Ol Famli we Oli No Save Finis
Prishud wok blong yumi we yumi mas mekem i blong putum famli blong yumi mo famli blong olgeta raon long yumi oli stap long medel blong tingting blong yumi.
Mi glad tumas blong stap wetem yufala tedei long jeneral prishud miting blong Jos blong Jisas Kraes blong Ol Lata-dei Sent. Hemia wan bigfala taem long histri blong Jos. Wan handred eititu yia i pas, long 1834, long Ketlan, Ohaeo, evri prishud oli bin kam tugeta long wan 4 bae 4 log skul haos. Long miting ia, Profet Josef Smit i bin talem: “Long saed blong fiuja blong Jos mo kingdom, yufala i no save moa bitim wan bebi we i sidaon long leg blong mama blong hem. Yufala i no andastanem nating. … Wan smol grup blong Prishud nomo yufala i stap luk ia tedei, be Jos ia, bae i fulumap Not mo Saot Amerika—bae i fulumap wol.”1
Ol milian prishud man, long moa long 110 kantri, oli kam tugeta long sesen ia. Maet Profet Josef i bin luk finis tedei mo bigfala fiuja we i stap kam yet long fored blong yumi.
Mesej blong mi tedei, i blong traem tokbaot fiuja ia mo wanem yumi mas mekem blong stap pat blong plan blong hapines ia we Papa long Heven i bin rere blong yumi. Bifo yumi bon, yumi bin laef long wan famli wetem Papa long Heven we i olsem King mo i no save finis. Hem i odenem wan wan we i mekem yumi go fored mo progres blong kam olsem Hem. Hem i mekem from Hem i lavem yumi. Stamba tingting blong plan ia i blong letem yumi gat spesel janis ia blong laef blong oltaem olsem we Papa blong yumi long Heven i stap laef. Gospel plan ia i givim laef long wol ia we bae yumi gat tes. Wan promes i kamaot tru long Atonmen blong Jisas Kraes, se sapos yumi obei ol loa mo prishud odinens blong gospel, bae yumi gat laef we i no save finis, we i presen we i moa hae long evriwan.
Laef we i no save finis i kaen laef ia we God, Papa blong yumi we i no save finis i stap laef long hem. God i talem se stamba tingting blong Hem i blong “mekem man i nomo save ded mo i kasem laef we i no save finis” (Moses 1:39). From hemia, bigfala stamba tingting blong evri prishud i blong help long wok ia blong mekem ol pipol oli go kasem laef we i no save finis.
Evri prishud wok, mo evri prishud odinens i blong helpem ol pikinini blong Papa long Heven blong oli jenis tru long Atonmen blong Jisas Kraes, blong oli kam ol memba blong ol famli yunit we oli kam stret evriwan. I folem toktok ia we i talem se “bigfala wok blong evri man i blong bilivim gospel, blong stap obei ol komanmen, mo blong krietem mo mekem famli yunit we i no save finis i kam stret evriwan,”2 mo i blong helpem ol narafala man blong mekem semmak.
From se hemia i tru, evri samting yumi mekem, i mas gat selestial mared olsem gol mo stamba tingting. Hemia i minim se yumi traehad blong sil long wan kompanion we i no save finis insaed long tempol blong God. Yumi mas leftemap tingting tu, blong ol narawan, blong mekem mo holem ol kavenan we i joenem wan hasban mo wan waef tugeta, wetem famli blong tufala, long laef ia mo long wol we i stap kam.
?From wanem hemia i impoten tumas long wanwan long yumi—yangfala o olfala, dikon o hae pris, boe o papa? Hem i from prishud wok we yumi mas mekem blong putum famli mo famli blong olgeta raon long yumi oli stap long medel blong tingting blong yumi. Evri bigfala desisen bae i stanap long risal we desisen ia i mekem long famli blong kwalifae from laef wetem Papa long Heven mo Jisas Kraes. I no gat wan samting long prishud seves blong yumi we i impoten olsem hemia.
Bae mi talem se hemia i minim wanem long wan dikon we i stap lisin tedei olsem wan memba blong wan famli yunit, mo olsem wan memba blong kworom.
Long famli blong hem, maet i gat o i no gat famli prea oltaem, o famli haos naet oltaem. Sapos papa blong hem, we i filim save ol wok ia, i singaotem famli i kam tugeta blong prea o ridim skripja, nao dikon ia i save ron blong tekpat wetem wan smael. Hem i leftemap tingting blong ol brata mo sista blong hem blong tekpat mo presem olgeta taem oli mekem. Hem i save askem papa blong hem blong givim wan blesing taem skul i stat o long wan nara taem blong nid.
Maet hem i no gat wan fetful papa. Be tingting blong hat blong hem blong gat ol eksperiens ia bae i tekem ol paoa blong heven long olgeta raon long hem from fet blong hem. Bae oli lukaotem blong gat famli laef ia we dikon i wantem long ful hat blong hem.
Tija, long Aronik Prishud i save luk long hom tijing wok blong hem, wan janis blong helpem Lod i jenisim laef blong wan famli. Lod i talem long Doktrin mo Ol Kavenan:
“Diuti blong tija i blong lukaotem jos oltaem, mo stap wetem mo mekem olgeta oli kam strong moa;
“Mo i mas luk se i no gat rabis fasin insaed long jos, mo i no gat strong fasin wetem wanwan long olgeta, i no gat giaman, i no gat fasin blong tok biaen long bak, i no gat fasin blong tokbaot nogud ol man” (D&C 20:53–54).
Semmak, pris long Aronik Prishud i kasem wok ia:
“Diuti blong pris i blong prij, blong tij, blong eksplenem, blong askem strong, mo blong baptaesem man, mo blong blesem mo pasem sakramen,
“Mo blong visitim haos blong wanwan memba, blong askem strong long olgeta blong prea long wan voes we i laod, mo long sikret mo blong mekem evri famli diuti” (D&C 20:46–47).
Maet yu save askem yuwan, semmak olsem mi taem mi yang tija mo pris, ?olsem wanem nao bae mi fesem ol jalenj ia.” Mi neva save stret, wei we bae mi save toktok blong muvum wan famli blong go from laef we i no save finis mo semtaem, no mekem hem i harem nogud o tokbaot nogud hem. Mi bin lanem se i gat wan toktok nomo we i save jenisim hat, mo toktok ia i kam long Tabu Spirit. Hemia i hapen plante taem, taem yumi talem testemoni abaot Sevya, we i bin mo i stap yet wan memba blong famli we i stret evriwan. Taem yumi lukluk nomo long lav we yumi gat long Hem, gud taem mo pis bae i gro insaed long ol hom yumi stap visitim. Tabu Spirit bae i givhan long seves blong yumi long ol famli.
Yang prishud man, i save, long wei we hem i stap prea, long wei we hem i toktok, mo long wei we hem i leftemap tingting blong ol memba blong famli, lidim maen mo hat blong olgeta i go long paoa mo eksampol blong Sevya.
Wan waes prishud lida i soem long mi se hem i andastanem hemia. Hem i bin askem yang boe blong mi blong tekem lid long hom tijing visit. Hem i talem se famli ia bae i no lisin long toktok blong hem, be hem i ting se wan simpol tijing mo testemoni blong wan boe i save gotru long strong hat blong olgeta.
?Wanem nao yang elda ia i save mekem blong help krietem ol famli we oli no save finis? Maet hem i stap rere blong go long misin. Hem i save prea wetem ful hat blong hem se bae hem i save faenem, tijim mo baptaesem ol famli. Mi tingbaot yet wan naes yang man, wetem waef blong hem mo tufala smol gel blong tufala i sidaon wetem mi mo misinari kompanion, long wan dei. Tabu Spirit i kam i testifae long tufala se gospel blong Jisas Kraes i bin kambak. Tufala i biliv inaf we tufala i askem sapos mitufala i save givim tufala gel wan blesing olsem we tufala i bin luk oli mekem long sakramen miting. Tufala i wantem finis se pikinini blong tufala i gat blesing, be tufala i no andastanem se ol blesing we oli moa hae bae i posibol nomo insaed long ol tempol blong God afta we oli mekem ol kavenan.
Mi harem nogud yet long kapol ia mo tufala smol gel ia, we ating tufala i bigwan finis, we oli no gat promes blong famli we i no save finis. Papa mo mama blong tufala, i luk smol ol blesing we i save kam long olgeta. Hop blong mi se long wan wei, long wan ples bae oli gat janis blong kwalifae blong kam wan famli we i no save finis.
Ol nara elda we oli go long misin, bae oli gat eksperiens we i moa hapi we boe blong mi, Matiu, i bin gat. Hem mo kompanion blong hem i faenem wan wido wetem 11 pikinini we oli laef long wan laef we i no gud tumas. Hem i wantem olgeta blong gat wanem we yufala i wantem—wan famli we i no save finis. Long boe blong mi, i olsem se i no posibol, o i no save hapen long tetaem ia.
Mi bin visitim smol taon ia plante yia afta we boe blong mi i baptaesem wido, mo wido ia i invaetem mi blong mitim famli blong hem long jos. Mi mas wet smol from plante long ol pikinini blong hem, mo plante apupikinini blong hem, oli kamaot long plante defren japel long eria ia. Wan boe i stap long wan bisoprik, mo plante long ol pikinini blong hem oli kasem blesing blong tempol kavenan mo hem i sil olsem wan famli we i no save finis. Taem mi stap livim sista ia, hem i putum han blong hem raon long wes blong mi (hem i sot, mekem se hem i save kasem wes blong mi nomo), mo talem: “Plis talem Mateo blong i kambak long Jile bifo mi ded.” Hem i kasem, from ol fetful elda ia, wan glad we hem i filim finis, from presen ia we i hae olgeta long evri presen blong God.
I gat sam samting, we wan elda, taem i kambak long misin blong hem, i mas mekem blong stap tru long komitmen blong hem blong lukaotem laef we i no save finis blong hemwan mo olgeta we hem i lavem. I no gat komitmen i moa impoten naoia mo long taem we i no save finis bitim mared. Yu bin harem waes kaonsel ia blong mekem mared i kam faswan long plan afta long misin. Fetful prishud wokman ia, bae i mekem hemia wetem waes.
Taem hem i tingting long mared, bae i luk se hem i stap jusum mama blong ol pikinini blong hem mo wanem bae hem i givim long olgeta. Bae hem i jusum gud, wetem prea. Bae i meksua se woman ia hem i maredem i gat sem standet long saed blong famli, i gat strong tingting abaot stamba tingting blong Lod long saed blong mared, mo woman ia i wan we bae hem i save trastem wetem hapines blong ol pikinini blong hem.
Presiden N. Eldon Tanna i givim waes kaonsel ia: “Famli we yu mas givim ona moa long eni nara memba blong famli, i ol pikinini we bae yu gat. Ol pikinini ia oli gat raet blong gat ol gudfala papa mo mama we i posibol blong oli gat—wan klin papa mo mama.”3 Fasin we i klin gud bae i protektem yu mo protektem pikinini blong yu. Yu mas givim blesing ia long olgeta.
Nao. I gat ol hasban mo ol papa we oli stap lisin tedei. ?Wanem nao yu save mekem? Mi hop se bae yu wantem mekem ol jenis we i nid blong yu mo famli blong yu i stap long selestial kingdom wan dei. Olsem wan prishud papa, wetem waef long saed, yu save tajem hat blong wanwan memba blong famli blong leftemap tingting blong olgeta blong wet from dei ia. Bae yu go long sakramen miting blong yu wetem famli blong yu, mo mekem yu rere blong tekem famli blong yu i go long tempol. Bae yu muv wetem olgeta folem rod ia i go long wan famli hom we i no save finis.
Bae yu tritim waef blong yu mo ol pikinini long wei we Papa long Heven i bin tritim yu. Bae yu folem eksampol mo daereksen blong Sevya blong lidim famli blong yu long wei blong Hem.
“I no gat eni paoa o fos we man i save yusum o mas yusum tru long prishud, be nomo wetem fasin blong winim tingting blong man, wetem fasin blong safa longtaem, wetem fasin blong gat tingting i stap daon mo fasin blong no stap flas, mo wetem fasin blong gat tru lav;
“Tru long fasin blong stap kaen, mo wan klin save, we bae i leftemap sol bigwan mo i no gat fasin blong tufes, mo i no gat fasin blong no stap ones—
“Yu mas stap tok strong long stret taem wetem strong fasin, taem Tabu Spirit i lidim yu; mo afta, yu mas soemaot wan lav we i bigwan moa long hem we yu bin tok strong long hem, blong mekem se hem i no ting se yu wan enemi blong hem” (D&K 121:41–43).
Lod i talem long ol prishud papa wanem kaen hasban oli mas stap. Hem i talem: “Bambae yu mas lavem waef blong yu wetem ful hat blong yu, mo yu mas stap strong fulwan long hem mo i no wan narawan” (D&K 42:22). Taem Masta i toktok long tugeta hasban mo waef, Hem i givim oda ia: “Yu no mas mekem adaltri, … mo yu no mas mekem eni samting we i semmak long hemia” (D&K 59:6).
Long ol yut, Lod i putum standet ia i stap: “Ol pikinini. Oltaem yufala i mas obei long ol papa mama blong yufala, …mo fasin ya i save mekem Masta blong yumi i glad long yufala,” (Kolosi 3:20), mo “oltaem yufala i mas ona long papa mo mama blong yufala” (Eksodas 20:12).
Taem Lod i toktok long evriwan insaed long famli, advaes blong Hem i blong evriwan i lavlavem mo sapsapotem wanwan.
Hem i askem yumi blong “traehad blong mekem laef blong wanwan memba blong famli i kam stret moa; blong mekem strong olgeta we oli no strong,; blong karembak hemia we i mestem rod, mo glad long wan niu paoa long spirit.”4
Lod i askem tu blong yumi mekem evri samting blong helpem olgeta we oli ded finis blong stap wetem yumi long hom we i no save finis.
Hae pris grup lida we i wok had blong helpem ol pipol blong faenem ol bubu blong olgeta mo tekem nem blong olgeta blong go long tempol, i stap sevem olgeta we oli go finis. Bae i gat tangkyu long wol we i stap kam i go long ol hae pris ia, mo olgeta we oli mekem ol odinens, from se oli no fogetem famli blong olgeta we oli stap wet long spirit wol.
Ol profet oli talem: “Wok blong Lod we i moa impoten we bae yu mekem, bae i wok we yu stap mekem insaed long ol wol blong haos blong yu. Hom tijing, wok blong bisoprik, mo ol nara wok blong Jos oli impoten tu, be wok we i moa impoten i hemia insaed long ol wol blong haos blong yu.”5
Insaed long hom mo prishud seves blong yu, praes we i moa hae i stap long ol smol aksen we i helpem yumi mo olgeta yumi lavem blong kasem laef we i no save finis. Olgeta aksen ia, bae oli luk smol long laef ia, be oli karem ol blesing we i stap oltaem long taem we i no save finis.
Taem yumi stap fetful long seves blong yumi blong helpem ol pikinini blong Papa long Heven blong gobak hom long Hem, bae yumi kwalifae from gudfala welkam we yumi evriwan i wantem harem taem yumi finisim seves blong yumi long wol ia. Ol toktok ia oli: “Ei Yu yu mekem wan gudfala wok, Yu yu wan gudfala man we yu lukaot gud long wol wok blong mi. From we yu bin lukaot gud long smol bisnis ia we mi putum long han blong yu, bambae mi putumap yu blong yu lukaot long plante bisnes. Yu kam joen long lafet blong mi” (Matiu 25:21).
Long medel blong “ol plante bisnis ia,” i gat promes blong yu gat wan famli laen we i no gat en. Hem i prea blong mi se bae yumi evriwan i kwalifae mo helpem ol narawan blong kwalifae from bigbigfala blesing ia long hom blong Papa blong yumi mo Pikinini blong Hem, Jisas Kraes. Long tabu nem blong Jisas Kraes, amen.