E Mafai Faapefea Ona Ou Malamalama?

O’u uso e ma tuafafine pele, oka se olioli ina a tele i le faatasi ai iinei i lenei konafesi aoao matagofie mo Le Ekalesia a Iesu Keriso o le Au Paia o Aso e Gata Ai i lalo o le taitaiga a lo tatou perofeta pele, o Peresitene Russell M. Nelson. Ou te molimau atu ia te outou o le a tatou maua le avanoa e faalogologo atu ai i le siufofoga o lo tatou Faaola o Iesu Keriso e ala i aoaoga a i latou e tatalo, pepese, ma lauga mai i manaoga o o tatou aso i lenei konafesi.

E pei ona tusia i le tusi o Galuega, sa aoao atu e Filipo le faievagelia le talalelei i se tagata patino Aitiope o se eunuka sa pule i oa taua uma na umia e le masiofo o Aitiope.¹ Ina ua foi ane mai tapuaiga i Ierusalema, sa ia faitau i le tusi a Isaia. I le uunaia ai e le Agaga, sa faalatalata mai i ai Filipo ia te ia ma faapea atu, “Po ua e [malamalama] ea i mea ua [e] faitauina?

“Ua fai mai [le eunuka], Ou te mafaia faapefea, pe a le faasino mai e se tasi ia te au? …

“Ona tautala atu lea o Filipo, ua afua i lea lava Tusi ona folafola ia te ia o le tala lelei ia Iesu.”²

O le fesili sa fai atu e lenei tagata Aitiope o se faamanatu o le tiute paia ua ia i tatou uma ia saili le aoaoina ma ia aoao atu e le tasi le isi i le talalelei a Iesu Keriso.³ O le mea moni, o le aano o le aoao mai ma le aoao atu o le talalelei, o nisi taimi e pei ai i tatou o le tagata Aitiope—tatou te manaomia le fesoasoani a se faiaoga faamaoni ma musuia; ma o nisi taimi e pei ai i tatou o Filipo—e manaomia ona tatou aoao atu ma faamalosia isi i lo latou liuaina.

O lo tatou faamoemoega a o tatou saili atu ia aoao mai ma aoao atu le talalelei a Iesu Keriso o le tatau lea ona faateleina le faatuatua i le Atua ma i Lana fuafuaga paia o le fiafia ma ia Iesu Keriso ma Lana taulaga togiola ma ia ausia ai le liuaina tumau. O sea faatuatua faateleina ma le liuaina o le a fesoasoani ia i tatou ia osia ma tausia feagaiga ma le Atua, o le mea lea e faamalosia ai lo tatou manao e mulimuli ia Iesu ma fatu ai se liuga moni faaleagaga i totonu o i tatou—i nisi upu, o le liuaina o i tatou i se tagata fou, e pei ona aoao mai ai le Aposetolo o Paulo i lana tusi i tagata Korinito.⁴ O lenei liuga o le a aumaia ia i tatou se fiafia sili, uluuluola, ma se olaga maloloina ma fesoasoani ai ia i tatou e faatumauina se vaaiga e faavavau. Pe le o le mea tonu ea lenei na tupu i le eunuka Aitiope ina ua ia aoao e uiga i le Faaola ma liua ai i Lana talalelei? Fai mai le mau ua “alu foi ia i lana malaga ma le olioli.”⁵

O le poloaiga ia aoao mai ma aoao atu le talalelei i le tasi ma le isi e lē fou; o loo faia pea lava pea talu mai le amataga o le talafaasolopito o tagata.⁶ I se tasi taimi patino, a o i ai Mose ma lona nuu i fanua valevalenoa o Moapi a o lei ulufale atu i le nuu folafolaina, sa musuia e le Alii o ia e apoapoai atu i lona nuu e faatatau i lo latou tiutetauave e aoao tulafono ma feagaiga na latou maua mai le Alii ma ia aoao atu i a latou fanau,⁷ o le toatele o i latou sa le’i iloaina mo i latou lava le sopoiaina o le Sami Ulaula po o le faaaliga na tuu atu i luga o le Mauga o Sinai.

Sa apoapoai atu Mose i lona nuu:

“Isaraelu e, faalogologo mai ia i tulafono ma faamasinoga ou te aoao atu ai ia te outou tou te faia, ina ia outou ola ai ina ia outou o atu ai foi ma fai mo outou le nuu ua foaiina atu ia te outou e Ieova le Atua o outou tama. …

“… Ia e [aoao] atu i lau fanau, ma fanau a lau fanau.”⁸

Ona faaiu lea e Mose, i le faapea atu, “O lenei, ia e tausiusi i ana tulafono ma ana poloaiga ou te fai atu ai ia te oe i le aso nei, ina ia manuia ai oe ma au fanau pe a mavae atu oe, ina ia e nofo tulu’i ai i le laueleele ua foai mai ia te oe e Ieova lou Atua i aso uma lava.”⁹

O loo faatonu mai pea e le aunoa e perofeta a le Atua e manaomia ona tatou tausi a’e o tatou aiga i le faafailelega ma le apoapoaiga a le Alii”¹⁰ ma “i le malamalama ma le upumoni.”¹¹ Sa saunoa talu ai nei Peresitene Nelson, “I nei aso o le salalau solo o le ola lē mamā ma le vaisu o ponokalafi, ua i ai i matua se tiutetauave paia ia aoao a latou fanau i le taua o le Atua [ma Iesu Keriso] i o latou olaga.”¹²

Uso e ma tuafafine, o le lapataiga a lo tatou perofeta o se isi faamanatu o lo tatou tiutetauave faaletagata lava ia e saili le aoaoina ma ia aoao atu o tatou aiga o loo i ai se Tama i le Lagi e alofa ia i tatou ma o lē ua atiaeina se fuafuaga paia o le fiafia mo Ana fanau; o Iesu Keriso, o Lona Alo, o le Togiola o le lalolagi; ma o le faaolataga e sau mai le faatuatua i Lona suafa.¹³ O o tatou aiga e manaomia ona mauaa i luga o le papa o lo tatou Togiola, o Iesu Keriso, lea e mafai ona fesoasoani ia i tatou taitoatasi ma o ni aiga ia maua o tatou lava ia uunaiga faaleagaga ia mausali i o tatou loto, e fesoasoani ai ia i tatou ia tumau i lo tatou faatuatua.¹⁴

Atonu tou te manatuaina soo e toalua o Ioane le Papatiso ia sa mulimuli atu ia Iesu Keriso ina ua mavae ona faalogo atu i le molimau a Ioane o Iesu o le Tamai Mamoe a le Atua, o le Mesia. O nei tamalii lelei sa taliaina le valaaulia a Iesu ia “o mai inā matamata”¹⁵ ona latou mafuta lea ma Ia i lena aso. Sa oo ina la iloaina o Iesu o le Mesia, le Alo o le Atua ma mulimuli atu ia te Ia i o la olaga atoa.

I se tulaga faapea, pe a tatou taliaina le valaaulia a le Faaola ia “o mai ina matamata,” e manaomia ona tatou mafuta ma Ia, faatofu i tatou lava i tusitusiga paia, olioli i ai, aoao Lana aoaoga faavae, ma taumafai ia ola i le ala na Ia soifua ai. Ona faato’a mafai lea ona tatou iloa o Ia, o Iesu Keriso, ma iloa Lona siufofoga, ma le iloaina a tatou o mai ia te Ia ma talitonu ia te Ia, o le a tatou lē fiaaai lava pe fia feinu.¹⁶ O le a mafai ona tatou iloatino le upumoni i taimi uma, e pei ona tupu i na soo e toalua na mafuta faatasi ma Iesu i lena aso.

Uso e ma tuafafine, e lē tupu fua lena mea. O le faaogatusaina o i tatou ma faatosinaga sili ona maualuluga o le amioatua e le o se mataupu faigofie; e manaomia ai le valaau atu i le Atua, ma aoaoina pe faapefea ona faatotonugalemuina le talalelei a Iesu Keriso i o tatou olaga. A tatou faia, ou te folafola atu o le faatosinaga a le Agaga Paia o le a aumaia le upumoni i o tatou loto ma mafaufau ma o le a molimau mai e uiga i ai,¹⁷ ma aoao mai mea uma.¹⁸

O le fesili a le Aitiope, “Ou te mafaia faapefea [ona malamalama], pe a le faasino mai e se tasi ia te au?” o loo i ai foi se uiga faapitoa i le anotusi o lo tatou tiutetauave taitoatasi ia faatino mataupu faavae o le talalelei ua tatou aoaoina i o tatou olaga. I le tulaga o le Aitiope, mo se faataitaiga, na ia faatinoina le upumoni na ia aoao mai ia Filipo. Sa talosaga atu o ia e papatiso. Ua oo ina ia iloa o Iesu Keriso o le Alo o le Atua.¹⁹

Uso e ma tuafafine, o a tatou amioga e tatau ona atagia atu i mea ua tatou aoao mai ma aoao atu. E manaomia ona tatou faaali atu o tatou talitonuga e ala i le auala o loo tatou ola ai. O le faiaoga silisili lava o se tagata o faataitaiga lelei. O le aoao atu o se mea o loo tatou ola moni ai lava e mafai ona faia ai se eseesega i loto o i latou tatou te aoaoina. Afai tatou te mananao i tagata, pe o o tatou aiga pe leai, ia teumalu ma le olioli tusitusiga paia ma aoaoga a aposetolo ma perofeta soifua o o tatou aso i o latou loto, e manaomia ona latou vaaia o loo fiafia i ai o tatou agaga i na mea. E faapena foi, afai tatou te mananao ia latou iloa o Peresitene Russell M. Nelson o le perofeta, tagatavaai, ma talifaaaliga i o tatou aso, e manaomia ona latou vaai ia i tatou o sii o tatou lima e lagolago o ia ma iloa o loo tatou mulimuli i ana aoaoga musuia. E pei ona fai mai le muāgagana lauiloa a Amerika, “E leotele atu faatinoga i lo upu.”

Atonu o nisi o outou o loo fesili ifo ia te outou i lenei lava taimi, “Elder Soares, ua leva ona ou faia nei mea uma ma ou mulimuli i lenei faataitaiga e le gata o a’u lava ia ae faapea foi o se aiga, ae paga lea, o nisi o a’u uo po o ē pele ia te a’u ua faataumamao i latou lava mai le Alii. O le a se mea e tatau ona ou faia?” Mo outou o loo lagonaina i lenei lava taimi nei lagona o le faanoanoa, tiga, ma atonu o le salamo, faamolemole ia iloa e le o leiloloa atoa latou ona o loo silafia e le Alii le mea o loo i ai i latou ma o loo leoleo ia i latou. Manatua, o i latou foi o Ana fanau!

E faigata ona malamalama i mafuaaga uma pe aisea ua savavali ese ai nisi tagata i se isi ala. O le mea silisili e mafai ona tatou faia i nei tulaga o le alolofa atu pea i ai ma talia i latou, tatalo mo lo latou manuia, ma saili mo le fesoasoani a le Alii ia iloa po o le a le mea e fai ma ta’u atu. Ia olioli ma le faamaoni faatasi ma i latou i o latou tulaga manuia; avea ma a latou uo ma tagai mo mea lelei ia i latou. E lē tatau ona tatou fiu ia i latou ae ia faasaoina a tatou mafutaga. Aua ne’i teenaina pe faamasino atu ia i latou. Tau lava o le alofa atu ia i latou! Ua aoao i tatou e le faataoto o le atalii faamaumau oa e faapea a oo ina atamamai le fanau lava ia, e masani lava latou te mananao e o mai i le fale. Afai e tupu lena mea i ē pele ia te oe, ia faatumulia o outou loto i le agaalofa, taufetuli atu ia i latou, fusi mai i latou, ma sogi ia i latou, e pei ona faia e le tama o le atalii faamaumau oa.²⁰

Mea mulimuli, faaauau pea ona ola i se olaga agavaa, ia avea ma se faataitaiga lelei o mea ua e talitonu i ai, ma ia faalatalata atili atu i lo tatou Faaola o Iesu Keriso. Ua Ia silafia ma malamalama i o tatou faanoanoaga ma tiga matuitui, ma o le a Ia faamanuia i a outou taumafaiga ma le tuuto atu i o outou aiga pele afai e le o le olaga nei, o le olaga a sau. Ia manatua pea, uso e ma tuafafine, o le faamoemoe o se vaega taua o le fuafuaga o le talalelei.

I le gasologa o le tele o tausaga o auaunaga i le Ekalesia, ua ou vaai i tagata faatuatua o le ekalesia o ē o loo faaaogaina pea lava pea nei mataupu faavae i o latou olaga. O le tulaga lenei sa tupu i se tina nofotoatasi o lē o le a ou ta’ua o “Maria.” O le mea e faanoanoa ai, sa oo Maria i se tete’aga leaga. I lena taimi, sa iloa ai e Maria o ana faaiuga aupito sili ona taua e fesootai i lona aiga, o faaiuga faaleagaga. Pe o le tatalo, suesueina o tusitusiga paia, anapogi, ma le auai i le lotu ma le malumalu o le a faaauau pea ona taua ia te ia?

Sa faamaoni pea Maria, ma i lena taimi sili ona ogaoga i lona olaga, sa ia filifili ai e piimau pea i mea na ia iloa e moni. Sa ia maua le malosi i le “O Le Aiga: O Se Folafolaga i le Lalolagi,” lea e faatasi ma le tele o mataupu faavae matagofie, o loo aoao mai ai ua i ai i “matua se tiute paia e tausia a latou fanau i le alofa ma le amiotonu” ma ia aoao i latou ia tausia poloaiga a le Atua.²¹ Sa faaauau pea ona ia saili atu mo ni tali mai le Alii ma faasoa atu na tali i lana fanau e toafa i faatasiga uma a le aiga. Sa latou talanoaina soo le talalelei ma fefaasoaai o latou aafiaga ma molimau i le tasi ma le isi.

E ui i faanoanoaga na latou oo i ai, ae sa atiae e lana fanau se alofa mo le talalelei a Keriso ma se manao e auauna atu ma faasoa atu i isi. O le toatolu o i latou sa auauna atu ma le faamaoni i ni misiona faamamaluina, ma o le uii o loo auauna atu nei i Amerika i Saute. O lona afafine ulumatua, lea ou te masani lelei lava i ai, ua faaipoipo nei ma o loo malosi lona faatuatua, na faasoa mai e faapea, “Ou te le’i lagonaina lava sa tausi a’e matou e lo’u tina na o ia ona sa i ai i taimi uma le Alii i lo matou aiga. A o ia faasoa maia lana molimau e uiga ia te Ia, na amata ona matou liliu taitoatasi atu ia te Ia ma a matou lava fesili. Ou te matua faafetai na ia faia le talalelei ia ola i o matou olaga.”

Uso e ma tuafafine, sa mafai e lenei tina lelei ona faia lona aiga o se nofoaga autu o aoaoga faaleagaga. E talitutusa ma le fesili a le Aitiope, sa fesili ai Maria ia te ia lava i le tele o taimi, “E mafai faapefea ona aoao la’u fanau se’i vagana ua taiala e se tina i latou?”

A’u soa pele i le talalelei, ou te molimau atu ia te outou pe a tatou saili e aoaoina ma le naunautai, malosi, mausali, ma le faamaoni le talalelei a Iesu Keriso faatasi ma aoao atu i le tasi ma le isi ma se faamoemoega moni ma faia i le faatosinaga a le Agaga, e mafai e nei aoaoga ona liua loto ma musuia ai se manao ia ola e tusa ma upumoni a le Atua.

Ou te molimau atu o Iesu Keriso o le Faaola o le lalolagi. O Ia o le Togiola, ma o loo soifua o Ia. Ou te iloa o loo Ia taitaia Lana Ekalesia e ala i Ana perofeta, tagatavaai, ma talifaaaliga. Ou te molimau atu ia te outou o loo soifua le Atua, e alofa o Ia ia i tatou. E finagalo o Ia ia tatou toe foi atu i Lona afioaga—i tatou uma. E faafofoga mai o Ia i a tatou tatalo. Ou te molimau atu ai i nei upumoni i le suafa o Iesu Keriso, amene.