Wóltaʼii 30
Diyin Yá Yáłtiʼí Joseph Smith díí diyingo bił ííshją́ą́ ályaa éí David Whitmer, Peter Whitmer Jr., dóó John Whitmer yee yił hodoolnih biniyé, Fayette, New Yorkdi, Biniʼantʼą́ą́tsoh 1830yę́ędą́ą́ʼ, éí Fayettedi tágíjį́ ntsaago áłah azlį́į́ʼ bikééʼdóó, éí elders tʼah doo Sodizindóó dahdiikááhyę́ędą́ą́ʼ áhoodzaa. Díí tʼóó áłtsé bee bił hooneʼę́ędą́ą́ʼ tááʼgo diyingo íł ííshją́ą́ ályaaígíí ałʼąąh daasdzoh ńtʼę́ę́ʼ; éí Diyin Yá Yáłtiʼii 1835 Diyingo Naʼnitin dóó Bee Ahadaʼdeestʼáanii biyiʼ tʼááłáhíjįʼ ahiihyiyíízoh.
1–4, David Whitmer éí tsʼídá tʼáadoo yéego naʼneeztʼą́ʼígíí biniinaa bichʼahadooshkeed; 5–8, Peter Whitmer Jr. éí Oliver Cowdery Laman dineʼé neidinootʼį́į́łgóó yił dooʼash; 9–11, John Whitmer éí Jesus Christ binaʼnitin bee yisdáʼiildéehii yee naʼdínóotʼįįłgo bee bikʼihodiiniiʼ.
1 Áko shooh, shí ándishní, David, nihokááʼ dineʼé bináníldzigo dóó sheʼadziilii baʼíínílíi dooyę́ę tʼáadoo ákwiindzaa da.
2 Ákondi níniʼ díí nahasdzáán bikááʼ naazléi shí shitsʼą́ą́dééʼígíí bilááhgo baʼiisíníliid, Ániilaaii, dóó naʼnitin bee nikʼihodiiniiʼígíí; áádóó shiʼIiʼsizį́ Diyinii, dóó nikʼi bídahólníhígíí tʼáadoo bikʼeh hosíníłʼįįd da, ákondi tʼáadoo bikʼidiishniiʼígíí nighadaʼdeestʼą́.
3 Ákohgo, shí shitsʼą́ą́dóó éí tʼáá ni ádánaʼádíłkid doo, áádóó naadahasyáhígíí yéego baa ntsídanikees dooleeł.
4 Áádóó nizhéʼé bighandi sinídáa doo, ńłéí bee hazʼáanii łaʼ naanááhisíláago índa. Áádóó sodizin bá naʼnitin doo, áádóó nihokááʼ dineʼé bitahgóó, dóó binaagóó ndahazʼánígíí biiʼ ałdóʼ. Amen.
5 Áko shooh, shí ándishní, Peter, nikʼis Oliver bił yíʼash doo; háálá kʼad baa hoolzhiizh éí shinaʼnitin bee yisdáʼiildéehii shí íínisingo nizééʼ aa ádíílííłgo bee naʼnítin doo; éí bąą, tʼáadoo náníldzidí, ákondi nikʼis bizaad dóó ná yaa ntsézkezígíí bikʼeh honíłʼį́į́ dooleeł, éí neidoolééł.
6 Áádóó bí tʼáá ałtsóní yee tiʼhoonííhígíí ni ałdóʼ bił tiʼhwiinínííh dooleeł, tʼáá áłahjįʼ nijéí naniiłnáago bee shichʼįʼ sodílzin dóó shiinídlą́, háálá bí dóó ni yisdádoohʼashgo bá; háálá oochįįh baa niláhígíí bee Laman dineʼé bitahgóó shisodizin haididoołííł;
7 Áádóó doo nááná łaʼ sodizin biyiʼ bikééʼ dahnáánásdáa da dooleeł, sodizin naatʼiʼjí, tʼáá hazhóʼí bikʼis, Joseph Smith, Jun tʼéiyá.
8 Ákohgo, díí bikʼehoníłʼį́ dóó shibee hazʼáanii bídinilkaalgo bikééʼ yínááł, áko hoolʼáágóó iiná bee nikʼihojidoodliił. Amen.
9 Áko shooh, shí ándishní, shá naalʼaʼí John, kʼad kodóó dóó náasjįʼ shinaʼnitin bee yisdáʼiildéehii hazhóʼí bee naʼnítin doo, dilní diitsʼaʼígíí nahalingo.
10 Áádóó nikʼis Philip Burrough kééhatʼį́į́įdi nanilnish dooleeł, áádóó ákweʼé binaagóó ndahazʼánígíí biiʼ ałdóʼ, aooʼ, tʼáá haʼígiʼ dandidootsʼííłgiʼ, éí áádóó dahdidíínááł nidííniidgo índa.
11 Áádóó Ziongi tʼéiyá nanilnish dooleeł, tʼáá átʼée ńtʼę́ę́ʼ niʼiisizʼíinii bee, kodóó dóó hoolʼáágóó; aooʼ, áádóó shí biniyé áshtʼínígíí éí tʼáá áłahjįʼ tʼáá ałtsogo baa halneʼ doo, nihokááʼ dineʼé haadanidoolíłígíí doo bináníldzidgóó, háálá shí éí nił honishłǫ́ǫ doo. Amen.