1 Áko shooh, Shí ándishní, shá naalʼaʼí Martin Harris shitsʼą́ą́dóó yitʼínígíí yinízin, áko ni, shá naalʼaʼí Joseph Smith, Jun., éí béésh tʼąhí nanijaah tʼáá aaníí átʼé diníigo baa hainídzííʼ dóó shitsʼą́ą́dóó nídinjaaʼ díníigo baa hwiinílneʼ;

2 Áádóó kʼad, áko shooh, díí kóbididííniił—nichʼįʼ haadzííʼę́ę, kónídííniid: Shí, Diyin Bóhólníihii, Diyin God nishłį́, áádóó díí naanínil, shá naalʼaʼí Joseph Smith, Jun., dóó ándishní díí bá ooʼíinii nilį́įgo bá sínízį́į doo;

3 Áádóó ándishní diyingo shił ahaʼdidíítʼááł, doo tʼáá háida bichʼįʼ ííshjání ádíílííł da tʼáá hazhóʼí tʼáá áko nidííniidyę́ę tʼéiya bichʼįʼ; dóó doo bee néhólnííh da Shí bee ná lą́ aséłį́į́ʼgo tʼéiyá.

4 Áádóó aʼiilyéii bee béésh tʼąhí ataʼ hodíílnihgo neiyílyá; dóó díí éí áłtsé aʼiilyéii naah ninílá; áádóó ándishni tʼáadoo nááná łaʼ aʼiilyéii bitsʼą́ą́dóó íʼíshłééh diníní díí shinaanish ałtso bohoolyaago índá; háálá doo nááná łaʼ aʼiilyéii naa náádeeshdlééł da díí ałtsó íínlaago índa.

5 Tʼááʼaaníí, Shí ándishní, díí nihokááʼ bikááʼ kéédahatʼíinii doo shizaad yikʼeh dahółʼį́į́góó bikʼe daʼíyééʼii bichʼįʼ kódoolnííł;

6 Háálá díí bikééʼdóóʼ nididiʼdoolzį́į́ł dóó shizaad nihokááʼ dineʼé baʼáłchíní bitahgóó baa hwidíílnih.

7 Áko shooh, shizaad doo deiyoodlą́ą́góó, nidóʼ doo danoodlą́ą da doo, shá naalʼaʼí Joseph, bee náʼahóótʼiʼgo díí tʼáá áłtso nąąh niníláhígíí bił ííshjáá ádíílííł.

8 Yáa, díí kʼad oochíiłdi beʼoodląʼ ádaadin dóó bikʼos daniłdzil—háchʼįʼ sháháchʼįʼ.

9 Áko shooh, tʼáá aaníí shí ándishní, béésh tʼąhí baa ahályą́ągo nąąhniilyáhą́ą́ hashtʼeʼninínil, shá naalʼaʼí Joseph, háálá shibeehódzáanii biniyéí, dóó náásdi nááʼoochííł bił ííshją́ą́ ádoolnííł

10 Ákondi díí kʼad oochíiłii ni ninahjįʼ shizaad nídeididoolééł;

11 Áádóó tʼáá aaníí baa hwíínílneʼígíí díí bił siláa doo, shá ndaalʼaʼí tááʼgo tʼáá aaníí yaa daholneʼígíí, éí biká ádideeshniił dóó deideisį́į́ł, éí díí bił ííshjání ádeishłííł, áádóó shizaad nił ííshją́ą́ ííshłaaígíí binahjįʼ adahwiisʼáágóó yee ndaʼnitin doo.

12 Aooʼ, díí éí tʼáá aaníi áʼtéego bił béédahodoozįįł, háálá yáʼąąshdę́ę́ʼ bee bił dahodeeshnih.

13 Adziilii baa dahideeshłééł áko díí tʼáá ádaatʼéhígiʼ átʼáo deidoołtsééł dóó ndeidoołkah;

14 Áádóó doo nááná łaʼ díí adziilii baa deeshłééł da, díí tʼáá aaníinii bił ííshjání ályaaʼígíí díí oochʼíłígíí bitah, díí hoolzhishdi shisodizin haalyeedígíí dóó haalwodígíí éí doo kééhatʼínídę́ę́ʼ—ooljééʼ yitʼínígiʼ átʼáo, dóó jóhonaaʼéí bitsʼádiʼnílídígíí átʼáoʼ, dóó tʼóó báhádzidgo ndaabaahí bidahnidaatʼaʼí yił deiyínééh nahalingo.

15 Áádóó tʼáá aaníigo daʼiiłtsáánii shizaad náás yaa dahodoolnihgo ádeishłííł.

16 Áádóó áko shooh, tʼáá háida shizaad deiyoosdląądígíí, shiʼIiʼsizʼį́ Diyinii bikʼihodooleełgo ádeishłííł; dóó shitsʼą́ą́dóó náádabiʼdoochííł, tó dóó Iiʼsizį́ Diyinii bee ndi—

17 Áádóó tʼóó honíshgháníjįʼ áłtsé dooleeł, háálá tʼah doo danihiʼdiilzį́į́h da—

18 Áádóó tʼáá aaníinii yee hadaasdzíʼígíí éí ałdóʼ díí oochíłígíí bijéí yikʼijįʼ deistłʼisgo hoyééʼgo bá nahodootʼááł.

19 Háálá nihokááʼ yikááʼ kéédahatʼínii hoyééʼii dabidooghą́ą́ł, dóó tʼáá ákótʼáo baa náhálzhish doo, doo ádaa ńdaʼookąąhgóó, nahasdzáán bikááʼ áhoʼdisdįįdjįʼ, dóó nihokááʼ yikááʼ kéédahatʼíinii adabidiʼdoolkʼą́ą́ł dóó ałtso ábidiʼdooldįįł shitsʼádiʼnílíídgo níyáadi.

20 Áko shooh, díí bee nihił hashneʼ, éí diné ałdóʼ Jerusalem doolchxǫǫłgo bee bił hweeshneʼę́ęgiʼ átʼáo; áádóó shizaad bohodoolnííł díí hoolzhishgi áłtséédą́ą́ bohoolyaayę́ęgiʼ átʼáo.

21 Áádóó kʼad ánidishní, shá naalʼaʼí Joseph, ádaa náʼiiníkąąh dóó shidááhdóó yáʼátʼééhgo yínááł, dóó diné yídaʼoołkaahígíí kʼad tʼáadoo naniloʼí;

22 Áádóó Diyin God bibee hazʼáanii doo łah ánáániiłgóó bikʼeh honíłʼį́ nidishní; áádóó díí beʼiinlaago, áko shooh hoolʼáágóó iiná naadeeshłééł, niʼdiisyį́į ndi.

23 Áádóó kʼad, shá naalʼaʼí Joseph, hastiin yéego bił ééhodoozįįłgo yínaʼádíłkidígíí, bee nichʼįʼ hanáánásdziih—

24 Áko shooh, ábidishní, éí ayóó ádaahaʼniih dóó doo hazhóʼí shidááhdóó aʼoh áʼdílnééh da; ákondi shichʼįʼ niʼjįʼ yaa kódzaago, dóó yéego sodizin dóó oodląʼ yee aʼoh áʼdiilyaago, tʼáá aaníí bijéí bitłʼáádę́ę́ʼ yee áníigo, ákohgo índá yideestsééł nízinyę́ę bił ííshjání ádeishłííł.

25 Áádóó díí kʼad ahoolchíiłii biyiʼ diné kwíídidooniił: Áko shooh, Diyin Bóhólníihii Joseph Smith, Jun., yił ííshją́ą́ áyiilaaígíí neiłʼį́į́ʼ, dóó éí tʼáá aaníí ádaatʼéego shił bééhózin, háálá deiłtsą́, háálá Diyin God bibeʼadziilii binahjįʼ shił ííshjání ályaa doo éí diné bibeʼadziilii bee da.

26 Áádóó Shí Diyin Bóhólníihii, shá naalʼaʼí Martin Harris ábidinishní, dóó díí éí kʼad doo yee yichʼįʼ hanáádoodzih da, tʼáá hazhóʼí kódidooniiłgo tʼéiyá: Éí nééłʼį́į́ʼ, dóó Diyin God bibeʼadziil binahjįʼ shił ííshjání ályaa; dóó díí saad yee hadoodzih.

27 Ákondi díí doo tʼáá aaníí átʼée da dííniidgo éí áłtséedą́ą́ bee diyingo bił ahaʼdinishtʼánée kʼíidootih, dóó áko shooh, éí bá nihootʼą́ą doo.

28 Áádóó kʼad, hajoobaʼí íʼdiilyaago dóó naʼiisiiʼyę́ę yee shił hoolneʼgo tʼéiya, dóó shibee hazʼáanii yikʼeh hółʼį́į doogo diyingo bił ahadiʼnishtʼą́ągo, dóó shoodlą́ągo, áko shooh, ábidisní, doo kótʼáo yinéíłʼį́į da doo, háálá baa haasdzííʼyę́ę doo bił ííshją́ą́ ádeishłííł da.

29 Áádóó díí kótʼée doogo, ándishní, shá naalʼaʼí Joseph, kóndishní, kóbididííniił, áko doo anáádoonííł da, dóó díí tʼáadoo yee shaa nátʼíní doo.

30 Áádóó díí kótʼée doogo, Joseph ándishní, ahetʼáád łaʼ bilagáanaa bizaadkʼehjí ánáánéídlaago łah ánááhoodzaajįʼ ni kódíílííł; áádóó ataʼ nááhólneʼ doo.

31 Díí íínilaago tʼéiyá, áko shooh, aʼiilyéii doo łaʼ naanáádoolyééł da, áádóó naadiníʼánígíí tʼáá átʼé nigháádeishnił.

32 Áádóó kʼad, danidiyoołhééłgo nibaʼ sijeʼígíí biniinaa, aooʼ, náásdi yishʼį́ shánaalʼaʼí Martin Harris doo hojoolbaʼí aʼdiilyaagóó dóó shitsʼą́ą́dóó ooʼínii silį́įgo, bí éí bąąhági ádaatʼéí yiihdootłish.

33 Áádóó ląʼída díí nahasdzáán bikááʼdóó nahjįʼ kódandoołííłgo nibaʼ naazjééʼ; áko díí biniinaa, náágóó niidoołkááłgo, díí bee hazʼáanii naanínil.

34 Aooʼ, díí biniinaa ádííniid; Áłtsé, dóó nichʼįʼ hadeezdzihjįʼ hastʼeʼ sínízį́, áádóó bee nichʼįʼ haasdzʼígíí bee beʼdíílíłígíí nichʼįʼ kódeeshłííł;

35 Áádóó shibee hazʼáanii tʼáá aníi bikʼeh dahoníłʼį́įgo, nihoníyáadi yisdádíínááł. Amen.