Saili le Malamalama e ala i le Agaga

Uso e ma tuafafine pele, ua ta’u soo mai e le Alii ia i tatou ia “saili i le aoao e faapea foi i le suesue ma le faatuatua.”¹ E mafai ona tatou maua le malamalama ma le malamalamaaga e le gata i manatu talafeagai o o tatou mafaufau, ae faapea foi i le taitaiga ma musumusuga a le Agaga Paia.

O lenei punavai faaopoopo o le malamalama e le’i avea i taimi uma ma se vaega o lo’u olaga.

Sa ma auai ma lo’u toalua pele, o Irene i le Ekalesia i le 31 tausaga ua mavae ina ua faato’a ma faaipoipo lava. Sa ma ola a’e uma i Kolomupia, ae i nai masina talu ona uma le ma faaipoipoga, ae ma malaga ma nonofo i Siamani ona o la’u galuega. Sa ma laiti lava ma sa i ai ni faamoemoega ma ni tulimataiga sili; o se taimi matuai faagaeetia ma fiafia mo i ma’ua.

Ata

Sister ma Elder Held

A o o’u taulai atu i la’u galuega, na lagona e Irene o le a ma mauaina se ituaiga o savali mai le lagi, e aunoa ma le iloaina pe faapefea po o afea. O lea, sa ia faatagaina ai i totonu o le ma fale soo se tagata faatau oloa o i ai ni tusi o faamatalaga i soo se autu [encyclopedias], masini mitipefu, tusikuka, masini mo le umukuka, ma isi mea faapena, ma faatalitali ai pea mo lena savali uiga ese.

I se tasi afiafi sa ia ta’u mai ai ia te a’u e toalua ni alii talavou i ni suti paauli na tu’itu’i i le ma faitotoa ma sa ia lagona se uunaiga matuai manino ma tulagaese e faataga i la’ua i totonu. Sa la fai mai la te fia talanoa ia te ia e uiga i le Atua ae e toe o mai pe a ou i ai foi i le fale. Pe le o le savali faamoemoeina ea lenei?

Sa amata ona la asiasi mai ia i ma’ua, faatasi ai ma le la taitaiga, sa ma faitau i tusitusiga paia ma oo ai ina malamalama i le taua tele o Iesu Keriso o lo tatou Faaola ma Togiola. Sa le’i pine ae ma salamo ona sa ma papatiso o ni pepe laiti, lea sa le’i avea o se feagaiga na malamalama i ai. Peitai, o le toe papatisoina o lona uiga foi o le avea ma ni tagata o lenei Ekalesia fou, o lea la e tatau ona ma matuai malamalama muamua i mea uma e faatatau i ai.

Ae e faapefea la ona ma iloa pe o mea o loo ta’u mai ia i ma’ua e faifeautalai e uiga i le Tusi a Mamona, Iosefa Samita, ma e uiga i le ata o le faaolataga e moni uma lava? Ia, sa ma malamalama mai afioga a le Alii e mafai ona ma “iloa i latou i o latou fua.”² O lea la, i se faiga na matua faatulagaina lelei, na amata ai ona ma suesueina le Ekalesia e ala i le sailia o na fua i mata o o ma’ua mafaufau manino. O le a le mea sa ma vaaia? Ia, sa ma vaaia:

• Tagata faauo ma fiafia ma aiga matagofie o ē na malamalama e tatau ona tatou lagona le olioli i lenei olaga ae le na o le mafatia ma le faanoanoa.

• O se lotu e leai se faifeau e totogia ae o se lotu e taliaina e tagata o le ekalesia o latou tofiga ma tiutetauave.

• O se lotu e totonugalemu mea uma ia Iesu Keriso ma aiga, lea e anapopogi ai e faatasi i le masina le tagata ma foai atu e fesoasoani i ē matitiva ma lē tagolima, le nofoaga e faalauiloa ai mausa faalesoifua malololoina, aoaoina i tatou ia aloese mai fualaau ma vailaau faasaina.

E le gata i lea:

• Na ma fiafia i le faamamafaina o le tuputupu ae faaletagata lava ia, i a’oga, galue malosi ma le ola-tutoatasi.

• Sa ma aoao e uiga i le polokalama ofoofogia o fesoasoaniga alofa.

• Ma sa faagaeetia i ma’ua e ala i konafesi aoao ma musika matagofie atoa ai ma matupu faavae faaleagaga loloto o loo faasoa mai ai iina.

O le vaaia o nei mea uma, na lē mafai ai ona ma maua se mea sese i le Ekalesia. I le isi itu, sa ma fiafia tele i mea uma sa ma vaaia. Peitai, sa lē mafai lava ona ma filifili ia papatiso ona sa ma mananao ia iloa mea uma ae ma te le’i [papatiso].

Ae, e ui i le ma lē mautonu, sa saunia ma le onosai i ma’ua e le Alii, na Ia mamanuina i ma’ua, ma sa Ia fesoasoani ia i ma’ua ia iloa e tatau ona ma aoao ia iloatino le upumoni e le gata i o ma mafaufau manino ae e ala foi i le leo filemu ma le itiiti o le Agaga, lea e talanoa faapitoa mai i o tatou loto.

Na oo mai lena leo ma le taunuuga o lagona i se tasi afiafi ina ua mavae le 10 masina o le aoaoina o le talalelei, ina ua ma faitau i le Mosaea 18: “Ona ua outou mananao e … tauave avega a le tasi, … ma faamafanafana atu ia te i latou o e e manaomia le faamafanafanaga, … afai o le manao lea o o outou loto, se a se mea tou te tetee ai i le papatisoina i le suafa o le Alii?”³

Na ulufia e lena fuaitau mai le Tusi a Mamona o ma’ua loto ma agaga, ma sa faafuasei lava ona ma lagonaina ma iloaina e leai lava se mafuaaga o le a lē papatiso ai. Sa ma iloaina o manaoga na ta’ua i nei mau o moomooga foi na o ō ma’ua loto ma na matuā taua lava na mea. E i ai mea e sili ona taua nai lo le malamalama i mea uma aua ua lava mea ua uma ona ma iloaina. Sa ma faalagolago lava i le aao taiala o se Tama Faalelagi alofa ma sa mautinoa ai o le a faaauau pea ona Ia taialaina i ma’ua.

I lena lava aso, sa ma setiina ai se aso mo lo ma papatisoga, ma sa le’i pine ae ma papatiso, ua taunuu lava!

Ata

O le papatisoga a Elder ma Sister Held

O le a se mea na ma aoaoina mai lena aafiaga?

Muamua, sa ma aoaoina e mafai ona ma faalagolago atoatoa atu i se Tama Faalelagi alofa, o lē o loo taumafai pea e fesoasoani ia i tatou e avea ma tagata ua Ia silafia e mafai ona tatou avea ai. Sa ma faamaoniaina le moni a’ia’i o Ana afioga ina ua Ia fetalai atu: “Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o; ma e manuia lava i latou o e e faalogologo i a’u mataupu, … ona o le a latou aoaoina le poto; ona o ia o lē na te taliaina o le a Ou tuu atu atili i ai.”⁴

Ma le lona lua, na ma aoaoina faapea, e le gata i o tatou mafaufau manino, o le isi vaega i le mauaina o le malamalama e mafai ona tuu maia ia i tatou le taitaiga ma le malamalamaaga. O le leo filemu ma le itiiti lea o Lona Agaga Paia o loo talanoa mai i o tatou loto faapea foi i o tatou mafaufau.

Ou te fia faatusatusaina lenei mataupu faavae i lo tatou gafatia e vaai ai. Ua tuuina mai ia i tatou e lo tatou Tama o i le Lagi e le na o le tasi, ae lua ni mata faaletino. E mafai ona tatou vaai lelei lava i le na o le tasi le mata, ae o le mata lona lua ua tuuina mai ia i tatou se isi vaaiga. A tuufaatasia vaaiga uma e lua i o tatou faiai, la te gaosiaina se ata e tolu itu o lo tatou siosiomaga.

E faapena foi, ua tuuina mai ia i tatou ni punavai se lua o faamatalaga, e ala mai i o tatou gafatia faaletino ma faaleagaga. E gaosia e lo tatou mafaufau le tasi o vaaiga e ala atu i o tatou lagona faaletino ma e ala atu i lo tatou mafaufau manino. Ae e ala atu i le meaalofa o le Agaga Paia, ua saunia ai foi e le Tama mo i tatou se vaaiga lona lua, o se mea lea e sili ona taua ma moni, aua e sau sa’o lava mai ia te Ia. Ae, talu ai o musumusuga a le Agaga e masani ona matua maaleale, e toatele tagata e le o nofouta ma le iloa lena punaoa faaopoopo.

A tuufaatasia nei vaaiga e lua i o tatou agaga, e faaali mai e se ata atoa e tasi le moni o mea e pei ona i ai moni lava. O le mea moni, e ala mai i le vaaiga faaopoopo a le Agaga Paia, o “mea moni,” faapitoa, e pei ona atagia tonu mai e ala i lo tatou malamalamaaga faalemafaufau, e mafai ona faaalia mai o se taufaasese po se measese lava ia. Ia manatua upu a Moronae: “O le mana o le Agaga Paia e mafai ona outou iloa ai le moni o mea uma lava.”⁵

I le 31 tausaga o lo’u avea ai ma se tagata o le Ekalesia, ua ou iloa i le tele o taimi afai e na o lo tatou mafaufau manino tatou te faalagolago i ai ma faafitia pe tuulafoaiina le malamalamaaga faaleagaga e mafai ona tatou maua e ala i musumusuga a le Agaga Paia, e pei lava la o tatou ola i le olaga i le na o le tasi o le mata. Ae, i se uiga faafaatusa, ua uma ona tuuina mai ia i tatou ni mata se lua. Ua na o le tuufaatasiga o vaaiga uma e lua e mafai ai ona tuuina mai ia i tatou le ata moni ma le ata atoa o mea moni uma ua tatou lagonaina i o tatou olaga, faapea foi ma le malamalama atoatoa ma le loloto i lo tatou faasinomaga ma le faamoemoega o ni fanau a se Tama Faalelagi soifua.

Ua faamanatu mai ia te a’u mea na aoao ai i tatou e Peresitene Nelson i le tausaga ua mavae ina ua ia saunoa mai faapea, “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”⁶

Ua ou iloa ma le mautinoa a’ia’i e faapea:

• E i ai so tatou Tama o i le Lagi alofa, ma ua tatou ioe uma e o mai i lenei lalolagi o se vaega o se fuafuaga faalelagi.

• O Iesu o le Keriso, o loo soifua o Ia ma o lo’u Faaola ma le Togiola.

• Ou te iloa o Iosefa, o se tama faifaatoaga lotomaualalo, sa valaauina ma avea ma perofeta maoae lea na amataina lenei tisipenisione o le atoaga o taimi, faatasi ai ma ki uma, mana, ma le pule o le perisitua paia a le Atua.

• Ou te iloa o le Tusi a Mamona o se molimau lona lua ia Iesu Keriso ma o aiga e tatau ona tumau faatasi e faavavau.

• Ma ou te iloa o lo tatou Alii, o Iesu Keriso, o loo taitaia lenei ekalesia, Lana Ekalesia toefuataiina, e ala atu i lo tatou perofeta soifua, o Peresitene Russell M. Nelson, i le asō.

O upumoni taua nei ma le tele o isi ua avea ma mataupu faavae ua atiae ai lo’u faaleagaga o loo fesoasoani mai ai le Atua ia ou avea ai. Ma ou te tulimatai atu i le tele o aoaoga fou o loo finagalo pea o Ia mo a’u—ma oe—ia mauaina a o tatou ola ai i lenei olaga matagofie ma “aoao … e ala lava i le suesue ma le faatuatua foi.”

Ou te iloa e moni nei mea uma ma molimau atu ai i le suafa o Iesu Keriso, amene.