Wóltaʼii 48
Diyin Yá Yáłtiʼí Joseph Smith díí diyingo bił ííshją́ą́ ályaa, Kirtland, Ohiodi, Wóózhchʼį́į́d 10, 1831yę́ędą́ą́ʼ. Diyin Yá Yáłtiʼí éí Diyin Bóhólníihii Sodizin Yidahidiikaaígíí kéyah shódeidoołtʼeełígíí éí haitʼáo yikááʼ kéédahatʼį́į dooleełgo neiyídéíłkid. Sodizin daʼatahígíí Ashdladiingo Hahoodzoh haʼaʼaahdę́ę́ʼ deiyínéhígíí biniinaa díí tʼáá íiyisíí baa náhástʼįįd, éí Diyin Bóhólníihii ádííniidígíí yikʼeh dahółʼį́įgo Ohiodi áłah silį́į́ʼ (daóltaʼii 37:1–3; 45:64 yídííłtah).
1–3, Ohiodi Sodizin Atah Danilínígíí éí bikédaayah łahdóó nihikʼéí baa dadidoohʼááł dabiʼdooniid; 4–6, Sodizin Atah Danilínígíí éí kéyah nideidiyoołnih, dóó kin dashiijaaʼgo ádeidoolííł, dóó bilą́ąjįʼ naazínígíí bá dahwéeʼaahgo yikʼeh dahółʼį́į doo.
1 Háálá kʼad hoolzhishgi tʼáá nihił nahazʼánígi dahonohłǫ́ǫ doogo nihá nidzin, éí kʼad nihił ádahootʼéhígíí biniinaa tʼáá ákweʼégo nihá yáʼátʼééh.
2 Áádóó kéyah tʼáá nihee dahólǫ́ǫgo, nihidineʼé haʼaʼaahdę́ę́ʼígíí łahdóó baa dahididoohʼááł;
3 Áádóó kéyah doo nihee dahólǫ́ǫ́góó, bíniʼdii nihinaagóó kédaayahígíí kʼad hoolzhizhígi ndeiyiiłniih, bá yáʼádaatʼéehgo, háálá kʼad kǫ́ǫ́ tʼóó hónízáhájįʼ kéédahatʼį́įgo bá yáʼátʼééh.
4 Áko nihá bíighahgo béeso tʼáá átʼé hashtʼeʼ ahanidahohjááh doo, dóó tʼáá átʼé Diyin bikʼeh dahonółʼį́įgo ahandahohjááh, áko baa hoolzhiizhgo kéyah ndahidoołnih háálá éí tʼáá danihí doo, kindashijaaʼígíí ndi.
5 Éí kéyah tʼah doo ííshją́ą́ álnéeh da; ákondi nihikʼiské haʼaʼaahdę́ę́ʼ nínáago éí hastʼóíígíí łaʼ bikʼidahodidoonih, dóó éí kéyah siʼánígi bee bił dahodoonih, éí doodago éí bił ííshją́ą́ ádadoolnííł.
6 Áádóó éí kéyah ndeidiyoołnihgo bee bikʼidahodoonih, éí kindashijaaʼ hadidoolníłígíí yidadidoolnish; áádóó áko índa nihaʼáłchʼíní bił ahíhidoohkah, diné tʼááłáʼí nízínígo baʼáłchíní bił, éí bił ádahootʼéhígíí bikʼehgo, áádóó sodizinjí tsʼídá alą́ąjįʼ bídahólníhígíí dóó sodizin bibishop bikʼidadiilniiʼgo baa dahaasyáhígíí, éí bikʼeh óʼooʼníiłii áádóó bee hazʼáanii niheilyáhígíí bikʼehgo, áádóó éí díí bikééʼdóó nihaa dahidoolyéłígíí. Tʼáá ákótʼée doo. Amen.