Fausia se ‘Olo o le Faaleagaga ma le Puipuiga
A tatou ola i le talalelei a Iesu Keriso, a tatou faalagolago atu i le Togiola a le Faaola ma fetaomi atu i luma ma le faatuatua, e faamalosia i tatou e faasaga i togafiti a le tiapolo.
O’u uso e ma tuafafine pele, a o taunuu mai ai lenei konafesi i lona faaiuga, ou te tuuina atu le faafetai i lo tatou Tama i le Lagi mo fautuaga, upumoni, ma faaaliga na fofogaina mai i lenei pulelaa i aso e lua ua mavae. Ua aoaoina i tatou e auauna a le Atua ua valaauina e fofogaina mai Ana afioga paia. Ua faamanatu mai e le Alii ia i tatou i faaaliga o aso e gata ai, “Pe i loʼu lava leo po o … [i] leo o aʼu auauna, ua tutusa lava.”1
I le vaavaai atu i lenei potopotoga toatele o le Au Paia, ma le mafaufau i tagata o loo maimoa mai i le konafesi aoao i le lalolagi atoa, ou te mafaufau i le faapotopotoina i le Tusi a Mamona ina ua faaali atu Iesu Keriso ia sa Nifaē i le mavae ai o Lona faasatauroga. Sa Ia aoao i latou i le talalelei ona fautua atu lea, “Ia outou o atu i o outou fale, ma mafaufau i mea ia na ou fai atu ai, ma ole atu i le Tamā, i lou igoa, ina ia outou malamalama.”2
“Ia outou o atu i o outou fale, ma mafaufau” o le laasaga e sosoo ai ina ia matuā faalolotoina upu a perofeta ma taitai o le Ekalesia ia na fofogaina i lenei nofoaga paia. O aiga e faatotonugalemu-ia-Keriso o ‘olo ia mo le malo o le Atua i le lalolagi i se aso, e pei ona valoia, pe a “sasaa ai e [le tiapolo] i loto o le fanauga a tagata, ma faaoso i latou ia feita e faasaga i mea lelei.”3
Na fausia e tagata ‘olo i le talafaasolopito atoa ina ia taofia ai le fili i fafo. E masani lava, o na ‘olo e aofia ai se ‘olo puipui lea e [tutu] ai tagatavaai—e pei o perofeta—e lapatai mai e uiga i malosiaga taufaamatau ma osofaiga o le a oo mai.
I uluai taimi o paionia i Iuta, o le tamā o le tamāmatua o lo’u tama o Thomas Rasband ma lona aiga o nisi ia o uluai tagata na ulufale atu i le Vanu o Heber i Mauga matagofie o Wasatch i Iuta ma nofoiaina.
I le 1859, na fesoasoani Thomas e fausia le ‘olo o Heber, lea na fausia mo lo latou puipuiga. O se fausaga faigofie o ogalaau vavae, na faatutu i talaane o le tasi i le isi, ma fau ai le pito i fafo o le ‘olo. O fale laau na fausia i totonu o le ‘olo e faaaoga ai lena puipui masani. O le fausaga na maua uma ai le puipuiga ma le saogalemu mo na aiga paionia a o latou atiae o latou aiga ma tapuai atu i le Alii.
E faapena foi i tatou. O o tatou aiga o ‘olo ia e faasagatau atu i mea leaga o le lalolagi. I totonu o o tatou aiga tatou te o mai ia Keriso e ala i le aoao e mulimuli i Ana poloaiga, e ala i le suesueina o tusitusiga paia ma tatalo faatasi, ma e ala i le fesoasoani i le tasi ma le isi ia tumau i luga o le ala o feagaiga. O le faamamafa fou i suesuega faaletagata lava ia ma faaleaiga i totonu o le aiga e ala i le mataupu aoaoina Sau, Mulimuli Mai ia te Au ua mamanuina e “faalolotoina [ai] lo tatou liua ma fesoasoani ai ia te i tatou ia avea atili e faapei o Iesu Keriso.”4 O le faia o lea mea, o le a avea ai i tatou ma tagata e pei ona ta’ua e Paulo o “tagata fou”5 faatasi ma o tatou loto ma agaga ua ogatasi ma le Atua. Tatou te manaomia lena malosi e fetaiai ai ma ‘aloese ai mai osofaiga a le fili.
A o tatou ola ma le tuuto e oo mai ona o le faatuatua ia Iesu Keriso, o le a tatou lagonaina le i ai o le filemu o le Agaga Paia, o lē e taitai i tatou i le upumoni, musuia i tatou ina ia ola agavaa mo faamanuiaga a le Alii, ma molimau mai o loo soifua le Atua ma e alofa ia i tatou. E tupu mea uma nei i totonu o le ‘olo o o tatou lava aiga. Ae ia manatua, o o tatou aiga e malolosi e pei lava o le malosi faaleagaga o i tatou taitoatasi i totonu o aiga.
Na aoao mai Peresitene Russell M. Nelson, “I aso a sau, o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”6 I le avea ai ma perofeta soifua, tagatavaai, ma talifaaaliga a le Alii i lenei vaitaimi, o le tagatavaai i luga o le ‘olo o lo tatou malutaga, O Le Ekalesia a Iesu Keriso o le Au Paia o Aso e Gata Ai, na te iloa atu gaoioiga a le fili.
Uso e ma tuafafine, o loo tatou tau ma Satani mo agaga o tagata. Na tusia laina o le taua i lo tatou muai olaga. Na liliu ese Satani ma le tasi vaetolu o fanau a lo tatou Tama i le Lagi mai i Ana folafolaga o le faaeaga. Talu mai lena taimi, o loo tau pea auauna a le fili ma [tagata] faamaoni o ē ua filifilia le fuafuaga a le Tama.
Ua iloa e Satani ua faitaulia ona aso ma e le’o toe lava se taimi. I lona atamai ma le taufaasese, o le a lē manumalo lava o ia. Peitai, o lana taua ia manumalo i o tatou agaga taitoatasi e faaauau pea.
Mo lo tatou saogalemu, e tatau ona tatou fausia se ‘olo o le faaleagaga ma le puipuiga mo o tatou lava agaga, o se ‘olo e le mafai ona ulufale mai i ai lē tiapolo e toatasi.
O Satani o se gata atamai, e tolotolo i totonu o o tatou mafaufau ma loto pe a tatou lē faamalosia lo tatou puipuiga, feagai ma se lē fiafia, pe ua leai se faamoemoe. Na te faaosooso i tatou i viiga, o se folafolaga o le toafimalie, mafanafana, po o ni lagona lelei e lē tumau pe a faanoanoa. Na te ta’uamiotonuina le faamaualuga, agaleaga, lē faamaoni, lē faamalieina, ma le ola lē mama, ma e i ai taimi e mafai ona tatou “teʼa atu ma le toe lagonaina.”7 E mafai ona tuua i tatou e le Agaga. “E faapena ona olegia e le tiapolo o latou agaga, e ta’ita’i ifo ai i latou ma le faaeteete i seoli.”8
E faapena foi, e masani ona tatou lagonaina le malosi tele o le Agaga pe a tatou lagiina viiga i le Atua i upu faapenei:
A tatou fausiaina se ‘olo o le malosiaga faaleagaga, e mafai ona tatou teenaina faaosoosoga a le fili, fulitua ia te ia, ma lagona le filemu o le Agaga. E mafai ona tatou mulimuli i le faataitaiga a lo tatou Alii ma le Faaola, o lē, ina ua faaosoosoina i le vao, na fetalai atu “Satani e, ina alu ese ia oe i o’u tua.”10 E ao ona aoao i tatou taitoatasi e ala i aafiaga o le olaga pe faapefea ona faia lena mea.
O lena faamoemoega amiotonu o loo faamatalaina lelei i le Tusi a Mamona ina ua saunia e Kapeteni Moronae sa Nifaē e fetaiai ma osofaiga mai se autau Amalekia taufaasese, saua, fia manao i le pule. Na fausia e Moronae ‘olo e puipuia ai sa Nifaē “ina ia mafai ona latou ola mo le Alii lo latou Atua, ma ina ia mafai ona latou faatumauina o le mea ua taua e o latou fili o le faamoemoe o Kerisiano.”11 Na “mausali [Moronae] i le faatuatua ia Keriso,”12 ma sa faamaoni “i le tausia o poloaiga a le Atua … ma le tetee atu i le amioletonu.”13
Ina ua o atu sa Lamana i le taua, sa latou ofo i sauniuniga a sa Nifaē, ma sa faatoilaloina i latou. Na faafetai sa Nifaē “i le Alii lo latou Atua, ona o lona mana le mafaatusalia i le laveaiina o i latou mai lima o o latou fili.”14 Na latou fausia ‘olo mo le puipuiga i fafo, ma sa latou fausia le faatuatua i le Alii o Iesu Keriso i totonu—loloto i o latou agaga.
O a nisi o auala e mafai ai ona tatou faamalosia i tatou lava i taimi faigata ina ia tatou avea ma “mea faigaluega i aao o le Atua e faataunuu ai lenei galuega tele.”?15 Se’i tatou tagai i tusitusiga paia.
Tatou te usiusitai. Na poloai e le Alii le Tama ia Liae e toe auina atu ona atlii i Ierusalema e “saili talafaamaumau, ma aumai i latou i lalo iinei i le vao.”16 Sa le’i fesiligia lava e Liae; na te le’i tomanatu pe aisea ae pe faapefea foi. E faapena foi Nifae, o lē na tali atu,“O le a ou alu ma fai mea ua poloaiina e le Alii.”17
O tatou faatino ea i le usiusitai ma le loto i ai e pei o Nifae? Pe o tatou mananao ea e fesiligia poloaiga a le Atua e pei ona faia e uso o Nifae, o ē ona o le leai o se faatuatua na i’u ai ina la fulitua i le Alii? O le usitai, e faatinoina faatasi ma le “paia o le loto,”18 o le mea ua finagalo ai le Alii mai ia i tatou.
Tatou te faalagolago i le Alii, o lē na fetalai atu ia Iosua, a o ia sauni e taitai Isaraelu i le nuu folafolaina, “Ia e faamalosi ma loto tele; aua e te fefe, aua e te mata’u; aua o Ieova lou Atua o loo ia te oe i mea uma e te alu i ai.”19 Na faatuatuaina e Iosua na upu ma apoapoai atu i tagata: “Ina faapaiaina ia outou e outou; aua o a taeao e faia e Ieova o vavega i o outou luma.”20 Na vaeluaina e le Alii le vai o Ioritana, ma na faamutaina le fesēsēā’i o Isaraelu mo le 40 tausaga i le vao.
Tatou te tutu atu mo le upumoni e pei ona faia e le perofeta o Apinati i le Tusi a Mamona. I le pueina, ma aumaia i luma o le Tupu o Noa ma ana faitaulaga amioleaga, na aoao atu e Apinati Tulafono e Sefulu ma tala’i atu ma le mamana o le a “afio mai i lalo [Keriso] lava ia i totonu o le fanauga a tagata, ma … togiola e ia ona tagata.”21 Ona ia tautino atu lea, ma le faatuatua loloto i totonu o ia, “Le Atua e, talia mai ia loʼu agaga,”22 ma sa “mafatia [Apinati] i le oti i le afi.”23
Tatou te osia ma faafou a tatou feagaiga e ala i le taumamafa i le faamanatuga ma e ala i le tapuai atu i le malumalu. O le faamanatuga o le totonugalemu lea o a tatou tapuaiga i Aso Sa, lea tatou te maua ai le folafolaga ina ia “maua pea lona Agaga e faatasi ma i [tatou].”24 Faatasi ai ma lena sauniga paia tatou te tautino atu e ave i o tatou luga le suafa o Iesu Keriso, ia mulimuli ia te Ia, ma ia talia a tatou tiutetauave i lenei galuega paia e pei ona sa Ia faia. I totonu o le malumalu, e mafai ona tatou “tuu ese mea o lenei lalolagi”25 ma lagona le faatasi mai o le Alii ma Lona filemu maoae. E mafai ona tatou taulai atu i o tatou tuaa, o o tatou aiga, ma le ola e faavavau i le afioaga o le Tama. E leitioa a saunoa Peresitene Nelson talu ai nei i Roma: “O le lelei e afua mai i lenei malumalu e matua lē mafuatiaina lava.”26
E tatau ona tatou maua le amiosa’o e faia ai mea uma tatou te faia. E tatau ona tatou atiaeina le iloatino ma le amio pulea ina ia tatou lē fuafuaina pea mea e sa’o ma mea e sese. E tatau ona tatou mafaufau i le upu a Peteru, le uluai Aposetolo o le Ekalesia na lapatai mai, “Ia outou faautauta, ia outou mataala, ona o lē ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ‘aina e ia.”27
A o tatou faamalosia ma le maelega a tatou ‘olo, o le a avea i tatou e faapei o Iesu Keriso, e pei o Ona so’o moni, faatasi ai ma o tatou lava agaga i Lona puipuiga.
O lau molimau ia Iesu Keriso o lou lava ia ‘olo patino lena, o le puipuiga mo lou agaga. Ina ua fausia e le tama o lo’u tamamatua ma ana uo paionia le ‘Olo o Heber, sa latou tuu taitasi ogalaau i luga seia oo ina “[fusimau faatasi le olo o] le fale atoa”28 ma sa puipuia ai i latou. E faapena foi le molimau. O lea mea ma lea mea tatou te maua ai se molimau mai le Agaga Paia a o Ia fetalai mai i o tatou lava agaga, ma aoao mai le “[upumoni] i le mea lilo.”29 A tatou ola i le talalelei a Iesu Keriso, a tatou faalagolago atu i le Togiola a le Faaola ma fetaomi atu i luma ma le faatuatua, ae le o le fefe, e faamalosia i tatou e faasaga i togafiti a le tiapolo. O a tatou molimau e faafesootaia i tatou i le lagi, ma e faamanuiaina i tatou i le “moni o mea uma lava.”30 Ma, e pei o paionia na puipuia e se ‘olo, ua siomia saogalemu i tatou i aao alofa o le Faaola.
Na aoao mai le perofeta o Eteru, “O le mea lea, soo se tasi e talitonu i le Atua e mafai moni lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua, e fai ma taula i agaga o tagata, lea o le a latou mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua.”31
Ou uso e ma tuafafine pele, ou te tuua outou faatasi ma laʻu faamanuiaga ina ia o atu ma le mautinoa i le Alii ma i Lana talalelei. Faauouo i latou na o loo tautevateva ma faatasi ai ma le malosi o le Agaga i totonu ia te outou, ia toe taitai i latou ma le agaalofa i le ‘olo o le faaleagaga ma le puipuiga. Saili “e avea e faapei o Iesu”32 i mea uma tou te faia, e tetee atu ai i le tiapolo ma faaosoosoga, ia salamo, e pei ona apoapoaiina ai i tatou ananafi e lo tatou perofeta pele, ia faamaoni i le loto, ia amiotonu ma mamā, faaali atu le agalelei ma le alofa mamā, ma ia alofa i le Alii lo outou Atua i le tuuto o se soo moni.
O a tatou molimau o le talalelei a Iesu Keriso, o o tatou aiga, o o tatou auaiga, ma lo tatou auai i Le Ekalesia a Iesu Keriso o le Au Paia o Aso e Gata Ai o le a avea ma o tatou ‘olo patino o le puipuiga e siomia ai i tatou ma puipui i tatou mai le mana o le tiapolo e toatasi. Ou te molimau atu ai i lenei mea i le suafa o lo tatou Alii ma le Faaola, o Iesu Keriso, amene.