Lagonaina o Lona Siufofoga
I se lalolagi ma le tele naua o leo faatautavā, ua faia e lo tatou Tama Faalelagi ina ia mafai e i tatou ona lagonaina ma mulimuli i Lona [siufofoga].
I le taeao po ananei le taeao, na tuu atu ai e le tuagane o lo’u toalua ia te ia se tusi sa ia tusia i lona tina i le tele o tausaga ua mavae. I lena taimi, o Sister Homer sa na o se teineitiiti laitiiti. I se vaega, o lana tusi e faitauina, “Tina Pele, ou te faamalie atu ou te le’i faasoaina atu la’u molimau i le asō—ae ou te alofa ia te oe.” A o matou o atu mo le taumafataga o le aoauli, sa ou manatu e manaia lena mea. O lea sa ou nofo ai i lalo, ma sa ou tusia se tusi e faapea, “Peresitene Nelson pele, ou te faamalie atu ou te le’i tuuina atua la’u lauga i le asō—ae ou te alofa ia te oe.” Ae i se itu, e le’i sa’o le lagona i lena mea. O lea la ua tatou i ai iinei, ma ua ou fiafia e faaopoopo atu a’u upu i [na saunoaga] ua fofogaina i lenei sauniga i le asō.
I le tele o tausaga ua mavae, sa ou malaga ai i se tama’i vaalele na faafoeina e se pailate faatoa maua se laisene. I le faaiuga o le matou faigamalaga, sa kilia mai i matou e tulaueleele. Ae ina ua matou latalata atu i le laueleele, sa ou faalogoina se faailo i le potu o le avevaalele o lapataia le pailate e “alu i luga.” Na tepa atu le pailate i le pailate fesoasoani atamai atu, lea na faasino atu i le itu i lalo, na mamao ese mai le auala o le vaalele, ma fai atu, “Ia!”
Na vave ona me’i le matou vaalele i le itu agavale ma lalo, ona toe masagi lea i luga i se maualuga talafeagai, toe foi i le mamanu e tulaueleele ai, ma taunuu saogalemu ai i lo matou nofoaga faamoemoeina. Sa matou iloa mulimuli ane sa i ai se isi vaalele na kilia e lele ese atu. Pe ana matou mulimuli i faatonuga o le faailo, semanu matou te lele sa’o lava i ai, nai lo lele ese, mai le vaalele o loo sau. O lenei aafiaga na aoao ai a’u i ni lesona taua se lua: Muamua, i taimi sili ona taua i o tatou olaga, o le a tatou faalogoina ai ni leo se tele o faatautavā mo lo tatou gauaiga. Ma le lona lua, e taua lo tatou faalogo i leo sa’o.
Leo Faatautavā
O loo tatou ola i se lalolagi e tele leo o loo sailia lo tatou gauaiga. Faatasi ai ma talafou uma i mea o loo tutupu i le taimi nei, tuiti, poloka, podcasts, ma fautuaga faatauanau mai Alexa, Siri, ma isi, ua faigata ai ona tatou iloa po o fea leo e faatuatuaina. O nisi taimi tatou te fesili mo ni manatu taiala i o tatou olaga, ma le manatu o le a aumaia e le toatele ni punavai sili ona lelei o mea moni. O nisi taimi tatou te “faaletonu i manatu e lua,”1 filifili “e le malulu pe vevela.”2 O nisi lava taimi tatou te mulimuli i mea e faigofie, taulai atu i se leo e tasi po o se mataupu e taitaia i tatou, po o le faalagolago atoa atu i lou lava tomai e mafaufau ai
E ui e ono aoga nei auala taitasi, ae o loo aoao mai e aafiaga e le faatuatuaina na mea i taimi uma. E le faapea o mea e tautaua o mea sili ia i taimi uma. O le faaletonu i ni manatu se lua e le aumaia se taitaiga. O le faigofie e seasea ona taitai atu i ni mea e taua. O le taulai atu i se leo e tasi po o se mataupu e mafai ona faalelei ai lo tatou tomai e iloa ai. Ma o le faalagolago atoatoa atu i lo tatou lava mafaufau e mafai ona taitai atu ai i tatou ia faalagolago i o tatou lava mafaufauga papa. Afai tatou te le faaeteete, e mafai e leo sese ona tosoesea i tatou mai le totonugalemu o le talalelei i nofoaga e faigata ai ona faatumauina le faatuatua, ma tatou maua ai sina mea e sili teisi lava ma le tuugaogaoina, lototiga, ma le le faamalieina.
Faalogo i le Leo Sese
Se’i o’u faataitaia atua le uiga o la’u tala i le faaaogaina o se tala faatusa ma se faataitaiga faatusitusiga paia. E masani ona faasino atu tagata a’e mauga i mea maualuluga i luga atu o le 8,000 mita o se “sone o le oti” aua, i na maualuga, e le lava le okesene e lagolago ai le ola. E i ai se tulaga tutusa faaleagaga i le sone o le oti. Afai tatou te faaaluina tele se taimi i ni nofoaga e le maua ai le faatuatua, o le a aveesea mai ia i tatou e leo e foliga mai e lelei le okesene faaleagaga tatou te manaomia.
I le Tusi a Mamona, ua tatou faitau i ai ia Korioa, o le sa i ai sea ituaiga aafiaga. Sa fiafia o ia i le lauiloa tele ona o ana aoaoga sa “logolelei [i le] mafaufau faaletino.”3 Fai mai o ia sa aoao e mātua ma perofeta uputuu valea ua mamanuina e faaitiitia ai le saolotoga ma faaauau ai le le iloa o se mea.4 Sa ia finau e tatau i tagata ona saoloto e faia soo se mea latou te filifili e fai aua o poloaiga ua na o ni tapu ua faigofie ona fuafuaina.5 Ia te ia, o le talitonuga i le Togiola a Iesu Keriso o le “fua lea o se mafaufau valea,” na fatuina e se talitonuga i se tagata e le mafai ona tino mai ona e le mafai ona vaaia o Ia.6
Na fatuina e Korioa le tele o vevesi lea na aumai ai o ia i luma o le faamasino sili ma le faitaulaga sili. O iina, sa ia tulai atu ai “i upu leotetele,” ma faitioina taitai ma manao i se faailoga. Na tuuina atu se faailoga. Sa taia o ia ina ia le mafai ona toe tautala. Ona iloa lea e Korioa sa faaseseina o ia, ma mafaufau ai i upumoni taua ia sa ia tuulafoaia, sa ia auē ai, “Sa ou iloa i taimi uma lava.”7
Ona aisi solo lea o Korioa mo se meaai seia oo ina solia o ia ma oti ai e se vaega o sa Sorama.8 O le fuaiupu mulimuli i lana tala o loo i ai lenei manatunatuga manino: “Ma ua faapea ona tatou vaai ai e le lagolagoina e le tiapolo ana fanau i le aso o gataaga, ae vave ona ia toso i lalo i latou i seoli.”9
O Le Leo Sa’o
Talu ai e finagalo lo tatou Tama Faalelagi i mea sili ona lelei mo i tatou, ua Ia faia ai ina ia mafai ona tatou lagona Lona siufofoga. O le tele o taimi, tatou te lagona o Ia e ala i uunaiga e tuuina mai e le Agaga Paia. O le Agaga Paia o le tagata lona tolu o le Aiga Atua. E molimau mai o Ia i le Tama ma le Alo,10 na auina mai e “aoao [i tatou] i mea uma,”11 ma o le a “faaali mai ia te [i tatou] mea uma e tatau ona [tatou] faia.”12
E talanoa le Agaga i tagata eseese i auala eseese, ma e atonu Na te talanoa i le tagata lava e tasi i ni auala eseese i taimi eseese. O se taunuuga, o le aoaoina o auala e tele e talanoa mai ai o Ia ia i tatou o se sailiga lea o le olaga atoa. O nisi taimi, e fetalai mai o Ia i o tatou “mafaufau ma [o tatou] loto”13 i se leo itiiti, ae mamana, ma e āti “i le totonugalemu o i latou o e na faalogo i ai.”14 O nisi taimi, i Ana uunaiga o “i ai …[i o tatou] mafaufau” pe “uunai … i [o tatou] lagona.”15 O nisi taimi, o le a “mu i totonu [o o tatou loto].”16 O nisi lava taimi, Na te faatumulia o tatou agaga i le olioli, faamalamalamaina o tatou mafaufau,17 pe talanoa mai e uiga i le filemu i o tatou loto mafatia.18
Mauaina o Lona Siufofoga
O le a tatou mauaina le siufofoga o lo tatou Tama i le tele o nofoaga. O le a tatou mauaina pe a tatou tatalo, pe a tatou suesue i tusitusiga paia, ma pe a tatou auai i le lotu, gauai atu i talanoaga faamaoni, po o le alu i le malumalu. E mautinoa lava, o le a tatou mauaina i le konafesi i le faaiuga o lenei vaiaso.
O le asō na tatou lagolagoina ai ni tamalii e toa 15 o ni perofeta, tagatavaai, ma talifaaaliga. O o latou tulaga faaleagaga ma aafiaga e tuuina atu ai ia i latou se vaaiga tulagaese lea tatou te matuai manaomia tele. O a latou savali e faigofie le mauaina ma talanoaina ma le manino atoatoa. Latou te ta’u mai ia i tatou mea e finagalo le Atua ia tatou iloa, pe e lauiloa pe leai.19
O le sailia o Lona siufufoga i se nofoaga se tasi o nei nofoaga, e lelei, ae o le sailia i le tele o na [nofoaga], e sili atu ona lelei. Ma pe a tatou lagonaina, e manaomia ona tatou mulimuli i le faatonuga o loo tuuina mai. Fai mai le Aposetolo o Iakopo, “Ia fai outou ma e anaana i le upu, a e aua le na ona faalogologo i ai.”20 Ma na aoao mai Peresitene Thomas S. Monson i se tasi taimi: “Tatou te mata’itu. Tatou te faatalitali. Tatou te faalogologo mo lena leo itiiti ma le filemu. A fetalai mai, e usiusitai alii ma tamaitai popoto.”21
Pe A Tuai le Oo Mai o le Faatonuga
I le amataga o lo’u olaga faalegaluega, sa talosagaina ai i ma’ua ma Sister Homer e talia se suiga i se tofiga faalegaluega. I lea taimi, sa foliga mai ia i ma’ua o se filifiliga tēle tele. Sa ma suesue, sa ma anapogi, ma sa ma tatalo, ae sa tuai ona oo mai se tali. Na i’u lava, ina ma faia se faaiuga ma agai atu i luma. A o ma faia, sa ma lagona le toafimalie ma vave ona iloaina o se tasi o faaiuga sili ona lelei ua ma faia.
O se taunuuga, na ma iloaina ai o nisi taimi e tuai lava ona oo mai ni tali. E mafua lenei mea ona e lē o le taimi sa’o, ona e lē manaomia se tali, pe ona e faatuatuaina i tatou e le Atua e faia ni a tatou lava faaiuga. Na aoao mai e Elder Richard G. Scott i se tasi taimi faapea e tatau ona tatou loto faafetai mo ia ituaiga o taimi ma faia ai lenei folafolaga: “Afai e te ola agavaa ma o loo ogatusa lau filifiliga ma aoaoga a le Faaola ma ua manaomia ona e gaoioi, ia faia loa ma le faatuatua. … O le a lē tuuina outou e le Atua e agai ese mamao atu e aunoa ma se uunaiga o le lapataiga pe afai na outou faia ni faaiuga sese.”22
E Tatau Ona Tatou Filifili
Ma o lea, e manaomia ona tatou filifili po o fea o leo eseese uma ia o le a tatou usiusitai i ai. Pe o le a tatou mulimuli ea i leo e le faatuatuaina o loo fautua mai e le lalolagi, pe o le a tatou faia le galuega manaomia e faataga ai le siufofoga a lo tatou Tama e taialaina i tatou i a tatou faaiuga ma puipuia i tatou mai tulaga lamatia? O lo tatou sailia ma le filiga atili o Lona siufofoga, o le a faigofie atili ai ona tatou lagonaina. E le faapea o le a sili atu ona leotele Lona siufofoga ae ia faateleina lo tatou gafatia e lagonaina ai. Ua folafola mai e le Faaola afai tatou te “faalogologo i [Ana] mataupu, ma ua’i o [tatou] taliga i [Ana] fautuaga,” “o le a [Ia] tuu mai atili [ia i tatou].”23 Ou te molimau atu e moni lenei folafolaga—mo i tatou taitoatasi.
Toeitiiti atoa le tausaga talu ona maliu lo’u uso matua i se faalavelave matautia tau taavale. O le olaga talavou o Ioane sa tumu i folafolaga ma ausiaga. Ae a o ia faasolo ina matua, o ma’i o le tino ma le tuai o le mafaufau na matuai faigata ai le olaga. E ui e lei oo mai le faamalologa i lona olaga lea na ia faamoemoe i ai, ae sa tumau pea Ioane i lona faatuatua, naunau ia tumau, i le mea sili na te mafaia, seia oo i le iuga.
I le taimi nei, ou te iloa sa lei atoatoa Ioane, ae sa ou mafaufau po o le a le mea lea na tuuina atu ia te ia lea ituaiga o onosai. O le tele o leo na valaauliaina o ia ia masalosalo ma taumamao, ae sa ia filifili e leai. Ae, sa ia faia le mea sili na te mafaia ia taula lona olaga i le totonugalemu o le talalelei. Sa ia ola ai i lona olaga iina, aua sa ia iloa o le a ia maua ai le siufofoga o lona Matai iina; sa ia ola ai i lona olaga iina, aua sa ia iloaina o iina o le a aoaoina ai o ia.
Faaiuga
Uso e ma tuafafine, i se lalolagi ma le tele naua o leo faatautavā, ou te molimau atu ua faia e lo tatou Tama Faalelagi ina ia mafai e i tatou ona lagonaina ma mulimuli i Lona [siufofoga]. Afai tatou te filiga, o le a La tuuina mai faatasi ma Lona Alo ia i tatou le taitaiga o loo tatou sailia, le malosi tatou te manaomia, ma le fiafia o loo tatou mananao uma i ai. I le suafa, o Iesu Keriso, amene.