O Tali i Tatalo

O se aoaoga faavae taua ma toafimalie o le talalelei a Iesu Keriso e faapea, o loo i ai i lo tatou Tama Faalelagi se alofa atoatoa mo Lana fanau. Ona o lena alofa atoatoa, e le gata ua Ia faamanuiaina i tatou e tusa ma o tatou manao ma mea e manaomia ae e tusa foi ma Lona atamai e lē mafuatia. E pei ona ta’ua manino e le perofeta o Nifae, “Ua ou iloa e alofa [le Atua] i ana fanau.”¹

O se tasi o vaega o lena alofa atoatoa o le aofia ai o lo tatou Tama Faalelagi i auiliiliga o o tatou olaga, e tusa lava pe tatou te lē iloaina pe malamalama i ai. Tatou te sailia le taitaiga faalelagi ma le fesoasoani a le Tama e ala i le tatalo faatauanau ma le faamaoni. A tatou faamamaluina a tatou feagaiga ma taumafai ia avea atili e faapei o lo tatou Faaola, ua tatou agavaa i se gasologa faifai pea² o taitaiga faalelagi e ala i faatosinaga ma musumusuga a le Agaga Paia.

Ua aoao mai i tatou e tusitusiga paia: “Auā ua silafia e lo outou Tamā mea ua outou matitiva ai, a o lei ole atu outou ia te ia,”³ ma ua Ia “silafia mea uma, aua ua i luma o [Ona fofoga] mea uma.”⁴

O le perofeta o Mamona o se faataitaiga o lenei mea. Sa le’i ola o ia e vaai i taunuuga o ana galuega. Ae sa ia malamalama sa taitai ma le faaeteete o ia e le Alii. Ina ua musuia o ia e faaaofia papatusi laiti a Nifae i ana faamaumauga, na tusia e Mamona: “Ma ua ou faia lenei mea mo se faamoemoega poto, ona ua faapea ona musuia ai o aʼu, e tusa ma galuega a le Agaga o le Alii ua ia te aʼu. Ma o lenei, ou te le iloa mea uma; ae ua silafia e le Alii mea uma e oo mai; o le mea lea, ua galue ai o ia ia te aʼu ia ou faia e tusa ai ma lona finagalo.”⁵ E ui lava sa le’i iloa e Mamona le leiloloa ai o itulau e 116 o tusitusiga, na silafia e le Alii ma na saunia se ala e foia ai a o le’i taitai ona tupu.

E silafia e le Tama i tatou, silafia o tatou manaoga, ma o le a fesoasoani atoatoa mai ia i tatou. O nisi taimi e tuuina mai lena fesoasoani i le taimi lava lena po o se taimi vave pe a maea ona tatou ōle atu mo le fesoasoani faalelagi. O nisi taimi o o tatou manaoga faamaoni ma agavaa e lē taliina mai i le auala tatou te faamoemoe i ai, ae tatou te iloa e i ai faamanuiaga silisili a le Atua ua faapolopoloina. Ma o nisi taimi, o a tatou manaoga amiotonu e lē tuuina maia i lenei olaga. O le a ou faaali atu ni tala eseese se tolu o auala e mafai ona tali mai ai lo tatou Tama i le Lagi i a tatou aioiga faamaoni ia te Ia.

Na valaauina lo ma atalii uii e auauna atu o se faifeautalai i le Misiona a Pale i Farani. I tapenaga ina ia auauna atu, sa matou o ma ia e faatau mea masani, o ofutino, suti, fusiua, totini, ma se peleue. Ae paga lea, o le peleue sa ia manao ai sa le’i maua ai le telē na ia manaomia. Peitai, sa ta’u mai e le tagata faigaluega o le faleoloa o le a maua le peleue i ni nai vaiaso ma o le a tiliva atu i nofoaga autu e aoao ai faifeautalai i Provo a o le’i malaga atu lo’u atalii mo Farani. Sa matou totogia le peleue ma lē toe mafaufau i ai.

Na ulufale lo ma atalii i le nofoaga autu e aoao ai faifeautalai ia Iuni, ma na tilivaina atu le peleue i nai aso a o le’i oo i lona taimi faatulagaina e malaga ai ia Aokuso. Na te le’i faataitaia le peleue ae na teu faatopetope i totonu o lana ato faatasi ma ana lavalava ma isi aitema.

Ina ua oo mai le taumalulu i Pale, lea sa auauna atu ai lo ma atalii, na ia tusi mai ia i maua sa ia toso maia i fafo le peleue, faamaulu, ma iloa ai e laitiiti tele. O lea sa ao ai ona ma teuina se isi tupe i lana teugatupe i le faletupe ina ia mafai ona ia faatauina se isi peleue i Pale, lea sa ia faia. Faatasi ai ma sina lē fiafia, sa ou tusi atu ia te ia ma fai i ai e foai ese le peleue talu ai e le mafai ona ia faaaogaina.

Na ma maua mulimuli ane le imeli lenei mai ia te ia: “E matuā, malūlū lava iinei. … O le matagi e foliga mai e sau sa’o i totonu o i matou, e ui o lo’u peleue fou e maoae ma fai sina mamafa. … Na ou tuuina atu la’u [peleue] tuai i [se isi faifeautalai i la matou falemautotogi] o lē sa fai mai sa ia tatalo mo se auala e maua ai se peleue lelei atu. O ia o se tagata liliu mai i nai tausaga ma e na o lona tina … ma le faifeautalai na papatisoina o ia o loo lagolagoina o ia i lana misiona ma o le peleue o se tali lea i se tatalo, o lea na ou matuai fiafia ai.”⁶

Na silafia e le Tama Faalelagi o lenei faifeautalai, sa auauna atu i Farani i le 6,200 maila (10,000 kilomita) le mamao mai le aiga o le a manaomia vave se peleue fou mo se taumalulu i Pale ae na leai se tupe i lenei faifeautalai e faatau ai se [peleue]. Na silafia foi e le Tama Faalelagi o le a maua e lo ma atalii mai le faleoloa lavalava i Provo, se peleue o le a matuā laitiiti lava. Na Ia silafia o le a auauna faatasi nei faifeautalai e toalua i Pale ma o le peleue o le a avea ma tali i le tatalo lotomaualalo ma faamaoni a se faifeautalai lea sa i ai se manaoga vave.

Sa aoao mai le Faaola:

“E le faitaulia [ea] ni manu iti se lua i le asari? e leai foi so laua e pa’ū i le eleele e aunoa ma lo outou Tama.

“A o outou lauulu lava ua faitaulia uma ia.

“O lea aua tou te matatau ai; e sili outou i manu iti e tele.”⁷

I isi tulaga, pe a le tuuina mai o tatou manaoga agavaa i le auala na tatou faamoemoe i ai, atonu o le mea moni e mo lo tatou lelei silisili. Mo se faataitaiga, o Iosefa le atalii o Iakopo sa lotoleagaina ma itagia e ona uso ma oo ai ina latou fuafuaina le fasiotiga o Iosefa. Ae, sa latou faatauina atu o ia o se pologa i Aikupito.⁸ Afai e i ai se tagata na lagonaina sa le’i taliina ana tatalo i le auala na ia faamoemoe i ai, masalo o Iosefa. O le mea moni, o le lē manuia na ia oo i ai na tupu mai ai ni faamanuiaga maoae ia te ia ma faasaoina ai lona aiga mai le matelāina. Mulimuli ane, ina ua avea o ia ma se taitai faatuatuaina i Aikupito, ma le faatuatua tele ma le poto na ia fai atu ai i ona uso:

“O lenei, aua ne’i tiga outou, pe fai ma mea leaga i o outou manatu ina ua outou faatau mai ia te a’u i le mea nei; auā na auina mai a’u e le Atua e muamua ia te outou e fai ma faaola.

“Aua o ia tausaga e lua ua i ai le oge i le nuu, o loo totoe foi tausaga e lima e le i ai se galuega i le suasolo po o se seleselegasaito.

“Na auina mai foi a’u e le Atua e muamua ia te outou e faasaoina outou i le lalolagi, e faaola foi ia te outou i le faaolataga tele.

“O lenei, e le o outou na auina mai a’u iinei, a o le Atua.”⁹

A o i ai i le kolisi, sa faigaluega lo ma atalii ulumatua i se galuega faavaitaimi manaia a tamaiti aoga lea na faamoemoe e taitai atu i se galuega tumau matagofie pe a maea le faauuga. Na ia galue malosi i lenei galuega a tamaiti aoga mo le fa tausaga, na maualuga le agavaa, ma sa faaaloalogia tele e ana tagata faigaluega ma supavaisa. I le faaiuga o lana tausaga faaiu, e pei ona fuafuaina mai le lagi (o le manatu lea a lo ma atalii), na tatala ai le avanoa tumau ma o ia, ma o ia o le sui ta’imua, e moni lava, faatasi ai ma faailoga uma ma faamoemoega, o le a ia mauaina le galuega.

Ia, sa le’i maua e ia. E leai se isi o i matou na malamalama ai. Sa lelei lana tapenaga, lelei le faatalanoaga, o ia le sui sili ona agavaa, ma sa tatalo ma le faamoemoe tele ma le talitonuga! Sa matuā lofituina ma olopalaina, ma o le mea atoa na tupu matou te le’i malamalama ai. Aisea na tuulafoai ai e le Atua o ia i lona manaoga amiotonu?

Sa le’i iloa seia oo i ni nai tausaga mulimuli ane lea na matua manino mai ai le tali. A na faapea na te mauaina le galuega na moemiti i ai i le maea ai o le faauuga, semanu na te misia se avanoa taua tele na suia ai le olaga lea ua faamaonia nei ua avea ma ona manuia e faavavau. Na silafia e le Atua le faaiuga mai le amataga (e pei ona Ia silafia i taimi uma), ma i lenei tulaga, o le tali i le tele o tatalo amiotonu o le leai, ina ia maua se taunuuga silisili atu.

Ma o nisi taimi, o le tali i tatalo tatou te sailia ma le amiotonu, naunautai, ma le faamaoni e le tuuina mai i lenei olaga.

Sa fanau mai Sister Patricia Parkinson o lelei lana vaai, ae i le fitu o tausaga sa amata ai ona tauaso o ia. I le iva o tausaga, na amata auai ai Pat i Aoga i Iuta mo le au Logonoa ma Tauaso i Ogden, Iuta, 90 maila (145 km) mai lona aiga, lea na ao ai ona ia nofotumau i le a’oga—lea sa aofia ai ia ma’i manatu uma e mafai ona lagona e se iva tausaga le matua.

E oo atu i le 11 tausaga, ua le toe mafai atoa ona vaai. Na toefoi Pat i le aiga i le 15 o tausaga e auai i lana a’oga maualuga i le lotoifale. Sa alu i le kolisi ma faauu ma se faailoga maualalo i faaletonu o fesootaiga ma faalemafaufau, ma i le maea ai o se tauiviga lototoa e faasaga i taitai masalosalo o le ofisa a le iunivesite, sa ia ulufale atu ai i le aoga faauu ma faamaea se tikeri matuaofaiva i suesuega o faafitauli o gagana tautala. O loo galue nei Pat ma tamaiti aoga e 53 o le aoga tulaga lua ma vaavaaia ni tagata faatekinolosi se toafa o gagana tautala i lana aoga i le itumalo. E i ai lana ia lava fale ma lana ia lava taavale, lea e aveina e uo ma tagata o le aiga pe a manaomia e Pat ona malaga i se mea.

I le 10 o tausaga, na fuafuaina e maua e Pat se isi togafitiga faafomai e taulimaina ai lana vaai ua faaitiitia. Sa ta’u atu lava e ona matua ia te ia mea tonu o le a tupu e tusa ai ma ana togafitiga faafomai, ae mo ni mafuaaga, la te le’i tauina atu ia te ia e uiga i lenei faagasologa faapitoa. Ina ua ta’u atu e ona matua ia te ia ua uma ona faatulagaina le faagasologa, fai mai lona tina, “sa lē fiafia” Pat. Na tamoe atu Pat i le isi potu ae na toefoi mai mulimuli ane ma fai mai i ona matua faatasi ma sina ita, “Se’i o’u ta’u atu ia te oulua. Ou te iloa, e silafia e le Atua, e ao foi la ona oulua iloa. O le a ou tauaso i lo’u olaga atoa!”

I nai tausaga talu ai, na malaga ai Pat i Kalefonia e asiasi i aiga o ē na aumau ai iina. A o i ai i fafo ma le atalii o lona tuagane e tolu tausaga, sa ia fai atu ia te ia, “Aunt Pat, aisea e te le fai atu ai i le Tama Faalelagi e avatu ia te oe ni mata fou? Auā a e fai atu i le Tama Faalelagi, o le a Ia avatu ia te oe soo se mea e te manao ai. Tau lava o lou fai atu ia te Ia.”

Na fai mai Pat sa faate’ia o ia i le fesili ae sa tali atu, “Ia, o nisi taimi e le galue le Tama Faalelagi faapena. O nisi taimi e manaomia e Ia ona e aoao se mea, o lea e Na te lē tuu atu ai ia te oe mea uma e te manao ai. O nisi taimi e tatau ona e faatalitali. E sili atu le silafia e le Tama Faalelagi ma le Faaola o mea e lelei mo i tatou ma mea tatou te manaomia. O le mea lea, La te le tuuina maia ia te oe mea uma e te manao ai i le taimi e te manao ai.”

Ua ou iloa Pat mo le tele o tausaga ma sa ta’u atu ia te ia talu ai nei ou te faamemelo i le mea moni faapea, e lelei ma fiafia o ia i taimi uma lava. Sa ia tali mai, “Ia, e te le’i i ai i le fale faatasi ma a’u, a ea? E i ai a’u lava taimi faapitoa. Na ou matua tauivi ma faanoanoaga, sa tele na ou tagi.” Peitai, sa ia faaopoopo mai, “Mai le taimi na amata ai ona ou le iloa se mea, sa ‘ese lava, ae sa ou iloa sa faatasi mai le Tama Faalelagi ma le Faaola i lo’u aiga ma a’u. Sa matou taulimaina i le ala sili na matou mafaia, ma i lo’u manatu, na matou taulimaina i le auala sa’o. Ua i’u lava ina avea a’u ma se tagata faamanuiaina, ma ua masani lava o a’u o se tagata fiafia. Ou te manatua le i ai o Lona aao i mea uma. Ia i latou o ē fesili mai pe ou te ita ona ua ou tauaso, ou te tali atu: “O ai ou te ita i ai? O loo i ai le Tama Faalelagi faatasi ma a’u i lenei malaga; e lē o tuua na o a’u. O loo faatasi o Ia ma a’u i taimi uma.’”

I lenei tulaga, o le manao o Pat ina ia toe vaai e lē tuuina mai i lenei olaga. Ae o lana mau tauave, na aoaoina mai i lona tama, o le “E mavae atu foi lenei mea.”¹⁰

Na ta’ua e Peresitene Henry B. Eyring, “Ua silafia e le Tama i lenei lava taimi outou, o o outou lagona, faatasi ai ma manaoga faaleagaga ma faaletino o tagata uma o siomiaina outou.”¹¹ E mafai ona maua lenei upumoni maoae ma toafimalie i aafiaga e tolu na ou ta’ua.

Uso e ma tuafafine, o nisi taimi e vave ona tali mai a tatou tatalo faatasi ai ma le taunuuga na tatou faamoemoe i ai. O nisi taimi, e lē tali mai a tatou tatalo i le auala na tatou faamoemoe i ai, ae i le gasologa o taimi tatou te aoao ai o loo i ai faamanuiaga silisili a le Atua ua saunia mo i tatou nai lo mea na tatou muai faamoemoeina. Ma o nisi taimi o a tatou aioiga amiotonu i le Atua o le a lē tuuina mai i lenei olaga.¹² E pei ona saunoa mai Elder Neal A. Maxwell, “O le faatuatua foi e aofia ai le faalagolago i le taimi a le Atua.”¹³

Ua ia i tatou le faamautinoaga e faapea o Lana lava ala ma i Lana lava taimi, o le a faamanuia mai i tatou e le Tama Faalelagi ma foia o tatou popolega uma, faailoga tagata, ma ni lē fiafia.

Na faapea mai le Tupu o Peniamina: “Ma e lē gata i lea, ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata. E, ia manatua, ia manatua lava ua moni nei mea; ona ua fetalai mai ai le Alii le Atua.”¹⁴

Ou te iloa e faafofoga mai le Atua i a tatou tatalo.¹⁵ Ou te iloa i le avea ai o se Tama alofa e silafia mea uma, e tali atoatoa mai o Ia i a tatou tatalo, e tusa ai ma Lona atamai e lē mafuatia, ma i auala o le a avea ai ma o tatou manuia silisili ma faamanuiaga. Ou te molimau atu ai i le suafa o Iesu Keriso, amene.