Ol Joes
Bae yumi jusum raet rod we i had moa, be i no rong rod we i isi moa.
Ol brata mo sista. Bifo mi statem mesej blong mi tedei, mi wantem anaonsem fofala niu tempol, we, long ol manis mo yia we i stap kam, bae oli bildim long ol ples ia: Kito long Ekuado, Harare long Simbabwe, Belem long Brasil; mo wan nambatu tempol long Lima, Peru.
Taem mi kam memba blong Kworom blong Olgeta Twelef Aposol long 1963, i bin gat 12 tempol we oli open i stat long ful Jos. Wetem dedikesen blong Provo Siti Senta Tempol tu wik i pas, naoia i gat 150 tempol we oli open i stap raon long wol. Yumi mas glad tumas from ol blesing we yumi kasem insaed long ol tabu haos ia.
Naoia, ol brata mo sista. Mi wantem talem glad blong mi from janis blong save serem samfala tingting wetem yufala long moning ia.
Mi bin stap tingting abaot ol joes. Wan toktok i talem se doa blong histri i stap tantanem hem long ol smol insis, mo i semmak wetem laef blong ol pipol. Ol joes we yumi mekem, oli talemaot fiuja blong yumi.
Taem yumi aot long laef bifo hemia long wol ia, yumi kam long wol ia, yumi tekem wetem yumi presen ia blong fridom blong joes. Gol blong yumi i blong kasem selestial glori, mo ol joes we yumi mekem, long bigfala pat, oli talem se yes o no, bae yumi kasem gol blong yumi.
Plante long yufala i save gud long stori blong Alis long buk blong Lewis Karol,Alice’s Adventures in Wonderland (Ol Stori blong Alis long Drimlan.) Bae yu tingbaot se hem i kam long ol krosrod wetem tufala rod i stap, wan i go defren wei, narawan i go defren wei. Taem hem i stap tingting se bae i tanem long wanem saed, hem i fesem Jesae Puskat, mo Alis i askem hem: “?Bae mi folem wanem rod?”
Puskat i ansa: “Hemia i dipen long weples yu wantem go long hem. Sapos yu no save weples yu wantem go long hem, i nomata wanem rod yu tekem.”1
Yumi no olsem Alis, yumi save se yumi wantem go wea, mo i impoten wanem rod nao bae yumi tekem, from rod we bae yumi folem long laef ia, i save go long ples we yumi wantem go long hem long nekis laef.
Bae yumi jusum blong bildimap insaed long yumi, wan bigfala mo strong fet we bae i wanem i difendem yumi agensem ol plan blong enemi—wan bilif we i tru, wan kaen fet ia we bae i helpem yumi mo bae i pusum tingting blong yumi blong jusum raet. Sapos i no gat kaen fet olsem, yumi no go eni ples. Wetem fet, yumi save mekem ol gol i hapen.
Nomata i wan mas blong yumi jusum samting wetem waes, i gat taem we bae yumi mekem ol krangke joes. Presen ia blong fasin blong sakem sin, we Sevya i givim, i save mekem yumi stretem ol rod blong yumi blong yumi save gobak long rod ia we i lidim yumi long selestial glori we yumi stap lukaotem.
Bae yumi faenem strong paoa long tingting blong no folem tingting we i popula. Bae yumi jusum raet rod we i had moa, be i no rong rod we i isi moa.
Taem yumi tingting long ol desisen we yumi mekem long laef blong yumi evri dei—blong mekem joes ia o nara joes—sapos yumi jusum Kraes, bae yumi mekem joes we i stret.
Mi prea se bae i olsem, hemia i prea blong hat blong mi wetem tingting i stap daon, long nem blong Jisas Kraes, Masta mo Sevya blong yumi, amen.