N aron kamanenana ni koroboki aika tabu, karaoan te mwakuri ni kamaiu bon te karawawataki n te tuaa ibukin karaoan te bure, ao n te aro aei e kanakoaki mwin te bure mai iroun te tia bure ae rairananona ao ni kona ni kaiokia nakon te Atua. Iesu Kristo bon ti ngaia ae kona ni karaoa te mwakuri ni kamaiu ae kororaoi ibukia aomata ni kabane. E bon kona ni karaoia ibukina bwa e rineaki ao E a kaman katabuaki n te Bowi ae Kakannato i mwaain karikan te aonaba (Ita 3:14; Mote 4:1–2; Abe. 3:27), Ngaia Natin te Atua, ao maiuna ae akea burena. Ana Mwakuri ni Kamaiu e kairaki ma karawawatakina ibukin bureeia te botanaomata, kawawaean raraana, ao matena ao n rimwiaki ni mangautina man te ruanimate (Itaia 53:3–12; Ruka 22:44; Mot. 3:5–11; Aram. 7:10–13; R&B 19:16–19). Ibukin te Mwakuri ni Kamaiu, aomata ni kabane a na uti man te mate ma rabwataia ae aki mamate (1Korin. 15:22). Te Mwakuri ni Kamaiu e karekea naba te kawai ibukira bwa a na kabwaraki ara bure ao ni maiu n aki totoki ma te Atua. Ma te aomata are e tia n roko n te roro ni bukinaki ao e karekea te tua e kona ni karekei kakabwaia aikai ti ngkana iai ana onimaki iroun Iesu Kristo, e raira nanona man ana bure nako, e karekei otenanti ni kamaiu, ao e kawakin ana tua te Atua. Naake aki roko n te roro ni bukinaki ao naake akea te tua irouia a kamaiuaki rinanon te Mwakuri ni Kamaiu (Mot. 15:24–25; Moro. 8:22). Koroboki aika tabu a kamatata n reirei bwa ngke arona bwa Kristo e aki karaoa te mwakuri ni kamaiu ibukin ara bure, ao akea te tua, otenanti, ke te karea ae na kakoroi bukin bwai ake e tangiri te momotiraoi, ao te aomata e aki kona ni manga oki nako matan te Atua (2Nib. 2; 9).