Faamamāina e le Salamo
Ona o le fuafuaga a le Atua ma le Togiola a Iesu Keriso, e mafai ona faamamāina i tatou e ala i le faagasologa o le salamo.
I le olaga faaletino ua noatia ai i tatou i tulafono a tagata ma tulafono a le Atua. Sa ou maua lea aafiaga e lē masani ai o le faamasinoina o amioga matuiā i lalo uma o nei tulafono e lua—i le amataga a o avea ma se faamasino o le Faamasinoga Maualuga i Iuta ma i le taimi nei o se uso o le Au Peresitene Sili. O le eseesega na ou lagonaina i le va o tulafono a tagata ma tulafono a le Atua ua faalauteleina ai lo’u talisapaia o le moni ma le mana o le Togiola a Iesu Keriso. I lalo o tulafono a tagata, o se tagata ua ta’usalaina i solitulafono sili ona matuiā e mafai ona falepuipui i le olaga atoa e aunoa ma se avanoa e palola ai. Ae e ese i lalo o le fuafuaga o le alofa mutimutivale a se Tama Faalelagi alofa. Ou te molimau atu o nei agasala lava e tasi e mafai ona faamagaloina i le olaga nei ona o le taulaga togiola a lo tatou Faaola mo agasala a “i latou uma o e ua i ai le loto momomo ma le agaga salamo” (2 Nifae 2:7). E togiolaina e Keriso ma e moni Lana Togiola.
O le agalelei ma le alofa o lo tatou Faaola ua faailoaina i le viiga lea faato’a uma ona lagiina e le aufaipese.
O le taulaga togiola a Iesu Keriso ua matala ai le faitotoa mo “[tagata uma ia] salamo … ma o mai ia te ia” (Mataupu Faavae ma Feagaiga 18:11; tagai foi i le Mareko 3:28; 1 Nifae 10:18; Alema 34:8, 16). Ua lipoti mai e le tusi a Alema o le salamo ma le faamagaloga e oo lava ia i latou sa amioleaga ma avea ma tagata faamasaatoto (tagai i le Alema 25:16; 27:27, 30). O la’u savali i le asō o se savali o le faamoemoe mo i tatou uma, e aofia ai i latou o ē ua lē toe avea ma tagata o le Ekalesia e ala i le tapē o le igoa po o le aveesea o le igoa. O i tatou uma o tagata agasala e mafai ona faamamāina e le salamo. “O le salamo mai agasala e le faigofie,” sa aoao mai ai Elder Russell M. Nelson i se konafesi aoao ua mavae. “Ae e matua tauia le taui.”2
I. Salamo
O le salamo e amata i lo tatou Faaola, ma o se olioli, ae le o se avega. I le faigalotu o le Kerisimasi ia Tesema talu ai, sa aoao mai ai Peresitene Nelson: “O le salamo moni e le o se mea e faatasi ona tupu. O se avanoa e le taitai muta. E taua tele i le alualu i luma ma le mauaina o le filemu o le mafaufau, mafanafana, ma le olioli.”3
O nisi o aoaoga aupito silisili e uiga i le salamo o loo i ai i le lauga a Alema i le Tusi a Mamona i tagata o le Ekalesia ia na mulimuli ane ia faamatalaina o le i ai i se tulaga o le “lē talitonu tele,” “faafefeteina … i luga i le faamaualuga,” faatasi ai ma loto ua tuu “i luga o oa ma mea lē aoga o le lalolagi” (Alema 7:6). E tofu tagata o lenei Ekalesia toefuataiina ma le tele o mea e aoaoina mai aoaoga musuia a Alema.
Tatou te amata i le faatuatua ia Iesu Keriso, ona “o ia lea e afio mai na te aveese agasala a le lalolagi” (Alema 5:48). E tatau ona tatou salamo aua, e pei ona aoao mai Alema, “sei vagana ai ua outou salamo, e lē mafai lava i soo se ala ona outou mautofi i le malo o le lagi” (Alema 5:51). O le salamo o se vaega taua o le fuafuaga a le Atua. Ona o le a agasala tagata uma i lo tatou olaga faaletino ma vavaeese ai mai le afioaga o le Atua, o lea e “lē mafai ona faaolaina” le tagata e aunoa ma le salamo (Alema 5:31; tagai foi i le Helamana 12:22).
Sa aoaoina lenei mea mai le amataga. Sa poloaiina Atamu e le Alii, “Ia aoao atu i lau fanau, e ao i tagata uma, i soo se mea lava, ona salamo, po o o le a leai se ala e mafai ai ona latou mautofi i le malo o le Atua, ona e leai se mea lē mama e mafai ona mau iina, pe mau i ona luma” (Mose 6:57). E tatau ona tatou salamo i a tatou agasala uma—o a tatou faatinoga uma po o le lē faatinoina o mea e feteenai ma poloaiga a le Atua. E leai se tasi e tuusaoloto mai ai. O le afiafi ananafi na lu’iina ai tatou e Peresitene Nelson; “Uso e, e manaomia ona tatou salamo uma.”4
Ina ia faamamaina e le salamo, e tatau ona tatou lafoai ese a tatou agasala ma ta’uta’u atu i le Alii ma i Lana faamasino i le olaga nei i mea e manaomia ai (tagai i le Mataupu Faavae ma Feagaiga 58:43). Sa aoao mai Alema e faapea e tatau foi ona tatou “aumai galuega o le amiotonu” (Alema 5:35). O nei mea uma o se vaega o le valaaulia faisoo mai tusitusiga paia ia o mai ia Keriso.
E manaomia ona tatou aai ma feinu i le faamanatuga i aso Sapati taitasi. I lena sauniga tatou te osia ai feagaiga ma mauaina faamanuiaga e fesoasoani ia i tatou e faatoilaloina amioga uma ma manaoga o loo polokaina i tatou mai le atoatoa lea e valaauliaina i tatou e lo tatou Faaola ia ausia (tagai i le Mataio 5:48; 3 Nifae 12:48). Pe a tatou “faafiti [i tatou lava] mai mea uma e le faaleatua, ma alolofa i le Atua ma o [tatou] manatu atoa, mafaufau, ma le malosi atoa,” ona tatou mafai lea ona “atoatoa ia Keriso” ma “faapaiaina” e ala i le faamaligiina o Lona toto ia “paia, ua aunoa ma se ila” (Moronae 10:32–33). E maeu lea folafolaga! E maeu lea vavega! O se faamanuiaga lava!
II. Tali Atu o le Tagata Lava Ia ma Faamasinoga o le Olaga Nei
O le faamoemoega e tasi o le fuafuaga a le Atua mo lenei olaga faaletino o le “tofotofoina” lea o i tatou “e vaai pe [tatou] te faia mea uma o soo se mea e poloaiina ai i [tatou] e le Alii lo [tatou] Atua” (Aperaamo 3:25). I le avea ai ma se vaega o lenei fuafuaga, tatou te tali atu ai i le Atua ma i Ana auauna filifilia, ma o le tali atu o le tagata lava ia o le a aofia ai uma faamasinoga i le olaga nei ma faalelagi.
I le Ekalesia a le Alii, o faamasinoga i le olaga nei mo tagata o le ekalesia po o tagata faaolioli o le ekalesia e faatautaia e taitai o ē saili atu i le taitaiga faalelagi. O le latou tiutetauave lena o le faamasino o tagata o loo saili atu ia o mai ia Keriso ia maua le mana o Lana Togiola i luga o le ala o feagaiga e tau atu i le ola e faavavau. O faamasinoga i le olaga nei e iloa ai pe ua sauni se tagata mo le papatisoga. Pe o agavaa se tagata mo se pepa faataga e auai ai i le malumalu? Pe o se tagata o lona igoa sa aveesea mai faamaumauga a le Ekalesia ua lava le salamo e ala i le Togiola a Iesu Keriso, ina ia toefaaulufale mai e ala i le papatisoga?
Pe a faamaonia e se faamasino o le olaga nei na valaauina e le Atua se tagata mo le alualu i luma atili, e pei o avanoa o le malumalu, na te lē faailogaina lena tagata o sē ua atoatoa, ma na te lē faamagaloina se agasala. Sa aoao mai Elder Spencer W. Kimball e faapea, pe a mavae le mea na ia ta’ua o le “aveesea [o] faasalaga,” faaleolaga nei, “e tatau foi i le [tagata] ona saili ia maua mai i le Atua o le lagi se salamo faaiu, ma e na o ia e mafai ona faamagaloina agasala.”5 Ma afai e tumau pea amioga ma manaoga agasala e lē salamoina seia oo i le Faamasinoga Mulimuli, o se tagata e lē salamo o le a tumau pea le lē mamā. O le tali atu mulimuli o le tagata lava ia, e aofia ai le aafiaga o le faamamaāga faaiu o le salamo, e i le va o i tatou taitoatasi ma le Atua.
III. Toetu ma le Faamasinoga Mulimuli
O le faamasinoga lea e tele ina faamatalaina i tusitusiga paia o le Faamasinoga Mulimuli lea e sosoo ma le Toetutu (tagai i le 2 Nifae 9:15). E tele mau o loo ta’ua e faapea “tatou te laulaututu uma lava i luma o le nofoafaamasino o Keriso” (Roma 14:10; tagai foi i le 2 Nifae 9:15; Mosaea 27:31; e faamasinoina e tusa ma galuega na faia i le tino faaletino” (Alema 5:15; tagai foi i le Faaaliga 20:12; Alema 41:3; 3 Nifae 26:4). O le a faamasinoina tagata uma “e tusa ma a latou galuega” (3 Nifae 27:15) ma “e tusa ma … manaoga o o latou loto” (Mataupu Faavae ma Feagaiga 137:9; tagai foi i le Alema 41:6).
O le faamoemoega o lenei Faamasinoga Mulimuli o le fuafua lea pe tatou te ausia mea na faamatalaina e Alema o se “liuga tele o le loto” (tagai i le Alema 5:14, 26), lea tatou te avea ai ma tagata fou, e “lē toe i ai [se] manao e fai mea leaga, ae ia faia mea lelei e lē aunoa” (Mosaea 5:2). O le faamasino o lenei mea o lo tatou Faaola, o Iesu Keriso (tagai i le Ioane 5:22; 2 Nifae 9:41). A mavae Lana faamasinoga o le a tatou tautino atu uma “ua tonu ana faamasinoga” (Mosaea 16:1; tagai foi i le Mosaea 27:31; Alema 12:15), ona o Lona silisiliese (tagai i le 2 Nifae 9:15, 20) na Ia maua ai se malamalama atoatoa e uiga i a tatou amioga ma manaoga uma, i mea uma na e amiotonu pe ua salamoina ma mea na e lē amiotonu ma lē salamoina pe lē suia.
Ua faamatalaina e tusitusiga paia le faagasologa o lenei Faamasinoga Mulimuli. Ua aoao e Alema o le faamasinotonu a lo tatou Atua e manaomia ai i le toetutu le “tatau ona toefuatai o mea uma i o latou tulaga e tatau ai” (Alema 41:2). O lona uiga “afai sa lelei a latou galuega i le olaga lenei, ma sa lelei manaoga o o latou loto, … i le aso gataaga, [o le a] toefuatai i latou i le mea ua lelei” (Alema 41:3). E faapena foi, “afai ua leaga a latou galuega [po o o latou manaoga] o le a toefuatai ia te i latou mo le leaga” (Alema 41:4–5; tagai foi i le Helamana 14:31). O lea, sa aoao ai e le perofeta o Iakopo e faapea i le Faamasinoga Mulimuli “o i latou o e amiotonu o le a amiotonu pea, ma o i latou o e ua eleelea o le a eleelea pea” (2 Nifae 9:16; tagai foi i le Mamona 9:14; 1 Nifae 15:33). O le faagasologa lena e muamua atu i lo tatou tulaga a o le’i ta’ua e Moronae “o le pa faamasino logomalie a le Ieova silisili, le Faamasino Faavavau o e o ola ma e ua oti” (Moronae 10:34; tagai foi i le 3 Nifae 27:16).
Ina ia mautinoa o le a tatou mamā i luma o le Atua, e tatau ona salamo a o le’i oo i le Faamasinoga Mulimuli (tagai i le Mamona 3:22). E pei ona ta’u atu e Alema i lona atalii agasala, e le mafai ona tatou natia a tatou agasala i luma o le Atua, “ma e vagana ai ua e salamo o le a tutu o se molimau e faasaga ia te oe i le aso gataaga” (Alema 39:8; ua faaopoopo le faamamafa). O le Togiola a Iesu Keriso ua tatou maua ai le ala lava e tasi e ausia ai le faamamaāga e manaomia e ala i le salamo, ma o lenei olaga faaletino o le taimi lea e faia ai. E ui ua aoaoina i tatou e faapea o nisi salamo e tupu i le lalolagi o agaga (tagai i le Mataupu Faavae ma Feagaiga 138:31, 33, 58). ae e le mautinoa lena mea. Sa aoao mai Elder Melvin J. Ballard: “E matua faigofie atu le faatoilaloina ma auauna atu i le Alii pe a tuufaatasia uma le tino ma le agaga ia tasi. O le taimi lenei e sili atu ona faatosinaina tagata ma aafia gofie ai i se faatinoga. … O le olaga lenei o le taimi lea e salamo ai.”6
A tatou salamo, tatou te maua le faamautinoaga a le Alii o a tatou agasala, e aofia ai a tatou amioga ma manaoga, o le a faamamāina ma o lo tatou faamasino mulimuli alofa mutimutivale o le a “lē toe manatuaina lava i latou” (Mataupu Faavae ma Feagaiga 58:42; tagai foi i le Isaia 1:18; Ieremia 31:34; Eperu 8:12; Alema 41:6; Helamana 14:18–19). O le faamamaina e le salamo, e mafai ai ona tatou agavaa mo le ola e faavavau, lea sa faamatalaina e le Tupu o Peniamina o le “mau faatasi ma le Atua i se tulaga o le fiafia e lē gata” (Mosaea 2:41; tagai foi i le Mataupu Faavae ma Feagaiga 14:7).
I le avea ai ma se isi vaega o le “fuafuaga o le toefuataiga” a le Atua (Alema 41:2), o le a toefuatai mai e le Toetutu “mea uma … i o latou autino tatau ai ma atoatoa” (Alema 40:23). E aofia ai i lenei mea le faaatoatoaina o o tatou lē atoatoa ma faaletonu faaletino e maua i le olaga faitino, e aofia ai le fanau mai po o mafatiaga po o faamai.
Pe faaatoatoaina e lenei toefuataiga i tatou mai i o tatou manaoga uma lē paia ma lē mafaatoilaloina po o vaisu? E lē mafai lena mea. Ua tatou iloa mai faaaliga o aso nei o le a faamasinoina i tatou mo o tatou manaoga faapea ai foi ma a tatou amioga (tagai i le Alema 41:5; Mataupu Faavae ma Feagaiga 137:9) ma e oo lava i o tatou mafaufauga o le a ta’usalaina ai i tatou (tagai i le Alema 12:14). E lē tatau ona tatou “faatuai le aso o lo [tatou] salamo” seia oo i le oti, sa aoao mai ai Amoleka (Alema 34:33), ona o le agaga lava e tasi na umia o tatou tino i lenei olaga—pe e ā le Alii pe ōu le tiapolo—“o le a i ai le mana e umia ai o [tatou] tino i lena lalolagi e faavavau” (Alema 34:34). Ua i ai i lo tatou Faaola le mana ma ua tu sauni e faamama i tatou mai le leaga. O le taimi lenei e saili atu ai i Lana fesoasoani e salamo ai i o tatou manaoga ma mafaufauga leaga pe lē talafeagai ina ia faamamāina ai ma saunia e tutu i luma o le Atua i le Faamasinoga Mulimuli.
IV. O Aao o le Alofa Mutimutivale
O le vaega tupito o le fuafuaga a le Atua atoa ai ma Ana poloaiga uma o Lona alofa lea mo i tatou taitoatasi, lea e “silisili atu ona manaomia i mea uma … ma silisili ona olioli i le agaga” (1 Nifae 11:22–23). Sa faamautinoa mai e le perofeta o Isaia e oo lava i ē amioleaga pe a latou “foi mai ia Ieova … ona alofa mai lea o ia … [ma] na te matua faamagaloina” (Isaia 55:7). Sa aoao mai Alema, “Faauta, ua ia auina mai se valaaulia i tagata uma, ona ua faaloaloa mai ia te i latou aao o le alofa mutimutivale” (Alema 5:33; tagai foi i le 2 Nifae 26:25–33). Sa fetalai atu le Alii toetu ia sa Nifaē, “Faauta, ua faaloaloa atu ia te outou lou lima alofa mutimutivale, ma o soo se tasi e sau, o ia lea o le a ou taliaina” (3 Nifae 9:14). Mai nei aoaoga ma le tele o isi aoaoga faatusitusiga paia, ua tatou iloa ua tatala mai e lo tatou Faaola alofa Ona aao e talia alii ma tamaitai uma i tuutuuga alofa ua uma ona Ia faataatiaina e olioli ai i faamanuiaga aupito silisili ua i ai i le Atua mo Ana fanau.7
Ona o le fuafuaga a le Atua ma le Togiola a Iesu Keriso, ou te molimau atu i se “susulu atoatoa o le faamoemoe” e alofa le Atua ia i tatou ma e mafai ona faamamāina i tatou e ala i le faagasologa o le salamo. Ua folafola mai ia te i tatou “afai [tatou te] fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tama: o le a outou maua le ola e faavavau” (2 Nifae 31: 20). Tau ina ia tatou faia uma faapena, ou te aioi ma tatalo ai i le suafa o Iesu Keriso, amene.