Wóltaʼii 9
Diyin Yá Yáłtiʼí Joseph Smith díí diyingo bił ííshją́ą́ ályaa, Oliver Cowdery yee yił hodoolnih biniyé, Harmony, Pennsylvaniadi, Tʼą́ą́chil 1829yę́ędą́ą́ʼ. Oliver bichʼįʼ haʼoodzííʼ haʼíínílní dóó tʼáá nił hózhǫ́ǫgo naʼízoh, kʼad éí, ataʼ halneʼí yee hahaadziihígíí tʼéiyá bikʼehgo naʼízoh, ataʼ hodíílnihgo éí dooda biʼdooʼniid.
1–6, Nááná łaʼ ałkʼidą́ą́ʼ haneʼ ndaháasdzohyę́ę éí tʼah índa bá ataʼ dahodoonih; 7–14, Naaltsoos Mormon Wolyéhígíí bilagáanaakʼehjí álnééhgo hózhǫ́ naalkaah dóó Iiʼsizį́ Diyinii tʼáá aaníinii yee lą́ niʼiiłeeh.
1 Áko shooh, shí ándishní, shiyeʼ, bee shííníkeedyę́ę tʼáadoo bikʼehgo ataʼ hwiinílneʼígíí biniinaa, dóó shá naalʼaʼí, Joseph Smith, Jun. bá ninááʼízohgo, tʼáá éígiʼ átʼáo bá nááʼiizoh doo díí haneʼ ałtso íínlaajįʼ, éí baʼííníshłíigo bąąh ninílá.
2 Áádóó, áko shooh, nááná łaʼ haneʼ ndaháasdzohígíí shee hólǫ́, éí adziilii naah ndeeshłééłgo binahjįʼ ataʼ haneʼ bee ákáʼadíílwoł.
3 Haʼíínílní, shiyeʼ, háálá hódzą́ shiiʼ siláhígíí bikʼehgo, áádóó díí kʼad hoolzhishígíí biyiʼ doo ataʼ halneʼgo tʼáá íiyisí ná yáʼátʼééh.
4 Áko shooh, naanish bikáʼánídooʼniidígíí éí shá naalʼaʼí Joseph bá naʼízoh doo.
5 Áádóó, áko shooh, jó tʼóó áłtsé binídinilnishę́ędą́ą́ʼ nahalingo doo binanilnishígíí biniinaa, ataʼ hólneʼyę́ę, nitsʼą́ą́ nídiilá.
6 Shiyeʼ, tʼáadoo saad honíłóní, háálá hódzą́ shiiʼ siláhígíí bikʼehgo díígiʼ átʼáo ná hodíʼą́.
7 Áko shooh, doo bikʼiʼdiitįįh da; tʼóó naadeeshłééłgo tʼéiyá ninizį́į́ʼ, tʼáadoo hazhóʼí baa ntsísíníkééz da ndi tʼóó bee shííníkeed.
8 Ákondi, shooh, shí ándishní, yéego níniʼ biyiʼdi naniłkaah; áádóó índa tʼááísh ákótʼé diníigo bee nashidídííłkił, áádóó tʼáá aaníí ákótʼéego éí niyiʼdi dooládóʼósh nijéí dookʼą́ą́ł nahalin doo; éí bąą, tʼáá aaníí díníízįįł.
9 Ákondi doo ákótʼéego éí doo baa ákodíníízįįł da, ákondi chʼééh tsídíkeesgo doo ákódaatʼéhę́ę beidiyíínah; éí bąą, díí dahodílzinígíí doo baa naʼiidíízoh da tʼáá hazhóʼí nił ííshją́ą́ ííshłaago tʼéiyá.
10 Kʼad, díí nił bééhózingo shį́į́ baa náʼiisínízoh doo ńtʼę́ę́ʼ; ákótʼée ndi, kʼad ataʼ halneʼgo tʼáá íiyisí doo ná yáʼátʼééh da.
11 Áko shooh, tʼóó niʼdinzohę́ędą́ą́ʼ tʼáá íiyisí ná yáʼátʼééh ńtʼę́ę́ʼ; ákondi tʼóó béésíníldzííd, dóó kʼad bilááhgo ahoolzhiizh, dóó kʼad doo tʼáá íiyisí ná yáʼátʼééh da;
12 Háálá, daʼ yíníʼį́į́sh shá naalʼaʼí Joseph yíneelʼą́ągo ííshłaa, éí binahjįʼ bidziil? Áádóó Shí doo tʼáá ánóhłah nihánahoníʼą́ą da.
13 Díí ádíílííł nidishnínée ádíílííł, dóó ítʼį́į doo. Diyin bikééʼ sínízį́, dóó nandiʼnitaahgo doo nikʼehdidoodleeł da.
14 Naanish naah niníláhígíí bee nidziilgo sínízį́, dóó nitsiighá tʼááłáʼí ndi doo łaʼ yóó adoodił da, nihóníyáadi yisdádíínááł. Amen.