2010–2019
Vaai Atu ia Iesu Keriso
Konafesi Aoao ia Aperila 2019

Vaai Atu ia Iesu Keriso

Saunia e Elder Kim B. Clark

O Le Fitugafulu

A tatou vaai atu ia Iesu Keriso, o le a Ia fesoasoani mai ia tatou ola i a tatou feagaiga ma faalautele o tatou valaauga o ni toeaiina i Isaraelu.

A o savalia e Iesu se auala e latalata i Kapanaumi1 faatasi ma se motu o tagata e toatele na siomiaina o ia, o se fafine sa mafatia i se ma’i ogaoga mo le sefululua tausaga na aapa atu ma pa’i i le tuupao o Lona ofu. Na vave lava ona faamaloloina o ia.2

Na tusia i tusitusiga paia faapea o le iloaina e Iesu “ua alu atu le [mana] nai ia te [Ia],”3 “ona faliu lea o ia i le motu o tagata”4 ma “silasila solo … ina ia silafia lē ua faia lea mea.”5 “Ua iloa e le fafine ua le lilo o ia,”6 sa ia “faapa’ū o ia i ona luma, ma tautino atu le tonu ia te ia.”7

Sa fetalai atu Iesu ia te ia, “Afafine, ina faalototeleina ia oe: ua e ola i lou faatuatua; ina alu ia oe ma le manuia.”8

Na faasaoina e Iesu Keriso le fafine. Na faamaloloina faaletino o ia, ae ina ua faliu atu Iesu e silasila atu ia te ia, sa ia tautino mai lona faatuatua ia te Ia ma sa Ia faamaloloina lona loto.9 Sa Ia fetalai atu ia te ia ma le alofa, faamautinoa atu ia te ia Lana faamaoniga, ma faamanuia o ia i Lona filemu.10

Uso e, i le avea ai ma ē umia le perisitua paia, ua tatou auai i le galuega o le faaolataga. I le tausaga ua te’a, sa tuuina mai ai e le Alii le taitaiga o lenei galuega e faapitoa lava i luga o tau’au o toeaina i Isaraelu.11 Ua ia i tatou se poloaiga musuia mai le Alii—galulue faatasi ai ma o tatou tuafafine, e tatau ona tatou auauna atu i se auala e paia atu, faatelevave le faapotopotoina o Isaraelu i itu uma e lua o le veli, faamautu o tatou fale e avea ma malutaga o le faatuatua ma le aoaoina o le talalelei, ma saunia le lalolagi mo le Afio Mai Faalua o Iesu Keriso.12

E pei ona i ai i mea uma, ua faaali mai e le Faaola ia i tatou le ala: e manaomia ona tatou vaai atu ma auauna atu ia Iesu Keriso a o Ia silasila atu ma auauna atu i Lona Tama.13 Na fetalai atu le Faaola i le auala lenei i le Perofeta o Iosefa:

“Vaai mai ia te aʼu i mafaufauga uma; aua le masalosalo, aua le fefefe.

“Matau i manuʼa ua tuia ai loʼu itu, ma tulaga fao foi i oʼu lima ma oʼu vae; ia faamaoni, tausi i aʼu poloaiga, ma o le a oulua mautofi ai i le malo o le lagi.”14

I le malo i le muai olaga na folafola atu ai e Iesu i Lona Tama o le a Ia faia le finagalo o Lona Tama ma avea ma o tatou Faaola ma Togiola. Ina ua fesili Lona Tama, “O ai se ou te auina atu?”15 Sa tali atu Iesu:

“O A’u lenei, auina atu au.”16

“Lou Tama e, ia faia lou finagalo, ma ia ia te oe pea le mamalu e faavavau.”17

I Lona soifuaga atoa faaletino, sa soifua ai Iesu i lena folafolaga. I le lotomaualalo, agamalu, ma le alofa sa Ia aoao atu ai aoaoga faavae a Lona Tama ma faia le galuega a Lona Tama i le mana ma le pule na tuuina atu e Lona Tama ia te Ia.18

Na tuuina atu e Iesu Lona loto i Lona Tama. Sa Ia fetalai mai:

“Ou te alofa i le Tama.”19

“Ou te faia pea lava o mea lelei [e fiafia ai o] … ia.”20

“Ou te lei [sau] … e fai lo’u lava loto, a o le finagalo o [le Tama o lē] ua auina mai a’u.”21

I Lona tiga i Ketesemane na Ia tatalo ai, “A e aua le faia o lo’u loto, a o lou finagalo.”22

Pe a valaau mai le Alii i toeaiina i Isaraelu e “vaai mai ia te a’u i mafaufauga uma” ma “matau i manu’a” i Lona tino toetu, o se valaau ia liliuese mai le agasala ma le lalolagi ma liliu atu ia te Ia ma le alofa ma usiusitai ia te Ia. O se valaau e aoao atu Lana aoaoga faavae ma faia Lana galuega i Lana ala. O lea la, o se valaau ina ia faalagolago atu atoa ia te Ia, gauai ma tuuina atu o tatou loto ia te Ia, ma e ala atu i Lona mana togiola e avea ai faapei o Ia.23

Uso e, afai tatou te vaai atu ia Iesu Keriso o le a Ia faamanuiaina i tatou e avea ma Ana toeaiina i Isaraelu—lotomaualalo, agamalu, usiusitai, tumu i Lona alofa.24 Ma o le a tatou aumaia le olioli ma faamanuiaga o Lana talalelei ma Lana Ekalesia i o tatou aiga ma o tatou uso ma tuafafine i itu uma e lua o le veli.

Ua valaau mai Peresitene Russell M. Nelson ina ia tatou vaai atu ia Iesu Keriso tau lava o le auala lenei: “E le faigofie pe otometi le avea ma ni soo mamana faapena. O la tatou taulaiga e tatau ona tāmau i le Faaola ma Lana talalelei. E faigata faalemafaufau le taumafai e vaai atu ia te Ia i mafaufauga uma . Ae a tatou faia, e ō ese o tatou masalosaloga ma popolega.”25

O leRivet o se upu maoae. O lona uiga o le faapipii mau, ia tosina atu ma taofimau atoatoa.26 Tatou te tāmau lo tatou taulaiga ia Iesu Keriso ma Lana talalelei e ala i le ola ai ia tatou feagaiga.

A tatou ola ai i a tatou feagaiga, latou te faatosinaina mea uma tatou te fai atu ai ma faia. Ua tatou ola i se olaga o feagaiga27 e tumu i faatinoga faigofie o aso uma o le faatuatua lea e faataulai atua i tatou ia Iesu Keriso: tatalo mai le loto i Lona suafa, taumafa fiafia i Ana afioga, liliu atu ia te Ia ina ia salamo i a tatou agasala, tausia o Ana poloaiga, taumamafa i le faamanatuga ma tausi Lana Sapati ia paia, tapuai atu i totonu o Lona malumalu paia i le faatele e mafai ai, ma faaaoga Lana perisitua paia e auauna atu ai i fanau a le Atua.

O nei faatinoga o le tuuto atu i feagaiga e tatala ai o tatou loto ma mafaufau i le mana togiola o le Faaola ma le faatosinaga faapaiaina a le Agaga Paia. O le a suia e le Faaola i lea fuaitau i luga o lea fuaitau lo tatou lava natura, o le a tatou liua loloto atili atu ia te Ia ma o le a tino mai a tatou feagaiga i o tatou loto.28

O folafolaga tatou te tautino atua i lo tatou Tama Faalelagi o le a avea ma tautinoga mausali, o o tatou manaoga loloto. O folafolaga a le Tama Faalelagi ia i tatou e faatumulia ai i tatou i le lotofaafetai ma le olioli.29 O a tatou feagaiga o le a le toe avea ma tulafono tatou te mulimuli i ai ae o le a avea ma mataupu faavae faapelepele e musuia ma taiala i tatou ma tāmau ai la tatou taulaiga ia Iesu Keriso.30

O nei faatinoga o le tuuto o loo avanoa i tagata uma, laiti ma matutua. O outou alii talavou o loo umia le Perisitua Arona paia, o mea uma na ou fai atu ai i lenei po e faatautau ia te outou. Ou te faafetai i le Atua mo outou. Ua outou faia sauniga ma feagaiga paia ia avanoa mo le faitau miliona o le Au Paia o Aso e Gata Ai i vaiaso uma. Pe a outou saunia, faamanuia, pe tufatufa atu le faamanatuga; auauna atu; papatiso i le malumalu; valaaulia se uo i se gaoioiga, pe laveai mai se tagata o la outou korama, ua outou faia le galuega o le faaolataga. E mafai foi ona outou vaai atu ia Iesu Keriso ma ola ai i a outou feagaiga i aso uma. Ou te folafola atu afai o le a outou faia, o le a avea outou ma auauna faatuatuaina a le Alii i le taimi nei ma, i se aso a sau, o ni toeaiina malolosi i Isaraelu.

Uso e, ou te iloa atonu o nei mea uma e foliga taufaafefe. Ae faamolemole ia manatua upu nei a le Faaola: “A ou te le toatasi lava, aua ua ia te a’u le Tama.”31 E faapena foi i tatou. E le o tuua na o i tatou. E alofa le Alii o Iesu Keriso ma lo tatou Tama Faalelagi ia i tatou, ma o loo faatasi i La’ua ma i tatou.32 Ona sa silasila atu Iesu i Lona Tama ma faamaeaina le taulaga togiola maoae, e mafai foi ona tatou vaai atu ia Iesu Keriso ma le faamautinoaga o le a Ia fesoasoani mai ia i tatou.

E leai se tasi o i tatou e atoatoa. O nisi taimi tatou te le alualu ai i luma. E i ai mea e faalavelave pe faalotovaivaia i tatou. Tatou te faia ni measese. Ae a tatou vaai atu ia Iesu Keriso ma se loto salamo o le a Ia siitia i tatou i luga, faamama i tatou mai le agasala, faamagalo i tatou, ma faamalolo o tatou loto. E onosai ma agalelei o Ia; o Lona alofa togiola e le muta ma e le toilalo.33 O le a Ia fesoasoani mai ia tatou ola i a tatou feagaiga ma faalautele o tatou valaauga o ni toeaiina i Isaraelu.

Ma o le a faamanuiaina i tatou e le Tama ma mea uma e manaomia e faataunuu ai Ona faamoemoega: “o mea uma i le lagi ma i luga o le lalolagi, o le ola ma le malamalama, o le Agaga ma le mana, na auina mai i le finagalo o le Tamā, e ala mai ia Iesu Keriso, lona Alo.”34

Pe a tafe mai le malamalama ma le mana faalelagi i o tatou olaga e tolu mea faavavega o le a tutupu:

Muamua, e mafai ona tatou vaai! E ala i faaaliga tatou te amata ai ona vaai atu e pei ona silasila atu Iesu i le fafine: e le o foligavaaia i fafo a o totonu o le loto.35 Pe a tatou vaai atu e pei ona silasila mai Iesu, Na te faamanuiaina i tatou ia alolofa atu ia i latou tatou te auauna i ai ma Lona alofa. Faatasi ai ma Lana fesoasoani, o i latou tatou te auauna i ai o le a vaai atu i le Faaola ma lagona Lona alofa.36

Lona lua, ua ia i tatou le mana o le perisitua! Ua tatou maua le pule ma le mana e galue ai i le suafa o Iesu Keriso ina ia “faamanuiaina, taialaina, puipuia, faamalosia, ma faamaloloina isi ma aumaia vavega ia i latou [tatou te] alolofa i ai ma tausia [a tatou] faaipoipoga ma aiga ia saogalemu.”37

Lona tolu, tatou te o ma Iesu Keriso! O le mea tatou te o i ai, e afio i ai o Ia. A tatou aoao atu, e aoao atu o foi Ia. A tatou faamafanafana atu, e faamafanafana atu foi o Ia. A tatou faamanuia atu, e faamanuia atu foi o Ia.38

Uso e, pe le o se pogai ea lea tatou te olioli ai? Ioe! Ua tatou umia le perisitua paia a le Atua. A o tatou vaai atu ia Iesu Keriso, ola i a tatou feagaiga, ma tāmau lo tatou taulaiga ia te Ia, o le a tatou auai faatasi ma o tatou tuafafine ma auauna atu i se auala paia atu, faapotopoto mai Isaraelu ua faataapeapeina i itu uma e lua o le veli, faamalosia ma faamauina o tatou aiga, ma saunia le lalolagi mo le Toe Afio Mai Faalua o le Alii o Iesu Keriso. O le a tupu. Ou te molimau atu ai.

Ou te faaiu ma le tatalo lenei mai lo’u loto, mo i tatou uma, tagata uma, ia vaai atu ia Iesu Keriso i mafaufauga uma. Aua le masalosalo. Aua le fefefe. I le suafa o Iesu Keriso, amene.

Faamatalaga

  1. James E. Talmage places Jesus in “the vicinity of Capernaum” when this healing occurred (see Jesus the Christ [1916], 313).

  2. Tagai i le Luka 8:43–44; tagai foi i le Mataio 9:20–21; Mareko 5:25–29.

  3. Luka 8:46.

  4. Mareko 5:30.

  5. Mareko 5:32.

  6. Luka 8:47.

  7. Mareko 5:33.

  8. Luka 8:48.

  9. Na tusia e James E. Talmage e faapea, o le mea na taua atu i le fafine nai lo le faamalologa faaletino o le faamautinoaga lea na taliaina e le Faaola le manao o lona loto, ma na taliaina e Ia lona faatuatua (tagai Jesus the Christ, 318). Sa faamaloloina o ia faaletino ma le faaleagaga e Iesu ma tatala atu ia te ia le ala i le faaolataga.

  10. O se mea aoga le faatasi ai o Iairo, o se pule o le sunako, ma Iesu i le taimi na tupu ai lenei faamalologa. Sa malaga atu Iesu i le fale o Iairo i le mea o le a Ia faatuina ai le afafine o Iairo mai le oti. O le fafine lea na faamaloloina e Iesu atonu na tulieseina mai le sunako ona o ona mafatiaga. Ina ua faamaloloina o ia e Iesu, na Ia faamanino atu foi ia i latou uma na i ai iina, e aofia ai Iairo, o ia o se afafine faapelepele, o se tamaitai faatuatua, ma e atoatoa i le tino ma le agaga.

  11. Tagai i le D. Todd Christofferson, “O Le Korama a Toeaina” (Liahona, Me 2018, 55–58) mo se talanoaga o fetuunaiga e faatu se korama e tasi a le Perisitua Mekisateko i le uarota. O le faamoemoega o lena suiga sa faamatalaina i lenei auala i le vaega o Fesili e Fesiligia Soo o le uepisaite o Auaunaga: “O le i ai o se korama se tasi o le Perisitua Mekisateko i se uarota e tuufaatasia ai i latou e umia le perisitua e faataunuu vaega uma o le galuega o le faaolataga, e aofia ai ma galuega o le malumalu ma talafaasolopito o aiga ia na faamaopoopoina talu ai e le taitai vaega o faitaulaga sili” (“This Is Ministering: Frequently Asked Questions,” question 8, ministering.ChurchofJesusChrist.org).

    O fetuunaiga mulimuli ane ua tuu ai le taitai misiona a le uarota ma le taitai fou o malumalu ma talafaasolopito o aiga i le uarota i lalo o le taitaiga a le au peresitene o le korama a toeaina. Faatasi ai ma le auauna atu i aiga ua uma ona i ai i lalo o taitaiga a le au peresitene, o nei suiga ua tuuina atu ai le taitaiga o le galuega o le faaolataga i korama a toeaina, fesoasoani i ai Aualofa. O le mea moni, e umia e le epikopo ia ki i le galuega o le faaolataga i le uarota, ae na te faamatuu atu le tiutetauave ma le pule mo lena galuega i le peresitene o le korama a toeaina ina ia mafai e le epikopo ona faaaluina se taimi sili atu ma lona lava aiga, faamalosia o le autalavou, ma le auauna atu o se faamasino o Isaraelu.

  12. Tagai i le Russell M. Nelson, “Faamalosi Ia I Le Galuega Nei,” Liahona, Me 2018, 118–19; Russell M. Nelson, “Avea ma Faataitaiga Lelei o le Au Paia o Aso e Gata Ai,” Liahona, Nov. 2018, 113–14; Quentin L. Cook, “Liuaina Loloto ma Tumau i le Tama Faalelagi ma le Alii o Iesu Keriso,” Liahona, Nov. 2018, 8–12.

  13. Na auina mai e le Tama Iesu Keriso i le lalolagi (tagai i le Ioane 17:18).

  14. Mataupu Faavae ma Feagaiga 6:36–37.

  15. Aperaamo 3:27.

  16. Aperaamo 3:27.

  17. Mose 4:2.

  18. E tele mau i tusitusiga paia o loo tusia ai faamatalaga na faia e Iesu e uiga i le faia o le galuega a Lona Tama ma le aoao atu o aoaoga faavae a Lona Tama. Tagai, mo se faataitaiga, Ioane 5:19 (Ua faia e Iesu mea na Ia vaaia o faia e le Tama); Ioane 5:36 (na tuuina atu e le Tama i Lona Alo le galuega e faia); Ioane 8:26 (na aoao atu e Iesu mea na Ia mauaina mai i Lona Tama); Ioane 14:28 (na tautino mai e Iesu, “E Sili Lo’u Tama ia te A’u”); 3 Nifae 11:32 (o Lana aoaoga faavae o le aoaoga faavae lea na tuuina mai e Lona Tama ia te Ia).

  19. Ioane 14:31.

  20. Ioane 8:29.

  21. Ioane 6:38; tagai foi i le Ioane 5:30.

  22. Luka 22:42.

  23. O le upu vaai i lenei fuaitau (tagai i le Mataupu Faavae ma Feagaiga 6:36–37) e i ai uiga e ogatusa ma le valaau a le Alii: ia faafesagai (pe liliu atu i); ia taitaia le gauai o le tagata i; ia faalagolago i ai; ia saili mo; ia faatalitali ma le faamoemoe; ia mafaufau i ai o se iuga; e faamoemoe pe fuafua (tagai i le “Look,” Merriam-Webster.com).

  24. Tagai i le Mataupu Faavae ma Feagaiga 121:41–42. O uiga FaaKeriso o loo taʻua i tusitusiga paia o ni meaalofa a le Agaga lea e oo mai e ala i le alofa mutimutivale ma le alofa tunoa o Iesu Keriso. O mea ia ua avea ai toeaiina i Isaraelu o Ana toeaina.

  25. Russell M. Nelson, “Mauaina o le Mana o Iesu Keriso i o Tatou Olaga,,” Liahona, Me 2017, 39.

  26. Tagai i le merriam-webster.com, “rivet.”

  27. Mo se talanoaga o le mataupu o se olaga o le feagaiga, tagai i le Donald L. Hallstrom, “Living a Covenant Life,” Ensign, June 2013, 46–49. Na siiina mai lenei tusiga mai se lauga e umi atu na tuuina atu i le BYU-Idaho ia Me 2011. Mo le lomiga umi atu, tagai i le Donald L. Hallstrom, “A Covenant Life” (Brigham Young University–Idaho devotional, May 10, 2011), byui.edu.

  28. Tagai i le Ieremia 31:31–33, lea na tautino mai ai e le Alii o le a Ia osia se feagaiga fou ma le aiga o Isaraelu e tusia i o latou loto. O lenei ata o feagaiga na tusia i o tatou loto, po o feagaiga e ola mai i o tatou loto, o loo maua foi i tusitusiga a Paulo (tagai i le 2 Korinito 3:3; Eperu 8:10). Mo se talanoga e uiga i le liuaina ma le loto, tagai i le David A. Bednar, “Faaliliuina i le Alii,” Liahona, Nov. 2012, 106–9.

  29. O le tatalo o le faamanatuga o le areto o loo faaalia matagofie mai ai le natura o a tatou sootaga i feagaiga ma lo tatou Tama Faalelagi. I le fuafuaga o le faaolataga a le Tama tatou te osifeagaiga ai ma lo tatou Tama Faalelagi, ae o faamoemoega o feagaiga ua iloaina ma e tatou te agavaa mo faamanuiaga na folafolaina mai e ala mai i le Alii o Iesu Keriso; o Ia o le Puluvaga. I le sauniga o le faamanatuga tatou te molimau atu ai i le Tama (i lona uiga, osifeagaiga ai ma Ia) ua tatou loto e tauave i o tatou luga le suafa o Iesu Keriso, manatua pea o Ia, ma tausi Ana poloaiga ina ia tatou maua pea Lona Agaga (o le Agaga Paia lea) e faatasi ma i tatou.

    O meaalofa i folafolaga a le Tama e oo mai e ala i le mana togiola ma le faamalosiau o Iesu Keriso. Mo se faataitaiga, e pei ona aoao mai e Peresitene Russell M. Nelson, o Iesu Keriso “o le puna o olioli uma” (tagai “Olioli ma le Ola ai Faaleagaga,” Liahona, Nov. 2016, 82). O le mea lea, o le tāmau o la tatou taulaiga ia Iesu Keriso e aumai ai le olioli i o tatou olaga e tusa lava po o a o tatou tulaga.

  30. Na pu’eina e Peresitene Ezra Taft Benson le aafiaga o lenei suiga i uiga faaalia ma tulaga faamasani ina ua ia saunoa, “Pe a oo ina tuu le avea o le usiusitai ma mea faaonoono ae avea ma a tatou sailiga, o le taimi lena o le a faaee mai ai e le Atua le mana ia i tatou” (i le Donald L. Staheli, “Obedience—Life’s Great Challenge,” Ensign, May 1998, 82).

  31. Ioane 16:32.

  32. Mo nisi talanoaga e uiga i le tulaga moni o le popolega o le Tama ma le Alo mo, fiafia i, alofa mo, ma le aafia i o tatou olaga, tagai i le Jeffrey R. Holland, “O Le Silisiliese o le Atua,” Liahona, Nov. 2003, 70–73; Henry B. Eyring, “Savali faatasi ma A’u,” Liahona, Me 2017, 82–85. Tagai foi Mataio 18:20; 28:20; Mataupu Faavae ma Feagaiga 6:32; 29:5; 38:7; 61:36; 84:88.

  33. Tagai i le Roma 8:35–39; 1 Korinito 13:1–8; Moronae 7:46–47.

  34. Mataupu Faavae ma Feagaiga 50:27. Ia manatua e aumai e le Alii ia i latou taitoatasi ua faauuina ma auina atu lenei folafolaga e faatatau i, ma e faatapulaaina e ala, i tofiga faapitoa ua tuuina atu ia te ia:

    “O ia o lē ua faauuina e le Atua ma auina atu, o ia lava lea ua tofia ia avea ma lē ua sili, e ui ina o ia e aupito faatauvaa ma o le auauna a tagata uma.

    “O le mea lea, ua maua e ia mea uma; ona ua pule o ia i mea uma, o mea uma i le lagi ma i luga o le lalolagi, o le ola ma le malamalama, o le Agaga ma le mana, na auina mai i le finagalo o le Tamā, e ala mai ia Iesu Keriso, lona Alo.

    “Ae e leai se tagata na te mauaina mea uma vagana ua taʼumama ma faamamaina o ia mai agasala uma.

    Ma afai ua taʼumama ma faamamaina outou mai agasala uma, soo se mea tou te ole atu ai i le suafa o Iesu o le a faia lava” (Mataupu Faavae ma Feagaiga 50:26–29).

  35. Tagai i le 1 Samuelu 16:7; 1 Korinito 2:14. Mo se faataitaiga o lenei faamanuiaga o le vaai atu e pei ona silasila mai Iesu, tagai i le faamatalaga a Peresitene Henry B. Eyring e uiga i lona aafiaga i le avea ai ma se epikopo o se alii talavou na faia se solitulafono. Na fetalai atu le Alii ia Epikopo Eyring i lena taimi, “O le a Ou tuu atu ia te oe ina ia vaai atu ia te ia e pei ona Ou vaai ia te ia” (“Savali faatasi ma A’u,” 84).

  36. O le folafolaga ma le poloaiga lenei na tuuina atu e le Faaola i tagata i le malumalu i Nuumau. Na Ia poloaiina i latou ina ia latou ola ina ia i ai Lona malamalama ma Lana faataitaiga ia i latou, ina ia mafai ona latou uuina o Ia i luga e avea ma malamalama i le lalolagi i o latou olaga ma ia latou valaaulia i isi e o mai ia te Ia. E pei ona soifua ma valaaulia e Ona soo, o le a lagona e isi o Ia ma vaai ia te Ia i auauna a le Alii. (Tagai i le 3 Nifae 18:24–25.)

  37. Tagai i le Russell M. Nelson, “O Le Tau o le Mana o le Perisitua,” Liahona, Me 2016, 68.

  38. Tagai i le Mataupu Faavae ma Feagaiga 84:88.