ພາກທີ 53
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ ແກ່ອາເກີນົນ ຊິດນີ ກຽວເບີດ, ທີ່ເມືອງເຄີດແລນ, ລັດໂອໄຮໂອ, ວັນທີ 8 ເດືອນມິຖຸນາ, 1831. ຕາມຄຳຂໍຮ້ອງຂອງຊິດນີ ກຽວເບີດ, ສາດສະດາໄດ້ທູນຖາມພຣະຜູ້ເປັນເຈົ້າກ່ຽວກັບວຽກງານ ແລະ ໜ້າທີ່ຮັບຜິດຊອບຂອງບຣາເດີ ກຽວເບີດ ໃນສາດສະໜາຈັກ.
1–3, ການເອີ້ນ ແລະ ການເລືອກຂອງຊິດນີ ກຽວເບີດ ໃນສາດສະໜາຈັກຄື ການຖືກແຕ່ງຕັ້ງເປັນແອວເດີ; 4–7, ລາວຕ້ອງຮັບໃຊ້ເປັນຕົວແທນໃຫ້ອະທິການນຳອີກ.
1 ຈົ່ງເບິ່ງ, ເຮົາກ່າວກັບເຈົ້າ, ຜູ້ຮັບໃຊ້ຂອງເຮົາ ຊິດນີ ກຽວເບີດ, ວ່າເຮົາໄດ້ຍິນຄຳອະທິຖານຂອງເຈົ້າ; ແລະ ເຈົ້າໄດ້ເອີ້ນຫາເຮົາ ເພື່ອມັນຈະໄດ້ເປັນທີ່ຮູ້ຈັກແກ່ເຈົ້າ, ຜູ້ເປັນພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າ, ກ່ຽວກັບການເອີ້ນ ແລະ ການເລືອກຂອງເຈົ້າໃນສາດສະໜາຈັກ, ຊຶ່ງເຮົາ, ພຣະຜູ້ເປັນເຈົ້າ, ໄດ້ ຍົກຂຶ້ນໃນຍຸກສຸດທ້າຍນີ້.
2 ຈົ່ງເບິ່ງ, ເຮົາ, ພຣະຜູ້ເປັນເຈົ້າ, ຜູ້ຖືກ ຄຶງເພື່ອບາບຂອງໂລກ, ມອບບັນຍັດຂໍ້ໜຶ່ງໃຫ້ແກ່ເຈົ້າວ່າ ເຈົ້າຈົ່ງ ປະຖິ້ມໂລກ.
3 ຈົ່ງຮັບເອົາການແຕ່ງຕັ້ງຈາກເຮົາໄວ້ກັບເຈົ້າ, ແມ່ນແຕ່ການແຕ່ງຕັ້ງເປັນແອວເດີ, ເພື່ອສັ່ງສອນສັດທາ ແລະ ການກັບໃຈ ແລະ ການປົດບາບ, ຕາມຄຳຂອງເຮົາ, ແລະ ການຮັບເອົາພຣະວິນຍານສັກສິດໂດຍການວາງ ມື;
4 ແລະ ເພື່ອເປັນ ຕົວແທນໃຫ້ແກ່ສາດສະໜາຈັກນຳອີກ ໃນບ່ອນທີ່ອະທິການຈະກຳນົດ, ຕາມພຣະບັນຊາຊຶ່ງຈະມອບໃຫ້ໃນພາຍຫລັງ.
5 ແລະ ອີກເທື່ອໜຶ່ງ, ຕາມຄວາມຈິງແລ້ວ ເຮົາກ່າວກັບເຈົ້າວ່າ ໃຫ້ເຈົ້າເດີນທາງໄປກັບຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ, ແລະ ຊິດນີ ຣິກດອນ.
6 ຈົ່ງເບິ່ງ, ສິ່ງເຫລົ່ານີ້ເປັນພິທີການທຳອິດ ຊຶ່ງເຈົ້າຈະໄດ້ຮັບ; ແລະ ສ່ວນທີ່ເຫລືອຢູ່ຈະຖືກເຮັດໃຫ້ເປັນທີ່ຮູ້ຈັກໃນເວລາທີ່ຈະມາເຖິງ, ຕາມວຽກງານຂອງເຈົ້າໃນສວນອະງຸ່ນຂອງເຮົາ.
7 ແລະ ອີກເທື່ອໜຶ່ງ, ເຮົາຢາກໃຫ້ເຈົ້າຮຽນຮູ້ວ່າ ຄົນທີ່ຈະລອດຄືຄົນທີ່ ອົດທົນຈົນເຖິງທີ່ສຸດ. ແມ່ນເປັນດັ່ງນັ້ນ. ອາແມນ.