Fasin blong Agens long Saed blong Evri Samting

Stamba blong laef long wol ia i blong ol pikinini blong God oli kasem ol eksperiens we oli nid blong kam stret evriwan mo long en luksave tabu fiuja blong olgeta olsem wan we i gat long laef we God i king long hem.¹ Olsem we Presiden Tomas S. Monson i tijim yumi wetem paoa long moning ia, yumi stap progres taem yumi mekem ol joes, we oli ol tes we i soem se bae yumi obei long ol komanmen blong God o no (luk long Abraham 3:25).. Blong kasem tes, yumi mas gat fridom blong jusum bitim tu rod. Blong gat ol defren rod blong jusum blong yumi yusum fridom blong mekem joes, yumi mas gat samting i kam agensem yumi.

Haf blong plan we i stap, i gat nid long hem tu. Taem yumi mekem ol rong joes—from bae yumi mekem—yumi kam doti long sin, mo yumi mas klinim yumi blong muv fored i go from fiuja ia blong yumi we i no save finis. Plan blong Papa i givim wan rod blong mekem hemia, rod ia blong stretem wanem jastis i askem: wan Sevya i pem praes blong pemaot yumi long ol sin blong yumi. Sevya ia i Lod Jisas Kraes, Wan Stret Pikinini ia Nomo blong God, we i Papa we I No Save Finis; sakrifaes blong Sevya— we safaring blong Hem—i pem praes from sin blong yumi sapos yumi sakem sin blong yumi.

Wan long ol gudfala eksplenesen blong rol blong fasin blong agens long plan, i stap long Buk blong Momon, long tijing blong Lihae long boe blong hem, Jekob.

“From i mas nid i stap, se i mas gat wan fasin blong go agens long evri samting. Sapos i no olsem, fasbon blong mi long waelples, stret fasin i no save hapen, mo tu, fasin nogud, mo tabu fasin o ol sore, mo tu, gud o nogud” (2 Nifae 2:11; luk tu long ves 15).

Nao, Lihae i gohed: “From samting ia, Lod God i bin givim long man blong hem i mas tekem aksen blong hemwan. From samting ia, man i no save tekem aksen blong hemwan sapos i no gat wan o wan narafalawan blong pulum tingting blong hem” (ves 16). Semmak, long revelesen blong tedei, Lod i talem: “Mo i mas nid blong i olsem; blong devel i mas temtem ol pikinini blong man, sapos no, bae oli no save mekem samting blong olgetawan” (luk long D&C 29:39).

Fasin blong agens i bin nid blong stap long Garen blong Iden. Sapos Adam mo Iv, tufala i no bin mekem joes ia we i mekem se man i save ded, Lihae i tijim: “Mo bae oli no bin gat eni pikinini; from samting ia, … oli no bin mekem eni gud, from oli no bin save sin” (2 Nifae 2:23).

Stat long stat, fridom blong joes mo fasin blong agens oli stamba blong plan blong Papa mo blong fasin blong agens blong Setan agensem plan ia. Olsem we Lod i talemaot long Moses long kaonsel blong heven, Setan “i bin wantem blong prapa spolem gud fridom blong man blong mekem joes” (luk long Moses 4:3). Blong yumi prapa lus evriwan, bae i risal blong wanem Setan i proposem. Hem i kam long fored blong Papa mo talem: “Luk, mi hemia, yu sendem mi, bae mi pikinini blong yu, mo bae mi pemaot evri man, blong mekem se i no gat wan sol i lus, mo i tru, bae mi mekem; from hemia bae yu givim ona blong yu i kam long mi” (luk long Moses 4:1).

Long wei ia Setan i proposem blong kareaot plan blong Papa, long wan wei we bae i blokem stamba tingting blong Papa mo givim glori long Hem, Setan.

Rod blong Setan bae i mekem se evriwan i ikwol: bae i pemaot evri kaen man, bae i no gat wan sol i lus. Bae i no gat fridom blong joes, o eniwan i no save jusum samting, mo i no nid blong gat fasin blong agens. Bae i no gat tes, no gat fasin blong mestem rod mo no gat sakses. Bae yumi no save gro blong kasem stamba tingting we Papa i gat long ol pikinini blong Hem. Ol skripja oli rekodem se agens blong Setan i mekem se i gat “wo long heven” (Revelesen 12:7), mo evri pikinini blong God oli kasem raet blong kam laef long wol from oli jusum plan blong Papa mo sakemaot Setan, be wan pat aot long tri nomo oli no kam.

Stamba tingting blong Setan i blong givim hemwan ona mo paoa blong Papa (luk long Aesea 14:12–15; Moses 4:1, 3). Papa i talem: “From hemia, from se Setan i bin kam agensem mi, … mi bin mekem se oli sakemaot hem” (Moses 4:3) wetem evri spirit we oli yusum raet blong jusum blong folem hem (luk long Jud 1:6; Revelesen 12:8–9; D&C 29:36–37). Oli sakemaot olgeta olsem ol spirit we oli no gat bodi, oli kam long wol ia; nao Setan mo olgeta we oli folem hem oli stap temtem, mo lukluk blong giaman mo mekem prisena ol pikinini blong God (luk long Moses 4:4).. So devel wan ia, we i agensem mo lukaotem blong prapa spolem plan blong Papa, i mekem se plan ia i hapen, from se fasin blong agens nao i mekem se i gat joes, mo hem i janis blong mekem ol raet joes ia nao we i lidim man blong gro, we i stamba blong plan blong Papa.

Wanem i impoten tu se, temtesen blong mekem sin i no wan kaen fasin blong agens nomo long laef long wol ia. Papa Lihae i tijim se sapos Foldaon blong Adam i no bin tekem ples, bae Adam mo Iv, “bae oli bin stap long wan ples we oli no gat rong from oli no save, oli no gat glad, from oli no bin save sore; oli no bin mekem eni gud, from oli no bin save sin” (2 Nifae 2:23). Sapos i no gat eksperiens blong agens long laef long wol ia, “evri samting bae i mas kam tugeta long wan”, mo bae i no gat hapines o harem nogud (ves 11). Papa Lihae i gohed se, from hemia, afta we God i bin krietem evri samting “blong mekem ol stamba tingting blong hem blong laef we i no save finis i hapen … evri samting we hem i bin mekem, i mas gat wan samting we i agens; olsem frut we i no blong kakae blong go agensem tri blong laef; wan i swit mo narawan i konkon” (ves 15).² Tijing blong hem long saed blong pat blong plan ia blong fasin blong sevem man i en wetem ol toktok ia:

“Be luk, evri samting i bin hapen long waes tingting blong hem, we i save evri samting.

“Adam i bin foldaon blong mekem se man i save stap; mo ol man oli stap, blong oli save gat glad” (ol ves 24–25).

Fasin blong agens, we i kamaot olsem ol bigfala hadtaem we yumi fesem long laef ia, i pat tu blong plan we i mekem se bae yumi gro long laef long wol ia.

Yumi evriwan i gotru long plante defren kaen fasin blong agens we i testem yumi. Sam long ol tes ia oli temtesen blong mekem sin. Sam oli ol jalenj long wol ia we i no kamaot long sin blong yumi. Sam tes ia oli bigbigwan. Sam oli moa smol. Sam oli gogohed oltaem, mo sam oli kam wanwan taem. I no gat wan long yumi i save ronwe long hem. Fasin blong agens i letem yumi gro i go from wanem Papa long Heven i wantem yumi blong kam.

Afta we Josef Smit i finisim wok blong transletem Buk blong Momon, hem i mas faenem wan man blong pablisim buk. Hemia i no bin isi. Buk ia we i longwan mo i hadwok blong printim, mo mane blong printim mo joenem plante taosen kopi blong buk ia, wok blong hem i bigwan. Faswan, Josef i luk E. B. Grandin, wan printa long Palmaera, we i no wantem mekem. Nao i go long wan narawan long Palmaera, we i no wantem tu. Hem i wokbaot 40 kilometa mo go luk top printa blong Wes Niu Yok, we, hem tu, i no wantem. Wan printa blong Rojesta i bin glad blong mekem, be situesen i mekem se i no bin posibol.

Ol wik oli pas, mo Josef i harem nogud long fasin blong agens we i kam blong tabu wok ia i hapen. Lod i no bin mekem hemia i isi, be Hem i bin mekem i posibol. Long nambafaef taem, hem i gobak long Grandin, mo hem i gotru.³

Sam yia afta, Josef i harem nogud taem i stap prisena long Libeti Kalabus blong plante manis. Taem hem i prea blong kasem help, Lod i talem hem se “evri samting ia oli blong givim eksperiens long yu, mo bae i blong gud blong yu” (luk long D&C 122:7).

Yumi evriwan i save gud long ol nara kaen agens blong wol ia we i no hapen from sin blong yumiwan, olsem sik, handikap, mo ded. Presiden Tomas S. Monson i eksplenem:

“ Sam long yufala, samtaem i bin krae bigwan long safaring blong yufala, i askem from wanem Papa long Heven i letem yu gotru long kaen tes yu stap fesem. …

“Be laef blong yumi, i no blong hem i isi o stap gud oltaem. Papa blong yumi long Heven i save se yumi lan mo gro mo kam gud moa tru long ol had jalenj, harem nogud we i bigwan, mo ol had joes. Wanwan long yumi i gotru long taem we i tudak, taem wan i ded, taem we i soa from helt i soa, ol filing se oli fogetem yumi from olgeta we yumi lavem oli lego yumi. Olgeta tes ia mo sam moa, oli putum yumi long ril tes blong yumi long paoa blong stap strong.” ⁴

Ol hadwok blong kam antap long fasin blong kipim Sabat i wan nara eksampol blong fasin blong agens. Yumi gat ol komanmen blong Lod blong ona long Sabat. Sam long olgeta joes blong yumi, oli save agensem komanmen ia, be sam nara joes long hao yumi spendem taem long Sabat i wan kwestin nomo blong sapos o no bae yumi mekem wanem we i gud nomo, o wanem i gud moa o moa gud.⁵

Blong givim eksampol blong agens tru long temtesen, Buk blong Momon i tokbaot trifala wei we devel bae i yusum long ol las dei. Faswan, bae hem i “hem i toktok nogud long ol hat blong ol pikinini blong ol man, mo mekem olgeta blong kam kros agensem samting we i gud” (2 Nifae 28:20). Nambatu, bae hem i “mekem oli kwaet, mo giaman long olgeta blong lidim olgeta i go long sefples we i blong wol” mo talem: “Saeon i kam antap gud, evri samting i oraet” (ves 21). Nambatri, bae hem i talem long yumi “i no gat hel; … Mi mi no wan devel, from i no gat wan” (ves 22), mo from hemia, i no gat raet o rong. From fasin ia blong agens, God i givim woning long yumi blong yumi no “stap les long Saeon!” (ves 24).

Jos, tru long tabu misin blong hem, mo yumi, insaed long wanwan laef blong yumi, i stap fesem agens we i kam bigwan tedei. Maet taem Jos i stap gro long paoa, mo yumi, ol memba i stap gro long fet mo fasin blong obei, Setan i kam antap long paoa blong agens blong yumi gohed blong “gat fasin blong agens long saed blong evri samting.”

Sam long ol fasin blong agens ia i iven kam long ol memba blong Jos. Sam we oli yusum tingting blong olgeta o waes blong stanap agensem ol daereksen blong profet oli yusum nem blong wan grup we oli jusum—tabu grup blong agens. Be nomata i stret long wan dimokrasi, i no gat ples blong tingting ia long gavman blong kingdom blong God, we oli ona long kwestin be i no long fasin blong agens (luk long Matiu 26:24).

Olsem wan nara eksampol, i gat plante samting long stat blong histri blong Jos, olsem wanem Josef Smit i bin o no bin mekem folem ol situesen, we oli yusum olsem stamba blong agens. Long yufala evriwan, mi talem: praktisim fet mo trastem tijing blong Sevya ia we i talem se bae yumi save “makem olgeta long frut blong laef blong olgeta” (Matiu 7:16). Jos i stap mekem plante wok blong soemaot ol rekod we hem i gat, be afta we yumi soem evri samting we yumi save pablisim, samtaem, ol memba ol memba oli gat ol besik kwestin we stadi nomo i save givim ansa. Hemia i pat blong Jos histri we i agens long saed blong evri samting. Sam samting, yumi lanem tru long fet nomo (luk long D&C 88:118). Yumi mas dipen long fet folem witnes we yumi kasem long Tabu Spirit.

God i no stap blokem fridom blong joes blong eniwan long ol pikinini blong Hem, olsem blong blokem help blong sam. Be Hem i mekem se i no hevi blong tekem ol trabol, mo ol hadtaem mo i mekem yumi strong blong tekem olgeta, semmak olsem Hem i mekem long ol pipol blong Alma long graon blong Helam (luk long Mosaea 24:13–15). Hem i no stap blokem evri disasta, be Hem i ansarem prea blong yumi olsem Hem i mekem wetem strong hariken we i wantem kam blokem dedikesen blong tempol long Fiji.⁶ Hem i stap blokem paoa blong olgeta olsem Hem i bin mekem wetem teroris atak we i tekemaot laef blong plante pipol long Brasel eapot, be i givim kil nomo long fo misinari blong yumi.

Tru long evri agens long wol ia, yumi gat tras blong God se bae Hem i “kaontem ol hadtaem blong yumi blong gud blong yumi” (2 Nifae 2:2). Oli tijim yumi tu blong andastanem ol eksperiens long wol ia mo komanmen blong Hem wetem bigfala lukluk long plan blong fasin blong sevem man, we i talem long yumi stamba tingting blong yumi long laef ia mo i givim yumi tras blong wan Sevya, we mi stap testifae abaot trutok ia blong ol samting ia. Long nem blong Jisas Kraes, amen.