Mataupu 8

Tatou Te Vaai Atu ia Keriso

“Tatou te talitonu ia Keriso. Tatou te aoao atu e uiga ia Keriso. Tatou te vaai atu ia Keriso. O Ia o lo tatou Togiola, o lo tatou Alii, ma lo tatou Faaola.”

Mai le Soifuaga o Gordon B. Hinckley

I le konafesi aoao ia Aperila 1975, sa faasoa atu ai e Elder Gordon B. Hinckley, a o avea ai ma se tasi o le Korama a Aposetolo e Toasefululua, le aafiaga lenei:

“Talu ai nei sa faia ai se fale tatala o le Malumalu o [Mesa] Arisona. I le mae’a ai o se faafouga atoa o lena fale, na toeitiiti atoa le kuata miliona o tagata sa vaai i le manaia o totonu. I le aso muamua o le tatalaga, sa valaaulia ai faifeau o isi ekalesia o ni malo faapitoa, ma e faitau selau na tali mai. Sa o se faamanuiaga ia te a’u le talanoa atu ia i latou ma tali a latou fesili i le faaiuga o a latou maimoaga taamilo [i le malumalu]. Sa ou fai atu ia i latou, o le a matou fiafia e tali soo sa latou faafesili e ono i ai. E tele ni fesili na tuuina mai. O se tasi o na fesili sa tuuina mai e se faifeau Porotesano.

“Sa ia saunoa mai: ‘Ua ou soo atoa i lenei maota, lenei malumalu o loo tauave i ona foliga le suafa o Iesu Keriso, ae e leai se mea o o’u vaai o i ai se faatusa o le satauro, le faailoga o le FaaKerisiano. Ua ou matauina o outou maota i isi nofoaga ma e faapena foi ona le i ai le satauro. Aisea e tupu ai lenei mea, ae o loo outou fai mai tou te talitonu ia Iesu Keriso?’

“Sa ou tali atu: ‘Ou te le manao e faatiga i soo se tasi o o’u uso a Kerisiano o e e faaaogaina le satauro i luga o ’olo o o latou falesa tetele ma i fata faitaulaga o o latou falesa, o e laeiina i o latou laei fai sauniga, ma lolomi i luga o a latou tusi ma isi tusitusiga. Ae o i matou, o le satauro o se faailoga o le Keriso maliu, ae o le matou savali o se folafolaga o le Keriso soifua.’

“Ona ia fesili mai lea: ‘Afai tou te le faaaogaina le satauro o le a la le faailoga o la outou tapuaiga?’

“Sa ou tali atu, o olaga o o tatou tagata e ao ona avea ma faailoaga anoa e tasi o lo tatou faatuatuaga ma, o le mea moni, o le faailoga lea o le tatou tapuaiga. …

“… E leai se faailoga, leai se galuega o faatufugaga, leai se faailoga o se faatusa e lava ona faamatalaina ai le mamalu ma le ofoofogia o le Keriso Soifua. Sa ia ta’u mai ia i tatou lena faailoga ina ua ia fetalai mai, ‘Afai tou te alofa mai ia te a’u, ia outou tausi mai i a’u poloaiga.’ (Ioane 14:15.)

“I le avea ai ma soo, e le mafai ona tatou faia se mea faalealofa pe leaga, pe faatufanua e aunoa ma le faaleagaina o lona faatusa. Pe mafai foi ona tatou faia se galuega lelei ma agalelei ma alofa e aunoa ma le faaiilaina atili o le faailoga o ia, o le o lona suafa o loo tatou tauaveina i o tatou luga.

“Ma o lea e ao ai ona avea o tatou olaga ma se faailoaga anoa, o le faailoga o le tatou folafolaina atu o la tatou molimau e uiga i le Keriso Soifua, le Alo e Faavavau o le Atua Soifua.

“O’u uso e ma tuafafine, e faapena le faatauvaa, ma e faapena le loloto, ma ia aua lava ne’i galo ia i tatou lena mea.”¹

“O le mea aupito taua i lo tatou faatuatuaga, o la tatou molimau ia Iesu Keriso o le Alo o le Atua. … O Ia o le maatulimanu autu o le ekalesia o loo faapea ona tauaveina Lona suafa.”

Aoaoga a Gordon B. Hinckley

O Iesu Keriso o le Alo soifua o le Atua soifua.

“O le mea aupito taua i lo tatou faatuatuaga, o la tatou molimau ia Iesu Keriso o le Alo o le Atua. … O Ia o le maatulimanu autu o le ekalesia o loo faapea ona tauaveina Lona suafa.”²

Tatou te talitonu ia Keriso. Tatou te aoao atu e uiga ia Keriso. Tatou te vaai atu ia Keriso. O Ia o lo tatou Togiola, lo tatou Alii, ma lo tatou Faaola.³

Galuega i le lalolagi

O Ia o le Alo o le Atua, o le Atalii e Toatasi na Fanaua, sa tuua nofoaga selesitila o Lona Tama ina ia soifua i le olaga faitino. I Lona soifua mai, sa pepese ai agelu ma sa o atu le Au Makoi e tuuina atu ni meaalofa [ia te Ia]. Sa tuputupu a’e o Ia, sa pei foi o isi tama i Nasareta i Kalilaia. O iina sa “tupu le poto ma le tino [o Iesu], ua alofagia o Ia e le Atua atoa ma Tagata” (Luka 2:52).

Sa latou asiasi atu ma Maria ma Iosefa i Ierusalema ina ua 12 Ona tausaga. I le latou malaga toe foi atu i le fale, sa laua sueina ai o Ia. Sa laua toe foi mai i Ierusalema ma maua atu o Ia i totonu o le malumalu, o talanoa ma le au fomai popoto. Ina ua otegia o Ia e Maria ona o lona le i ai faatasi ma i laua, sa Ia tali atu, “Lua te le iloa ea e tatau ona ou i le fale o lo’u Tama” (Luka 2:49). O Ana fetalaiga sa o se faaataataga o Lana galuega i le lumanai.

O lena galuega sa amatalia i Lona papatisoga i le vaitafe o Ioritana i lima o Lona tausoga o Ioane. Ina ua alu a’e o Ia nai le vai, sa afio ifo le Agaga Paia i Ona luga e peiseai o se lupe, ma sa faalogoina le siufofoga o Lona Tama, na fetalai mai, “O lou Atalii pele lena, ua Ou fiafia lava ia te Ia” (Mataio 3:17). O lena tautinoga na avea ma faamautinoaga o Lona paia.

Sa anapogi o Ia mo aso e 40 ma sa faaosoosoina e le tiapolo, o le sa saili e aveese o Ia mai Lana misiona paia sa tofia i ai. Sa Ia tali atu i le valaaulia a le fili, “Aua e te tofotofo i le Alii lou Atua” (Mataio 4:7), ua toe tautino atu ai i Lona avea ma alo paia.

Sa femaliuai o Ia i auala pefua o Palesitina. Sa leai Sona aiga na mafai ona Ia faia mo Ia lava, leai se mea e taoto ai Lona ao. O Lana savali sa o le talalelei o le filemu. O Ana aoaoga o aoaoga o le agalelei ma le alofa. “Ma afai e i ai se tagata na te su oe i le tulafono ma ave lou peleue, ia tuu atu foi ia te ia lou pulupulu” (Mataio 5:40).

Sa Ia aoao atu e ala i faataoto. Sa Ia faia vavega ma e le’i i ai se tasi o na vavega na faia muamua pe na faia talu mai lena taimi. Sa Ia faamaloloina i latou na loa ona mama’i. Sa Ia faapupula i tauaso, faafaalogo i tutuli, ma faasavavali pipili. Sa Ia faatuina e na oti, ma sa latou toe ola e viia o Ia. E moni lava, e leai se tagata na faia muamua se mea faapena.

E toaitiiti na mulimuli ia te Ia, ae toatele na feita ia te Ia. Sa Ia fetalai e uiga i le au tusiupu ma le au Faresaio o ni tagata pepelo, ua tusa ma ni tuugamau ua faasinasinaina. Sa latou taupulepule leaga faasaga ia te Ia. Sa Ia tutuli ese tagata faatau tupe mai le maota o le Alii. Atonu na latou auai faatasi ma i latou o e na taupulepule e faatamaia o Ia. Ae sa le’i taofia ai o Ia. Sa “femaliuai [o Ia] ma agalelei” (Galuega 10:38).

Pe sa le’i lava ea nei mea uma tatou te manatua ai o Ia e faavavau? Pe sa le’i lava ea nei mea e tuu ai Lona suafa faatasi, po o luga a’e foi, o na alii maoae o e sa savalia le lalolagi ma o e ua manatuaina mo mea na latou tautalagia pe faia? E mautinoa lava e mafai ona faatulagaina o Ia faatasi ma perofeta maoae uma o le olaga nei.

Ae peitai, o nei mea uma, sa le’i lava lea mo le Alo o le Silisili Ese. Ae sa o se ta’imua i mea tetele o le a oo mai. Sa oo mai i se auala ese lava ma matautia tele.⁴

Pu’eina, faasatauroga ma le maliu

Sa faalataina, pu’eina, faasalaina i le oti, ia oti i le tiga tele e ala i le faasatauroga. Sa tu’itu’ia Lona tino ola i se satauro laupapa. I se tiga e le mafaamatalaina, sa faapea ona aluese malie atu ai Lona soifua. Ae a o soifua pea o Ia, sa Ia alaga atu, “Lo’u Tama e, ia e faamagaloina atu ia te i latou; aua ua latou le iloa le mea ua latou faia” (Luka 23:34).

Sa luluina le laueleele a o tuua [o Ia] e Lona agaga. O le taitai o le toaselau o le sa vaai i ia mea uma, sa ia tautino faamaoni mai, “E moni o le Alo lava lenei o le Atua” (Mataio 27:54).

O i latou sa alofaina o Ia, sa latou aveese mai Lona tino mai le satauro. Sa latou tapenaina ma tuu [Lona tino] i totonu o se tuugamau fou. …

Atonu na fetagisi Ana uo. Sa fetagisi le Au Aposetolo sa Ia alofaina ma o e sa Ia valaauina o ni molimau i Lona paia. Sa fetagisi ia tamaitai sa alofaina o Ia. Na leai se tasi na malamalama i le mea sa Ia fetalai ai e uiga i le toetu a’e i le aso tolu. E mafai faapefea ona latou malamalama? E le’i tupu muamua lava se mea faapenei. Na leai se mea faapea na tupu muamua. Sa le talitonuina, e oo lava ia i latou.

Atonu sa i ai se lagona faanoanoa tele ona o le toilalo ma le leai o se faamoemoe ma le faavauvau a o latou mafaufau i le aveesea o lo latou Alii mai ia i latou ona o le oti.⁵

Toetu

Ae peitai sa le o le mutaaga lena. I le taeao o le aso tolu, sa toe foi atu ai Maria le Makatala ma le isi Maria i le tuugamau. I lo laua maofa tele, sa aveesea le maa ma sa matala le tuugamau. Sa la’ua autilo atu i totonu. Sa saofafai mai ni tagata i laei papae i itu uma e lua o le nofoaga na tanumia ai [le Faaola]. Sa faaali atu se agelu ia i la’ua ma faapea atu, “Aisea tou te saili le ua soifua i e ua oti?

“E le o iinei o ia, a ua tu; ia outou manatu i lona fetalai atu ia te outou, ina o i Kalilaia o ia,

“Ua faapea atu, E tatau ona tuuina atu o le Atalii o le Tagata i lima o tagata agasala, ma ia faasatauroina, ma toetu mai i le aso tolu” (Luka 24:5–7).

O nei faaupuga faigofie—“E le o iinei o ia, a ua tu”—ua avea ma faaupuga aupito sili ona o’oo’o o tusitusiga uma. O le folafolaga lea o le tuugamau avanoa. O le faataunuuga lea o mea uma sa Ia fetalai ai e uiga i le toe tu mai. O le tali fiafia lea i le fesili e feagai ma alii, tamaitai, ma fanau uma o e ua fananau mai i le lalolagi.

“O Lana savali sa o le talalelei o le filemu. O Ana aoaoga o aoaoga o le agalelei ma le alofa.”

Sa fetalai atu le Alii toetu ia Maria, ma sa tali atu o ia. Sa le o Ia o se aitu. Sa le o se mea lenei na vaai faalemafaufau i ai. Sa moni o Ia, sa moni e pei lava ona sa i ai o Ia i le olaga i le tino. Sa Ia le faatagaina o ia e pa’i atu ia te Ia. Sa le’i alu atu muamua o Ia i lona Tama oi le Lagi. O le a le mamao ona tupu lea o lena mea. Ai se matagofie o lena faatasiga, le opoina e le Tama, o le alofa ia te Ia ma o le atonu na tutulu mo Ia i taimi na tigaina ai o Ia.

O le a faaali atu o Ia i alii e toalua na agai atu i le ala i Emau. O le a Ia talanoa ma i la’ua ma talisua faatasi ma i la’ua. O le a faatasi faalilolilo o Ia ma Ana Aposetolo ma aoao atu ia i latou. Sa le’i i ai Toma i le faatasiga muamua. I le faatasiga lona lua, sa valaaulia ai o Ia e le Alii e tagotago i Ona aao ma Lona itu. I le maofa tele sa ia alaga ai, “Lo’u Alii e, ma lo’u Atua e” (Ioane 20:28). Sa fetalai atu o Ia i le toa 500 i [se tasi] taimi. …

Ma o loo i ai foi se isi molimau. O le soa faaletusitusiga paia, o le Tusi a Mamona, o loo molimau mai sa le gata ina faaali atu o Ia ia i latou o le Lalolagi Tuai, ae sa faaali atu foi i a i latou i le Lalolagi Fou. Aua pe sa le’i fetalai ea o Ia i se tasi o taimi, “Ua i ai ia te au ni isi mamoe ua le o i lenei lotoa; e ao foi ona ou aumai i latou; ma o le a latou faalogo i lou leo; ma o le a tasi le lafu, ma tasi le leoleo mamoe”? (Ioane 10:16).

Ia i latou i lenei itulagi sa Ia faaali atu i ai i le mavae ai o Lona Toetu. I Lona afio ifo mai ao o le lagi, sa toe faalogoina ai le siufofoga o le Atua e Faavavau na tautino mai ma le paia: “Faauta i lou Atalii Pele, o le ua ou fiafia lava i ai, o le ua ou faamamaluina ai lou igoa—ia outou faalogo ia te ia” (3 Ni. 11:7). …

Ma afai e le lava nei mea uma, o loo i ai le molimau, moni ma faamaoni ma e le mafaafitia, o le perofeta maoae o lenei tisipenisione, o Iosefa Samita. A o taulealea sa alu atu ai o ia i le togavao e tatalo i le sailiga o le poto ma le malamalama. Ma sa ia vaaia ni Tagata e toalua, o lo laua pupula ma le mamalu e lē mafaamatalaina, o tutu mai i ona luga a’e i le ea. Sa fetalai atu le tasi o i laua ia te ia, ma ta’u lona “igoa ma fetalai atu, a’o tusi ane i le tasi—O Lo’u Atalii Pele lenei. Faalogo ia te Ia!” [Iosefa Samita—Talafaasolopito 1:17].

O Iosefa lava lenei na tautino mai i se taimi mulimuli ane: “Ma sa ma vaaia le mamalu o le Alo, i le lima taumatau o le Tamā, ma ua maua lona atoatoa; …

“Ma o lenei, ina ua mavae le tele o molimau ua tuuina mai e uiga ia te ia, o le molimau mulimuli lenei, i molimau uma, ma te tuu atu e uiga ia te ia: O loo soifua o ia!” (MF&F 76:20, 22).⁶

Ia i latou uma o e o i ai ni masalosaloga, ou te toe ta’u atu upu na tuuina atu ia Toma a o ia tagotago i manu’a i aao o le Alii: “Aua foi e te masalo vale, a ia e talitonu” [Ioane 20:27]. Talitonu ia Iesu Keriso, le Alo o le Atua, o le tamalii aupito sili o le olaga nei ma le faavavau. Talitonu i lona soifua lē mafaatusalia e tau i tua atu o le lalolagi a’o le’i faavaeina. Talitonu o ia o le Foafoa o le lalolagi o loo tatou ola ai. Talitonu o ia o Ieova o le Feagaiga tuai, o ia o le Mesia o le Feagaiga Fou, ma na maliu ma na toetu mai o ia, ma sa ia asiasi atu i konetineta i sisifo ma aoao atu i tagata iina, ma ua taitai o ia i lenei tisipenisione faaiu o le talalelei, ma o loo soifua o ia, o le Alo soifua o le Atua soifua, o lo tatou Faaola ma lo tatou Togiola.⁷

E mafai ona iloa e i tatou taitoatasi o Iesu Keriso le Alo o le Atua ma o le Togiola o le lalolagi, ua toetu mai i le tuugamau.

O loo i ai se … taua o loo tauina mo le faatuatua o tagata, peitai e le o taimi uma e … manino ai le faailoaina mai o itu o loo feteenai, aua e oo lava foi i autau a le au Kerisiano, o loo i ai foi i latou o e o le a faatamaia le paia o Keriso o lona suafa lea o loo latou tautalagia. Atonu e le manatulia i latou pe ana le matuai faatosina o latou leo, pe ana le matuai malosi o latou aafiaga, pe ana le maaleale a latou mafuaaga.

… O le a faapotopoto le mano o tagata i luga o le fia afe o mauga e talitalia le gafoa a’e o le aso o le Eseta ma faamanatu ai ia i latou lava le tala e uiga ia Keriso, o lona toetu lea o le a latou faamanatuina. I le gagana e matagofie ma lelei, o le a toe faamatala ai e failauga o tapuaiga e tele le tala o le tuugamau avanoa. Ia i latou—ma ia te oe—ou te tuu atu ai le fesili lenei: “Pe e te talitonu moni lava i ai?”

Pe e te talitonu o Iesu Keriso o le Alo o le Atua, o le atalii moni o le Tama?

Pe e te talitonu o le siufofoga o le Atua, le Tama e Faavavau, sa faalogoina i luga a’e o vai o Ioritana lea na tautino mai, “O Lo’u Atalii pele lena, ua ou fiafia lava ia te ia”? (Mataio 3:17.)

Pe e te talitonu ea o lenei lava Iesu o le fai vavega, o le na faamalolo i e mama’i, o le na toe faafoisia mai le malosi o e le atoatoa, ma o le na tuuina atu le ola i e na oti?

Pe e te talitonu i le mavae ai o lona maliu i le mauga o Kalevaria ma lona tanumia i le tuugamau o Iosefa, sa toe soifua mai ai o ia i le aso tolu?

Pe e te talitonu moni o loo soifua o ia—e moni malosi, ma o ia lava lea—ma o le a toe afio mai o ia e pei ona folafolaina mai e agelu i lona afio a’e?

Pe e te talitonu moni lava i nei mea? Afai o lea, o lona uiga o oe o se vaega o se tino toaitiiti o tagata e talitonu moni i upu o le Tusi Paia, o e ua faateteleina ona amusia e le au fai filosofia, o e ua faateteleina ona tauemuina e nisi o le au atamamai, ma o e ua faateteleina ona manatulia e faapea “ua le taulia ma le toe aoga [o latou talitonuga]” e se vaega faatoateleina o faifeau o tapuaiga ma au failotu lauiloa.

… I manatu o nei tagata atamamai, o nei mea o ni talafatu—o le soifua mai o Iesu o le Alo o le Atua o le na pepese ai agelu i laufanua o Iutaia, o le faivavega o le na faamaloloina i e mama’i ma faatutu i e na oti, o le Keriso na toetu mai i le tuugamau, o le afio a’e ma le folafolaga e toe afio mai.

O nei failotu i onaponei, ua latou aveese mai ia te ia lona mamalu ona toe mafaufau lea pe aisea ua le tapuai atu ai tagata ia te ia.

O le Faaola toetu na savavali faatasi ma ni alii se toalua i le auala i Emau.

O nei tagata atamamai na aumaia mai ia Iesu le ofutele o le avea ma atua ae tuua ai na o se tagata. Ua latou taumafai e tuu o ia i o latou lava manatu papa’u. Ua latou faoa o ia i lona tulaga mamalu o se alo [o le Atua] ma aveesea mai le lalolagi lona Tupu moni. …

… Ou te tuu atu la tatou molimau faamaoni, e le o maliu le Atua, e vagana ai e pei ona manatulia o ia i se faaiugaga e leai se ola. …

… E manaomia se mea e sili atu nai lo na’o se talitonuga talafeagai. E manaomia se malamalamaaga i lona tulaga uiga ese ma le le mafaatusalia o le Faaola paia ma se naunautai mo ia ma lana savali i le avea ai ma Alo o le Atua.

O lena malamalamaaga ma lena naunautai o loo avanoa mo i latou uma o e o le a totogia le tau. E le mafai ona i ai faatasi ma aoaoga maualuga atu, ae o le a le mafai foi ona oo mai i le na’o se uiga o le faitau. Leai, e oo mai i se faagasologa e faigofie lava. O mea a le Atua e malamalama i ai e ala i le Agaga o le Atua. (1 Korinito 2:11.) O loo faapea ona tautino mai i upu o le faaaliga.

O le mauaina o le malamalama ma le naunautai mo le Alii, e sau mai i le mulimuli i tulafono faigofie. … Ou te fia fautuaina atu le tolu, e faigofie i lo latou manatu, ae toetoe ina a soona faaaoga ma le manaia i lo latou ta’ua soo, ae e taua i lo latou faatatauga ma aoga i o latou taunuuga. …

O le muamua ia faitau—ia faitau i afioga a le Alii. … Mo se faataitaiga, faitau le Tusi a Ioane ma i lona amataga e oo i lona faaiuga. Tuu atu i le Alii e fetalai mai mo ia lava ia te oe, ma o le a oo mai ana afioga faatasi ma se tautinoga filemu, lea o le a faapea ona faaleaogaina ai upu a i latou o e faitio ia te ia. Ia faitau foi i le molimau a le Lalolagi Fou, le Tusi a Mamona, le na aumaia e se molimau “o Iesu o le Keriso, o le Atua Faavavau, ua faaali mai o ia lava i atunuu uma.” (Itulau autu o le Tusi a Mamona.)

O le isi e sosoo ai, ia auauna atu—ia auauna atu i le galuega a le Alii. … O le faamoemoe o Keriso e le manaomia ai ou masalosaloga; e manaomia ai lou malosi ma taimi ma taleni; ma a o e faaaogaina nei mea i lau auaunaga, o le a tuputupu a’e lou faatuatua ae o le a matafi ese ou masalosaloga. …

O le lona tolu ia tatalo. Talanoa ma lou Tama e Faavavau i le suafa o Lona Alo Pele. “Faauta, ou te tu atu i le puipui ma tu’itu’i atu: ai se tasi e faalogo mai i lo’u leo, ma tatala mai le puipui, ou te ulufale atu ia te ia, ma te tali sua foi ma ia, o ia foi ma a’u.” (Faaaliga 3:20.)

O lana valaaulia lea, ma e moni lava le folafolaga. Atonu o le a le masani ai ona e faalogo i leo mai le lagi, ae o le a oo mai se faamautinoaga na auina mai le lagi, e filemu ma mautinoa. …

… E susulu mai i filosofia fenumia’i uma, lea e ta’ua o faitioga maualuluga atu, ma talitonuga le lelei, o le a faapea ona oo mai ai le molimau a le Agaga Paia e faapea, e moni lava o Iesu o le Alo o le Atua, na fanaua i le tino, o le Togiola o le lalolagi na toetu mai i le tuugamau, o le Alii o le a afio mai e nofotupu o le Tupu o tupu. O lou avanoa la ia iloa. O lou tiute la ia sailia.⁸

E tatau ona tatou fesili ifo ia i tatou lava e le aunoa, “O le a se mea tatou te faia ia Iesu o le ua igoa ia Keriso?”

Ou te toe fai atu le fesili na tuuina mai e Pilato i le lua afe tausaga ua mavae, “Se a foi le mea ou te faia ia Iesu o le ua igoa ia Keriso?” (Mataio 27:22.) Ioe, e tatau ona tatou fesili ifo ia i tatou lava e le aunoa, O le a se mea tatou te faia ia Iesu o le ua igoa ia Keriso? O le a se mea tatou te faia i ana aoaoga, ma e mafai faapefea ona tatou faia ina ia avea ma se vaega e le mavavaeeseina o o tatou olaga? …

… “Faauta i le Tamai Mamoe a le Atua, na te aveesea le agasala a le lalolagi.” (Ioane 1:29.) O le a mativa moni lava o tatou olaga pe a aunoa ma le aafiaga a ana aoaoga ma lana faataitaiga le mafaatusalia. O lesona o le liliu atu o le isi alafau, alu i le maila faaopoopo, o le toe foi mai o le faamaumauoa, ma le anoano o isi aoaoga e le mafaatusalia, ua tuufaasolo mai i augatupulaga ina ia avea ma tulaga e uunaia ai, e aumaia ai i fafo le agalelei ma le alofa mutimutivale i le tele o le le alofa o le tagata i le tagata.

Ua nofotupu sauaga faalealofa i le mea na tuliesea ai Keriso. O loo taitai le agalelei ma le faapalepale i le mea o loo iloa ai Keriso ma mulimulitaia ai ana aoaoga.

O le a se mea tatou te faia ia Iesu o le ua igoa ia Keriso? “Sole ua faaali atu e ia ia te oe le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feoai ma lou Atua ma le loto faamaulalo?” (Mika 6:8.)

“O le mea lea, Ou te fai atu ai ia te outou, e tatau ona outou faamagalo i le tasi; ona o ia o lē e lē faamagalo atu i lona uso i ana agasala, e tu tausalaina o ia i luma o le Alii; aua e tumau ia te ia le agasala tele atu.” (MF&F 64:9.) …

O le a se mea tatou te faia ia Iesu o le ua igoa ia Keriso? “Aua na ou fia ai, ona outou avane ai lea ni mea ou te ai ai: Na ou fia inu, ona outou avane ai lea ni vai ou te inu ai: Sa fai a’u ma tagata ese, ona outou talia lea o a’u: na ou le lavalava, ona outou faaofuina lea o a’u: Na ou ma’i, na outou asiasia mai lea o a’u. Na ou i le falepuipui, ona outou o ane ai lea ia te au. (Mataio 25:35–36) …

O le a se mea tatou te faia ia Iesu o le ua igoa ia Keriso?

Aoao e uiga ia te ia. Suesue i tusitusiga paia aua o mea ia e molimau mai ia te ia. Mafaufau loloto i le vavega o lona soifuaga ma [lana] misiona. Ia taumafai teisi ia filiga atili e mulimuli i lana faataitaiga ma usitai i ana aoaoga.⁹

Tatou te vaai atu ia Iesu Keriso o le papa o lo tatou faaolataga, o lo tatou malosi, o lo tatou fesoasoani, o le autu foi o lo tatou faatuatuaga.

Tatou te le mailoa po o a ni mea o faatalitali mai. Tatou te le mailoa po o a mea e tutupu a taeao. O loo tatou ola i se lalolagi le mautonu. O nisi, o le a tele mea e ausia. O nisi, o le le fiafia. Mo nisi, o le a tele le olioli ma le fiafia, soifua maloloina lelei ma le ola manuia. O nisi, atonu e mama’i, ma fetaiai ma le faanoanoa. Tatou te le iloa. Ae tasi le mea tatou te iloa. E pei o le fetu o le pole i matu, e tusa lava pe o a mea e tutupu i le lumanai, ae o loo i ai le Faaola o le lalolagi, le Alo o le Atua, e moni ma mautinoa o le taula lea o o tatou ola tino ola pea. O Ia o le papa o lo tatou faaolataga, o lo tatou malosi, o lo tatou fesoasoani, o le autu foi o lo tatou faatuatuaga.

Po o le fiafia po o le faanoanoa, tatou te vaavaai atu ia te Ia, ma o loo i ai o Ia iina e faamautinoa ma fesoasoani mai ia te i tatou.¹⁰

Ua ou iloa o loo soifua lo’u Faaola,
Le Faaola manumalo, le Alo o le Atua,
Ua manumalo i tiga ma le oti,
O lo’u Tupu, lo’u Taitai, ma lo’u Alii.

O soifua o Ia, o lo’u papa mausali e tasi o le faatuatua,
O le faamoemoe paia e tasi o tagata i le lalolagi,
O le sulu taiala i se auala lelei atu,
O le malamalama i tua atu o le veli o oti.

Ia, aumai pea lou Agaga lelei,
Le filemu lea e na’o lau afio e oo mai ai,
Le faatuatua e savalia ai le ala ua le toe uia
Lea e tau atu i lou afioaga e faavavau.11

Fautuaga mo Suesuega ma le Aoaoina Atu

Fesili

Toe faamanatu upu o le molimau a Peresitene Hinckley i le vaega 1, ma faaalu se taimi e mafaufau loloto ai i lau oe lava molimau ia Iesu Keriso. Aisea e te faafetai ai mo le galuega ma le Togiola a le Faaola? O a ni tala ma ni aoaoga mai le soifuaga o le Faaola e i ai ni taua faapitoa ia te oe?
Ia fesili ifo ia te oe lava ia fesili taitasi o loo i le vaega e 2. E faapefea ona faatosina e au tali lou olaga i lea aso ma lea aso? I le vaega lava lea e tasi, toe faamanatu ia “tulafono faigofie” e tolu a Peresitene Hinckley mo le mauaina o se malamalamaaga i “mea a le Atua.” O faapefea ona fesoasoani nei mataupu faavae ia te oe e faateleina ai lou malamalama faaleagaga?
Sa faafia ona fesili mai Peresitene Hinckley, “O le a se mea tatou te faia ia Iesu o le ua igoa ia Keriso?” (vaega e 3). O le a se mea e mafai ona tatou aoao mai i ana tali? Mafaufau pe faapefea ona e taliina lenei fesili. Mata e ese faapefea lou olaga pe ana fai e te le iloa ia aoaoga ma faataitaiga a le Faaola?
Sa faamamafa mai e Peresitene Hinckley e faapea, o Iesu Keriso o lo tatou taula i se lalolagi le mautonu (tagai i le vaega e 4). O le a se taimi na e lagonaina ai le malosi ma le fesoasoani a le Faaola i se taimi o puapuaga? Mafaufau loloto i laina taitasi o le viiga a Peresitene Hinckley i le vaega e 4. O a ni auala e avea ai Keriso ma o tatou “faamoemoe paia e tasi”? E faapefea ona avea o Ia ma o tatou “sulu taiala i se auala lelei atu”?

Mau Fesootai

Luka 24:36–39; Ioane 1:1–14; Galuega 4:10–12; 2 Nifae 2:8; 25:26; Alema 5:48; MF&F 110:3–4

Fesoasoani mo Suesuega

“Fuafua ni gaoioiga suesue e faateleina ai lou faatuatua i le Faaola” (Talai La’u Talalelei [2004], 22). Mo se faataitaiga, a o e suesue, atonu e te fesili ifo ia te oe lava ni fesili e pei o nei: E mafai faapefea e nei aoaoga ona fesoasoani e faateleina lo’u malamalama i le Togiola a Iesu Keriso? E mafai faapefea e nei aoaoga ona fesoasoani ia ou avea atili ai e faapei o le Faaola?”