Wóltaʼii 24
Diyin Yá Yáłtiʼí Joseph Smith dóó Oliver Cowdery díí diyingo bił ííshją́ą́ ályaa, Harmony, Pennsylvaniadi, Yaʼiishjáástsoh 1830yę́ędą́ą́ʼ. Sodizin hadilyaa dóó kʼasdą́ą́ʼ dį́į́ʼ ńdeezidgo, sodizin yikʼijįʼ danilínígíí yéego akʼijįʼ daazlį́į́ʼ, sodizin yándaazinígíí doo atídabidiʼdoolnííłgóó tʼáa atsʼáhoníą́ądi łahda nínádaditʼį́į́h ńtʼę́ę́ʼ. Ákweʼé hoolzhishgo díí tááʼgo bił ííshją́ą́ ádaʼalyaa éí yee dabiʼdziil, yee hadaʼólní, dóó yee ndabidiʼnitin doo biniyé.
1–9, Joseph Smith éí ataʼ halneʼ, naʼnitin, dóó Diyin God bizaad hózhǫ́ yaa halneʼ dooleełgo bikʼihodiiniiʼ; 10–12, Oliver Cowdery éí Jesus Christ binaʼanitin bee yisdáʼiildéehii yee naʼnitin dooleełgo bee bikʼihodiiniiʼ; 13–19, Bee hazʼáanii éí álílee bídadéétʼiʼgo ííshją́ą́ ádaalʼį́, ódziih, akeeʼ łeezh bąąh nańlʼdééh, áádóó dah naʼayizii dóó azis bee naʼaljidí tʼáágééd joogááł doo.
1 Áko shooh, Naaltsoos Mormon Wolyéhígíí náhidíízoh, dóó shikʼehgo ákáʼanánílwoʼ doogo bee nikʼihoodiiniiʼ dóó nániʼdiiltį́; áádóó bee nichʼįʼ nahwiinánée biyiʼdóó hanííłtį́, dóó naninítą́ą́ʼ, niʼanaʼí tʼáá ałtso bitsʼą́ą́dóó yisdániʼdoodlóóz, áádóó Chʼį́į́díí beʼadziilii dóó chahałheeł bitsʼą́ą́dééʼ yisdániʼdoodlóóz!
2 Ákótʼée ndi, niʼayísíhígíí doo tʼóó nahjįʼ kódoolnííł da; ákótʼée ndi, nílááh yínááł dóó tʼáadoo ninááʼiyísíhí.
3 Bee nikʼihodiiniiʼígíí nił nilį́įgo íínísin; áádóó kʼidíníláago dóó baʼáhályą́ ńtʼę́ę́ʼgo, tʼáá tsxį́łígo Colesville, Fayette, dóó Manchesterdi sodizin baa díínááł, éí níkáʼadoojah; áádóó iiʼsizíiniikʼeh dóó atsʼíseekʼeh tʼáá áłah bee bikʼidahozhdeeshdliił;
4 Ákondi doo kʼé danidííniidgóó, hóyéeʼgo bá hadeesdzih akʼihojídlíi éí ndagaʼ.
5 Áádóó Diyin God tʼáá shízhiʼ bee bichʼįʼ sodílzin, áádóó Aaʼáhályáanii yee nił halneʼígíí nahízóóh doo, dóó sodizin daʼatahígíí bichʼįʼ tʼáá ałtso Diyin God bizaad hózhǫ́ baa halneʼ doo.
6 Áádóó tsʼídá bee hadíídzihígíí dóó bee niʼdíízohígíí áníléehgo yee nił hodoolnih, áádóó deididootsʼį́į́ł, doodago éí hóyéeʼgo bá hadeesdzih akʼihojidlíii éí ndagaʼ.
7 Háálá tʼáá ałso bee ákáʼadíílwołígíí éí Zion bá ádíílííł; áádóó díí bitsʼą́ą́dóó nidziil doo.
8 Nichʼįʼnahwiiʼnáago haʼíínílní, háálá ląʼí da neihodooleeł; ákondi bídinilkaalgo yínááł, háálá, shooh, nił honishłǫ́, niiníłką́ąjįʼ ndi.
9 Atsʼíískʼehjí naʼanish doo hózhǫ́ bichʼįʼ nidziil da doo, háálá éí doo bee nikʼihodiiniiʼ da. Bee nikʼihodiiniiʼígíí binanilnish áko niká adoolwołígíí ná hólǫ́ǫ dooleeł áko nił nilį́įgo éʼéłʼį́į doo, dóó tʼáá ałtso Diyin God bizaad bidziilgo yaa halneʼ doo, áádóó tʼahdii atsii tʼááh dah adéesniiʼ íníłʼį́į doo dóó sodizin dah deiyíkááhgo dabidziilgo ádanileʼ.
10 Áádóó nikʼis Oliver nahasdzáán bikááʼgóó tʼahdii shízhiʼ tʼáá aanínígíí yaa halneʼ dooleeł, áádóó sodizin daʼatahígíí bichʼįʼ ałdóʼ. Áádóó shibiniiyéí tsʼídá doo niʼ kwíílééhgóó tʼáá ałtsogo yaa halneʼ doo; áádóó shooh, niiníłką́ąjįʼ bił honishłǫ́ǫ doo.
11 Shí shinahjįʼ éí baa haʼniih doo, dóó bí binahjįʼ éí ndagaʼ, bitsxeʼgo doodago doo bidziilgóó ndi, naalteʼ doodago doo naalteʼ nilį́į́góó ndi;
12 Áádóó tʼáá dahoolzhíshígíí, dóó tʼáá ałtsogóó, bizééʼ ąą íídoolííł dóó shinaʼnitin bee yisdáʼiildéehii yaa halneʼ dooleeł shizhí dilní diitsʼaʼ nahalingo, tʼáá ákwííjį́ dóó tʼáá ákwíí tłʼééʼ. Áádóó adziilii baa deeshłééł éí átʼéhígíí nihokááʼ dineʼé bitahgóó doo baa ákonidzin da.
13 Tʼáadoo álílee áhodoonííłgo shíínóhkeedí, tʼáá hazhóʼí ádoohłííł nihidííniidgo tʼéiyá, níłchʼi bidaʼiiníziinii hanołkaadgo, bitah dahoneezgaiígíi náółdziihgo, áádóó tłʼiish báá dáhádzidii bichʼįʼ, áádóó haʼátʼíhígíida daʼagháanii bichʼįʼgo tʼéiyá;
14 Áádóó díí éí doo ádoołííł da, tʼáá hazhóʼí ádeinízinígíí nihídeiyókeedgo tʼéiyá, áko Diyin God bizaad dabiyiʼígíí ałtso bidahodoolnííł; háálá ndaháasdzohígíí bikʼehgo áʼdoohłííł.
15 Áádóó haaʼígi dah yah ooyáago, dóó shízhiʼ binahjįʼ doo kʼé nihiʼdooʼniidgóó, hóyéeʼgo bá hadoohdzih akʼihojídlí éí ndagaʼ, nihikeeʼ łeezh bąąh wołdééh éí tʼáá aaníinii bikʼijįʼ siláago bee bééhózin doo, dóó atiin bąąhgóó nihikeeʼ doołdah.
16 Áádóó baa hodoolzhish tʼáá háíshį́į́ bílaʼ yee atínihiʼniilaago, éí shí shízhiʼ binahjįʼ haohzííʼgo atíʼdoolííł; áádóó, áko shooh, nihizaadígíí bikʼehgo atíʼdeeshłííł, shá bóhónéedzą́ą́ góneʼ.
17 Áádóó tʼáá háíshį́į́ bee hazʼáanii yee há nihodooʼááłgo éí bídóʼ bee hazʼáanii bee bá nihodootʼááł.
18 Áádóó béesoozis doodaii dah naʼayizii doo naajaah da doo, doodago gish, doodago naakigo éétsoh, sodizin daʼatahígíí chʼiyáán, dóó ééʼ, dóó ké, dóó béeso, dóó dahnaʼayizii tsʼída nohsinígo nihaadeidoonił.
19 Háálá shidaʼákʼeh ayóó nihidziilgo doołdahgo nihikʼihodiiniiʼ, aooʼ, azhą́ tsʼídá akéeʼdi hoolzhishdi ndi; aooʼ, aáádóó tʼáá ałtso deinsį́į́hígíí ałdóʼ, éí ałdóʼ díí ałkééʼ sinilígíí bikʼehgo ádaʼdoolííł. Amen.