Jekjōn 130
Naan in tōl ko litok jān Josep Smith Rikanaan eo, ilo Ramus, Illinois, Eprōļ 2, 1843.
1–3, Jemān im Nejin remaron̄ make waļo̧k n̄an armej; 4–7, Enjeļ ro rej pād ilo juon lan̄ in selestial; 8–9, Laļ in n̄e em̧ōj an kōņak aiboojoj in selestial enaaj juon Urim im Tumim eļap; 10–11, Juon dekā emouj ej leļo̧k n̄an aolep ro rej deļo̧n̄ļo̧k ilo laļ selestial; 12–17, Iien eo an Itok eo Kein karuo kar dāpiji jān Rikanaan eo; 18–19, Jeļāļo̧kjeņ eo bōke ilo mour in ej wanlōn̄ļo̧k ipped ilo Jerkakpeje eo; 20–21, Aolep kōjeraam̧m̧an ko rej itok jān pokake kien; 22–23, Jemān im Nejin ewōr ānbwinnier kanniōk im di.
1 N̄e Rilo̧mo̧o̧r enaaj waļo̧k jenaaj lo E ilo lukkuun āinwōt E. Jenaaj lo bwe E ej juon armej āinwōt kōj.
2 Im bwe ejja iiaio eo ej pād ilubwiljid ijin enaaj pād ilubwiljid ijeņ, enaaj wōt koba ippān aiboojoj ejjeļo̧k jem̧ļo̧kin, aiboojoj eo me jej jab m̧ōņōņō ie kiiō.
3 Jon 14:23—Waļo̧ktok eo an Jemān im Nejin, ilo eoon ņe, ej n̄an armej make; im ļōmņak in bwe Jemān im Nejin rej jokwe ilo būruōn armej ej koļmānļo̧kijeņ em̧or an kabun̄ ko, im ej jab m̧ool.
4 Ilo uwaake kajjitōk eo—Ej jab watwatin iien an Anij, an enjeļ, an rikanaan, im an armej, ekkar n̄an planet eo me rej pād ioon ke?
5 Ij uwaak, Aaet. A ejjeļo̧k enjeļ raņ rej lotok laļ in a ro wōt rej dien ak kar dien wōt itok n̄an e.
6 Enjeļ raņ rej jab pād ioon juon planet āinwōt laļ in;
7 A rej pād ilo im̧aan mejān Anij, ioon juon globe āinwōt lo̧jet in kilaj im kijeek, ijo aolep men ko kōn aiboojoj eo aer rej alikkar, tōre ko remootļo̧k, kiiō, im ilju im jekļaj, im rej pād wōt im̧aan Irooj.
8 Jikin eo Anij ej pād ie ej juon Urim im Tumim eļap.
9 Laļ in, ilo jekjek ekwōjarjar im jab wabanban eo an, naaj kōm̧m̧ane āinwōt crystal im naaj juon Urim im Tumim n̄an ro rej jokwe ioon, eo me kake aolep men ko rej ekkejelļo̧k n̄an juon aelōn̄ in kiin̄ ettāļo̧k, ak aolep aelōn̄ in kiin̄ ko an juon laajrak ettāļo̧k, naaj alikkar n̄an ro rej jokwe ioon; im laļ in enaaj an Kraist.
10 Innām dekā eo emouj ba kake ilo Revelesōn 2:17, enaaj erom juon Urim im Tumim n̄an kajjojo armej ro rej bōk juon, eo kake men ko rej ekkejelļo̧k n̄an juon laajrak eutiejļo̧k in aelōn̄ in kiin̄ ko naaj kwaļo̧k e;
11 Im juon dekā emouj ej leļo̧k n̄an kajjojo ro rej deļo̧n̄tok ilo aelōn̄ selestial, eo ioon juon āt ekāāl kar jeje, eo ejjeļo̧k armej ejeļā kake ijello̧kun wōt e eo ekar bōk e. Āt kāāl in ej ki eo.
12 Ij kanaan, ilo etan Irooj Anij, bwe ijjino in men ko reppen im renaaj kōm̧m̧an eļap kōto̧o̧rļo̧k bōtōktōk m̧oktaļo̧k jān itok eo an eo Nejin Armej enaaj pād ilo South Carolina.
13 Emaron̄ bōlen wanlōn̄tak kōn kajjitōk eo kōn rikōm̧akoko. En̄in ej ainikien eo kwaļo̧ke n̄an eō, ke iaar kanooj jar kōn mennin ekkōnono in, Tijem̧ba 25, 1832.
14 Iaar juon iien kanooj jar n̄an jeļā iien eo an itok eo an Nejin Armej, ke Iaar ron̄ juon ainikien eo ej āliji ennaan kein:
15 Josep, nejū m̧aan, eļan̄n̄e kwōnaaj mour m̧ae iien kwōj ruwalitōkn̄oul ļalem iiō ko dettam̧, kwo naaj lo turin mejān eo Nejin Armej; kōn menin en bwe menin, im jab bar kainepataik Eō kake men in.
16 Āindein kar likūt eō, ilo ejjeļo̧k maron̄ in jeļā eļan̄n̄e itok in ba kake e n̄an jinoin meļļenium eo ak juon waļo̧ktok kar m̧oktaļo̧k, ak eļan̄n̄e iaikuj kar mej im āindein loe turin Mejān.
17 Ij tōmak itok eo an eo Nejin Armej eban m̧ōkajļo̧k jān iien ne.
18 Jabdewōt jon̄an mālōtlōt eo jej tōpare ilo mour in, enaaj wanlōn̄ļo̧k ipped ilo jerkakpeje eo.
19 Im eļan̄n̄e juon armej ej bōk eļapļo̧k jeļāļo̧kjeņ im mālōtlōt ilo mour in kōn an niknik im pokake jān bar juon, enaaj kanooj ļapļo̧k an em̧m̧an n̄an e ilo laļ eo ej itok.
20 Ewōr juon kien, kar kean̄ kake im ban kajejtokjān ilo lan̄ m̧okta jān foundasōn ko an laļ in, eo me ioon aolep kōjeraam̧m̧an ko rej pedped—
21 Im n̄e jej bōk jabdewōt kōjeraam̧m̧an jān Anij, e ej jān pokake kien eo me ioon e ej pedped.
22 Jemān ewōr ānbwinnin kanniōk im di ko āinwōt maron̄ un̄ūr wōt ānbwinnin armej; Nejin barāinwōt; a Jetōb Kwōjarjar ejjeļo̧k ānbwinnin kanniōk im di, a ej juon ānbwinnin Jetōb. Eļan̄n̄e ekar jab āindein, Jetōb Kwōjarjar eban kar maron̄ jokwe ilo kōj.
23 Juon armej emaron̄ bōk Jetōb Kwōjarjar, im emaron̄ wanlaļtak ioon im jab pād wōt ippān.