Folasaga
Ua faavaeina e le Au Peresitene Sili ma le Korama a Aposetolo e Toasefululua le faasologa o Aoaoga a Peresitene o le Ekalesia e fesoasoani ai ia te oe ia sili atu ona e latalata i lou Tama Faalelagi ma faaloloto lou malamalama i le talalelei toefuataiina a Iesu Keriso. A o faaopoopo e le Ekalesia voluma i lenei faasologa o tusi, o le a e fausia se faaputuga o tusi faasino o le talalelei mo lou aiga. Ua mamanuina nei tusi e faaaoga mo suesuega faaletagata lava ia ma ni punaoa mo aoaoga. E mafai foi ona fesoasoani e saunia ai ni lesona o afiafi faaleaiga, saunia isi lesona po o lauga, ma tali ai fesili e uiga i aoaoga faavae o le Ekalesia.
O le tusi lenei ua faaalia ai aoaoga a Peresitene Gordon B. Hinckley, o lē na auauna atu o se Peresitene o Le Ekalesia a Iesu Keriso o le Au Paia o Aso e Gata Ai mai le aso 12 o Mati, 1995, e oo atu i le aso 27 o Ianuari, 2008.
Suesuega Faaletagata Lava Ia
A o e suesue i aoaoga a Peresitene Gordon B. Hinckley, ia saili atu ma le agaga tatalo i musumusuga a le Agaga Paia. O fesili i faaiuga o mataupu taitasi o le a fesoasoani ia te oe e mafaufau loloto ai, malamalama, ma faaaoga aoaoga a Peresitene Hinckley. E mafai foi ona fesoasoani manatu nei.
-
Tusi mafaufauga ma lagona e oo atu ia te oe mai le Agaga Paia a o e suesue.
-
Vase ia fuaitau e te manao e manatua. Mafaufau e tauloto fuaitau nei pe tusi foi i au tusitusiga paia i autafa o fuaiupu fesootai.
-
Faitau se mataupu po o se fuaitau ia sili atu ma le tasi ina ia e malamalama atili ai.
-
Fesili ifo ia te oe lava i fesili e pei o le “E faapefea ona faateleina e aoaoga a Peresitene Hinckley lo’u malamalama i mataupu faavae o le talalelei?” po o le “O le a se mea o finagalo le Alii ia ou aoaoina mai nei aoaoga? O le a se mea e finagalo o Ia ia ou faia?”
-
Fesili ifo ia te oe lava, pe faapefea ona fesoasoani aoaoga o lenei tusi ia te oe i luitau ma atugaluga patino ia te oe lava ia.
-
Faasoa atu mea ua e aoaoina i tagata o lou aiga ma au uo.
Aoao Atu mai Lenei Tusi
O le a fesoasoani nei taiala ia te oe e te aoao atu ai mai lenei tusi, i le fale po o le lotu.
Sauni e Aoao Atu
Saili atu i le taitaiga a le Agaga Paia a o e sauniuni e aoao atu. Suesue le mataupu ia maua ai se toafimalie i lou malamalamaaga i aoaoga a Peresitene Hinckley, ma filifili ma le agaga tatalo ia aoaoga e te lagonaina o le a aupito sili ona aoga.
Atonu e te manao e uunaia i latou e te aoaoina ia suesue le mataupu e i latou lava ma gauai faapitoa atu i le vaega o “Fautuaga mo le Suesueina ma le Aoaoina Atu” i le faaiuga o le mataupu.
Uunaia se Talanoaga e uiga i Aoaoga a Peresitene Hinckley
A o e aoao atu mai lenei tusi, valaaulia isi e faasoa mai o latou manatu, fai fesili, molimau atu, ma aoao e le tasi le isi. A latou auai ma le mataalia, o le a sili ona latou saunia e aoao ma maua faaaliga faaletagata lava ia.
Faataga ni talanoaga lelei e faaauau nai lo le taumafai e fai uma ia aoaoga. Taiala ia talanoaga e fesoasoani ai i tagata auai e faitau i aoaoga a Peresitene Hinckley ma maua ni auala e faatatau ai na aoaoga i o latou olaga.
O fesili o loo i le faaiuga o mataupu taitasi, o ni punaoa taua mo le uunaia o talanoaga. E mafai foi ona e atiae au lava fesili e patino ia i latou o loo e aoaoina. O loo tuuina atu i lalo nisi manatu e uunaia ai talanoaga:
-
Fesili i le vasega e faasoa mai mea sa latou aoaoina mai a latou suesuega faaletagata lava ia o le mataupu.
-
Atofa ni fesili e filifilia i le faaiuga o le mataupu i ni tagata taitoatasi po o ni vaega toalaiti. Fai i le vasega e vaavaai mo aoaoga i le mataupu e fesootai ma fesili. Ona valaaulia lea o i latou e faasoa mai o latou manatu ma malamalamaaga.
-
Faitau faatasi nisi o aoaoga a Peresitene Hinckley i le mataupu. Fai i le vasega e faasoa mai ni faataitaiga mai tusitusiga paia ma mai i o latou lava aafiaga, e fesootai i na aoaoga.
-
Fai i le vasega e filifili mai se vaega se tasi ma faitau le leoa. Valaaulia i latou e nonofo i ni vaega taitoalua pe taitoatolu, o e na filifilia se vaega tutusa ma talanoaina mea na latou aoaoina.
Uunaia le Faaaogaaga ma le Faasoa Atu
O le a sili ona ‘anoa aoaoga a Peresitene Hinckley pe a faaaoga e tagata taitoatasi i o latou olaga, ma faasoa atu i isi. Atonu e te manao e faaaoga se tasi pe sili atu foi o manatu nei:
-
Fesili i le vasega pe mafai faapefea ona latou faaaogaina aoaoga a Peresitene Hinckley i le fale, i le Ekalesia, ma isi faatulagaga.
-
Valaaulia le vasega e faasoa mai ni aafiaga na latou maua a o latou mulimuli i le fautuaga a Peresitene Hinckley.
-
Uunai le vasega e faasoa atu nisi o aoaoga a Peresitene Hinckley i tagata o le aiga ma uo.
Faaiu le Talanoaga
Fai se aotelega puupuu o le lesona pe fai i se toatasi pe toalua e faia lena mea. Molimau atu i aoaoga ua outou talanoaina, ma uunaia le vasega ia faaaoga mea na latou aoaoina. Atonu foi e te manao e valaaulia isi e faasoa mai a latou molimau.
Faamatalaga e uiga i Punaoa o Nei Aoaoga
O aoaoga i lenei tusi o ni upusii tuusao mai lauga, tusitusiga, ma faatalanoaga a Peresitene Gordon B. Hinckley. O upusii mai punaoa na lolomiina ma faasalalauina, o loo faatumauina lava ia faailoga, o sipelaga, faamataitusi tetele, ma parakalafa o uluai punaoa, sei vagana ai o suiga faafaatonu pe faalomitusi sa tatau ai ina ia faaleleia lona faitauga. Ona o upusii e tausisia le faamaoni aiai i punaoa ua lolomiina ma faasalalauina, atonu e te matauina sina faiga e le o ogatusa teisi ma le tusiga. Mo se faataitaiga, o soanauna e faasino i le Atua o loo faamataitusi laiti i nisi o saunoaga ae faamataitusi tetele i isi.
Sa tele ina faaaoga e Peresitene Hinckley ia faaupuga alii, tane, ma tagata e faasino ai i tagata uma, o le tane ma le fafine. Sa tele foi ina ia faaaogaina ia soanauna o le o ia ma le lona e faasino ai i itupa uma e lua. O nei vaega o le gagana sa taatele lava i lona vaitau.