“Jakobi dhe Familja e Tij”, Tregime nga Dhiata e Vjetër (2022)
“Jakobi dhe Familja e Tij”, Tregime nga Dhiata e Vjetër
Zanafilla 27–33
Jakobi dhe Familja e Tij
Si i mban Zoti premtimet e Tij
Jakobi u largua nga shtëpia e tij për t’i shpëtuar vëllait të tij të zemëruar, Esaut. Babai e bekoi Jakobin që të gjente dhe të martohej me një grua që e donte Zotin dhe i zbatonte urdhërimet e Tij.
Ndërsa Jakobi udhëtonte, Zoti e vizitoi atë në një vegim. Ai i premtoi të ishte gjithmonë me Jakobin. Jakobi premtoi t’i jepte Zotit të dhjetën e gjithçkaje që fitonte.
Zoti i premtoi Jakobit se do të kishte shumë fëmijë. Nëpërmjet fëmijëve të Jakobit, familjet e tokës do të bekohen që ta njohin Shpëtimtarin. Familja e Jakobit në ditët e mëvonshme quhet shtëpia e Izraelit.
Zanafilla 28:3–4, 14; 1 Nefi 10:14
Jakobi udhëtoi për te një vend i quajtur Haran. Atje ai ra në dashuri me një grua të drejtë të quajtur Rakela.
Jakobi ra dakord të punonte shtatë vjet për babanë e saj, Labanon, nëse Labanoja do ta lejonte të martohej me Rakelën. Labanoja ra dakord. Jakobi punoi për shtatë vjet.
Por Labanoja donte që Lea, bija e tij më e madhe, të martohej e para. Gjatë dasmës, Labanoja e mashtroi Jakobin dhe e detyroi të martohej me Lean. Por Jakobi dashuronte Rakelën. Ai premtoi të punonte edhe shtatë vjet nëse mund të martohej edhe me atë. Labanoja ra dakord dhe familja e Jakobit filloi të rritej.
Zanafilla 29:28–35; 30:3–13, 17–24; Jakobi [LiM] 2:27–30
Labanoja nuk e pagoi ndershmërisht Jakobin. Por Zoti e bekoi Jakobin me shumë kafshë dhe i tha Jakobit të kthehej në shtëpi.
Zanafilla 30:31, 43; 31:1–7, 17–18
Rrugës për në shtëpi, Jakobi mësoi se vëllai i tij, Esau, dhe 400 burra po vinin për ta takuar.
Jakobi mendoi se Esau mund të ishte ende i zemëruar me të. Jakobi trembej për sigurinë e familjes së tij, kështu që e çoi në një vend të sigurt dhe u lut.
Jakobi u lut gjithë natën deri në mëngjes. Zoti e vizitoi Jakobin dhe e bekoi. Zoti i tha Jakobit se do të ishte një udhëheqës i madh për shumë njerëz. Zoti e ndryshoi emrin e Jakobit në Izrael.
Shpejt Esau dhe njerëzit e tij e gjetën Jakobin dhe familjen e tij. Esau nuk ishte më i zemëruar me Jakobin. Ai vrapoi që ta takonte Jakobin dhe e përqafoi. Ai ishte shumë i lumtur që e shihte dhe që takoi familjen e tij. Jakobi ishte i lumtur gjithashtu që e shihte përsëri Esaun.
Zoti i mbajti premtimet e Tij ndaj Jakobit gjatë gjithë jetës së tij. Jakobi arriti në shtëpi me familjen e tij dhe u vendos atje. Prej atëherë e tutje, Jakobi u quajt Izrael dhe pjesëtarët e familjes së tij u quajtën izraelitë. Ai vazhdoi t’i zbatonte urdhërimet dhe ta adhuronte Zotin.