Wóltaʼii 34
Diyin Yá Yáłtiʼí Joseph Smith díí diyingo bił ííshją́ą́ ályaa éí Orson Pratt yee yił hodoolnih biniyé, Fayette, New Yorkdi, Níłchʼitsʼósí 4, 1830yę́ędą́ą́ʼ. Akʼisoo Pratt íídą́ą́ʼ náhástʼéí tsʼáadah binááhaigo. Eí bínaaí, Parley P. Pratt Jesus Christ binaʼnitin bee yisdáʼiildéehii ninályáhígíí tʼóó áłtsé yidiiztsʼą́ą́yę́ędą́ą́ʼ oosdląąd dóó tó bee biʼdoolzį́į́ʼ, éí tʼáá bítséédi hastą́ą́ damóoyę́ędą́ą́ʼ áhóótʼįįd. Díí diyingo ííshją́ą́ ályaa Peter Whitmer Sr. bighandi beiyílyá.
1–4, Daʼoodláanii Bąąhági Átʼéii Bikʼé Nináʼílyáhígíí binahjįʼ Diyin God biyeʼké daaleeh; 5–9, Jesus Christ binaʼnitin bee yisdáʼiildéehii bee naʼnitingo Christ Nínáádoodááł Bijį́įdi bá hashtʼeʼhodinééh; 10–12, Diyin bikʼehgo áhodoonííł bee haʼoodzíʼígíí éí Iiʼsizį́ Diyinii bibeʼadziilii binahjįʼ áhootʼįįh.
1 Shiyeʼ Orson, shidinitsʼįįh dóó shikʼeh honíłʼįįh dóó shí, Bóhólníihii Diyin God, Jesus Christ ná Nináʼnídláii ndi, bee nichʼįʼ hadeesdzihígíí baa ákoninzįįh;
2 Nahasdzáán beʼadinídíín dóó binahjįʼ daʼiináanii, adinídíinii chahałheeł yiyiʼ adiníłdíinii áádóó éí chahałheeł doo yikʼiʼditįįh da;
3 Éí nihokááʼ dineʼé tsʼídá ayóó áyóóʼníigo beʼiinaʼ tʼáá bí yá nináʼádeetʼą́, áko tʼáá haishį́į́ daʼoodlánígií da Diyin God biyeʼké dadooleeł. Ákohgo shiyeʼ éí nílį́;
4 Áádóó háála iisínídląądígíí biniinaa nikʼihoozhdoodliił;
5 Áádóó shinaʼnitin bee yisdáʼiildéehii bee naʼnítin doogo bee nikʼidiishniiʼ éí biniinaa tʼáá íiyisíí ayóó átʼáo nikʼihojisdliʼ—
6 Nizhí dilníʼgiʼ átʼáo dei diitsʼaʼgo ánílééh, nízáádgóó ayóó íítsʼaʼgóó didootsʼį́į́ł tʼáá áłah, bindaʼadloʼii dóó doo yáʼádaashóonii dahʼooldahígíí ádaa ńdaʼoohkąąh bidiníigo néiníkąąh, Diyin Bóhólníihii nínáádoodááł bijį́įdi bá hashtʼeʼáhólééh.
7 Háálá áko shooh, tʼáá aaníí, tʼáá aaníigo, shí ándishní, hodíínaʼgo baa hodoolzhish ádziilii bee dóó ayóóʼatʼéii binahjįʼ kʼos biyiʼ adadeeshááł.
8 Áádóó nishááhdi ayóó átʼéego aʼdooʼááł, háálá tʼáá ałtso ałʼąą dineʼé daditxiz doo.
9 Ákondi tʼahdoo ayóó átʼáo bijį́įjįʼ iiłkaahdą́ą́ʼ, jóhonaaʼéí bił chahodoołhił, dóó ooljééʼ dił dooleeł; dóó sǫʼ doo bikʼindazdidlaad da dooleeł, áádóó łaʼ éí ndadoołdas, dóó doo yáʼádaashóonii éí ayóó átʼáo dadoolchxǫǫł.
10 Ákohgo, nizhí dei diitsʼaʼgo ánílééh dóó tʼáadoo baa sínítiʼí, háálá Bóhólníihii Diyin God yee haadzííʼ; éi bąą diyingo ádahodoonííłii bee naʼnítin, dóó Iiʼsizį́ Diyinii bibeʼadziilii binahjįʼ naadoolyééł.
11 Áádóó iinídlą́ągo, áko shooh, níyáajįʼ nił honishłǫ́ǫ dooleeł—
12 Áádóó tʼáá aaníí, tʼáá aaníigo, ándishní, tʼáadoo hodinaʼí nishááh. NiDiyin Bóhólníihii dóó Nánináʼnidlái nishłį́. Tʼáá ákótʼé. Amen.