Դասեր ջրհորի մոտ

Քույրե՛ր, ես գիտեմ, որ ձեզնից շատերը նույն կերպ են զգում, քանի որ չգիտեք, թե ինչպես դիմագրավել դժվարին մարտահրավերներին ու կորուստներին, քանի որ ձեր կյանքը չի ընթանում այնպես, ինչպես որ դուք հույս ունեիք, աղոթում էիք և ծրագրել էիք:

Անկախ մեր հանգամանքներից, մեր կյանքը սուրբ է և ունի իմաստ ու նպատակ: Մեզանից յուրաքանչյուրը Աստծո սիրելի դուստրն է, և մենք ծնվել ենք մեր Երկնային Հորը նմանվելու ներուժով:

Իր քավիչ զոհաբերության միջոցով մեր Փրկիչ Հիսուս Քրիստոսը հնարավորություն տվեց մեզ մաքրվել և բժշկվել՝ արտոնելով մեզ իրականացնել մեր նպատակը երկրի վրա՝ անկախ ընտանիքի անդամների որոշումներից, մեր ամուսնական կարգավիճակից, ֆիզիկական և մտավոր առողջությունից կամ որևէ այլ իրավիճակից:

Դիտարկենք ջրհորի մոտ գտնվող կնոջը: Ինչպիսի՞ն էր նրա կյանքը: Հիսուսը հասկացավ, որ նա հինգ ամուսին էր ունեցել և այժմ ամուսնացած չէր այն տղամարդու հետ, ում հետ ապրում էր: Եվ այնուամենայնիվ, չնայած նրա կյանքի դժվարություններին, Փրկիչի առաջին հրապարակային հայտարարությունը, որ Ինքը Մեսիան է, ուղղված էր նրան: Նա ասաց. «Ես եմ, որ քեզ հետ խօսում եմ»:²

Այդ կինը դարձավ հզոր վկա՝ իր քաղաքում գտնվողներին հայտարարելով, որ Հիսուսը Քրիստոսն է: «Եւ Սամարացիների այն քաղաքիցը շատերը հաւատացին նորան այն կնկայ խօսքի համար»։³

Նրա անցյալ ու ներկա հանգամանքները չէին որոշում նրա ապագան։ Նրա նման մենք կարող ենք ընտրել՝ այսօր դիմել Փրկիչին այն ուժի և բժշկության համար, որը մեզ հնարավորություն կտա իրականացնելու այն ամենը, ինչի համար մենք այստեղ ենք:

Վարդապետություն և Ուխտերի հայտնի հատվածում Տերը խրախուսում է կանանց և տղամարդկանց, որ «ջերմեռանդ ներգրավված լինեն բարի գործի մեջ, և շատ բաներ անեն իրենց իսկ ազատ կամքով, և շատ արդարություն գործեն, քանզի զորություն կա նրանց մեջ»:⁴

Քույրե՛ր, զորություն կա մեր մեջ, որ շա՛տ արդարություն գործենք:

Նախագահ Ռասսել Մ. Նելսոնը վկայել է. «Յուրաքանչյուր կին և յուրաքանչյուր տղամարդ, որն Աստծո հետ ուխտ է կապում և պահում այդ ուխտերը, և արժանիորեն մասնակցում է քահանայության արարողություններին, նրանց ուղղակիորեն մատչելի է Աստծո զորությունը»:⁵

Ես հասկացել եմ, որ երբ մենք ձգտում ենք հարգել սուրբ ուխտերը, որոնք կնքվել են մկրտության ժամանակ և սուրբ տաճարներում, Տերը կօրհնի մեզ «Իր բժշկող, ամրապնդող զորությամբ» և այնպիսի «հոգևոր ըմբռնումով ու զարթոնքով, որ [մենք] երբևէ չենք ունեցել նախկինում»:⁶

Լեռան քարոզում Հիսուսն ուսուցանեց Իր աշակերտներին. «Դուք երկրի աղն էք»⁸ և «Դուք աշխարհի լոյսն էք»:⁹ Ավելի ուշ երկնքի արքայության աճը Նա համեմատեց թթխմորի հետ, «որ մի կնիկ առաւ՝ եւ երեք չափ ալիւրի մէջ թագցրեց մինչեւ որ բոլորը խմորուեցաւ»:¹⁰

• Աղ

• Թթխմոր

• Լույս

Նույնիսկ շատ փոքր քանակությամբ, սրանցից յուրաքանչյուրն ազդում է իր շուրջը եղած ամեն ինչի վրա: Փրկիչը հրավիրում է մեզ օգտագործել Իր զորությունը և լինել աղ, թթխմոր և լույս:

Քույրե՛ր, սրտերը կարող են փոխվել, և կյանքերը օրհնվել, երբ մենք առաջարկում ենք մի պտղունց աղ, մի գդալ թթխմոր և լույսի մի շող:

Ես վկայում եմ, որ Փրկիչը մեր կյանքի աղն է, և հրավիրում է մեզ ճաշակել Իր ուրախությունից և սիրուց:¹⁴ Նա է մեր թթխմորը, երբ մեր կյանքը ծանր է, և բերում է մեզ հույս՝¹⁵ կրելով մեր բեռները¹⁶ Իր անզուգական ուժի և փրկագնող սիրո միջոցով:¹⁷ Նա է մեր լույսը,¹⁸ որ լուսավորում է մեր տունդարձի ճամփան:

Ես աղոթում եմ, որ մենք կարողանանք գալ Փրկիչի մոտ, ինչպես կինը ջրհորի մոտ, և խմենք Նրա կենդանի ջրից: Ապա, Սամարիայի ժողովրդի հետ մենք կարող ենք հայտարարել. «Այլ եւս քո խօսքերի պատճառով չենք հաւատում. … որովհետեւ մենք ինքներս լսեցինք, եւ գիտենք որ ճշմարտապէս սա է աշխարհի Փրկիչը՝ Քրիստոսը»։¹⁹ Հիսուս Քրիստոսի անունով, ամեն։