Ol Famli Kaonsel

Ol brata mo sista blong mi. Fani samting blong stap olsem papa mo mama, i we, yumi stap kam gud long wok ia afta nomo we ol pikinini oli kam bigwan finis. Bae mi serem wetem yufala tedei, sam samting we sapos mi bin andastanem gud moa taem Barbra mo mi i stat lukaotem ol pikinini blong mitufala.

Long seves blong mi olsem Aposol, plante taem mi tokbaot bigwan paoa mo olsem wanem i impoten blong gat Jos kaonsel, olsem misin, stek, wod mo okseleri kaonsel.

Mi biliv se ol kaonsel oli wei we i moa gud blong kasem ril risal. Antap long hemia, mi save se kaonsel miting i fasin blong wok blong Lod, mo Hem i bin krietem evri samting long yunives tru long wan kaonsel long heven, olsem we oli raetem i stap long ol tabu skripja.¹

Be kasem naoia, mi neva tokbaot, long wan jeneral konfrens long saed blong kaonsel ia we i besik mo i stamba—mo i moa impoten aot long evri kaonsel, we hem i: famli kaonsel.

Nid ia blong gat famli kaonsel i bin stap mo i stap oltaem. Wanem we i tru, i we, oli blong taem we i no save finis. Yumi pat blong wan famli kaonsel long laef bifo laef long wol ia, taem yumi bin laef wetem papa mo mama blong yumi long Heven olsem spirit pikinini blong tufala.

Wan famli kaonsel, taem oli lidim wetem lav mo ol fasin olsem hemia blong Kraes, bae i go agensem teknoloji blong tedei, we, plante taem, i pulumaot yumi blong spendem kwaliti taem wetem wanwan long yumi, mo tu, i stap tekem devel i kam stret insaed long hom blong yumi.

Plis tingbaot se famli kaonsel i defren long famli haos naet we oli stap holem long ol Mandei. Famle Haos Naet i lukluk faswan blong tijim gospel mo gat famli aktiviti. Famli kaonsel, long nara saed, oli save holem eni dei long wik, mo i wan miting we papa mo mama i lisin—long wanwan long tufala mo long ol pikinini.

Mi biliv se i gat fo kaen famli kaonsel:

Faswan, wan jeneral famli kaonsel we i tekem ful famli.

Sekenwan, wan eksekutiv famli kaonsel we i gat mama mo papa nomo.

Nambatri, wan smol famli kaonsel we i gat papa, mama mo wan pikinini.

Nambafo, wan tutu famli memba kaonsel we i gat papa o mama, wetem wan pikinini.

Long evri famli kaonsel ia, oli mas ofem evri lektronik tul, blong mekem se evriwan i save lukluk mo lisin long wanwan long olgeta. Long taem blong famli kaonsel mo long ol nara taem we i stret, yu save gat wan basket i stap blong putum evri lektronik tul insaed taem famli i kam tugeta, mo i blong evriwan—wetem papa mo mama tu—we oli putum ol telefon, tablet, mo MP3 pleya insaed long basket ia. Afta, kaonsel i save stat mo i no gat temtesen blong ansa long Fesbuk, ansa long teks, long Instagram, long Snapchat o long imel.

Bae mi serem smol wetem yufala olsem wanem wanwan kaen famli kaonsel ia i save wok.

Faswan, ful famli kaonsel i tekem evri memba blong famli.

Smol buklet blong Jos, Famli blong Yumi, i talem: “Kaonsel ia i save mit blong toktok raon long ol famli problem, fasin blong yusum mane, mekem ol plan, sapotem mo mekem wanwan i kam strong, mo prea from wanwan long yufala, mo from famli yunit.”²

Kaonsel ia i mas mit long wan taem we oli putum finis, mo i no strong bitim eni nara kaen famli kaonsel.

I stat wetem wan prea, o i save stap olsem wan storian we oli statem finis long wan nara ples. Plis tek not se famli kaonsel, samtaem oli no statem o endem long wan semfala wei.

Taem papa mo mama oli rere mo pikinini i lisin mo tekpat long storian, !famli kaonsel i stap wok tru!

Nomata wanem situesen blong famli, hem i impoten blong yumi andastanem situesen blong wanwan memba blong famli. Nomata blad blong yumi i semmak, i gat ol situesen long medel blong yumi we i mekem wanwan long yumi i defren long narawan, mo i nidim lav mo sore blong ful famli kaonsel blong wok tugeta.

Eksampol, evri toktok mo lav long wol bae i no stretem wan helt problem o wan problem blong filing we wan o moa long wan memba blong famli i fesem. Long taem olsem, famli kaonsel i kam wan ples blong yuniti, fasin blong stap tru mo sapot wetem lav, mo semtaem, oli go lukaotem help long nara ples blong kasem sam ansa.

Ol brata mo ol sista, speseli olgeta we oli bigwan, oli save stap olsem ol strong tija long ol yang pikinini sapos papa mo mama oli yusum famli kaonsel blong yusum help mo sapot blong olgeta long ol taem we i had mo i strong.

Long wei ia, wan famli i olsem wan wod. Taem bisop i yusum ol memba blong kaonsel, hem i save stretem ol problem, mo mekem plante gud i hapen long ol wei we bae hem i neva save mekem sapos i no gat help. Long semfala wei, papa mo mama, oli nidim blong yusum evri memba blong famli blong lukluk long ol jalenj mo wanem i kam agens. Long wei ia nao oli putum paoa blong famli kaonsel i wok. Taem ol memba blong kaonsel oli filim se oli pat blong wan desisen, oli kam ol sapota mo sam stret gudfala samting i save hapen.

I no evri famli kaonsel i gat tufala, papa mo mama, wetem ol pikinini. Famli kaonsel blong yu i luk defren long famli kaonsel blong mifala taem mitufala i stap lukaotem seven pikinini blong mifala. Tedei, famli kaonsel i Barbra mo mi; samtaem nomo mifala i holem wan famli kaonsel we i tekem ol adalt pikinini, hasban mo waef blong olgeta, mo samtaem ol apupikinini mo ol smol apupikinini.

Olgeta we oli singgel, mo tu, olgeta studen we oli stap longwe long hom, oli save folem tabu kaonsel fasin ia taem oli kam tugeta wetem ol fren mo ol fren we oli serem rum wetem, blong oli kaonsel tugeta.

Tingting se ples long apatmen bae i jenis sapos ol fren we oli serem rum oli kam tugeta long wik blong prea, lisin, toktok raon mo planem ol samting tugeta.

Evriwan i save stretem famli kaonsel blong tekem evri gud samting aot long tabu fasin ia we Papa blong yumi long Heven we i gat lav i putum i stap.

Olsem we mi talem fastaem, wanwan taem, i nid blong gat wan bigfala famli kaonsel. Wan bigfala famli kaonsel i save gat ol bubu, mo ol bigfala pikinini we oli nomo stap long haos. Iven sapos ol bubu mo ol bigfala pikinini oli laef longwe, oli save tekpat long famli kaonsel tru long telefon, Skype o FaceTime.

Yu save tingting blong holem jeneral famli kaonsel long Sandei, we i fas dei blong wik. Ol famli oli save luklukbak long wik we i pas, mo mekem plan long wik we i stap kam. Maet hem i hemia nao we famli blong yu i nidim blong help blong mekem Sabat i wan glad taem.

Nambatu kaen famli kaonsel i wan eksekutiv famli kaonsel we i tekem papa mo mama nomo. Long taem tugeta ia, papa mo mama i save luklukbak long nid blong wanwan pikinini long saed blong helt, filing mo spirit mo progres blong olgeta.

Eksekutiv famli kaonsel i wan gud taem tu blong waef mo hasban i tokbaot rilesensip blong tufala. Taem Elda Harol B. Li i mekem siling blong mitufala, hem i tijim wan prinsipol we mi biliv se i save helpem evri kapol. Hem i talem: “Neva slip sapos yutufala i no nildaon tugeta, holem han blong yutufala, mo talem prea blong yutufala. Ol prea olsem i invaetem Papa long Heven blong kaonsel wetem yumi tru long paoa blong Spirit.”

Nambatri kaen famli kaonsel i wan smol famli kaonsel. Long ples ia, papa mo mama i spendem taem wetem wan pikinini long eni kaen taem. Hem i wan janis blong storian, blong mekem desisen fastaem abaot ol samting we bae hem i mekem o no mekem long fiuja. Taem oli mekem ol desisen, ol pikinini oli save raetemdaon blong lukluk long hem afta sapos i nid. Sapos boe o gel blong yu i luk se yu givim strong sapot, kaonsel miting ia i save setemap ol gol mo stamba tingting blong fiuja. Hem i wan taem tu blong lisin gud long bigfala tingting mo jalenj we wan pikinini i save fesem, olsem no gat tras long hemwan, abius, fos blong fren o fraet.

Nambafo kaen famli kaonsel i wan tutu famli kaonsel we i gat papa o mama mo wan pikinini. Kaen famli kaonsel ia i stap hapen eni taem. Eksampol, papa o mama mo pikinini i save mit eni ples, olsem ron long trak, o wok raon long haos. Wan taem aot wetem wan pikinini wetem papa o mama i save givim wan spesel taem blong joen tugeta long saed blong spirit mo long saed blong filing. Mekem plan blong gat ol taem olsem blong ol pikinini oli wet mo luk fored from ol spesel taem we oli stap olgetawan wetem Papa o Mama.

Naoia ol brata mo sista. I bin gat wan taem we ol wol blong haos blong yumi oli bin naf blong difendem yumi agensem wol mo paoa blong aotsaed. Yumi bin lokem doa, klosem ol windo, mo sarem ol get, mo yumi bin filim sef, mo gat proteksen insaed long smol ples blong haed long wol aotsaed.

Taem ia i pas finis. Ol wol, doa, fanis mo get blong hom blong yumi oli no save stopem nara samting we i kam long Intanet, Wi-Fi, mo mobaelfon, mo ol netwok. Oli save kam insaed long hom blong yumi wetem sam klik o prestem baten.

Laki, Lod i givim wan rod blong fesem o agensem ol nogud saed blong teknoloji we i save pulumaot yumi blong spendem kwaliti taem wetem wanwan long yumi. Lod i mekem olsem taem Hem i givim kaonsel sistem blong mekem strong, blong protektem, blong putum long sef ples mo blong fidim ol rilesensip we oli moa impoten.

Ol pikinini oli nidim tumas wan papa mo mama we i wantem lisin long olgeta, mo famli kaonsel i save givim wan taem we ol memba blong famli oli save lanem blong andastanem mo lavlavem olgeta.

Alma i tijim: “Askem advaes long Lod long evri samting we yufala i mekem, mo bae hem i lidim yu blong mekem gud.”³ Invaetem Lod blong i pat blong famli kaonsel blong yufala tru long prea, hemia bae i mekem rilesensip bitwin yufala i kam antap. Wetem help blong Papa long Heven mo Sevya, yumi save stap wet longtaem, gat tingting, stap help, stap fogiv, mo andastanem man taem yumi prea from help. Wetem help blong Tufala, yumi save mekem hom blong yumi i olsem wan smol pis blong heven long wol ia.

Wan famli kaonsel i folem fasin blong ol kaonsel long heven, we i fulap long lav olsem hemia blong Kraes, mo Spirit blong Lod we i lid, mo i helpem yumi blong protektem famli blong yumi long ol samting we i save stilim taem blong yumi stap tugeta, mo samting we i save protektem yumi long ol devel blong wol.

Wetem prea, wan famli kaonsel i save invaetem Sevya i stap wetem yumi olsem we Hem i promesem: “long weples we tu no tri man oli joen wanples long nem blong mi, mi mi stap wetem olgeta.”⁴ Taem yumi invaetem Spirit blong Lod blong kam pat blong famli kaonsel blong yumi, i tekem ol blesing we toktok i no save tokbaot.

Laswan, plis tingbaot se wan famli kaonsel, oli holem oltaem, mo bae i helpem yumi blong faenem ol famli problem bifo oli kam bigwan; bae oli givim long wanwan memba blong famli wan filing se hem i impoten; mo antap long evri samting, bae ol kaonsel oli helpem yumi blong gat moa sakses mo stap hapi moa long ol rilesensip blong yumi, insaed long ol wol blong hom blong yumi. Bae Papa long Heven i blesem ol famli blong yumi taem yumi kaonsel tugeta, i prea blong mi wetem tingting we i stap daon, long nem blong Masta Jisas Kraes, amen.