Putum Tras Blong Yu long Spirit Ia we I Lidim Man blong Mekem Gud
Yumi stap groap i kam kolosap moa long Sevya taem we, wetem klin lav, yumi givhan long ol narawan long bihaf blong Hem.
Mi glad tumas blong stap wetem yufala long dei ia blong wosip, tingting, mo komitmen. Yumi bin prea tugeta. Papa blong yumi long Heven i harem yumi. Yumi bin tingbaot Sevya blong yumi, Lod Jisas Kraes, mo ol hym blong pres long Hem oli tajem hat blong yumi. Yumi kasem insperesen blong mekem moa blong helpem Masta blong yumi long wok ia blong Hem blong leftemap mo helpem ol pikinini blong Papa blong yumi long Heven.
Yumi wantem givhan long ol narawan mo hemia i kam bigwan moa from wanem we Sevya i bin mekem long yumi. From hemia nao hat blong yumi i solap taem yumi harem ol toktok ia we oli singsing: “From se mi kasem plante, mi tu, mi mas givim.”1 King Benjamin, long tabu tok blong hem long Buk blong Momon, i bin promesem filing ia blong talem tangkyu (luk long Mosaea 2:17–19).
Taem fet blong yumi long Jisas Kraes i stap lidim yumi blong kwalifae from glad blong fogivnes blong Hem, yumi wantem blong helpem ol narawan long bihaf blong Hem. King Benjamin i tijim se fasin blong fogiv i no hapen wantaem nomo olsem.
Hem i talem long wei blong hem: “Mo nao, from ol samting ia we mi bin talemaot long yufala—hem i, from long saed blong holemtaet fasin blong kam klin aot long ol sin blong yufala long wan dei i go long narafala dei, blong mekem se yufala i no wokbaot wetem no gat rong long fes blong God—mi wantem se bae yufala i serem ol samting blong yufala long olgeta pua, evri man folem samting we hem i gat, olsem givim kakae long olgeta we oli hanggri, putum klos long olgeta we oli neked, go luk ol sik man mo givhan long olgeta blong mekem se oli harem gud, tugeta, long saed blong spirit, mo long saed blong wol, folem ol samting we oli wantem.”(Mosaea 4:26).
Gudfala kompanion blong Alma, Amulek, i tijim trutok ia se yumi mas gohed blong wok long Lod blong holemtaet fogivnes: “Mo nao luk, ol brata blong mi we mi lavem tumas, mi talem long yufala, yufala i no mas ting se hemia nomo; from afta we yufala i mekem evri samting ia, sapos yufala i tanem baksaed blong yufala long olgeta we oli gat nid, mo olgeta we oli neked, mo no visitim olgeta we oli sik mo olgeta we oli gat hadtaem, mo no serem ol samting blong yufala sapos yufala i gat, long olgeta we oli stap long nid—mi talem long yufala, sapos yufala i no mekem wan long ol samting ia, luk, prea blong yufala i blong nating nomo, mo i no gat yus long yufala, mo yufala i olsem ol man we oli gat tufes we oli tanem baksaed long fet” (Alma 34:28).
Mi tingting tedei long ol woman long laef blong mi. I gat 31 woman mo gel long famli blong mifala, stat wetem waef blong mi i go kasem ol tri niu smol apugel blong mitufala. Sam oli stap ia tedei. Faef oli no kasem 12 yia yet. Ating hemia i fas miting blong olgeta long Konfrens Senta wetem ol sista blong Jos blong Sevya. Wanwan bae i tekem wan defren set blong memori mo mekem ol komitmen blong olgetawan aot long eksperiens ia tedei.
I gat trifala memori mo trifala komitmen we mi prea se bae i stap wetem olgeta long laeftaem blong olgeta mo afta tu. Ol memori oli ol filing. Mo ol komitmen oli ol samting blong mekem.
Filing we i impoten moa, hem i lav. Yu bin filim lav blong ol gudfala sista lida ia we oli bin toktok finis. Mo yu bin filim tru long Spirit we oli lavem yu nating oli no save yu, from se oli filim lav we Papa long Heven mo Sevya i gat long yu. From hemia oli wantem tumas blong wok blong yu mo mekem yu kasem ol blesing we God i wantem blong yu.
Yu bin filim lav long ol narawan tedei—long ol fren, ol skul fren, ol neiba mo wan we i jes kam long laef blong yu, wan strenja. Filing blong lav ia i wan presen we i kam long God. Ol skripja oli singaotem hemia “jareti” mo “stret lav blong Kraes” (Moronae 7:47). Yu bin filim lav ia tedei, mo yu save kasem hamas taem yu lukaotem.
Wan seken filing yu bin gat tedei, i Tabu Spirit we i lidim tingting blong yu. Ol sista oli promesem yu tedei se Tabu Spirit bae i lidim yu blong faenem seves ia we Lod i wantem yu givim long ol narawan long bihaf blong Hem. Yu bin filim, tru long Spirit, se promes blong olgeta i kam long Lod mo hemia i tru.
Lod i talem: “Mo nao, i tru, i tru, mi talem long yu, putum tras blong yu long Spirit ia we i lidim man blong mekem gud—yes, blong mekem samting i stret, blong wokbaot wetem tingting we i stap daon, blong yumi mekem stret jajmen; mo hemia i Spirit blong mi.” (Luk long D&C 11:12).
Maet yu kasem blesing ia tedei. Eksampol, nem o fes blong wan we i stap long nid i kam long maen blong yu long taem blong miting ia. Maet i wan tingting we i flae pas nomo, be from samting we yu harem tedei, bae yu prea from, mo trastem se God bae i lidim yu blong mekem gud samting we Hem i wantem blong olgeta. Taem ol prea olsem oli kam wan paten long laef blong yu, yu mo ol narawan bae i jenis long gud saed.
Nambatri filing we yu gat tedei i we yu wantem stap kolosap moa long Sevya. Iven gel we i moa yangfala long ples ia i bin filim se invitesen blong singsing ia i tru: “Kam folem mi, Sevya i talem. Bae yumi folem eksampol blong Hem.”2
So, wetem ol filing ia, fas samting yu komitim yu blong mekem, i blong go mo givim seves, mo save se yu no stap yuwan. Taem yu go blong kamfotem mo helpem eniwan long nem blong Sevya, Sevya i mekem rod i rere blong yu. Nao, olsem we ol riten misinari we oli stap ia tedei bae oli save talem long yu, hemia i no minim se evriwan biaen long evri doa bae oli rere blong welkamem yu, o evriwan yu traem blong givhan bae i talem tangkyu. Be Lod bae i go fastaem long yu blong mekem rod i rere.
Plante, plante taem, Presiden Tomas S. Monson i talem se hem i save se promes blong Lod i tru: “Mo long weaples we eniwan i akseptem yufala, ples ia bae mi stap long hem tu, from we bambae mi go long fored blong yufala. Bambae mi stap long raet han blong yufala, mo long lef blong yufala, mo Spirit blong mi bambae i stap insaed long hat blong yufala, mo ol enjel blong mi oli stap raonem yufala, blong sapotem yufala.” (Luk long D&C 84:88).
Wan long ol wei we Hem i go fastaem long yumi i taem Hem i mekem rere hat blong wan we Hem i askem yu blong givhan. Bae Hem i mekem hat blong yu tu i rere from.
Bae yu luk se Lod i putum sam pipol blong help long saed blong yu— long raetsaed blong yu, mo long lefsaed blong yu, mo raon long yu evriwan. Yu no stap go yuwan blong givhan long ol narawan long bihaf blong Hem.
Hem i mekem hemia blong mi tedei. Lod i putum “ol witnes blong hem … oli stap raonabaot long yumi we oli plante we plante” (Hibrus 12:1), long toktok mo miusik, blong oli joen mo dabdabolem paoa blong wanem Hem i wantem mi blong talem. Mi mas meksua nomo se mi save fitim pat blong mi insaed long wok blong Hem. Mi hop mo prea we bae yu filim hat blong talem tangkyu mo glad taem Lod i putum yu tugeta wetem ol narawan blong givim seves long bihaf blong Hem.
Olsem we yu gotru long hem plante, mo bambae yu smael wetem fasin blong luksave, semmak olsem mi, taem yumi singsing, “Wok ia i swit.”3
Bae yu smael taem yu tingbaot ves ia: “Nao [King] i talem long olgeta se: ‘Tru mi talem long yufala, taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.’” (Matiu 25:40).
Seken samting we yu mas mekem, i blong tingbaot Lod taem yu go mekem seves long bihaf blong Hem. Lod i no stap go fastaem long yufala mo sendem ol enjel blong wok wetem yumi, be tu, Hem tu i filim kamfot ia we yu givim long ol narawan semmak olsem yumi givim long Hem.
Evri gel blong God we i harem mo bilivim ol mesej blong miting ia bae i askem: “?Bae Lod i mekem mi mekem wanem blong helpem Hem blong helpem olgeta long nid?” Situesen blong wanwan sista i defren. Hemia tu i semmak long smol grup blong ol gel, aeneli, apugel mo smol apugel blong mi. Long olgeta, mo long evriwan long ol gel blong Papa long Heven, mi ripitim waes kaonsel ia blong Sista Linda K. Beton.
Hem i askem yu blong prea wetem fet blong save wanem Lod bae i wantem yu mekem long situesen blong yu. Mo afta, hem i givim yu promes blong swit kamfot we Lod Hemwan i bin givim long woman ia we oli bin tokbaot nogud hem from i putum sas oel long hed blong Kraes, be hem i save salem blong helpem olgeta we oli pua.
“Mo Jisas i talem se ‘Ei, !Yufala i livim woman ia! ?From wanem yufala i stap spolem hem? Hem i mekem wan gudfala samting long mi ia.
“Ol puaman bambae oli stap oltaem wetem yufala. Mo sapos yufala i wantem, oltaem yufala i save mekem i gud long olgeta. Be mi, bambae mi no save stap oltaem wetem yufala.
“Woman ia i mekem wan samting we hem i naf blong mekem. Hem i kapsaetem senta ya long bodi blong mi blong mekem mi mi rere blong oli berem mi.
“Tru mi talem long yufala, long evri ples long wol we bambae oli talemaot gud nius blong mi, be bambae oli mas tokbaot samting ia we woman ia i mekem, blong tingbaot hem bakegen.” (Mak 14:6–9).
Sotfala skripja ia, i swit mo waes kaonsel long ol fetful sista long Kingdom blong Lod long wan taem blong trabol. Bae yu prea blong save huia Papa i wantem yu blong wok from wetem lav long Hem mo long Sevya. Mo bae yu no ting o wantem wan pablik fenerol, folem eksampol blong woman ia long stori blong Buk blong Mak, we tabu wok blong woman ia blong ona long Sevya blong wol, man i tingbaot, be man i no tingbaot nem blong hem.
Hop blong mi i we ol sista long famli blong mifala bae oli mekem evri samting we oli save mekem wetem lav long God blong givhan long olgeta long nid. Mo nambatri samting we mi hop se bae oli mekem, hem i blong wanwan i no flas long ol gudfala wok blong hem. Yet, bae mi prea se bae oli akseptem advaes blong Lod, taem Hem i talem, mo mi save se yumi evriwan i nid blong harem:
“Ol fasin we yufala i mekem blong ona long God, i nogud yufala i mekem long fes blong ol man, blong oli lukluk yufala. Sapos yufala i stap mekem olsem, bambae Papa blong yufala we i stap long heven, hem i no save givim pei long yufala from.”
Mo afta Hem i talem:
“Be sapos yu givim samting long puaman blong givhan long hem yu mas mekem, olsem we lef han blong yu i no save samting we raet han blong yu i mekem.
“Yu mas haedem ol gudfala fasin ia blong yu, blong ol man raonabaot long yu oli no luk. Nao papa blong yu we i save luk ol samting ia, hem bambae i givim pei long yu from.” (Matiu 6:1, 3–4).
Prea blong mi from ol sista long kingdom, long weaples oli stap long hem, mo situesen, i we fet blong olgeta long Sevya mo Atonmen blong Hem bae i lidim olgeta blong mekem evri samting we oli save mekem long olgeta we Lod God i askem blong givhan long olgeta. Taem oli mekem olsem, mi promes se bae oli muv fored long rod ia blong kam tabu woman, we Sevya mo Papa long Heven bae i givim pei long olgeta.
Mi testifae se hemia i Jos blong Jisas Kraes we i laef bakegen long ded. Hem i girap long ded. Hem i pem praes from evri sin blong yumi. Mi save hemia; from Hem bae yumi laef bakegen long ded mo save gat laef we i no save finis. Presiden Tomas S. Monson i profet blong Hem we i stap laef. Papa long Heven i stap harem mo ansarem ol prea blong yumi. Mi witnes se bae yumi stap groap i kam kolosap moa long Sevya taem we, wetem klin lav, yumi givhan long ol narawan long bihaf blong Hem. Mi livim wetem yufala tru mo stret witnes ia long nem blong Jisas Kraes, amen.