1 Daʼíísínółtsʼą́ą́ʼ, O elders shisodizinjí atah danohłínígíí, éí shizhiʼ binahjįʼ áłah soołį́įʼii, Jesus Christ Diyin God hiináanii biYeʼ, nahasdzáán biYisdáʼiinííłii; tʼah tʼáá shízhiʼ deinohdlą́ągo dóó shibee hazʼáanii bikʼeh dahonółʼį́įgo.

2 Shí ánáánihidishní, daʼdoohtsʼį́į́h dóó daʼíísínółtsʼą́ą́ʼ dóó bee hazʼáanii nihaa deeshłéłígíí bikʼeh dahonołʼį́.

3 Háálá Shí tʼáá aaníigo ánihidishní, bee hazʼáanii nihaa níláhígíí bikʼehgo áłahsoolį́ʼígíí éí binahjįʼ ánihidííniid, dóó díí bee lą́ daʼsoolį́į́ʼ, dóó shízhiʼ binahjįʼ aTaaʼ ndabídóółkid, áko nihaa doolyééł.

4 Áko shooh, tʼáá aaníigo shí ándishní, díí bee hazʼáanii áłtséhígíí nihaa nishłé, áko shízhiʼ binahjįʼ dahdidoohkah, tʼááłáʼí noozínígo, tʼáá hazhoʼó shá naalʼaʼí Joseph Smith, Jun., dóó Sidney Rigdon éí áłtsé tʼahdoo.

5 Áádóó bee hazʼáanii łaʼ baa deeshłééł dóó tʼóó hónisgháníjįʼ, áádóó hahgo ńdóotʼashígíí éí Iiʼsizį́ Diyinii bibeʼadziilii binahjįʼ bił hodoonih.

6 Áádóó nihí éí shiʼIiʼsizį́ Diyinii bibeʼadziilii bee náás deinóhkááh doo, shinaʼnitin bee yisdáʼiildéehii bee ndaʼnohtingo, naaki nółtʼéego, shízhiʼ bee, nihizhí dilníʼgiʼ átʼáo dei diitsʼaʼgo ádoohłííł, Diyin God bá ndaalʼaʼí nahalingo shizaad baa hoołneʼ doo.

7 Áádóó tó bee oohsį́į́h doo, kódóhníigo: Ádaa ńdaʼoohkąąh, ádaa ńdaʼoohkąąh, háálá yáʼąąshdi hazʼą́ koshídę́ę́ʼ bichʼįʼ hoolzhish.

8 Áádóó díí kodóóʼ dahdidohʼash eʼeʼaah nahósʼaʼjigo; áádóó bee naʼnohtin bił yáʼádaatʼéhígíí bikʼínoháázhgo ákótʼéego tʼéiyá shisodizin tʼáá ałtso nahósʼaʼgóó hadidoohłííł—

9 Yáʼąąshdę́ę́ʼ nihił ííshją́ą́ ádoolníłígíí baa hoolzhiizhgo índa, New Jerusalem kin dashijaaʼígíí hashtʼedoolnííł, ákohgo tʼáá áłáhíjįʼ ahąʼ ánihidiʼdoolnííł, áko shidineʼé dadoohłeeł dóó Shí éí nihiDiyin God deeshłeeł.

10 Áádóó ałdóʼ, Shí ánihidishní, shá naalʼaʼí Edward Partridge bikʼidiishniiʼ góneʼ dasidáa doo. Áádóó baa hodoolzhish, áko doo yáʼátʼééhgo íʼiilaago nááná łaʼ bitsʼáskʼeh góneʼ ndidooltééł. Tʼáá ákótʼée doo. Amen.

11 Ánáánihidishní, doo tʼáá háída shinaʼnitin bee yisdáʼiildéehii yee naʼdínóotįįł da, doodago shisodizin doo łą́ą́ʼgo idahidiikááhgo íídoolííł da, tʼáá hazhóʼí háída tʼáá íídą́ą́ʼ bee óhólnííhii bee hólónígíí biisį́įʼgo tʼéiyá, áádóó óhólnííh dahyoolééłgo sodizinjí bééhoʼdílzinígíí dóó sodizin yilą́ąjįʼ naazínígíí tʼáá álínígiʼ átʼáo dabíísį́į́ʼgo.

12 Áádóó ałdoʼ, díí sodizinjí elders, priests dóó ndaʼnitiní éí shinaʼnitin bee yisdáʼiildéehii binahjįʼ hadadilyáii yee ndaʼnitin dooleeł, éí Diyin God Bizaad Bible dóó Naaltsoos Mormon Wolyéhígíí biyiʼ, éí Jesus Christ binaʼnitin bee yisdáʼiildéehii tʼáá átʼé biyiʼ náháasdzo.

13 Áádóó diyingo bee ahadaʼdeestʼánígíí yikʼeh dahółʼį́į́ doo dóó sodizinjí bee ndahastʼáanii ádeidoołííł, dóó díí yee ndaʼnitin doo, Iiʼ Sizį́ Diyinii yikʼehgo ádaʼałʼį́į doo.

14 Áádóó daʼiinohdlą́ągo sodadołzingo Iiʼ Sizį́ Diyinii nihił dahólǫ́ǫ doo; áádóó Iiʼ Sizį́ Diyinii tʼáadoo nihaiyílyáágóó doo nidaʼdínóhtʼį́į́ł da.

15 Áádóó bee ndaʼnohtin doo nihidííniidígíí éí tʼáá áłtso bikʼeh dahodoołʼįįł, éí Diyin God Bizaad tʼáá ałtso nihił ííshją́ą́ ályaago índa.

16 Áádóó Aaʼáhályáanii binahjįʼ nihizhíʼ dadiitsʼaʼ doo, éí tʼáá ákótʼéego íínisinígíí bikʼehgo yádaołtiʼ doo dóó Diyin bikʼeh áhodooníłígíí baadahoołneʼ dooleeł;

17 Háálá, áko shooh, Aaʼáhályáanii tʼáá ałtsóní bił bééhózin, dóó aTaaʼ dóó biYeʼ tʼáá aaníigo yaa halneʼ.

18 Áádóó kʼad, áko shooh, Shí sodizin daʼatahígíí bichʼįʼ haasdziih. Nihokááʼ dineʼé tsʼídá doo diyííłhééł da; áádóó tʼáá háíshį́į́ íísxínígíí éí kʼad hoolzhishígíí biyiʼ, índa náábíkéédę́ę́ʼ hoolzhishígíí biyiʼ nidi, tsʼídá doo bá yóóʼanídidootʼáał da.

19 Áádóó ałdóʼ, Shí ádíshní, nihokááʼ diné tsʼídá doo diyííłhééł da; ákondi tʼáá háíshį́į́ iisxínígíí éí náádiyoolyééł.

20 Tsʼídá doo adiʼnííʼį́įł da; áádóó tʼáá háíshį́į́ iʼneezʼį́ʼígíí dóó doo ádaa náʼookąąhígíí éí chʼíbidiʼyoolghą́ą́ł.

21 Tʼáadoo tʼáá ádzaagóó hólneʼí; tʼáá háíshį́į́ tʼáá ádzaagóó halnéʼígíí dóó doo ádaa náʼookąąhígíí éí chʼíbidiʼyoolghą́ą́ł.

22 Nijéí tʼáá átʼéé ńtʼę́ę́ʼ bee neʼasdzáán ayóóʼííníʼní, dóó ádadíínółtąʼ nááná łaʼ éí dooda.

23 Áádóó tʼáá háiida asdzání yinéłʼį́įgo yídanoosnííʼgo éí hweʼoodląʼ yóóʼazhdííʼą́ą doo, dóó Iiʼ Sizį́ Diyinii doo bił hólǫ́ǫ da doo; dóó doo ádaa náʼookąąhgóó éí chʼíbidiʼyoolghą́ą́ł.

24 Tsʼídá doo aaʼdidííléeł da; dóó tʼáá háíshį́į́ aaʼdííláhígíí, dóó bijéí tʼáá átʼé doo yee ádaa náʼooskangóó, éí chʼíbidiʼyoolghą́ą́ł.

25 Ákondi tʼáá háíshį́į́ aaʼdííláago dóó bijéí tʼáá átʼéé ńtʼę́ę́ʼ yee ádaa náʼooskango, dóó éí yóóʼiidííʼą́ągo, dóó doo ánáánádzaagóó, éí baa ńdiʼdootʼááł;

26 Ákondi ákónáánádzaago, éí doo baa ńdiʼdootʼááł da, ndi chʼíbidiʼyoolghą́ą́ł.

27 Ninaagóó kéédahatʼínígíí tsʼídá tʼáadoo yíníłchʼį́į́dgo baa yáníłtiʼí, doodaiiʼ doo atídíílííł da.

28 Díí shibee hazʼáanii bídadéétʼiʼ nihił béédahózinígíí éí shizaad biyiʼ nihił chʼédaastʼą́; áko tʼáá háíshį́į́ bąąhági áátʼįįdígíí dóó doo ádaa náʼooskanígíí éí nahjįʼ kóbidiʼdoolnííł.

29 Áyóóʼáshííníʼníigo éí shikáʼanánílwoʼ doo dóó tʼáá átʼé shibee hazʼáanii bikʼeh honíłʼį́į doo.

30 Áádóó áko shooh, baa dahojoobaʼígíí béédaałniih, dóó nihinaadeełii bee baa jíínóhbaʼígíí doo dóó bee bíkaʼíínílwodígíí yee dahiináa doo, éí baa dííníʼánígíí doo bitsʼándidííʼááł da.

31 Áádóó baa dahajoobaʼígíí nihinaadeełii bee bikáʼohjééʼgo, shídóʼ shikáʼohjeeh doo; éí shisodizinjí bishop nilínígíí dóó yił ndaalnishígíí, elders naakigo, doodago high priests bidááhdóó ndahidoohjih, éí yikʼididoolnih doodago díí biniyé néíyiizlááʼ dóó yikʼidiilniiʼ.

32 Áádóó baa hodoolzhish, áko shisodizinjí bishop nilínígíí naadeełii bidááhdóó ndahaasnilgo, áádóó shisodizindóó naadeełii hojoobaʼ bee aa hasnilígíí bee bił hóóneʼgo, éí aa hasnilígíí doo sodizin bigháádooʼnił da, éí shibee hazʼáanii bikʼeh ályaa, áko diné tʼááłáʼí nízínígo shidááhdóó baa deitʼánígíí ííłʼį́į doo, tʼáá ałtso baa deetʼánígíí tʼáá bí yikʼidéézį́į doo, doodago naadeełii bee baa joozbaʼgo beiyílyáhígíí, éí tʼáá bí dóó baʼáłchíní bá bííghahígíí bikʼehgo.

33 Áádóó ałdóʼ, sodizin naalyéhí bee hólǫ́ǫgo, doodago yah andaajahígíí bee dahólǫ́ǫgo, ałtsé naadeełii yee aa dahajoozbaʼ bikééʼdóó tʼahdii tʼáá ląʼí bee dahólǫ́ǫgo, áádóó bííʼohígíí éí bishop baa dadohjih, éí naadeełii bee ádaadinígíí bá sinilgo bee baa dajidoohbaał, haashį́į́ nízah nináhálzhishgo, áko nihokááʼ dineʼé tʼááłáʼí nízínígo yíde nilínígíí bikʼehgo baadahidoolyééł.

34 Éí bąą, bííʼohígíí éí naalyéhí bá hazʼą́ą góneʼ hashtʼeʼndooʼnił, éí baa dahojoobaʼígíí dóó téʼáʼį́ yiih heeskaiígíí bee bíkáʼadoowoł, sodizindóó high council, áádóó bishop dóó yił ndaalnishígíí bee bídahólníihgo ádoolníił;

35 Áádóó sodizin daʼatahígíí chodeidoołʼįįł biniyé kéyah nahidoonih, dóó sodizin bá hooghan biyiʼ hodílzindoo biniyé ádoolnííł, áádóó New Jerusalem dínóosééłgo náásdi baa chíhodootʼááł—

36 Áko shisodizin ntsaaíígi níyáago shidineʼé diyingo bił ahadaʼdeestʼánígíí tʼáá łáhájįʼ áłah dadooleeł. Áádóó shidineʼé yisdánídookah biniyé díígiʼ átʼáo ííshłaa.

37 Áádóó baa hodoolzhish, áko tʼáá háíshį́į́ bąąhági áátʼįįdígíí dóó doo ádaa náʼooskanígíí éí shisodizindóó nahjįʼ kóbidiʼdoolnííł, shisodizin biyiʼ baa dahojoobaʼígíí dóó bichʼįʼ andahaztʼiʼígíí yee aa joosbaʼyę́ę doo baa ndahidoolyééł da, doodago kótʼáo ááłdíshní, shí shichʼįʼ—

38 Háálá díidí tsʼídá hojoobaʼ ádaatʼéii bíkáʼoohjééʼgo, éí shí áłdóʼ shíkáʼoohjééʼ doo.

39 Háálá baa hodoolzhish, áko shá yádaałtiʼí bee haasdzííʼyę́ę yee hadahadzííhgo éí bohodoolnííł; háálá Gentile dineʼé shinaʼnitin bee yisdáʼiildéehii deesiłígíí éí shinaalyéhí daʼílíinii bee baa jideeshbaał, éí shidineʼé baa dahojoobáʼígíí yee yaa deijiidoobaał éí Israel bighandóó danilį́.

40 Áádóó ałdóʼ, tʼáadoo nihijéí bee ádaa deidzíínóhdlíhí; tʼáá áłtso nihiʼééʼ tʼáadoo ayóó átʼáo ndaashchʼąąhí, áádóó tʼóó nizhónígo éí nílaʼ bee nizhónígo adíílííł;

41 Áádóó tʼáá ałtsoní niłtólígo shinááł ádíílííł.

42 Tsʼídá tʼáadoo tʼóó nił hóyéʼí; háálá tʼáá háíshį́į́h tʼóó bił hóyéʼígíí éí naalnishí bibááh doo yidooyį́į́ł da doodaiiʼ biʼééʼ doo yiih doogááł da.

43 Áádóó tʼáá háíshį́į́ nihitahgóó bitah honeezgaiígíí, dóó nídoodzihgo doo yoodlánígíí, ákondi oodlánígíí, éí tʼáá ałtso beʼiinaʼ yee ndoodzihígíí bee bikáʼadoowoł, chʼil azeeʼ dóó chʼiyáán ditʼódígíí bee, áádóó anaaʼ bilaʼ bitsʼą́ą́dóó éí dooda.

44 Áádóó sodizindééʼ elders danilínígíí, naakigo doodaiiʼ díkwíígo da, éí bídíʼdóojiił, dóó shízhiʼ binahjįʼ bilaʼ bitsiitʼááh dahdéesniiʼgo yá sodidoolzįįł; áádóó daninééhgo Bóhólníihii yá daninééh doo, áádóó dahiináago éí Bóhólníihii yá dahiináa doo.

45 Tsʼídá ayóóʼóʼóní bee ahił dahinohnáa doo, áko ádaadinígíí bá daahchah doo, áádóó ayóó átʼáo nááʼiiná haʼahóóní íiyisíí bee ádaadinígíí bá.

46 Áádóó baa hodoolzhish shinahjįʼ náádabiʼdiilyáhígíí éí doo dadínóonééł da, háálá tsʼídá bił yáʼádaatʼéeh doo;

47 Áádóó doo shéédahósingo náádabidiʼdiilyáhígíí, yíi bił dahólǫ́ǫ doo, háálá náádabiʼdiilyáago íiyisíí yínííł danízin doo.

48 Áádóó ałdóʼ, baa hodoolzhish tʼáá háíshį́į́h tʼáá aaníí náshidoołdzih nizingo shoodlánígíí, dóó doo dadootsaałgo bá náhootʼánígíí, éí ńdooldzih.

49 Háída binááʼ ádingo eeshʼį́į doo nízingo oodlą́ągo éí ooʼį́į dooleeł.

50 Háída bijééhkałgo adidootsʼį́į́ł yoodlą́ągo éí adiitsʼaʼ doo.

51 Naʼniłhodii dahdínóoljį́įłgo yoodlą́ągo éí dahdínóoljį́į́ł.

52 Áádóó díí ádeidoolííłgo doo deiyoodlánígíí, ákotʼée ndi dashoodlą́ągo, éí shiyeʼké dadooleeł yídeiyíghahgo ííshłaa; áádóó shibee hazʼáanii doo kʼídeiyitíhígíí ká ndaakaigo yichʼįʼ dabidziil doo.

53 Tsʼídá tʼáá ałtso naa deetʼánígíí bichʼįʼ niłdzilgo sínízį́į doo.

54 Tsʼídá łaʼ nikʼis biʼééʼ doo bitsʼą́ą́ʼ ńdidííłtsoos da; nikʼis neiníláhígíí tsʼídá bikʼé niʼdíílééł.

55 Áádóó naadeełii bee hiinínánígíí tʼáá bilááh nee házlį́įʼgo, éí shinaalyéhí bá hazʼą́ądi dííjih, áko bee haasdzíʼígíí éí tʼáá ałtsóní bikʼehgo áhodoolnííł.

56 Tsʼídá yídííkił, áádóó shizaad nihaahidiníʼánígíí bikʼehgo chʼídootʼááł; dóó éí hazhóʼí baa áháyą́ągo hastʼeʼnidooʼnił;

57 Áádóó ałtsé tʼah tʼáadoo baa yáníłtiʼí, áádóó tʼáá átʼé neiyílyáago índa bee naʼdíníítʼį́į́ł.

58 Áádóó Shí bee hazʼáanii łaʼ nihaa nílá áko éí tʼáa áłtso nihokááʼ dineʼé bee nadíníítʼį́į́ł; háálá éi tʼáá ałtso nihokááʼ dineʼé dah deíkááhgóó, ahidaʼdiilchíín, bizaad ałʼąą ádaatʼéii dóó diné danilíinii bitahgóó bee nidiʼnóotʼį́į́ł.

59 Naadahaasyáhígíí tsʼídá nídidíílééł, éí shizaad biyiʼdóó bee hazʼáanii naahaasyá, áko éí shisodizin yikʼi bohólnííhgo shibee hazáanii átʼée doo.

60 Áádóó tʼáá háiida díidi yikʼeh hółʼį́įgo éí yisdádooltééł, ndi tʼáá háiida díidi doo yikʼeh hółʼį́į́góó dóó tʼáá ákótʼį́įgo éí chʼį́įdii nabiloʼ doo.

61 Áko sodołzingo yínóhkeedgo, diyingo ił ííshją́ą́ ályaaʼígíí éí bikááʼígi łaʼ diyingo ííshją́ą́ ánáádoołnííł, bóhooʼą́ʼígíí éí bikááʼígi łaʼ bínááhidooʼááł, áko tʼahdoo béédahoozįįhígíí dóó ádahodoolzeeʼii nił bééhodoozįįł—ił hózhǫ́ yidoolééłii, hoolʼáágóó iiná yidoolééłii.

62 Tsʼídá yídííkił, áádóó háadi New Jerusalem ádoolníłígíí shí íínisinígi baa hoolzhiizhgo nił ííshją́ą́ ádoolnííł.

63 Áádóó áko shooh, baa hodoolzhish éí shá ndaalʼaʼí haʼaʼaahjigo, dóó eʼeʼaahjigo, náhookǫsjigo dóó shádiʼááhjigo adahidoolʼaał.

64 Áádóó tʼáá kʼad ndi, haʼaʼaahjigo eelʼaadígíí éí ihidiikaiígíí eʼeʼaahjigo adahidínóohchééł yidííniid, díí éí nahasdzáán bikááʼ ádahodooníłígíí, dóó nahonitʼingo doo yáʼátʼééhgóó ádaʼałʼínígíí biniinaa.

65 Áko shooh, tsʼídá díídi tʼáá áłtso bikʼeh hodííłʼįįł, áádóó bee nikʼihojídoodlihígíí ayóó átʼéii doo; háálá nihí nihichʼįʼgo yáʼąąshii bee bóhólníihgo bił hazʼáanii bee naʼnitinii doo bééhózin da yę́ę éí nihił béédahózin dooleełgo nihaa deetʼą́, nidi bí, éí doo baa deetʼą́ą da.

66 Bee hazʼáanii naahaasyáhígíí yinídlą́ągo bikʼeh honíłʼį́į doo.

67 Áádóó díí bikééʼdóó sodizin diyingo bibee ahadaʼdiitʼaahii naahidoolyééł, éí tʼáá bííghah áhééłtʼéego naahidoolyééł, tʼáá kweʼé dóó New Jerusalemdi tʼáá áłah.

68 Éí bąą, bee hódzáanii bídin nohłínígíí, éí shíídóohkił, éí bił hadleeʼgo índa doo akʼíháʼááhgóó tʼáá ałtso aidiiʼaah doo.

69 Nihijéí haʼólníigo óhłééh dóó nihił hózhǫ́, háálá yáʼąąshii bee bóhólníihgo bił hazʼáanii, doodago kótʼáo ááłdíshní, sodizin bibee ąą ńdaditį́hí eiyíjaaʼ. Tʼáá ákótʼée doo. Amen.

70 Priests dóó ndaʼnitiní éí baadahideestʼánígíí bee dahidoolyééł, sodizin daʼatahígiʼ átʼáo.

71 Áádóó elders doodago high priests danilínígíí bishop yikáʼadoojahgo tʼáá ałtsojįʼ yił ndahaʼáago bikʼidahodoonih, éí bishop naadeełii bichʼįʼ baa joosbaʼyę́ę baʼáłchíní bee baaʼáháyą́ą doo, éí baa dahojoobáʼígíí bee bikaʼadoowoł, dóó nááná łaʼ biniyéi, éí ałtséedą́ą́ʼ baa haʼoodzííʼ;

72 Doodago tʼáá átʼé yee ákáʼííjéʼígíí tʼáá ákogi átʼéego bee bichʼįʼ ndaʼdoolyééł, naanish baa deetʼánígíí doodago nááná łahgi átʼáo, hazhoʼó baa ntsáházkéezgo doodago bishop dóó yił ndaalnishígíí yindahazʼánígíí bikʼehgo.

73 Áádóó bishop, áłdóʼ, łahdóó bíkaʼanáʼáwoʼ doo, doodago sodizinjí tʼáá ałtsogóó ákáʼaalwodígíí tʼáá ákogi átʼéego bee bichʼįʼ ndoolyééł.

74 Áko shooh, tʼáá aaníigo Shí ándishní, háiida nihitahdóó, aaʼdííláago biniinaa bichʼooní yitsʼá níyáago, doodago kótʼáo ááłdíshní, bijéí tʼáá átʼéé ńtʼę́ę́ yee hojoobaʼ íínízingo yee ádaa hoolneʼgo díí ákódzaago, doo nihitahdóó nahjįʼ kódadoohłííł da;

75 Ákondi háiida aaʼdíílá biniinaa bichʼooní yitsʼáníyáago, dóó tʼáá bí bąąhági ádzaago, dóó bichʼooní tʼahdii hiináago, éí nihitahdóó nahjįʼ kódadoohłííł.

76 Áádóó ałdóʼ, Shí ánihidishní, hadaʼohsííd dóó hazhoʼó ádaaʼádahołyą́, tʼáá ałtsojįʼ ndaʼídółkid, áko łaʼ bichʼooní hólónígíí doo nihitah hólǫ́ǫ da doo;

77 Áádóó doo bichʼooní hólǫ́ǫ́góó, tʼáá ałtso bąąhági átʼéii yaa naayáhígíí yaa náʼiidookąął doodago éí doo nihitah doogááł da.

78 Áádóó ałdóʼ, tʼáá ałtso Christ bisodizin daʼatahígíí, sodizin tʼáá áłtso bibee hazʼáanii dóó diyingo bee ahadaʼdeestʼánígíí yikʼeh dahółʼį́įgo ádeidoolííł.

79 Áádóó baa hodoolzhish, áko háiida iisxį́įgo éí kéyah bibee hazʼáanii bichʼįʼ bidiʼdoochił dóó áájí bibee hazʼáanii bikʼehgo bá nahodootʼááł; háálá béénílniih éí éí áátʼįįdígíí doo bee bandiʼdootʼááł da; áádóó éí kéyah bibee hazʼáanii bikʼehgo bá nahidiyootʼááł.

80 Áádóó hastiin doodago asdzáán aaʼdííláago, éí sodizindóó elders naakigo, doodago dikwíígo da, bá ndahidooʼááł, saad tʼááłáʼí níʼánígo há hashtʼéédeidoodlííł hastiin doodago asdzáán bikʼijįʼ doodzoh, sodizindóó naakigo ooʼiinii nilíinii íʼdoolííł, sodizin yitsʼą́ą́jí danilínígíí éí dooda; ákondi naakida ooʼíinii nilį́įgo éí tsʼídá nizhóní doo.

81 Ákondi naaki ooʼíinii áníigo hastiin doodago asdzáán éí bá nahodootʼááł; áádóó elders éí sodizin bidááhdóó yá nahodooʼááł, dóó sodizindę́ę́ʼ hastiin doodago asdzáán yikʼijįʼ yadidoolnih, éí Diyin God bibee hazʼáanii bikʼehgo bá nahodootʼááł.

82 Áádóó tʼáá bííghahdą́ą́ʼ, bishop ałdóʼ áádi atah doo.

83 Áádóó áko tʼáá átʼé bá ndahwiitʼaahígíí nihidááhdóó ndahaasyáhígíí baa nídadóóhtʼįįł.

84 Áádóó hastiin doodago asdzáán háiida doo yaa diʼnóoʼį́į́ł da, éí kéyah bibee hazʼáanii bidááhdóó ndoodlóós.

85 Áádóó hastiin doodago asdzáán aneezʼį́įgo, éí kéyah bibee hazʼáanii bidááhdóó ndoodlóós.

86 Áádóó hastiin doodago asdzáán biyoochʼíídgo, hastiin doodago asdzáán éí kéyah bibee hazʼáanii bidááhdóó ndoodlóós.

87 Áádóó hastiin doodago asdzáán bąąhági ádzaago, hastiin doodago asdzáán éí bee hazʼáanii bidááhdóó ndoodlóós, Diyin God biʼánahwiitʼaahígíí ndi.

88 Áádóó niʼkis doodago nilah atʼíniilaago, éí nikʼis dóó nilah bichʼįʼ doohááł doodago tʼáá sáhí bichʼįʼ hadoohdzih; áádóó nikʼis doodago nilah asihígíí yaa hadoodzihgo náánídiʼdooʼááł dóó kʼé ná ahididoohniił.

89 Áádóó nihiʼkis doodago nihilah doo ádaa halneʼgóó sodizin bichʼįʼ ndoohłóós, sodizin daʼatahígíí bichʼįʼ éí dooda, ákondi elders baa doohłóós. Áádoó éí bíł áłah doohłeeł, dóó tʼáá áłtso nihokááʼ dineʼé bidááhdóó éí dooda.

90 Áádóó nihiʼkis doodago nihilah ląʼígo yichʼįʼ bąąhági ádzaago, nihiʼkis doodago nihilah ląʼí da bidáádóó bichʼahidiʼdooshkeeł.

91 Áádóó háiida diné binááł bąąhági áátʼįįdgo, éí hastiin dóó asdzáán diné binááł bichahodiʼdooshkeeł, áko hastiin doodago asdzáán ádaa yádínóozįįł. Áádóó hastiin doodago asdzáán doo ádaa halneʼgóó, hastiin doodago asdzáán Diyin God bibee hazʼáanii bidááhdóó ndoodlóós.

92 Áádóó háiida nahonitʼindi bąąhági áátʼįįdgo, éí hastiin dóó asdzáán nahonitʼingo bichʼa hodiʼdooshkeeł, áko hastiin doodago asdzáán nahonitʼingo háiida yichʼįʼ bąąhági áátʼįįdígíí yichʼįʼ ádaa hodoolnih, dóó Diyin God ałdóʼ yichʼįʼ, áko sodizin daʼatahígíí doo tʼóó baaʼihgo baa yádaałtiʼ da doo.

93 Áádóó áko tʼáá ałtsóní díí bikʼehgo éʼélʼį́į doo.