Wóltaʼii 51
Diyin Yá Yáłtiʼí Joseph Smith díí diyingo bił ííshją́ą́ ályaa, Thompson, Ohiodi, Wóózhchʼį́į́d 20, 1831yę́ędą́ą́ʼ. Kweʼé hoolzhishgo Diyin Yikééʼ Naazíinii haʼaʼaahdę́ę́ʼ deiyínéhígíí Ohiojįʼ ndahaazná, dóó nehenéhígi bá hashtʼehodoolníiłgo tʼáá íiyisíí bídin hóyééʼ. Díí íiyisíí bishop binaanish silį́į́ʼ, Bishop Edward Partridge díí áhooníłígíí haitʼáo bidiʼdoonishgo yínaʼídééłkid, dóó Diyin Yá Yáłtiʼí Diyin Bóhólníihii yíneídééłkid.
1–8, Edward Partridge akʼi bóhólnííh dóó kédaayah neichʼid doogo bee bikʼihodiiniiʼ; 9–12, Diyin Yikééʼ Naazíinii tʼáadoo dabiyoochʼídí dóó tʼáá aheełtʼéego ahił ndaalnish doo; 13–15, Bishop naadeełii bá hazʼą́ ádadoołííł dóó Diyin Bóhólníihii bibee hazʼą́ bikʼehgo kéyah hashtʼedadoołííł dabiʼdooʼniid; 16–20, Ohiodi tʼóó honíshgháníjįʼ ahandaʼiinééh doo.
1 Dashíínółtsʼą́ą́ʼ, ní Bóhólníihii nihiDiyin God, áádóó shá naalʼaʼí Edward Partridge bichʼįʼ hadeesdzih, dóó nahatʼá bee bił hodeeshnih; háálá haitʼáo díí diné kéédahatʼį́į dooígíí bee bił hodoonihígíí nidzin.
2 Háálá shibee hazʼáanii bikʼehgo hashtʼedaatʼée doo; doo ákótʼéego éí, nahjįʼ kódabidiʼdoolnííł.
3 Ákohgo, bíniʼdii shá naalʼaʼí Edward Partridge, dóó yikʼidiilniiʼígíí, éí tʼáá íiyisíí baa ahééh danisin, díí dineʼé kéyah deinízinígíí bikʼehgo baa dahidíʼaah, diné tʼááłáʼí nízínígo baʼáłchíní bikʼeh tʼáá ahedaałtʼéego, bił áhootʼéhígíí dóó yídin nilínígíí dóó bee bichʼįʼ anáhóótʼiʼígíí bikʼehgo.
4 Áádóó bíniʼdii shá naalʼaʼí Edward Partridge, díí diné kéyah baa deetʼánígíí yeidiníʼą́ągo, éí kéyah baa deetʼą́ągo shóoztʼeʼígíí naaltsoos yikááʼ íídoolííł, áko éí tʼáá bí yótąʼ doo, díí sodizin biyiʼ tʼáá ákótʼáo baa deetʼánígíí, asihgo dóó sodizin daʼatahígíí doo badaʼííníídlíi da daaníigo, éí sodizin bibee hazʼáanii dóó bee ałhaʼdadeestʼáanii bikʼehgo doo, kótʼáo éí sodizinjí doo daʼjítah da doo.
5 Áádóó asihgo dóó sodizinjí doo baʼódlíigo, sodizinjí baa dahojoobáʼígíí dóó bichʼįʼ andahaztʼiʼígíí yá hodísingo bishop yeidiníʼą́ągo yee aa joosbaʼyę́ę éí nínéídidoodlééłgo doo bee bá ahóótʼiʼ da; éí bąą, ainíláhígíí doo baa ndoolyééł da, ákondi baa deetʼánígíí naaltsoos bikááʼ ályaaígíí tʼéiyá baa nídidootʼááłgo yótą́ʼ doo.
6 Áádóó ákótʼáo tʼáá ałtsóní kéyah bikááʼgóó bee hazʼáanii bikʼehgo, ílį́įgo ádaʼdoolnííł.
7 Áádóó bíniʼdii díí dineʼé daabíhígíí díí dineʼé bee bídahólníihgo baa dahidoolyééł.
8 Áádóó béeso díí dineʼé bichʼįʼ chʼíníídeeʼígíí—bíniʼdii díí dineʼé yá sizį́į dooígíí bikʼihodidoonih, éí díí dineʼé, chʼiyáán dóó ééʼ deinízinígíí bá béeso yá neijaah doo.
9 Áádóó bíneʼdii dinéʼ tʼááłáʼí nízinígo doo dabiyoochʼíídgóó, dóó díí dineʼé bitahgóó tʼáá ahidaałtʼée doo, dóó tʼáá aheełtʼéego badaʼiilyée doo, áko łaʼí danohłį́į doo, bee nihichʼįʼ haasdzíʼígiʼ átʼáo ndi.
10 Áádóó díí dineʼé daabihígíí doo bitsʼą́ą́ʼ nididooʼnił da áádóó nááná łaʼ sodizindééʼígíí doo baa doojih da.
11 Ákohgo, sodizin nááná łaʼ díí sodizin bibéeso beiyíjaaʼgo, yee ałhadaʼdeestʼánígíí bikʼehgo díí sodizin yichʼįʼ niná daʼdoodlééł;
12 Áádóó bishop éí doodago ásizínígíí díí íídoolííł, éí sodizin daʼatahígíí ádaaníigo yadadidoolnih.
13 Áádóó ałdóʼ, bíniʼdii bishop naadeełii bá hazʼą́ díí sodizin yá neidooʼááł; áádóó bíniʼdii tʼáá ałtsóní béeso dóó atsįʼ, éí díí dineʼé deinízinígíí biláahgo ákóneʼí sinil doo, éí bishop yikʼidéezʼį́į́ʼgo yaa áhályą́ą doo.
14 Áádóó bíniʼdii tʼáá bí dóó baʼáłchíní yídin danilínígíí nídeididoonił, jó bí éí díí naanish yikʼideezʼį́įʼgo dahyoolééł doo.
15 Áádóó ákótʼáo díí dineʼé shibee hazʼáanii bikʼehgo tʼáá bí áhił ákáʼadoojahgo hashtʼeʼádaʼdidoolnííłgo baa hodiníʼą́.
16 Áádóó tʼóó honishgháníjįʼ díí kéyah bee baa jideeshbaał, Shí, Diyin Bóhólníihii, nááná łahgiʼ átʼáo bá hosidéʼą́ągo índa, áádóó kʼad bidaʼohłééh bidííniid;
17 Áádóó oolkiłígíí éí doodago yoołkáłígíí diné doo łaʼ bił bééhóziní da, ákohgo bíniʼdii kéyah yikááʼ dahiináago nináháhááh doo, dóó díí éí bá yáʼátʼééhii átʼée dooleeł.
18 Áko shooh, díí éí shá naalʼaʼí Edward Partridge bá bikʼehgo eʼélʼíinii átʼée doo, nááná łaʼgi ałdóʼ, dóó tʼáá ałtso sodizin naaznilgóó yikʼeh ádaʼałʼį́į doo.
19 Áádóó tʼáá háiida Diyin yikééʼ sizį́įgo, dóó doo biyoochʼíídgóó, dóó hoyą́ągo akʼi bóhólnííhgo baa ákóhoniidzį́įʼgo éí Diyin Bóhólníihii tsʼídá bá hózhóonii yiih doogááł, dóó ahoolʼáágóó iiná baadidootʼááł.
20 Tʼáá aaníigo, Shí nihichʼįʼ haasdziih, Shí éí Jesus Christ áshtʼį́, tʼáá hooshchʼįʼ deeshááł, oolkiłígíí doo nidashíínółíhę́ę góneʼ. Tʼáá ákótʼée doo. Amen.