Wóltaʼii 31
Diyin Yá Yáłtiʼí Joseph Smith díí diyingo bił ííshją́ą́ ályaa éí Thomas B. Marsh yee yił hodoolnih biniyé, Biniʼantʼą́ą́tsoh 1830yę́ędą́ą́ʼ. Díí Sodizin ntsaago áłah azlį́į́ʼ bikééʼdóó tʼáá áko (wóltaʼii 30gi alą́ąjįʼ saad dashijaaʼígíí yídííłtah). Thomas B. Marsh éí díí yiziłígíí hahoolzhiizhyę́ędą́ą́ʼ tó bee biʼdoolzį́į́ʼ dóó Sodizinjí elder dooleełgo bee bikʼihodiiniiʼ díí diyingo bíł ííshjááʼ ádoolníłígíí tʼah bitséédi.
1–6, Thomas B. Marsh éí Jesus Christ binaʼnitin bee yisdáʼiildéehii yee nidiʼnóotįįłgo bee bikʼihodiiniiʼ dóó baʼáłchíní yáʼáhootʼéehgo bił hazʼą́ą doo biʼdooʼniid; 7–13, Haʼíínílní, tʼáá áłahjįʼ sodílzin, áádóó Aaʼáhályáanii bikʼeh honíłʼį́ biʼdooniid.
1 Shiyeʼ, Thomas, shinaanish yinídlánígíí biniinaa nikʼihojisdliʼ.
2 Áko shooh, naʼáłchíní biniinaa ląʼígo nichʼįʼ nahwiisnááʼ; ákótʼée ndi, ni dóó naʼáłchiní bikʼihozhdeshdliił, aooʼ, naʼáłchíní yázhí; áádóó áájįʼ iidoołkááł tʼáá aaníinii deidoodląął dóó bił béédahodoozįįł dóó shisodizin biyiʼ bił tʼááłáʼí dííleeł.
3 Nijéí hidíłnááh dóó nił hoozhǫǫh, háálá biniyé anidoolʼaʼígíí baa hoolzhiizh; dóó doo nanitłʼahgóó yáníłtiʼ doo, dóó díí kʼad daʼáchííhdi haneʼ tsʼídá baa hózhǫ́ǫgo bee nanitin doo.
4 Shá naalʼaʼí, Joseph Smith, Jun. diyingo bił ííshją́ą́ ádaalyaaígíí bee naʼnítin doo. Kʼad dóó náásjįʼ díí bee naʼnítin doo, aooʼ, daʼákʼehdi daʼdooldah háálá adidoolkʼą́ą́łgo tʼáá íídą́ą́ʼ daʼiigai.
5 Éí bąą, tʼáá átʼée ńtʼę́ę́ʼ niiʼsizíinii bee alzhéhí bee íshééh, áádóó nibąąhági ádaatʼéii bee nanídeitʼą́, tłʼoh naadą́ą́ʼ nidaazgo dahyíłjił doo, háálá ndaalnishí éí bichʼįʼ niʼdoolyééłgo yííghahgo bee bidiʼnílʼį́. Ákohgo, naʼáłchíní náás dahiináa doo.
6 Áko shooh, tʼáá aaníigo shí ándishní, tʼóó honíshgháníjįʼ bitsʼą́ą́ʼ dahdidíínááł, dóó shizaad bee naʼnítin doo, áádóó shí éí bá hashtʼeʼhodeeshłííł.
7 Aooʼ, nihokááʼ dineʼé bijéí ąą ádadeeshłiił, dóó naahakááh dooleeł. Áádóó sodizin atah dadooleełígíí hadidíílííł;
8 Áádóó bidziilgo ádadíílííł áádóó ahanahidootʼishjįʼ ahodoolzhishgo hashtʼedíílííł.
9 Tiʼdahooʼnííh bichʼįʼ haʼíínílní, doo yáʼáshǫ́ǫ́góó akʼijįʼ yádaałtiʼígíí tʼáadoo bikʼijįʼ yáníłtiʼí. Nighan hazʼą́ągi aʼoh ádínílzingo bikʼidíníʼį́į́ doo, áádóó nidziilgo sínízį́.
10 Áko shooh, shí andishní sodizin bá náʼáłdziihii nílį́į doo, ákondi nihokááʼ dineʼé bichʼįʼ éí ndagaʼ, háálá doo daninízin da doo.
11 Nílááh ánííłʼaʼjigo yínááł, áádóó Aaʼ Áhályáanii haadííníłígíí dóó háájigo dahdidíínááłígíí yee nił hodoolnih.
12 Tʼáá áłahjįʼ sodílzin, doo ákónítʼį́įgo éí azánidiʼdoodlóós dóó bee nikʼihojisdliʼyę́ę nitsʼą́ą́ʼ náádidooʼnił.
13 Nihoníyáajįʼ akééʼ sínízį́, áádóó shooh, shí nił honishłǫ́ǫ doo. Díí saad éí doo diné doodago hastʼóí bitsʼą́ą́dééʼ da, ákondi shí shitsʼą́ą́dééʼ átʼé, Jesus Christ, náNináʼnídléí ndi, Azhéʼé iinízinígíí bee. Amen.