O Lau Tusi Metotia o le Perisitua

I le avea ai ma tamaiti aoga, o le toatele o outou o loo atiae foi a outou taleni, mea e naunau i ai, ma mea e fiafia ai e ala i gaoioiga faaopoopo i le aoga po o lesona patino, o ‘au, ma vaega i fafo atu o le aoga, e aofia ai taaloga.

I le fiafia ai i taaloga i lo’u olaga atoa, ou te faamemelo lava ia i latou o ē atiae o latou tomai faaafeleti i le tulaga latou te faatino ai i tulaga maualuluga. Mo se tasi ina ia matuā lelei lava i soo se mea, e faaopoopo atu i le taleni natura, e manaomia ai se lotopulea tele, ositaulaga, ma itula lēmafaitaulia o toleniga ma faataitaiga. O ia tagata afeleti e masani ona faalogo i nisi taimi i faitioga matuia a faiaoga ma naunau e tuu ese mea latou te mananao ai i le taimi nei mo se mea e sili atu i le lumanai.

Tatou te iloa tagata o le Ekalesia ma taitai perisitua o ē ua oo i le faamanuiaina i tulaga sili ona maualuga o afeleti faapolofesa. O loo i ai le tele o faataitaiga lelei, ae e na o ni nai [faataitaiga nei] ua mafai ona ou lisiina atu iinei ona o le taimi. Atonu e te iloaina nisi o tagata taaalo nei: i le peisipolo, o Jeremy Guthrie ma Bryce Harper; i le pasiketipolo, o Jabari Parker ma Jimmer Fredette; i le soka, o Ricardo Rojas; ma le lakapi liki, o William Hopoate; ma i le lakapi Amerika, o Taysom Hill ma Daniel Sorensen. Ua faia e [i latou] taitoatasi se sao taua i lana taaloga.

E ui ina matuā faamanuiaina i latou i ā latou taaloga, ae o nei tagata afeleti o le a muamua ona tautino mai e lē o i latou o ni tagata afeleti atoatoa po o ni tagata soifua atoatoa. Latou te galulue malosi ina ia silisili ona lelei i a latou taaloga—ma ia ola i le talalelei. Latou te tutu i luga pe a latou pa’ū’ū ma taumafai e tutumau e oo i le iuga.

I ‘au o taaloga, e atinae metotia mo tulaga faapitoa o taaloga ma tuufaatasia i totonu o se tusi metotia. E aoao e tagata afeleti a latou tofiga faapitoa mo metotia taitasi. E suesue mae’ae’a e tagata taaalo faamanuiaina le tusi metotia lea, pe a valaau mai se metotia, latou te iloa lelei, toetoe o le taimi lava lena, le mea e o i ai ma le mea e fai.

Ata

Faiaoga ma le tusi metotia

Ata na pueina e Dave Kaup/REUTERS/stock.adobe.com

Ata

Tusi Metotia

I se auala talitutusa, o i tatou o ē umia le perisitua e i ai foi i se ‘au (o se korama) ma se tusi metotia (o tusitusiga paia ma upu a perofeta o aso nei).

O e faamalosia tagata o lau ‘au?

O le a le lelei ua e suesueina ai lau tusi metotia?

Ua e malamalama atoatoa i lou tofiga?

Ata

Korama a le au perisitua

Ina ia faalautele atili le talafaatusa, e iloa e faiaoga maoae ia malosiaga ma vaivaiga o le latou ‘au faapena foi ma ‘au latou te taaalo. Latou te fatu se fuafuaga o le taaloga lea o le a tuu atu ai ia i latou le avanoa sili e manumalo ai. Ae a oe?

Ua e iloaina po o a faaosoosoga e sili ona e vaivai ai, ma e mafai ona e muai iloa auala o le a taumafai ai le fili e taofi ma faavaivai oe. Pe ua e fatuina se fuafuaga patino o le taaloga ma le tusi metotia lea o le a e iloa ai le auala e te tali atu ai pe a feagai oe ma le itu faafeagai?

Pe a e fetaiai ai ma faaosoosoga eseese o le ola mamā—pe o e i ai faatasi ma isi pe ua na o oe o loo sioa atu i se lau [screen]—ua e iloa lau fuafuaga o le taaloga. Afai e fautua atu se uo ia e inu i meainu malolosi pe faataitai i fualaau faasaina, ua e iloa le metotia. Ua e faataitaia ma iloa le auala e te vave tali atu ai.

Faatasi ai ma se fuafuaga o le taaloga, se tusi metotia, ma se tautinoga mautu e faataunuu lau matafaioi, o le a e iloa ai e itiiti le puleaina o oe e faaosoosoga. Ua uma ona e faia le faaiuga pe o le a faapefea ona e tali atu ma po o a mea o le a e faia. E te lē tau manaomia ona faia se faaiuga i taimi uma e te fetaiai ai ma faaosoosoga.

Na faasoa mai e se tasi o le Toasefululua se tala e faaalia ai lenei mataupu faavae. I le avea ai ma se ositaulaga i le aoga maualuga, sa ia tafao faatasi ma ana uo. I le maea ai ona fai o se meaai, sa latou tietie solo ae fautua mai loa se tasi latou te o i se ata tifaga faapitoa. O le faafitauli sa ia iloa o se ata tifaga e lē tatau ona ia matamata ai. E ui lava sa ia lagona i le taimi lava lena le mamafa ma le popole i lea tulaga, ae sa ia fuafua lava mo lenei mea. O le itulau lenei na aumai sa’o mai i lana tusi metotia o le perisitua.

Sa mānava loloa ma taumafai ina ia maua lona lototele, na ia faasilasila atu ai, “Ou te lē fiafia i lena ata tifaga. Na o le ave lava o a’u i le matou fale,” lea na latou faia. O se metotia faigofie na taitai atu i se manumalo! I ni tausaga mulimuli ane, na faamatalaina e se tasi o ana uo lea na faatasi ma ia i lena po le auala na faamaonia ai o lenei faataitaiga sa avea ma malosiaga tele mo ia e feagai ai ma le lototele i tulaga talitutusa faapea i lona lava olaga.

Sa ou talosagaina nisi o le Usoga e fautua mai ni metotia e te ono faaaofiaina i lau tusi metotia. O nisi nei o a latou fautuaga musuia.

• Tatalo i aso uma mo le malamalama sili atu ma se molimau ia Iesu Keriso.

• Faalogo toto’a i aoaoga a ou matua, lou epikopo, ma ou taitai o Alii Talavou ma le korama.

• Aloese mai ponokalafi ma anomea lē mamā o ala o faasalalauga faaagafesootai.

• Ia manatua folafolaga na e faia i le Atua, ma galue e tausia i latou.

• Suesue i tala o tusitusiga paia e uiga i perofeta maoae, ma mulimuli i o latou uiga lelei.

• Ia faamanuia fanau a le Tama Faalelagi e ala i auaunaga.

• Ia saili ni uo lelei e fesoasoani ia te oe ina ia avea ma tagata e te manao e avea ai oe.

• Ia avea ma se tagata atamai i le polokalama o le FamilySearch, ma saili lau oe lava talafaasolopito o aiga.

• Fuafua nofoaga o le saogalemu ia e mafai ona e solaese ai mai i faatosinaga leaga.

• Alofa ma fesoasoani e faamalosia isi tagata o lau korama o le perisitua.

Sa ou fesootai atu foi i tagata afeleti o o latou ata ia sa tatou matamata ai i le taimi ua sola. Sa mata’ina lo’u iloaina latou te lē faailoa maia i latou lava e ala i mea latou te faia, o ni tagata afeleti faapolofesa, ae e ala i tagata e i ai i latou, o ni atalii o se Tama Faalelagi alofa ma o ē umia le perisitua a le Atua.

Ia se’i o tatou faalogo atu nei i o latou manatu:

• O Jimmer Fredette, o i o se tiakono, o loo aoao e fai lona fusiua, ua fai mai: “Ua ou aoao e faalagolago malosi i lo’u iloa ma le faatuatua i le moni o le talalelei. Ua taitai a’u e lenei mea ina ia avea ma … sē e umia ma le agavaa le perisitua ma e sili i lo mea uma—o se faataitaiga lelei.”

  Ata

  Jimmer Fredette o se tiakono

• Bryce Harper, o i o se tane, ua ia tusia: “Sa ou faapea o le lauiloa, mauoa, ma se taui o le MVP o le a ou fiafia ai. Sa i ai se mea na misi. O lea, sa ou … saunia ai ma [ulufale atu] i le malumalu. Ua ou i ai nei i luga o se ala e [toefoi] atu i lo’u Tama Faalelagi ma faia se aiga e faavavau—o le olioli aupito silisili lea i le lalolagi!”

  Ata

  Bryce Harper ma lona toalua

• O Daniel Sorensen, o i o se faifeautalai, fai mai: “O se tusi metotia lelei o se fuafuaga lea e faaaoga ai taleni ma malosiaga o tagata taitoatasi o le au. … A o ou suesue ma faataitai aoaoga o le talalelei a Iesu Keriso, e mafai ona ou iloa le auala e faaaoga ai o’u malosiaga e auauna atu ai i le perisitua.”

  Ata

  Daniel Sorensen o se faifeautalai

• O Jeremy Guthrie, o i, o loo auauna atu o se peresitene o se misiona i le taimi nei, na faasoa mai: “A o avea ma se tiakono 12-tausaga-le-matua … [Sa ou lagona] le Agaga o molimau mai ia te a’u [e faapea] ‘o le olaga lenei o le taimi lea … e saunia ai e feiloai ma le Atua.’² O le fuafuaga o le taaloga o le faatuatua i le Atua i le faatinoga [ma le] salamo e ala atu i le Faaola. … O le tusi metotia o loo maua i tusitusiga paia ma e ala mai i perofeta soifua.”

  Ata

  Jeremy Guthrie o se peresitene o le misiona

• O Jabari Parker, o i, i lona faauuga i le tofi o le toeaina, ua fai mai: “E le mafai ona ou vaai faalemafaufau i le tagata semanu ou te avea ai pe ana ou lē faia lena faaiuga ina ia papatiso. … Ou te matuai ou faafetai tele ua ou maua le Atua i lo’u olaga e taiala a’u i aso uma.”

  Ata

  Jabari Parker i le faauuina o le perisitua

• O Ricardo Rojas, o i o loo auauna atu ai o se peresitene o se paranesi i le taimi nei, sa fai mai: “E ala i le perisitua [a le Atua] e mafai ai ona [tatou] fesoasoani i Lana galuega. Ua valaauina i tatou ina “ia faamalosi ma ia lototele’³ i le puipuiga o le upumoni.” Sa fesoasoani ai lenei mea ia te ia ia manuia uma i luga o le malae ma i le avea ai foi ma sē umia le peristua.

  Ata

  Ricardo Rojas o le peresitene o le paranesi

• O Taysom Hill, o i, i le avea ai ma se faifeautalai, ua ia lagonaina o le talalelei a Iesu Keriso ua avea ma se tusi metotia mo ia i lona olaga. Na ia faasoa mai, “O le talitonu i le fuafuaga [a le Atua] ma le faia o le mea sili ou te mafaia e faataunuu la’u matafaioi i le fuafuaga ua ou maua ai se lagona faagaeetiaina o le filemu ma le fiafia i lo’u olaga, i le iloaina o loo fiafia mai le Atua i a’u taumafaiga.”

  Ata

  Taysom Hill o se faifeautalai

• O William Hopoate, o i, i le faamanuiaina o le pepe a lona atalii o le tupulaga fa, fai mai o le talalelei ua fesoasoani ia te ia e “iloaina togafiti a le itu faafeagai ma maua ai le mataalia faaleagaga e tetee atu ai i ū fanafana mu ma auauna lelei atu ai i isi.”

  Ata

  William Hopoate i le faamanuiaga o le pepe

Ae a oe? O e iloaina lou faasinomaga maualuga atu ma paia atu o se atalii o le Atua, o loo umia Lana perisitua paia? I le mafaufau ai i lenei faasinomaga e faavavau, fatu sau fuafuaga o le taaloga ma le tusi metotia o le perisitua o le a taialaina oe i taimi o faaosoosoga ma faigata. Mafaufau i fuafuaga uma o osofaiga ma puipuiga.

Ofuafuaga o osofaiga e fesoasoani e faamalosia ai molimau ma faateleina le naunautaiga e tumau i luga o le ala lauitiiti ma le vaapiapi. O faataitaiga e aofia ai tatalo faisoo, suesueina o tusitusiga paia, auai i le lotu ma le malumalu, totogi sefuluai, ma le mulimuli i fautuaga o loo maua i le tamaitusi o le Mo le Malosi o le Autalavou.

Oauala o puipuiga e aofia ai le fuafuaina mamao pe faapefea ona e fetaiai ma faaosoosoga. A faaosoosoina e fetuunai ou lava ia tulaga faatonuina, e te iloa vave le mea o le a e faia.

E te manaomia se tusi metotia mo lena mea.

Ae a pe a lē fia tatalo i le asō? Ua oo i le taimi e faataunuu ai le metotia ua uma ona e fuafuaina mo le taaloga.

O e lagonaina ua vaivai lau molimau? E i ai sau metotia mo lena mea. Ua e iloaina le mea e fai.

O outou o loo tauaveina le perisitua paia a le Atua. O lau tautinoga e pipii mau i le āi u’amea o le a suia oe i le tagata e faavavau lea na foafoa oe e avea ai.

E silafia e le Atua oe ma alofa ia te oe. O le a Ia faamanuia oe ma taiala ou laasaga.

Atonu e te mafaufau e le o oe o se tagata taua, ma e lē lava lou lelei e avea ai ma se tagata ta’uta’ua o le taaloga. Ae e lē moni lena mea. E te iloa ua folafola mai e le Atua, “O le a oo mai mea vaivai o le lalolagi ma gaui i lalo mea tautaua ma le malolosi”?⁴

O e lagonaina la se vaivai? le aogā? Faamalo atu, ua e sao i le au fili!

O e lagonaina se lē taua? maualalo? Atonu o oe le tagata tonu o loo manaomia e le Atua.

Ata

Tavita ma Koliata

O le a se isi faataitaiga sili o i ai nai lo Tavita na la’a atu i le malae o le taua e faasaga i se fili taufaafefe, o Koliata? I le faalagolago ai i le Alii, faatasi ma se fuafuaga, e le gata na faasaoina e Tavita o ia lava ae o le autau a Isaraelu!⁵ Ia iloa o le a faatasi le Alii ma oe a o e maua lou lototele ina ia i ai i Lana itu. “Afai ua au ma i tatou le Atua, o ai se e faasagatau mai?”⁶

E mafai ona ia tatala faitotoa [o avanoa] ma fesoasoani ia i tatou ia maua le malosi ma tomai tatou te le’i iloaina o loo ia i tatou.⁷

Faalogo i o outou faiaoga faatuatuaina e pei o o outou matua, epikopo, ma taitai o Alii Talavou. Aoao le tusi metotia. Faitau tusitusiga paia. Suesue i upu a perofeta o aso nei. Fatu sau oe lava fuafuaga o le taaloga i auala o le a e faamaonia ai oe lava ia o se soo o Keriso.

Ia vave ona iloa au metotia o le a e faaaogaina e faamalosia ai lou agaga ma aloese ai mai i faaosoosoga a le fili.

Fai le mea lenei ma o le a mautinoa lava le faaaogaina o oe e le Atua.

Ia, atonu o loo i ai nisi ua vavaeeseina i latou lava mai le talalelei ma ua se ese. O isi e nonofo i le falematamata ma matamata i le taaloga mai se mea mamao. O nisi e filifili e nonofo i nofoa faaleoleo, e ui ina taumafai le faiaoga e ave i latou i totonu. Ou te valaaulia outou ia laveai mai, lagolago, ma alolofa ia i latou o se uso a tagata o le tou ‘au!

O isi e mananao e feosofi i totonu o le taaloga—ma taaalo. O le mea e sili ona taua e le o le talenia o i latou ae o lo latou naunautaiga e tuu i latou lava i luga o le malae. Latou te le faatali se’i tau valaau mai a latou numera ona ua latou iloa ua fai mai tusitusiga paia, “Afai ua ia te outou le manao e auauna atu i le Atua, ua valaaulia outou i le galuega.”⁸

E mafai ona e tuu oe lava ia i le au fili.

E te faia lenei mea pe a e suesueina ma le faatinoina lau tusi metotia o le perisitua.

I le aluga o le ala o le a mautinoa lava e te faia ni mea sese ma pa’ū ai—masalo i le tele ma le tele o taimi. E te lē atoatoa; o le pa’ū o se vaega o le faagasologa o le faaagavaaina lea e mafai ai ona faaleleia lau amio ma auauna atu ai i se ala sili atu ma agalelei atu. Ua saunia e le Faaola ma Lana Togiola le i’u le auala e manumalo ai i a tatou mea sese e ala i le salamo faamaoni.

E faaaluina e tagata taaalo maoae le fia selau itula e faaatoatoa ai se vaega itiiti o le latou taaloga. I le avea ai ma sē e umia le perisitua, e te manaomia foi lea lava mafaufau e tasi. Afai e te toilalo, ia salamo ma aoao mai ai. Faataitai ina ia e faia lelei atu i le isi taimi e sosoo ai. I le iuga, e pule lava oe. E mafai ona e aoaoina le tusi metotia?

Ou te uunaia outou: Faalagolago i le Alii. Ofu le ofutau atoa a le Atua,⁹ ma oso i totonu o le taaloga.

E lē toatele i latou e taaalo i taaloga faapolofesa i tulaga sili ona maualuluga, ae a oo mai i le avea ma soo, e toatele ua filifili e mulimuli ia Keriso.

O le mea moni, o lau misiona lena i lenei olaga—ia aoao auala a le Alii, ulufale atu i le ala o le avea ma so’o, ma taumafai e ola e tusa ma le fuafuaga a le Atua. O le a lagolagoina ma faamanuia oe e le Atua a o e liliu atu ia te Ia. E mafai ona e faia lenei mea ona o oe o se tagata silisili i Lana silafaga.

Ou te tatalo o le a outou faia le tautinoga e ola agavaa mo le perisitua paia ua outou umia ma taumafai e faatino lau matafaioi paia i aso uma. Ou te faamanuia ia te outou i le tomai ma le manao e faia ai. Ou te faaopoopo atu la’u molimau i le mana o le perisitua ua outou umia, o perofeta soifua, ma ia Iesu Keriso ma Lana matafaioi i le avea ai ma o tatou Faaola ma le Togiola. I le suafa, o Iesu Keriso, amene.