ພາກທີ 96
ການເປີດເຜີຍທີ່ມອບໃຫ້ແກ່ໂຈເຊັບ ສະມິດ ຜູ້ເປັນສາດສະດາ, ໂດຍສະແດງໃຫ້ເຫັນລະບຽບຂອງເມືອງ ຫລື ສະເຕກແຫ່ງຊີໂອນ ທີ່ເມືອງເຄີດແລນ, ລັດໂອໄຮໂອ, ວັນທີ 4 ເດືອນມິຖຸນາ, 1833, ປະທານໃຫ້ເປັນຕົວຢ່າງແກ່ໄພ່ພົນຂອງພຣະເຈົ້າໃນເມືອງເຄີດແລນ. ເຫດການເທື່ອນັ້ນເປັນກອງປະຊຸມໃຫຍ່ຂອງກຸ່ມມະຫາປະໂລຫິດ, ແລະ ຫົວຂໍ້ສຳຄັນຂອງການພິຈາລະນາຄືການຈັດການກັບທີ່ດິນບາງຕອນ, ທີ່ເອີ້ນວ່າ French farm (ບ້ານສວນຂອງຄອບຄົວຝະເຣັ້ນ), ທີ່ສາດສະໜາຈັກເປັນເຈົ້າຂອງ ຢູ່ໃກ້ເມືອງເຄີດແລນ. ເນື່ອງຈາກວ່າກອງປະຊຸມໃຫຍ່ບໍ່ສາມາດ ເຫັນພ້ອມກັນວ່າຄົນໃດຄວນເປັນຜູ້ດູແລບ້ານສວນແຫ່ງນັ້ນ, ທຸກຄົນຈຶ່ງເຫັນພ້ອມທີ່ຈະທູນຖາມພຣະຜູ້ເປັນເຈົ້າກ່ຽວກັບເລື່ອງນີ້.
1, ຕ້ອງເຮັດໃຫ້ສະເຕກເຄີດແລນແຫ່ງຊີໂອນເຂັ້ມແຂງຂຶ້ນ; 2–5, ອະທິການຕ້ອງແບ່ງປັນມູນມໍລະດົກໃຫ້ໄພ່ພົນຂອງພຣະເຈົ້າ; 6–9, ຈອນ ຈອນສັນ ຕ້ອງເປັນສະມາຊິກຂອງລະບົບເອກະພາບ.
1 ຈົ່ງເບິ່ງ, ເຮົາກ່າວກັບພວກເຈົ້າວ່າ ນີ້ຄືປັນຍາ, ຊຶ່ງໂດຍສິ່ງນີ້ພວກເຈົ້າຈະຮູ້ວິທີທີ່ຈະເຮັດແນວໃດກ່ຽວກັບເລື່ອງນີ້, ເພາະເຮົາເຫັນສົມຄວນທີ່ຈະເຮັດໃຫ້ ກສະເຕກທີ່ເຮົາໄດ້ຕັ້ງໄວ້ເປັນກຳລັງຂອງຊີໂອນ ຖືກເຮັດໃຫ້ເຂັ້ມແຂງຂຶ້ນ.
2 ສະນັ້ນ, ໃຫ້ຜູ້ຮັບໃຊ້ຂອງເຮົາ ນິວເອັນ ເຄ ວິດນີ ດູແລບ່ອນທີ່ເອີ່ຍເຖິງໃນບັນດາພວກເຈົ້າ, ຊຶ່ງໃນນັ້ນ ເຮົາມີແຜນທີ່ຈະສ້າງບ້ານສັກສິດຂອງເຮົາ.
3 ແລະ ອີກເທື່ອໜຶ່ງ, ໃຫ້ແບ່ງມັນເປັນແປງໆ, ຕາມປັນຍາ, ເພື່ອຜົນປະໂຫຍດຂອງຄົນທີ່ສະແຫວງຫາມູນມໍລະດົກ, ດັ່ງທີ່ມັນຈະຖືກພິຈາລະນາໃນສະພາໃນບັນດາພວກເຈົ້າ.
4 ສະນັ້ນ, ຈົ່ງລະວັງວ່າ ພວກເຈົ້າຈັດການກັບເລື່ອງນີ້, ແລະ ສ່ວນນັ້ນທີ່ຈຳເປັນຕໍ່ຜົນປະໂຫຍດຂອງ ກລະບົບຂອງເຮົາ, ເພື່ອຈຸດປະສົງຂອງການນຳຄຳຂອງເຮົາອອກໄປສູ່ລູກຫລານມະນຸດ.
5 ເພາະຈົ່ງເບິ່ງ, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ເຮົາເຫັນວ່າສິ່ງນີ້ເໝາະສົມທີ່ສຸດ, ວ່າຄຳຂອງເຮົາຈະອອກໄປສູ່ລູກຫລານມະນຸດ, ເພື່ອຈຸດປະສົງທີ່ຈະເຮັດໃຫ້ຫົວໃຈຂອງລູກຫລານມະນຸດອ່ອນລົງສຳລັບຄວາມດີຂອງພວກເຈົ້າ. ແມ່ນເປັນດັ່ງນັ້ນ. ອາແມນ.
6 ແລະ ອີກເທື່ອໜຶ່ງ, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ມັນເປັນຄວາມສະຫລຽວສະຫລາດ ແລະ ເຮົາເຫັນວ່າເໝາະສົມ, ທີ່ຜູ້ຮັບໃຊ້ຂອງເຮົາ ຈອນ ຈອນສັນ ຜູ້ທີ່ເຮົາໄດ້ຮັບເອົາເຄື່ອງຖວາຍຂອງລາວແລ້ວ, ແລະ ຜູ້ທີ່ເຮົາໄດ້ຍິນຄຳອະທິຖານຂອງລາວແລ້ວ, ຜູ້ຊຶ່ງເຮົາໄດ້ສັນຍາວ່າຈະປະທານຊີວິດນິລັນດອນໃຫ້ ຕາບໃດທີ່ລາວຍັງຮັກສາບັນຍັດຂອງເຮົານັບແຕ່ນີ້ເປັນຕົ້ນໄປ—
7 ເພາະລາວເປັນຜູ້ສືບຕະກຸນຂອງ ກໂຢເຊັບ ແລະ ເປັນຜູ້ຮັບສ່ວນພອນແຫ່ງຄຳສັນຍາທີ່ໄດ້ເຮັດໄວ້ກັບບັນພະບຸລຸດຂອງລາວ—
8 ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ເຮົາເຫັນສົມຄວນທີ່ລາວຈະກາຍເປັນສະມາຊິກ ຂອງລະບົບ, ເພື່ອວ່າລາວຈະໄດ້ຊ່ວຍເຫລືອໃນການນຳຄຳຂອງເຮົາອອກໄປສູ່ລູກຫລານມະນຸດ.
9 ສະນັ້ນ ພວກເຈົ້າຈົ່ງແຕ່ງຕັ້ງລາວສູ່ພອນນີ້, ແລະ ລາວຈະສະແຫວງຫາຢ່າງພາກພຽນເພື່ອຍົກເອົາໜີ້ສິນໄປຈາກບ້ານຊຶ່ງເອີ່ຍເຖິງໃນບັນດາພວກເຈົ້າ, ເພື່ອວ່າລາວຈະໄດ້ອາໄສຢູ່ທີ່ນັ້ນ. ແມ່ນເປັນດັ່ງນັ້ນ. ອາແມນ.