Taumamafa Fiafia i le Afioga a Keriso

A o ou laitiiti, sa ou manatu o le taumafa fiafia o le tau lava o le mauaina o se meaai telē ma le araisa, sushi, ma le sosi. Ua ou iloa nei o le taumafa fiafia e sili atu i lo le olioli i se taumafataga manogi. O se aafiaga o le olioli, faafailelega, faafiafiaga, fetufaaiga, faailoaina o le alofa i aiga ma ē pele, tuuina atu o a tatou faafetai i le Atua, ma le fausiaina o sootaga a o olioli i le anoano o meaai ua matua sasala le manogi. Ou te talitonu a tatou taumamafa fiafia i afioga a Keriso, e tatau ona tatou mafaufau i lea lava aafiaga e tasi. O le taumamafa fiafia i tusitusiga paia e le na o le faitau i ai. E tatau ona aumaia ia i tatou le olioli moni ma fausia ai o tatou sootaga ma le Faaola.

O loo manino le aoaoina mai o lenei mea i le Tusi a Mamona. Manatua le miti a Liae lea sa ia vaaia ai se laau “o ona fua sa manaomia lava e faafiafia ai le tagata.” O le fua lenei ua fai ma faatusa o le alofa o le Atua, ma a o tofo Liae i le fua, “ua … sili ona suamalie, nai lo o mea uma sa [ia] tofo muamua i ai.” Sa “faatumulia [lona] agaga i le olioli tele” ma o se mea sa ia manao e faasoa atu i lona aiga (1 Nifae 8:10–12).

A tatou taumamafa fiafia, o le a mafai foi ona tatou iloa atonu e le afaina le telē po o le ituaiga o meaai tatou te aai ai, pe afai e faatumulia o tatou loto i le faafetai. Sa ola le aiga o Liae i aano mata i le vao, ae sa faamatalaina e Nifae lenei tofotofoga faigata, e faapea, “Sa matua tele lava faamanuiaga a le Alii” o “o matou fafine … sa malolosi” ma mafai ona fanauina fanau “e aunoa ma le muimui” (1 Nifae 17:1–2).

O le taumamafa fiafia o nisi taimi e aofia ai le faataitaiina ma le tofoina. Na talanoa Alema e uiga i se fatu lelei e toto i o tatou loto. A o tatou faataitai i ai, o le a tatou iloaina o le fatu e amata “ona suamalie” (tagai i le Alema 32:28–33).

O faamanuiaga o le taumamafa fiafia i le afioga a Keriso e mamana ma e suia ai olaga. E tolu [faamanuiaga] faapitoa ou te manao e valaaulia outou e faaaoga i o outou olaga.

Muamua, o afioga a Keriso e mafai ona fesoasoani ia i tatou ia “faateleina lo [tatou] gafatia faaleagaga e maua ai faaaliga” (Russell Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 96) ma taiala ai ma le saogalemu i tatou i o tatou olaga. Ua aoao mai Mamona o afioga a Keriso ua i ai “se uiga malosi e taitai atu ai tagata ia latou faia le mea [ua] tonu,” ma e sili ona malosi ai i latou i lo soo se mea e mafai e “le pelu” ona faataunuuina (Alema 31:5). A o ou saili mo le atamai o le Atua i le taulimaina o o’u lava luitau, i taimi uma ou te faataitaia ai le “mana o le afioga a le Atua” (Alema 31:5), na ou lagona le musuia ma le gafatia e faia faaiuga poto, faatoilalo faaosoosoga, ma faamanuia lo’u olaga i le faatuatua faateleina ia Keriso ma le alofa mo i latou o siomia a’u. Na aoao mai i tatou e lo tatou perofeta, o Russell M. Nelson, e faapea “i aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia” (“Faaaliga mo le Ekalesia, Faaaliga mo o Tatou Olaga,” 96). O le a oo mai faaaliga e manaomia pe a tatou faataitaia le “mana o le afioga,” ma o lena afioga o le a sili atu ona mamana nai lo se isi mea e mafai ona tatou faataitaia pe mafaufauina.

Lua, pe a tatou tauivi ma o tatou lava faasinomaga ma le leai o se taua faaletagata lava ia, o le “afioga malie a le Atua” (Iakopo 2:8) i tusitusiga paia o le a fesoasoani ia tatou iloa po o ai moni i tatou ma tatou maua ai le malosi e sili atu i lo tatou lava malosi. O le iloaina o lo’u faasinomaga o se atalii o le Atua o se tasi lea o taimi sili ona matagofie ua ou lagonaina. I tausaga o lo’u talavou, sa ou le iloa se mea e uiga i aoaoga a le Faaola. Ina ua ou faato’a faitau i le Feagaiga Fou, na faamalolo moni e afioga a Keriso lo’u agaga mafatia. Na ou iloaina e le o tuuatoatasi a’u ma o a’u o se atalii o le Atua. A o o’u iloaina lo’u faasinomaga moni i luma o le Atua, sa ou iloa lo’u gafatia lemafuatia e ala i le Togiola a Keriso.

Sa faasoa mai foi e Enosa lona aafiaga patino e uiga i le faamaninoga lea e oo mai le mafaufau i afioga a Keriso. A o tuu e Enosa afioga na aoao atu e lona tama ia te ia e faatatau i le “ola e faavavau, ma le olioli o le Au Paia, [e gotouga] ifo i [lona] loto,” sa “matelaina [lona] agaga; ma sa [ia] tootuli i lalo i luma [o lona] Tufuga … i le tatalo malosi” (Enosa 1:3–4). I lena tatalo sa oo ina ia iloa le Faaola ma aoao ai e i ai so tatou taua tele, e alofaina ma e mafai ona faamagaloina a tatou mea sese, ma o fanau moni a le Atua.

Tolu, e mafai ona tatou siitia olaga o isi e ala i afioga a Keriso. E pei foi ona oo i ai Enosa i lona lava taimi ma le nofoaga na pa’i atu ai afioga a Keriso i lona loto, e faia foi e le Alii Lana vaega e pa’i atu ai i loto o i latou tatou te mananao e faasoa atu i ai le talalelei. Atonu o le toatele o i tatou e lagona le faavaivai pe a tatou taumafai e valaaulia se tasi e faalogo i le talalelei ona e le’i tupu le mea na tatou mananao e tupu. E ui lava i le taunuuga, ae ua valaaulia i tatou e le Alii e tatala o tatou gutu ma faasoa atu le savali o le talalelei ia i latou.

I le lua tausaga talu ai, na pa’i mai le Alii i le loto o lo’u tina pele, lea na fesoasoani ia te ia e filifili e talia le sauniga o le papatisoga. Sa ou faatalitali mo lena aso ina ia tupu mo le toeitiiti 35 tausaga. Ina ia mafai e ia ona faia lena faaiuga, sa auauna moni le toatele o tagata o le Ekalesia ia te ia e pei ona faia e Keriso. I se tasi aso Sa, sa ia lagona e tatau ona ia alu i le lotu. Sa ia mulimuli i le musumusuga. A o saofai o ia i le atulaina pito i luma ma faatalitali mo le sauniga faamanatuga e amata, sa tu i ona luma se tamaitiiti e fa tausaga ma tilotilo atu ia te ia. Sa ia faafeiloaia o ia i se ataata. Sa vave ona tuua o ia e le tamaitiiti ma toe savali atu i lona lava nofoa, lea sa i ai i le isi itu o le atulaina sa saofia ai lo’u tina. Sa piki i luga e le tamaitiiti se mea mai lona nofoa ma toe foi atu ma tuu atu i lo’u tina se tusipese ma toe savali atu i lona nofoa. Sa matauina e lo’u tina sa tuu se tusipese i isi nofoa uma o le falesa. Sa ono faigofie lava ona ia pikiina se [tusipese] mai le nofoa sa i ona autafa. Peitai, sa fiafia tele o ia i le faatinoga mamā o le agalelei o le tamaitiiti, lea na ia aoaoina i lona aiga ma i le lotu. Sa o se taimi faagaeetia mo ia. Sa ia maua se uunaiga malosi sa valaaulia o ia e le Atua e sau ma mulimuli i le Faaola. Sa ia lagona e tatau ona papatiso o ia. Sa le’i sailia e lenei tamaitiiti se faamamaluga mo le mea na ia faia, ae sa tau lava o lona faia o le mea silisili e ola i le afioga a le Atua ma ia alofa atu i lona tuaoi. Na fatuina e lona agalelei se suiga taua i le loto o lo’u tina.

O afioga a Keriso o le a pa’i atu ma le malosi i loto ma faapupula mata o i latou e lei vaai lava ia te Ia. I luga o le ala i Emau, sa savavali ai ni soo se toalua faatasi ma Iesu. Sa la faanoanoa ma sa le’i malamalama na manumalo le Faaola i le oti. I lo la faavauvau, sa la le iloaina ai o loo latou savavali faatasi ma le Keriso soifua. E ui sa “faamatala e [Iesu] ia te i laua o mea ua tusia ia te ia i Tusi uma,” ae sa la le’i iloaina o Ia o le Faaola toetu seia oo ina latou saofafai ma tofitofi le areto faatasi ma Ia. Ona pupula ai lea o laua “mata”. Pe a tatou—po o a tatou uo, paaga, ma tuaoi—taumamafa fiafia ma tofitofi faatasi ma Ia le areto, o le a pupula o tatou mata o le malamalama. Ina ua mafaufau soo i Emau i lo la taimi faatasi ma le Faaola toetu, sa la fai mai sa mu o laua loto i totonu o i laua a o Ia tatalaina Tusi ia i laua (tagai i le Luka 24:27–32). E moni lenei mea mo i tatou uma.

I le faaiuga, ou te molimau atu o le taumamafa fiafia i afioga a Keriso e mafai ona tupu i soo se taimi ma i soo se tulaga, pe afai tatou te saunia o tatou loto e taliaina. O le taumamafa fiafia i afioga a Keriso o le a aumaia ai faaaliga e lagolagoina le olaga, toefaamautu lo tatou faasinomaga moni ma le taua i luma o le Atua i le avea ai ma Ana fanau, ma taitai atu a tatou uo ia Keriso ma le ola e faavavau. Se’i ou faaiu atu i le faaleoina o le valaaulia a Nifae lea na ia fai mai: “E tatau ai ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. O le mea lea, afai o le a outou fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai le Tama: o le a outou maua le ola e faavavau” (2 Nifae 31: 20). I le suafa, o Iesu Keriso, amene.