Bae Hem I Putum Yu Antap long Ol Solda blong Hem mo Tekem Yu I Go Hom
Be semmak olsem Man blong Lukaot long Sipsip i faenem sipsip blong Hem we i lus, sapos yu leftemap hat blong yu i go long Sevya blong wol, bae Hem i faenem yu.
Wan long ol memori blong taem mi smol i bigfala noes longwe blong ol alarm wesil we oli krae mo wekemap mi. I no longtaem afta, wan nara saon, laet noes blong propela we i kam bigwan kasem we i seksekem ea. From mama i trenem gud mifala, mifala wanwan ol pikinini i holem basket we i rere, mo ron i go long hil mo haed long bom selta. Taem mifala i stap hariap long bigfala tudak, ol grin mo waet laet bae oli foldaon long skae i kamdaon blong makem ol ples blong slakem bom long hem. I strenj, be evriwan i singaotem ol laet ia, ol Krismes tri.
Mi gat fo yia, mo mi witnesem blong wan wol we i stap long wo.
Dresden
I no longwe tumas long ples we famli blong mi i stap long hem, i gat taon ia, Dresden. Olgeta we oli stap longwe oli witnesem wanem we mi luk ating taosen taem. Bigbigfala faea, we plante danamaet i mekem, i swip tru long Dresden, i prapa spolem moa long 90 pesen blong taon mo i livim ol doti mo asis nomo i stap.
Long sot taem, taon ia we bifo oli singaotem Jewel Bokis, i lus wantaem. Erik Kasna, wan man Jemani, i raet abaot taem ia: “I tekem taosen yia blong bildim naes ples ia, be long wan naet, hem i lus evriwan.”1 Taem mi smol, mi no save luk hao wo we i prapa spolem samting, mo pipol blong mifala i statem, bae i finis wan taem. Wol raon long yumi i no gat hop, i no gat fiuja.
I no longtaem i pas, mi gat janis blong gobak long Dresden. Seventi yia afta long wo, hem i kam bakegen “Jewel Bokis” blong taon ia. Oli kliarem ol doti ia, mo bildimbak taon ia mo i kam gud moa.
Las yia, long visit blong mi, mi luk naes Luteran Jos, Frowenkeje, Jos blong Ledi blong Yumi. Oli bildim faswan long ol yia 1700, mo i wan naes jewel blong Dresden, be wo i daonem i kam doti nating. Blong plante yia, i stap olsem, kasem taem we oli disaed blong bildimbak Frowenkeje.
Oli tekem samfala ston blong olfala jos we oli save yusum mo oganaesem bakegen, mo taem i posibol oli yusum blong bildimbak niufala jos. Tedei, bae yu save luk ol blak ston we faea i bonem oli stap olsem mak long wol. Ol “mak” ia oli no mekem yumi tingbaot wo histri blong bilding ia, be tu, i wan bilding blong hop—bigfala saen blong wanem man i save mekem blong krietem niu laef aot long asis.
Mi tingting hevi long histri blong Dresden mo sapraes long waes mo strong tingting blong olgeta we oli bildimbak wanem we i bin brokbrok nogud evriwan; mi filim Tabu Spirit i lidim tingting blong mi. Mi tingting, i tru, sapos man i save tanem doti, hafhaf samting blong wan taon we i brokbrok evriwan mo i bildim i kam wan naesfala bilding bakegen we i go from heven, ?bae hamas moa nao Papa we I Gat Olgeta Paoa bae i save mekem blong karembak ol pikinini blong Hem we oli bin foldaon, oli bin traehad o oli bin go lus?
I nomata se laef blong yumi i go rong olsem wanem. I no impoten tumas se sin blong yumi i doti olsem wanem, se konkon i bigwan hamas, se yumi stap yumiwan, o hat i brok hamas. Iven olgeta we oli no gat hop, we oli laef wetem trabol tingting, we oli salem yumi, we oli salem tru fasin blong olgeta, o tanem olgeta agensem God, oli bildimap olgeta bakegen. I no gat laef we i nogud tumas blong Hem i bildimbak, be hemia blong samfala pikinini blong tudak nomo, i no save mekem.
Glad nius blong gospel i we: from plan we i no save finis blong stap glad, we Papa long Heven i givim, mo tru long Atonmen blong Jisas we i Kraes, Hem i save pemaot yumi long ples we yumi foldaon long hem mo mekem yumi kam klin gud bakegen, be tu, yumi save progres i go bitim wanem man i save tingting long hem mo kasem laef we i no save finis wetem Hem mo kam pat long bigfala glori blong God.
Parabol blong Sipsip we I Lus
Long taem blong seves blong Sevya, ol lida blong relijin blong taem blong Hem oli no agri se Jisas i stap spendem taem wetem ol pipol we oli singaotem “ol man blong sin.”
Ating se long olgeta, i olsem se Hem i letem, o i sarem ae long fasin we i sin. Ating oli biliv se bes wei blong helpem ol man blong sin blong sakem sin i blong panisim, daonem, mo mekem olgeta oli sem.
Taem Sevya i kasem wanem we ol Farasi mo ol tija blong loa oli stap tingting long hem, Hem i talem wan simpol stori nomo:
“Hu long yufala we i gat handred sipsip blong hem mo wan long olgeta i lus be hem i no tingbaot? Sapos wan long yufala i lusum sipsip blong hem olsem, bambae hem i mas livim ol naentinaen sipsip blong hem, oli stap kakae long open ples, nao hem i mas go lukaot sipsip ia we i lus, gogo i faenem.
“Mo taem i faenem sipsip ia, bambae hem i glad tumas, i mas leftemap sipsip ia blong karem long solda blong hem.”2
Ova long plante handred yia, parabol ia oli talem mining blong hem nomo se i wan singaot blong yumi tekembak sipsip we i lus mo go aot long olgeta we oli lus. Hemia i stret mo gud, ?be mi askem se i gat moa long hemia?
?Olsem wanem? ?I posibol se stamba tingting blong Jisas, faswan nao i blong tij abaot wok blong Gudfala Man blong Lukaot long Sipsip?
?I Posibol se Hem i stap testifae abaot lav we God i gat long ol pikinini blong Hem we oli lusum rod?
?I posibol se mesej blong Sevya i we God i save gud olgeta we oli lus—se bae Hem i faenem olgeta, bae i go aot i lukaotem olgeta mo bae i sevem olgeta?
Mo sapos i olsem, ?wanem nao sipsip i mas mekem blong kwalifae from tabu help ia?
?Bae sipsip i nidim blong save hao blong yusum hadwok tul blong kalkuletem ples we wan i stap long hem? ?I nid blong save yusum wan GPS blong faenem ples we hem i stap long hem? ?I nid blong hem i gat save blong krietem wan program we bae i singaot from help? ?Sipsip ia i nidim blong wan pablik sponsa i apruvum hem fastaem blong Gudfala Man blong Lukaot long Sipsip i kam blong sevem hem?
No. !Nogat! Sipsip i save kasem help we i kam long heven from nomo Gudfala Man blong Lukaot long Sipsip i lavem Hem.
Long mi, parabol blong sipsip we i lus i wan stori long evri skripja we i gat moa hop long hem.
Sevya blong yumi, Gudfala Man blong Lukaot long Sipsip i save yumi mo i lavem yumi. Hem i save yu mo i lavem yu.
Hem i save taem yu yu lus, mo Hem i save weples yu stap long hem. Hem i save harem nogud blong yu, ol saelen prea blong yu, ol fraet blong yu, ol wota blong ae blong yu we i ron.
I nomata olsem wanem yu mekem nao yu go lus—sapos i from nogud joes blong yu, o from situesen we yu no gat kontrol long hem.
Wanem i impoten i we yu yu pikinini blong Hem. Mo Hem i lavem yu. Hem i lavem ol pikinini blong Hem.
From se Hem i lavem yu, bambae Hem i faenem yu. Bae Hem i glad mo karem yu long ol solda blong Hem. Mo taem Hem i tekem yu i gobak hom, bae Hem i talem long wan mo long evriwan: “Yufala i kam joen wetem mi, yufala i glad wetem mi from mi mi faenem sipsip ia blong mi we i lus.”3
?Wanem Nao Yumi Mas Mekem?
Maet bae yu tingting, ?bae mi mekem wanem? Yes, mi mas mekem moa bitim blong stap wet se bae oli kam sevem mi.
Nomata Papa we i gat lav i wantem evriwan long ol pikinini blong Hem blong gobak long Hem, be bae Hem i no fosem wan blong go long heven.4 God bae i no sevem yu sapos yu no wantem.
?So bae yumi mas mekem wanem?
Invitesen blong Hem i simpol nomo:
“Tanem yu i kam long mi.”5
“Kam long mi.”6
“Kam kolosap long mi mo bambae mi kam kolosap long yufala.”7
Olsem ia nao yumi stap soem Hem se yumi wantem blong oli kam sevem yumi.
I nidim smol fet. Be yufala i no givap. Sapos yu no save gat fet naoia, stat wetem hop.
Sapos yu no save talem se yu save se God i stap, yu save hop se Hem i stap. Yu save wantem blong biliv.8 Hem i inaf blong stat wetem.
Afta, taem yu tekem aksen folem hop ia, prea long Papa blong yumi long Heven. God bae i sendem lav blong Hem i kam long yu, mo wok blong sevem yu mo jenisim yu bae i stat.
Wetem taem, bae yu luksave han blong Hem long laef blong yu. Bae yu filim lav blong Hem. Mo hat blong wantem wokbaot long laet blong Hem mo folem ol wei blong Hem bae i gro wetem evri step blong fet we yu mekem.
Yumi singaotem ol step blong fet ia “fasin blong stap obei.”
I no wan popula toktok blong tedei. Be fasin blong stap obei i wan poen we oli holemtaet gud insaed long gospel blong Jisas Kraes, from se yumi save se “tru long Atonmen blong Kraes, Hem i sevem evri kaen man, tru long fasin blong obei long ol loa mo ol odinens blong Gospel.”9
Taem yumi stap kam antap long fet, yumi mas kam antap tu long fasin blong stap fetful. Mi bin talem toktok blong wan man Jemani we i tokbaot hao oli prapa spolem Dresden. Hem i raetem tu toktok ia: “Es gibt nichts Gutes, ausser: Man tut es.” Yufala we i no toktok long selestial lanwis ia, hem i minim “I no gat wan gud samting sapos yu no mekem.”10
Yu mo mi i tokbaot ol samting long saed blong spirit. Maet yumi sapraesem pipol wetem waes fasin blong talem mining blong ol topik blong relijin. Yumi stap tokbaot relijin mo “drim long haos antap.”11 Be sapos fet blong yumi i no jenisim wei we yumi stap laef long hem—sapos bilif blong yumi i no lidim ol evri dei desisen blong yumi—relijin blong yumi i nating, mo fet blong yumi i ded, mo i no stap gud mo i stap long denja blong i go flat gud.12
Fasin blong stap obei i laefblad blong fet. Tru long fasin blong stap obei yumi stap pulum laet long sol blong yumi.
Be samtaem, mi ting se yumi no andastanem gud fasin blong stap obei. Yumi luk se fasin blong obei i risal ia nao, be yumi no luk se i rod blong kasem risal. O yumi save hamarem fasin blong stap obei long aean blong ol komanmen blong sepem olgeta we yumi lavem, tru long fasin blong hotem mo hitim hem go kasem i kam wan we i tabu, we i blong heven.
I tru se i gat sam taem we yumi mas tok strong mo singaot blong man i sakem sin. I tru, i gat samfala we oli lanem samting long wei ia nomo.
Be maet i gat wan defren toktok we i save eksplenem from wanem yumi stap obei long ol komanmen blong God. Maet fasin blong stap obei i no rod ia blong benem, twistim, mo hamarem sol blong yumi i kam samting we i no yumi. Be, i rod ia we yumi stap faenemaot se oli mekem yumi wetem wanem.
God we i Gat Olgeta Paoa i krietem yumi. Hem i Papa blong yumi long Heven. Yumi stret spirit pikinini blong Hem. Hem i mekem yumi wetem ol samting we i gat paoa, i sas, i spesel, mo from hemia, yumi karem insaed long yumi wanem we i hae tumas.
Be long wol ia, ol tingting mo ol aksen blong yumi oli kam fasfas wetem wanem we i doti, i no tabu, i no klin. Das mo doti blong wol blong sin i makem sol blong yumi, i mekem i had blong luksave mo tingbaot raet blong laen blong yumi mo from wanem yumi stap.
Be evri samting ia i no save jenisim huia stret yumi. Stamba hae fasin blong yumi i stap nomo. Mo taem yumi jusum blong tanem hat blong yumi long Sevya we yumi lavem, mo putum leg long rod blong stap olsem disaepol, wan merikel samting i hapen. Lav blong God i fulumap hat blong yumi; laet blong trutok i fulumap maen blong yumi; yumi stat blong lusum tingting blong mekem sin; mo yumi no wantem wokbaot bakegen long tudak.13
Yumi kam blong luk fasin blong stap obei, i no olsem wan panismen, be olsem wan rod we i mekem yumi fri blong kasem heven. Mo sloslo, korapsen, das, mo ol samting we oli blokem yumi long wol ia i stat blong go lus. Long en, spirit ia we i no gat praes mo i no save finis we i stap insaed long yumi i kamaot, mo yumi saen long gud fasin we i kam fasin blong yumi.
Yu Inaf blong Oli Sevem Yu
Ol brata mo sista. Mi testifae se God i luk yumi olsem we yumi stap—olsem we yumi stap tru—mo Hem i luk se yumi inaf blong Hem i sevem yumi.
Maet yu filim se laef blong yu i nogud evriwan. Maet yu sin. Maet yu fraet, kros, stap krae, o trabol long ol tu tingting. Be semmak olsem Man blong Lukaot long Sipsip i faenem sipsip blong Hem we i lus, sapos yu leftemap hat blong yu i go long Sevya blong wol, bae Hem i faenem yu.
Bae Hem i sevem yu.
Bae Hem i leftemap yu mo karem yu antap long solda blong Hem.
Bae i tekem yu i gobak hom.
Sapos han blong man long wol i save tanem doti i kam wan naes haos blong wosip, nao yumi save trastem se God we yumi lavem, i save mo bambae i bildimbak yumi. Be i moa bitim wan projek blong putumbak samting. Plan blong Hem i blong bildimap yumi i kam wan samting we i gud moa bitim bifo—i moa gud evriwan bitim wanem yumi tingting long hem. Wetem evri step blong fet long rod blong stap olsem disaepol, yumi gro blong kam ol man wetem glori we i no save finis mo glad we i no gat en we oli putum plan blong yumi kam olsem.
Hemia i no testemoni blong mi nomo, be tu, i prea blong fet blong mi wetem tingting i stap daon, long nem blong Jisas Kraes, amen.