1 Titiraki. Tera te marawa ae te kirati ae taekinaki iroun Ioane, te mwakoro 4, ao te kibu 6 n Te Kaotioti?Kaeka. Bon te aonaba, n arona ni itiaki, n aki maamate, ao n akea tokina.

2 T. Tera ae ti riai ni mataata iai man ataia ibukiia maan aika aman, ae a taekinaki n te kibu naba anne?K. Bon taian taeka ni kabotau, ake a kamanenaaki iroun te Tia Kaotioti, ae Ioane, ni kabwarabwara karawa, ana bwaretaiti te Atua, kukurein te aomata, ao maan, ao maan aika kawakawa, ao manin aan nang; are bwain te tamnei bon katotongan are ni bwain te rabwata; ao are bwain te rabwata bon katotongan are ni bwain te tamnei; tamnein te aomata ni katotongan rabwatana, n aron naba tamnein te man, ao ni kabane maan are e karikiia te Atua.

3 T. A ti tei maan ake aman ibukiia maan n tatabemania nako, ke a tei ibukin aekaia nako ke rinania nako?K. A bon ti tei ibukiia maan aika kaokoro aika aman, ake a kaotaki nakon Ioane, bwa a na tei ibukin mimitongin aekaia maan n rinania are e baireaki ke te tabo are a karikaki iai, i nanon kimwareireia ni kukureia ae akea tokina.

4 T. Tera ae ti riai ni mataata iai man mataia ao baia ni kiba, are iai irouia maan?K. Mataia e tei ibukin te oota ao te atatai, are nanona bwa, a onrake n te atatai; ao baia ni kiba e tei ibukin te mwaaka, ni mwaing, ao ni mwakuri, ao a mwaiti riki.

5 T. Tera ae ti riai ni mataata iai man uangaun ma aman unimwaane, ae taekinaki iroun Ioane?K. Ti riai n mataata bwa unimwaane aikai are e nooria Ioane, bon unimwaane ake a tia ni kakaonimaki n aia mwakuri ni ibuobuoki ao a tia ni mate; ake kaain ekaretia ake itiua, ao a mena n te tai arei n ana bwaretaiti te Atua.

6 T. Tera ae ti riai ni mataata iai man te boki are e nooria Ioane, are e kabaeaki i akuna ma kabaebae aika itiua?K. Ti riai ni mataata bwa kanoana bon te kantaninga, mwakuri aika raba, ao ana makuri te Atua aika a tia ni kaotaki; bwaai ake a raba ibukin ana babaire ni kaineti ma te aonaba aei i nanon reitinakona ae itiua te ngaa te ririki, ke maanna n tiku n te maiu n rabwata.

7 T. Tera ae ti riai ni mataata iai man kabaebae aika itiua are e kabaeaki iai?K. Ti riai ni mataata bwa te moan kabaebae kanoana bon bwain te moan ngaa n ririki, ao te kauoua naba bon bwain te kauoua ni ngaa n ririki, ao ai arona naba ni karokoa te kaitiua.

8 T. Tera ae ti riai ni mataata iai man anera aika aman, ae taekinaki n te kaitiua ni mwakoro ao te moan kibu n Te Kaotioti?K. Ti riai ni mataata bwa bon anera aika aman ake a kanakoaki iroun te Atua, are ngaiia aika a anganaki te mwaaka i aon mwakoron te aonaba ake aua, ni kawakina maiuia ao ni kamauna; aikai are ngaia ae iai irouia te euangkerio ae akea tokina bwa a na angania ni kabane aaba, reeti, neewe, ao aomata; are iai irouia te mwaaka ni kaina karawa, ni kabaea nakon te maiu, ke ni kanakoa nakon taabo aika a roo.

9 T. Tera ae ti riai ni mataata iai man te anera are e rierake mai mainiku, Te Kaotioti te kaitiua ni mwakoro ao te kauoua ni kibu?K. Ti riai ni mataata bwa te anera are e nako mai mainiku boni ngaia are e anganaki ana kabaebae te Atua ae maiu i aoia ana baronga Iteraera aika tebwi ma uoua; mangaia are, e takarua nakoia anera ake aman are iai irouia te euangkerio ae akea tokina, ni kangai: Tai kaikoaka te aonaba, ke marawa, ke kaai, ni karokoa ti a tia ni kanikinaia ana taan mwakuri Atuara i aon ramwaia. Ao, ngkana ko kukurei ni butimwaia, bon aio Eria are e nang roko ni ikotiia ni kabane ana baronga Iteraera ao ni kaokii bwaai ni kabane.

10 T. Ningai te tai ae a na kakoroaki bukin bwaai ake a taekinaki n te mwakoro aei?K. A na kakoroaki bukiia n te kaonoua ni ngaa n ririki, ke ni kaukan te kaonoua ni kabaebae.

11 T. Tera ae ti riai ni mataata iai man kanikinaeaia te bubua ao abwi ma aua tenga, mai buakoia ana baronga Iteraera—tebwi ma uoua tenga mai buakoia baronga nako?K. Ti riai ni mataata bwa naake a kanikinaeaki bon ibonga aika rietata, ake a katabuaki nakon ana botaki ae tabu te Atua, bwa a na kamwakura te euangkerio ae akea tokina; bwa bon ngaiia ake a rineaki man aaba nako, reeti, neewe, ao aomata, irouia anera are anganaki te mwaaka i aoia aban te aonaba, ni uotiia ni kabane ake a kukurei n roko nakon ana ekaretia te Karimoa n Nati.

12 T. Tera ae ti riai ni mataata iai man katangan taian buu, ae taekinaki ni mwakoro 8 n Te Kaotioti?K. Ti riai ni mataata bwa ngkai te Atua e karika aonaba i nanon onoua te bong, ao n te kaitiua ni bong e katia ana mwakuri, ao e katabua, ao e karaoa naba te aomata man bubun aontano, ai arona naba, ni moan te kaitiua ni ngaa n ririki te Uea ae te Atua e na kaitiaka te aonaba, ao ni kakoroa bukin kamaiuakiia aomata, ao ni motiki taekan bwaai ni kabane, ao ni kaboi ni kabane bwaai, ma tii bwaai ake e tuai kaaki mwaakana iai, ngkana e na kabaei ni kabane bwaai, nakon tokin bwaai ni kabane; ao katangan aia buu anera ake itiman bon katauraoan ao katian ana mwakuri, ni moan te kaitiua ni ngaa n ririki—katauraoan te kawai i mwaain tain rokona.

13 T. Ningai ae a na kakoroaki bukin bwaai, ake a koreaki n te karuaiwa ni mwakoro n Te Kaotioti?K. A na koro bukiia i mwin kaukan te kaitiua ni kabaebae, i mwaain rokon Kristo.

14 T. Tera ae ti riai ni mataata iai man te boki ae uarereke are e kanaki iroun Ioane, are e taekinaki ni mwakoro 10 n te Kaotioti?K. Ti riai ni mataata bwa bon te mition, ao te otenanti, i bukina bwa e na ikotiia ana baronga Iteraera; nooria, bon aio Eriati, are, n aron ae e koreaki, e riai n roko ao ni kaokii bwaai ni kabane.

15 T. Tera ae e na ataaki man taan kakoaua aika uoman, n te katebwii ma teuana ni mwakoro n te Kaotioti?K. Bon burabeti aika uoman ake a na kateirakeaki nakon ana botanaomata Iutaia ni boong aika kaitira, n tain kaokan bwaai, ao bwa a na taetae ni burabeti nakoia Iutaia i mwin ae a ikotaki ao n tia ni katea te kaawa i Ierutarem n aban aia bakatibu.