1 Shizaad bikʼeh dahonółʼį́, shá ndaałʼaʼí Sidney, dóó Parley, dóó Leman; háálá áko shooh, tʼáá aaníigo nihichʼįʼ haasdziih, shinaʼnitin bee yisdáʼiildéehii bee ndaʼnohtin doogo niheiyílyá, áko niheiyílyáhígíí tʼáá éí, Shakers bee ndanohtin doo.

2 Áko shooh, Shí nihichʼįʼ haasdziih, tʼáá aaníinii łahdóó nihił béédahodoozįįł danízin, ákondi tʼáá átʼé éí dooda, háálá shidááhdóó doo ákódaatʼée da dóó íiyisíí ádaa ńdaʼdookąął.

3 Ákohgo, Shí anhideeshʼaał, shá naołʼaʼí Sidney dóó Parley, Jesus binaʼnitin bee yisdáʼiildéehii bee ndínóohtʼįįł.

4 Áádóó shá naalʼaʼí Leman díí naanish bichʼįʼ bidiʼdoolzį́į́ł, áko éí yił yaa ndadóotʼįįł, áádę́ęʼgo naʼnitinígíí doo yaa nídadóotʼįįł da, ákondi shá ndaalʼaʼí nabineeztą́ʼígíí bikʼehgooígíí tʼéiyá; áádóó éí ákótʼáo íʼiilaago éí bikʼihozdeeshdliił, doo ákwíjiidzaagóó éí doo náás jidoogááł da.

5 Áko Diyin Bóhólníihii kóní; háálá Diyin God nishłį́, dóó shiYeʼ Tʼáá Éí Tʼéiyá Shá Yizhchíinii nihokááʼ dineʼé yá nináʼdoodlééłgo bichʼįʼ ííłʼaʼ, dóó bee nihoníʼą́ tʼáá háíshį́į́ boosdląądígíí éí yisdáʼdoogááł, áádóó tʼáá háíshį́į́į́ doo boosdląądígíí éí chʼį́įdii ndabiloʼ doo—

6 Áádóó Diné Silį́įʼii atídeiyiilaa tʼáá bí danízinígi ádayííłʼįįd; dóó bibeʼ adziilii yee bílaʼ nishnáájígo ayóó átʼéego yidoozįįł, dóó kʼad éí yáʼąąshdi akʼi bóhólnííh doo, dóó akʼi bóhólníihgo nahasdzáán yikáaʼjįʼ doogááł áádóó tʼáá ałtso beʼanaʼí yikʼindoogaał, éí kʼadę́ę́ baa hoolzhíísh—

7 Shí, Bóhólníihii Diyin God, díí bee haasdzííʼ; ákondi oolkiłígíí éí doodago yoołkáłígíí diné doo łaʼ bił bééhóziní da, yáʼąąshdi Diyin yá ndaalʼaʼí ndi, doo bił béédahózin da doo nádzáadi índa.

8 Ákohgo, tʼáá ałtso nihokááʼ dineʼé ádaa ńdaʼdookąąłgo bá nisin, háálá tʼáá ádzíłtso bąąhági átʼéii biyaa nazhnideeh, ákondi tʼáá shí ádá áásésįįdígíí éí ndagaʼ, éí diné dahodísinii doo béédahonohsin da.

9 Ákohgo, Shí nihichʼįʼ haasdziih nahasdzáán bikááʼ hoolʼáágóó diyingo shibee ahaʼdeetʼáanii nihichʼįʼ kwííshłaa, éí hodeeyáádą́ą́ʼ niilyáhą́ą ndi.

10 Áádóó bee ádéé haasdzííʼyę́ę bohooshłaa, áádóó nahasdzáán nidahoneesʼą́ą́dę́ę́ʼ diné tʼáá ałtso yichʼįʼ yaa ádadoonííł; áádóó, doo tʼáá bí yichʼįʼ yaa kódaadzaagóó, niʼjįʼ kódabidiʼdoolnííł, háálá kʼad ayóó ájítʼé ízhʼdiilyaaígíí éí aʼohgo ájítʼéego áhodiʼdoolnííł.

11 Ákohgo, Shí ánihidishní díí diné bitaahkai doo, áádóó kóbidideeshniił, éí áłkʼidą́ą́ʼ łaʼ hastóí bikʼihodiiniiʼ ábidííniidyę́ęgiʼ átʼáo, éí łaʼ Peter wolyée ńtʼę́ę́ʼ:

12 Diyin Bóhólníihii Jesus bízhiʼ deiyoodlą́ą doo, éí nahasdzáán yikáá naagháá ńtʼę́ę́ʼ, dóó doogááł, bee hodeeztʼiʼii áádóó bee nihonítʼiʼii;

13 Jesus Christ bízhiʼ binahjįʼ ádaa ńdaʼoohkąąh dóó tó bee danihiʼdiilzį́į́h, diyingo bibee hazʼáanii bikʼehgo, éí bąąhági ádaadzaayę́ę bee baa nídaʼdidootʼááł;

14 Áádóó tʼáá háíshį́į́ díidi yikʼeh hółʼį́įgo Iiʼ Sizį́ Diyinii baa dahidoolyééł, sodizindééʼ elders danilínígíí atsiitʼááh dah adéésniiʼ bee Iiʼ Sizį́ Diyinii baa dahidíílééł.

15 Áádóó áłdóʼ, Shí tʼáá aaníigo nihichʼįʼ haasdziih, tʼáá háíshį́į́ iigeh doo álį́į da daanínígíí éí Diyin God tʼáa doo bee bóhólníihgo ábiilaa da, háálá iigeh éí Diyin God bibee óʼoolʼįįł átʼéego nihokááʼ dineʼé yee yá nihoníʼą́.

16 Ákohgo, tʼááłáʼígo beʼasdzą́ą́ íídoolííłgo bee bá hazʼą́, áko éí nizhdiltʼéhígíí atsʼíís tʼááłáʼí jidooleeł, áádóó díí tʼáá ałtso bohodoolníiłgo biniyé nahasdzáán ályaa;

17 Áádóó tʼáá ałtso nihokááʼ dineʼé yikááʼ nihidookahgo ályaa, tʼah doo nahasdzáán álnéhę́ędą́ą́ʼ nihokááʼ dineʼé tʼáá ałtso ádaalyaayę́ę bikʼehgo.

18 Áádóó tʼáá háíshį́į́ atsʼįʼ tʼáadoo daasání nínígíí, éí doo atsʼįʼ yiyą́ą da doo, éí Diyin God doo yee nihoníʼą́ą da;

19 Háálá, áko shooh, naaldlooshii daʼałchiní dóó hódah ndaatʼaʼí, éí nahasdzáán bikááʼ ályaa, éí chʼiyáán dóó ééʼ nihokááʼ dineʼé choidoołʼįįłgo bá niilyá, áko éí tʼóó ahayóí bá hólǫ́ǫ doo.

20 Ákondi nihokááʼ dineʼe doo nááná łaʼ bilááh baaʼ doolyééł da, ákohgo nihokááʼ dineʼé bąąhági átʼéii yiiʼ naaldeeh.

21 Áádóó yíiyá tʼáá háíshį́į́ tʼóó naaldlooshii neiłtseedígíí doodago atsʼįʼ doo yinízingo tʼóó yee naanéhígíí.

22 Áádóó áłdóʼ, Shí tʼáá aaníigo nihichʼįʼ haasdziih, Diné Silį́įʼii éí doo asdzání nilíigo nádzáa da, doodago hastiin nihokááʼ yikááʼ naagháhígiʼ átʼáo.

23 Ákohgo, nihidaʼdódleeh lágo, ákondi yéego akééʼ ndaasoozį́, háálá yáʼąąsh ndahazʼą́ądi daditsxiz doogo bichʼįʼ dadínóhʼį́į́ʼ, nahasdzáán éí adláanii nahalingo naʼnitʼigo háádiidááh doo, dahoníteelgóó tʼáá átʼé wódahgo ádadoolnííł, áádóó dził daníʼáhígíí wóyahgo ádadoolnííł, áko dahodiwolígíí tsʼídá kʼídahoneezláago áhodoolnííł—áádóó díí tʼáá ałtso áhodoonííł Diyin yá naalaʼí bidilní ayóó íitsʼaʼgo yididoołtsʼį́į́ł.

24 Ákondi Diyin Bóhólníihii ayóó átʼéego nídoodááłdi tʼah doo baa hoolzhííshdą́ą́ʼ, Jacob éí diné doo kééhatʼínígi tsxį́įłgo kʼeeʼąą yilzhish doo, áádóó Laman dineʼé éí chǫ́ǫ́hgiʼ átʼáo hadínóotʼį́į́ł.

25 Zion éí dah daaskʼidgi nizhónígo dínóosééł dóó dziłghą́ą́ʼdę́ę́ʼ bił dahózhǫ́ǫ doo, áádóó bá nihoníʼánígi áłah dooleeł.

26 Áko shooh, Shí nihichʼįʼ haasdziih, ánihidííniidígíí bikʼehgo náás dahdoohkááh; tʼáá ałtso bąąhági átʼéii baa ádaa ńdaʼoohkąąh; íínóhkeed áko yínókeedígíí nihaa doolyééł; dáádílkał nánółtsʼin áko nihá ąą ádoolnííł.

27 Áko shooh, Shí nihilą́ąjįʼ yishááł doo dóó tʼáá nihikéédę́ę́ʼ nihaa áháshyą́ą doo; áádóó nihitah honishłǫ́ǫ doo, áádóó doo nihił dahalą́ą da doo.

28 Áko shooh, Shí éí Jesus Christ áshtʼį́, dóó tʼáá hooshchʼįʼ deeshááł. Tʼáá ákótʼée doo. Amen.