiga e moni lava o Iesu o lo tatou Togiola, le Faaola o le lalolagi. …

Afai e moni le Tusi a Mamona, o Iosefa Samita o se Perofeta a le Atua, aua sa avea o ia ma mea faigaluega i aao o le Atua i le aumaia i le malamalama o lenei molimau i le paia o lo tatou Alii.

Afai e moni lenei tusi, [o le Peresitene o le Ekalesia] o se perofeta, aua o loo ia umia ki, meaalofa, mana, ma le pule uma sa umia e le Perofeta o Iosefa, o le na aumaia i luma lenei galuega i aso e gata ai.

Afai e moni le Tusi a Mamona, e moni le Ekalesia, aua o le pule lava lea e tasi lea na oo mai ai i le malamalama lenei faamaumauga paia o loo i ai i le taimi nei ma faaalia mai ia i tatou i aso nei. O se toefuataiga o le Ekalesia na faatulagaina e le Faaola i Palesitina. O se toefuataiga o le Ekalesia, na faatulagaina e le Faaola ina ua ia asiasia le konetineta [o Amerika] e pei ona tuuina mai i lenei faamaumauga paia.

Afai e moni le Tusi a Mamona, e moni foi le Tusi Paia. O le Tusi Paia o le Molimau e uiga i le Lalolagi Tuai; o le Tusi a Mamona o le Molimau i le Lalolagi Fou. O le tasi o le faamaumauga a Iuta; ae o le isi o le faamaumauga a Iosefa, ma ua tuu faatasi i laua i le aao o le Alii e faataunuu ai le valoaga a Esekielu. (Tagai Esekielu 37:19.) Ua laua folafola faatasi mai le Tulaga Tautupu o le Togiola o le lalolagi ma le moni o lona malo.¹²

O le tala o le [Tusi a Mamona] o se faamaumauga moni o mea taua na tutupu i malo ua loa tausaga talu ona mavae atu. Ae o lona faamatalaga o faafitauli o le lalolagi i aso nei, e pei lava o le fou o se nusipepa o le taeao ma e sili atu ona atoatoa, musuia, ma faagaeetia e tusa ai ma tali i na faafitauli.¹³

Ou te susuea ona itulau ma faitau, ma o loo i ai le gagana matagofie ma faagaeetia. O faamaumauga anamua lea na faaliliuina mai ai, sa aumaia mai le eleele e pei o se leo o loo tautala mai i le efuefu. Na oo mai o le molimau o se augatupulaga o alii ma tamaitai o e sa ola i luga o le fogaeleele, o e na tauivi ma mea faigata, o e sa feupuai ma tau, o e sa ola i ni taimi eseese i le tulafono a le lagi ma faamanuiaina ai, ae o isi taimi sa latou lafoai i lo latou Atua ma faapea ona oo ifo ai i le faatafunaga.¹⁴

E leai se isi tusiga ua ou iloa ua tuuina mai ai ma le manino ia taunuuga pagatia o tagata e mulimuli i auala e ese mai i poloaiga a le Atua. O ona itulau o loo i ai tala e uiga i ni nuu iloga se lua sa faapea ona tutupu olaola i le Itulagi i Sisifo. Sa amata ia malo taitasi o ni nuu laiti, ma sa savavali ma le matatau ona tagata i le Alii. Sa faamanuiaina ia malo taitasi, ae faatasi ai ma le faamanuiaina na oo mai ai le faateteleina o le amioleaga. Sa gauai atu tagata i mailei a taitai fia tele ma le poto leaga, o e sa faatigaina i latou i lafoga mamafa, o e sa faafilemuina i latou i folafolaga gaogaoii, o e sa faatagaina ma faapea foi ona uunaia le ola amioleaga ma le le mama, o e sa taitaia i latou i taua leaga na faapea ona oo ai i le maliliu o le faitau miliona ma iu ai ina tafi ese ia malo tetele e lua i ni vaitaimi eseese se lua.

E leai se isi molimau tusitusia ua faaalia manino mai ai le mea moni e faapea, afai e savavali tagata ma atunuu ma le matatau i le Atua ma usiusitai i Ana poloaiga, o le a latou tutupu ma ola, ae pe a latou faagaloina o ia ma lana upu, o le a faapea ona oo mai se faatafunaga lea, sei vagana e taofia e le amiotonu, o le a taitai atu ai i le vaivai ma le oti. O le Tusi a Mamona o se faamautinoaga o le faataoto a le Feagaiga Tuai, “O le amiotonu e viia ai le nuu: a o le agasala o le luma lea o le nuu.” (Faataoto 14:34.)¹⁵

Ia Aokuso 1830, a o avea ai ma se faifeau e le’i faauuina, sa malaga Parley Parker Pratt mai Ohaio e agai atu i Niu Ioka i sasae. I Newark, e faasolo atu i le Erie Canal, sa ia tuua ai le vaa ma savali atu mo le sefulu maila [16 kilomita] e alu i tuā, lea sa la fetaui ai ma se tiakono o le lotu Papatiso e igoa ia Hamlin, o le sa faamatala atu ia te ia, “e uiga i se tusi, se TUSI ESE, se TUSI ESE LAVA! … Na fai mai o ia, o lenei tusi, lea sa faapea na tusia muamua i papatusi a le o le auro po o le apamemea, e se lala o le ituaiga o Isaraelu; ma sa mauaina ma faaliliuina e se alii talavou e lata i Palemaira, i le Setete o Niu Ioka, e ala i le fesoasoani a faaaliga vaaia, po o le auaunaga a agelu. Sa ou fesili atu ia te ia pe faapefea po o fea foi e mafai ona maua mai ai lea tusi. Sa ia folafola mai e mafai ona ou vaai i ai, i lona fale i le aso na sosoo ai. … O le taeao na sosoo ai, sa ou alu ai i lona fale, lea, mo le taimi muamua lava, na ou vaai ai i le ‘TUSI A MAMONA’—lena tusi o tusi … lea sa avea ma auala autu, i aao o le Atua, o le faatonutonuina o le ala atoa o lo’u olaga i le lumanai.

Ata

Parley P. Pratt o loo faitau

“Sa ou susueina ma le naunautai, ma faitau lona itulau autu. Ona ou faitauina lea o molimau a nisi o molimau e faatatau i lona mauaina ma le faaliliuina. Ina ua mavae lenei mea, sa ou amata faitauina ona anotusi mai le amataga. Sa ou faitau i le aso atoa; o le ai, sa o se avega mamafa, sa leai so’u manao i se meaai; o le moe sa o se avega mamafa pe a oo mai le po, aua sa sili atu ia te a’u le faitau i lo o le moe.

“A o ou faitauina, sa i o’u luga le agaga o le Alii, ma sa ou iloa ma malamalama ua moni le tusi, e pei lava lona manino ma le iloagofie o le malamalama ma le iloa e se tagata o loo i ai o ia” (Autobiography of Parley P. Pratt, 3rd ed., Salt Lake City: Deseret Book Co., 1938, pp. 36–37.)

O Parley Pratt i lena taimi sa luasefulu tolu ona tausaga. O le faitauina o le Tusi a Mamona sa matuai o’oo’o ona aafiaga ia te ia, o lea sa le’i leva ae papatisoina o ia i totonu o le Ekalesia ma avea ai ma se tasi o ona lagolago aupito mataalia ma malosi. …

O le aafiaga o Parley Pratt i le Tusi a Mamona sa le tulaga ese. A o salalau atu ma faitauina ia voluma o le lomiga muamua, sa faapea foi ona ootia loloto ai le faitau selau o alii ma tamaitai malolosi, na faapea ona latou tuua ai mea uma sa latou anaina, ma i tausaga mulimuli ane, sa le toaitiiti i latou na foaia o latou soifua mo le molimau na latou tauaveina i o latou loto e uiga i le moni o lenei lomiga maoae.

I aso nei … o le [tusi] lenei ua sili atu ona toatele tagata ua faitauina nai lo o se isi lava taimi i lona talafaasolopito. … O lona faanatinati ua le taofia e pei o le taimi, ua i ai i le lalolagi atoa e pei o le tagata.¹⁶

Ua pai atu [le Tusi a Mamona] mo le manuia o olaga o le faitau miliona o e ua faitau ma le agaga tatalo i ai ma mafaufau loloto i ona upu. Se’i ou faamatala atu e uiga i se tasi o i latou na. …

Sa avea o ia ma se tagata faipisinisi, ma sa faamanuiaina ana taumafaiga. A o i ai i sana faigamalaga, sa feiloai atu ai i ni a tatou faifeautalai se toalua. Sa laua taumafai e faatulaga se taimi e aoao ai o ia. Sa taumafai o ia e tolopo, ae sa iu lava ina ioe e faalogo. Sa ia taliaina ma le leai sona naunau moni i mea o le a laua tauina atu. Sa oo ina faatalitonuina lona mafaufau sa laua tautatala atu i le mea moni, ae peitai, sa le’i faagaeetia ai lona loto.

Sa tonu ia te ia o le a na faitauina le Tusi a Mamona. Fai mai o ia, sa avea o ia ma se tagata o le lalolagi, e le taitai tagi. Ae a o ia faitau i le tusi, sa maligi ona loimata. Sa i ai se mea na faia [e le tusi] ia te ia. Sa ia toe faitauina ma lagonaina ai na lava faalogona. O le mea sa avea ma liliuga o le mafaufau, na oo ina avea ma liliuga o le loto.

Sa suia lona olaga, sa suia lana vaaiga. Sa ia tuuto atu o ia lava i le galuega a le Alii. O le aso, o loo ia faataunuuina ai se valaauga maualuga ma paia i le faamoemoega lea ua iu ina alofa i ai.¹⁷

Se’i ou faamatala atu [se isi] tala e uiga i le Tusi a Mamona. Sa ou faalogo i se alii o se tagata e ana se faletupe i Kalefonia o ia faamatala le tala lenei. Na fai mai o ia, o lana failautusi sa ulaula, ulaula i taimi uma. Sa fai ma ana vaisu le ulaula. Sa le mafai ona ia tuua. I se tasi aso sa ia faapea atu ia te ia, “E mafai faapefea ona ou tuua le ulaula?”

Sa ia aapa ifo i totonu o lana kesi ma aumai i fafo se kopi o le Tusi a Mamona ma tuu atu ia te ia. Sa ia faapea atu, “Ia, faitau le [tusi] lenei.”

Sa fai atu o ia, “Ua lelei, o le a ou faitauina.”

Sa toe sau o ia i le lua o aso mulimuli ane ma faapea atu, “Ua ou faitauina itulau e 200, ae ou te le’i vaai lava i se mea o i ai le upu ulaula . Ou te le’i vaai i se mea i le upu tapaa . Ou te le’i vaai i se mea e faatatau i ai.”

Sa fai atu o ia, “Ia faitau pea.”

O lea sa toe foi mai ai i le isi lua aso mulimuli ane ma fai mai, “Ua ou faitauina isi itulau e 200—e leai ma se ulaula o ta’u mai ai, leai se nikotini o ta’u mai ai, ma e le o ta’ua mai ai foi se mea e faatatau i le tapaa.”

Sa fai atu o ia, “Faitau pea.”

Sa toe sau o ia i le tolu pe fa o aso mulimuli ane. Na fai mai o ia, “Ua ou faitauina le tusi atoa. E leai lava se mea na ou vaai ai i se tapaa; e leai foi se mea na ou vaai ai i le ulaula. Ae,” sa ia fai mai ai, “ua oo mai ai i totonu o lo’u loto o se taunuuga o le faitauina o lena tusi se aafiaga, se mana, ua aveesea mai ia te a’u le manao e ulaula, ma e ese le manaia.”¹⁸

Se’i ou faamatala atu e uiga i se tusi sa ou mauaina. … Sa tusi mai se alii ma fai mai, “O loo o’u i ai i se falepuipui a le malo. Na ou tau lata mai nei i se kopi o le Tusi a Mamona i le potutusi a le falepuipui. Ua ou faitauina, ma ina ua ou faitau i le auega a Mamona i lona nuu na faaumatia—‘E, outou tagata lalelei e, pe na mafai faapefea ea ona outou o ese mai ala o le Alii! E, outou tagata lalelei e, pe na mafai faapefea ea ona outou teena Iesu lena, o le na tu mai ma aao faaloaloa mai e tali outou! Faauta, a na outou le faia lenei mea, po ua outou le pauu’ (Mamona 6:17–18)—Sa ou lagonaina na pei lava o loo tautala mai Mamona ia te a’u. Pe mafai ona ou maua se kopi o lena tusi?”

Sa matou auina atu ia te ia se kopi. O se taimi mulimuli ane, sa savali mai ai o ia i totonu o lo’u ofisa o se tagata ua suia. Sa pa’i atu ia te ia le agaga o le Tusi a Mamona ma o le aso, o ia o se alii faamanuiaina, ua toefaafoisia mai lona malosi, maua ma le faamaoni se tupe mo ia lava ma lona aiga.

E faapena le mamana o lenei tusi maoae i olaga o i latou e faitau i ai ma le agaga tatalo.

Uso e ma tuafafine, e aunoa ma le masalosalo ou te folafola atu ia te outou, afai o le a outou faitau ma le agaga tatalo i le Tusi a Mamona, e tusa lava pe ua faafia ona e faitauina muamua, o le a faapea ona oo atu i totonu o o outou loto se fuataga faaopoopo o le Agaga o le Alii. O le a oo mai ai se naunautaiga ua faamalosia e savavali i le usiusitai i ana poloaiga, ma o le a oo mai ai se molimau malosi atu i le soifua moni o le Alo o le Atua.¹⁹

• Aisea tatou te manaomia ai le Tusi a Mamona? O a nisi o fuaitau o le Tusi a Mamona ua faamalosia ai lau molimau ia Iesu Keriso? O a ni faataitaiga ua e vaaia o le “o faatasi” o le Tusi a Mamona ma le Tusi Paia e molimau e uiga i le Faaola? (Tagai vaega 1.)

• Aisea e te manatu ai, e sili atu ai le taua o le folafolaga i le Moronae 10:3–5 nai lo o le faamaoniga faaletino o le Tusi a Mamona? (Tagai vaega 2.) O a ni aafiaga na e maua i lenei folafolaga?

• A o e toe faamanatuina le vaega e 3, ia matau upumoni e mafai ona tatou iloa pe a tatou maua se molimau o le Tusi a Mamona. O a ni auala o loo molimau mai ai le Tusi a Mamona e uiga i nei upumoni?

• Mafaufau e uiga i nisi o “faafitauli o le lalolagi i aso nei” (vaega 4). O a ni auala e mafai ai e le Tusi a Mamona ona fesoasoani ia i tatou ia maua tali i na faafitauli? O a nisi o fuaitau i le Tusi a Mamona na fesoasoani ia te oe i taimi o luitau faaletagata lava ia?

• Mafaufau loloto i tala o loo i le vaega e 5. Afai e fesili atu se tasi ia te oe e uiga i le Tusi a Mamona, o le a sau tala e fai atu i le ala ua ia faia ai se aafiaga i lou olaga?

Isaia 29:9–18; 1 Nifae 13:35–41; 2 Nifae 29:6–9; Moronae 10:27–29; MF&F 20:8–12; 42:12–13

“Ou te faafetai mo le faamamafa i le faitauga o tusitusiga paia. Ou te faamoemoe, mo outou o le a avea lenei mea ma se mea e sili atu ona faafiafiaina nai lo o se tiute; ma, nai lo o lena, o le a avea ma se faifaiga alofa ma le afioga a le Atua. Ou te folafola atu ia te outou, a o outou faitau, o le a faamalamalamaina o outou mafaufau ma o le a siitia o outou agaga. O le taimi muamua e ono foliga mai e faalemanaia, ae o le a suia lena mea i se aafiaga ofoofogia i manatu ma upu e uiga i mea paia” (Gordon B. Hinckley, “O Le Malamalama i Totonu ia te Outou,” Liahona, Iulai 1995, 112).